Mga Batan-on​—Kab-ota ang mga Tumong nga Nagpasidungog sa Diyos

“Bansaya ang imong kaugalingon nga maoy tumong ang diyosnong pagkamahinalaron.”—1 TIMOTEO 4:7.

1, 2. (a) Nganong gidayeg ni Pablo si Timoteo? (b) Sa unsang paagi ang mga batan-on karon ‘nagbansay sa ilang kaugalingon nga maoy tumong ang diyosnong pagkamahinalaron’?

 “W ALA akoy lain nga may sama kaniyag tinamdan kinsa tiunay nga moatiman sa mga butang labot kaninyo. . . . Sama sa usa ka anak uban sa amahan siya nagpaulipon uban kanako sa pagpauswag sa maayong balita.” (Filipos 2:20, 22) Gilakip ni apostol Pablo kining mainitong komendasyon diha sa iyang sulat ngadto sa unang-siglong mga Kristohanon sa Filipos. Kinsa may iyang gitumong? Si Timoteo, ang iyang batan-ong kauban sa pagpanaw. Hunahunaa lang kon unsa ka makapadasig kang Timoteo kining kompirmasyon sa pagmahal ug pagsalig kaniya ni Pablo!

² Ang mahunahunaon-sa-espirituwal nga mga batan-on sama kang Timoteo mapuslanon gayod taliwala sa katawhan ni Jehova. (Salmo 110:3) Sa atong adlaw, ang organisasyon sa Diyos adunay daghang batan-on nga nag-alagad ingong mga payunir, misyonaryo, mga boluntaryo sa konstruksiyon, ug mga Bethelite. Dalayegon usab kaayo kadtong masibotong nakigbahin sa mga kalihokan sa kongregasyon samtang nag-atiman sa uban pang mga responsibilidad. Ang maong mga batan-on nakatagamtam ug tinuod nga katagbawan tungod sa ilang pagpangab-ot sa mga tumong nga nagpasidungog sa atong langitnong Amahan, si Jehova. Sila sa pagkatinuod ‘nagbansay sa ilang kaugalingon nga maoy tumong ang diyosnong pagkamahinalaron.’—1 Timoteo 4:7, 8.

3. Unsang mga pangutana ang hisgotan niining artikuloha?

³ Ingong batan-on, nagapangab-ot ka ba ug espesipikong espirituwal nga mga tumong? Asa ka man makakaplag ug tabang ug pagdasig sa pagkab-ot niana? Sa unsang paagi masuklan nimo ang mga pagpit-os niining materyalistikong kalibotan? Unsang mga panalangin ang imong madahom nga madawat kon imong kab-oton ang mga tumong nga nagpasidungog sa Diyos? Pangitaon nato ang mga tubag niining mga pangutanaha pinaagi sa pagkonsiderar sa kinabuhi ug buluhaton ni Timoteo.

Pipila ka Impormasyon Bahin ni Timoteo

4. Iasoy sa mubo ang kinabuhi ni Timoteo ingong Kristohanon.

⁴ Si Timoteo nagdako sa Listra, usa ka gamayng lungsod sa Romanhong probinsiya sa Galacia. Lagmit nakakat-on siya bahin sa Kristiyanidad sa tin-edyer pa siya sa dihang nagsangyaw si Pablo sa Listra sa mga 47 K.P. Si Timoteo dali rang nakabaton ug maayong reputasyon taliwala sa Kristohanong mga igsoon niadtong dapita. Pagbalik ni Pablo sa Listra duha ka tuig sa ulahi ug pagkasayod niya sa pag-uswag ni Timoteo, iyang gipili si Timoteo aron mahimong iyang kaubang misyonaryo. (Buhat 14:5-20; 16:1-3) Samtang nagkahamtong si Timoteo, gipiyalan siya ug mas dagko pang mga responsibilidad, lakip na ang hinungdanong buluhaton sa pagpalig-on sa mga igsoon. Sa dihang misulat si Pablo kang Timoteo gikan sa prisohan sa Roma sa mga 65 K.P., si Timoteo nag-alagad niadto ingong Kristohanong ansiyano sa Efeso.

5. Sumala sa 2 Timoteo 3:14, 15, unsang duha ka butang ang nakaimpluwensiya sa desisyon ni Timoteo sa pagkab-ot ug espirituwal nga mga tumong?

⁵ Dayag nga gipili ni Timoteo ang pagkab-ot ug espirituwal nga mga tumong. Apan unsay nagtukmod kaniya nga mangab-ot niana? Sa iyang ikaduhang  sulat kang Timoteo, gihisgotan ni Pablo ang duha ka butang. “Magpadayon ka sa mga butang nga imong nakat-onan ug nakakombinsir kanimo sa pagtuo,” misulat siya, “nga nahibalo kon kang kinsa nimo nakat-onan kini ug nga sukad pa sa pagkamasuso ikaw nahibalo na sa balaang mga sinulat.” (2 Timoteo 3:14, 15) Susihon una nato ang impluwensiya sa ubang mga Kristohanon diha sa mga pagpili nga gihimo ni Timoteo.

Pahimusli ang Maayong mga Impluwensiya

6. Unsang pagbansay ang nadawat ni Timoteo, ug unsay iyang sanong?

⁶ Si Timoteo gimatuto diha sa panimalay nga nabahin tungod sa relihiyon. Ang iyang amahan Grego, ug ang iyang inahan nga si Eunice, ug ang iyang apohan nga si Loida maoy mga Hudiya. (Buhat 16:1) Si Timoteo gitudloan ni Eunice ug Loida sa mga kamatuoran gikan sa Hebreohanong Kasulatan sukad pa sa iyang pagkamasuso. Human sila mahimong mga Kristohanon, sa walay duhaduha gitabangan nila si Timoteo nga makombinsir sa Kristohanong mga pagtulon-an. Tataw nga gipahimuslan gayod ni Timoteo kining maayo kaayong pagbansay. Si Pablo miingon: “Akong nahinumdoman ang imong pagtuo nga walay pagkasalingkapaw, ug nga sa sinugdan diha sa imong apohang babaye nga si Loida ug sa imong inahang si Eunice, apan ako masaligon nga kini anaa usab kanimo.”—2 Timoteo 1:5.

7. Unsang panalangin ang natagamtam karon sa daghang batan-on, ug sa unsang paagi nakahatag kinig kaayohan kanila?

⁷ Karon, bulahan ang daghang batan-on tungod kay nakabaton silag mahinadlokon-sa-Diyos nga mga ginikanan ug mga apohan kinsa, sama kang Loida ug Eunice, miila sa kahinungdanon sa espirituwal nga mga tumong. Pananglitan, mahinumdoman pa ni Samira ang tagdugay nga panag-estoryahay niya ug sa iyang mga ginikanan sa tin-edyer pa siya. “Gitudloan ako ni Mama ug Papa sa paghupot sa panglantaw ni Jehova sa mga butang ug sa paghimo sa buluhatong pagsangyaw nga akong prioridad,” matod pa niya. “Kanunay ko nilang dasigon nga himoong tumong ang bug-os-panahong pag-alagad.” Misanong si Samira sa mga pagdasig sa iyang mga ginikanan ug karon natagamtam niya ang pribilehiyo nga mag-alagad ingong membro sa pamilyang Bethel sa ilang nasod. Kon gidasig ka sa imong mga ginikanan sa pagsentro sa imong pagtagad sa espirituwal nga mga tumong, palandonga pag-ayo ang ilang tambag. Buot gayod nilang magmalipayon ka.—Proverbio 1:5.

8. Sa unsang paagi nakapahimulos si Timoteo sa makapalig-on nga Kristohanong panag-ubanay?

⁸ Hinungdanon usab nga mangita kag makapalig-ong panag-ubanay taliwala sa mga igsoon sa pagtuo. Si Timoteo nailhan kaayo sa Kristohanong mga ansiyano sa iyang kongregasyon ug nianang sa Iconio, nga mga 30 kilometros ang gilay-on. (Buhat 16:1, 2) Nahimo niyang suod nga higala si Pablo nga usa ka aktibo ug mapaagihon nga tawo. (Filipos 3:14) Ang mga sulat ni Pablo nagpaila nga si Timoteo madinawaton sa tambag ug dali rang mosundog sa mga panig-ingnan sa pagtuo. (1 Corinto 4:17; 1 Timoteo 4:6, 12-16) Si Pablo misulat: “Imong gisunod pag-ayo ang akong gitudlo, ang akong paagi sa pagkinabuhi, ang akong katuyoan, ang akong pagtuo, ang akong  hataas-nga-pailob, ang akong gugma, ang akong pagkamainantoson.” (2 Timoteo 3:10) Oo, si Timoteo nagsunod gayod sa panig-ingnan ni Pablo. Sa samang paagi, kon makigsuod ka sa mga igsoon sa kongregasyon nga lig-on sa espirituwal, matabangan ka sa pag-ugmad ug maayong espirituwal nga mga tumong.—2 Timoteo 2:20-22.

Tun-i ang “Balaang mga Sinulat”

9. Gawas sa pagpilig maayong mga kauban, unsay kinahanglan nimong buhaton aron ‘mabansay nimo ang imong kaugalingon nga maoy tumong ang diyosnong pagkamahinalaron’?

⁹ Ang pagpangab-ot ba sa espirituwal nga mga tumong maoy resulta lamang sa pagpilig maayong mga kauban? Dili. Sama kang Timoteo, kinahanglang mohimo ka ug mainampingong pagsusi sa “balaang mga sinulat.” Tingali dili ka ganahang magtuon, apan hinumdomi nga kinahanglang ‘bansayon ni Timoteo ang iyang kaugalingon nga maoy tumong ang diyosnong pagkamahinalaron.’ Ang mga atleta subsob nga magbansay pag-ayo sulod sa daghang bulan aron makab-ot ang ilang tumong. Sa samang paagi, aron makab-ot ang espirituwal nga mga tumong, gikinahanglan ang pagsakripisyo ug tim-os nga paningkamot. (1 Timoteo 4:7, 8, 10) Apan, mangutana ka tingali, ‘Sa unsang paagi ang pagtuon sa Bibliya makatabang kanako sa pagkab-ot sa akong mga tumong?’ Hisgotan nato ang tulo ka paagi.

10, 11. Nganong ang Kasulatan magtukmod kanimo sa pagkab-ot ug espirituwal nga mga tumong? Paghatag ug pananglitan.

¹⁰ Una, ang Kasulatan maghatag kanimo ug hustong panukmod. Gipadayag niini ang makapahinganghang personalidad sa atong langitnong Amahan, ang iyang kinalabwang pagpakita ug gugma kanato, ug ang walay-kataposang mga panalangin nga iyang itagana alang sa iyang matinumanong mga alagad. (Amos 3:7; Juan 3:16; Roma 15:4) Samtang mouswag ang imong kahibalo bahin kang Jehova, modako usab ang imong gugma kaniya ug ang imong tinguha nga ipahinungod ang imong kinabuhi kaniya.

¹¹ Daghang batan-ong Kristohanon ang nag-ingon nga ang regular nga pagtuon sa Bibliya hinungdanon kaayo sa pagtabang kanila nga modulot ang kamatuoran diha sa ilang kasingkasing. Pananglitan, si Adele gimatuto diha sa usa ka Kristohanong panimalay apan wala gayod siyay espirituwal nga mga tumong. “Ikuyog ko sa akong mga ginikanan sa Kingdom Hall,” matod pa niya, “apan wala akoy personal nga pagtuon ug dili sab ko mamati diha sa mga tigom.” Human mabawtismohi ang iyang magulang nga babaye, si Adele misugod sa tim-os nga pagtuon sa kamatuoran. “Gisugdan nako pagbasa ang enterong Bibliya. Mobasa kog pipila ka kapitulo ug unya isulat nako ang akong komento bahin sa akong nabasa. Naa pa gihapon karon ang tanan nakong mga nota. Nahuman nako pagbasa ang enterong Bibliya sa usa ka tuig.” Tungod niini, natukmod si Adele sa pagpahinungod sa iyang kinabuhi kang Jehova. Bisan pag aduna siyay grabeng depekto sa lawas, sa pagkakaron siya usa ka payunir, o bug-os-panahong tig-ebanghelyo.

12, 13. (a) Ang pagtuon sa Bibliya motabang sa usa ka batan-on sa paghimog unsang mga kausaban, ug sa unsang paagi? (b) Paghatag ug mga pananglitan sa praktikal nga kaalam nga anaa sa Pulong sa Diyos.

¹² Ikaduha, ang Bibliya motabang kanimo sa paghimog gikinahanglang mga kausaban sa imong personalidad. Giingnan ni Pablo si Timoteo nga ang “balaang mga sinulat” “mapuslanon sa pagpanudlo, sa pagpamadlong, sa pagpanul-id sa mga butang, sa  pagdisiplina diha sa pagkamatarong, aron ang tawo sa Diyos mahimong takos gayod, bug-os nga masinangkapan alang sa tanang maayong buhat.” (2 Timoteo 3:16, 17) Pinaagi sa regular nga pagpamalandong sa mga butang nga may kalabotan sa Pulong sa Diyos ug pinaagi sa pagpadapat sa mga prinsipyo sa Bibliya, imong matugotan ang espiritu sa Diyos nga molunsay sa imong personalidad. Imong maugmad ang hinungdanong mga hiyas, sama sa pagkamapainubsanon, pagkamalahutayon, pagkakugihan, ug tiunay nga gugma alang sa mga isigka-Kristohanon. (1 Timoteo 4:15) Nabatonan ni Timoteo kining mga hiyasa, ug busa siya nahimong mapuslanon kang Pablo ug sa mga kongregasyon nga gialagaran ni Timoteo.—Filipos 2:20-22.

¹³ Ikatulo, ang Pulong sa Diyos maoy tipiganan sa praktikal nga kaalam. (Salmo 1:1-3; 19:7; 2 Timoteo 2:7; 3:15) Motabang kini kanimo sa pagpilig mga higala sa maalamong paagi, pagpilig maayong kalingawan, ug sa paghimog daghan pang malisod nga mga desisyon. (Genesis 34:1, 2; Salmo 119:37; 1 Corinto 7:36) Ang paghimog maalamong mga desisyon karon hinungdanon sa imong pagpangab-ot ug espirituwal nga mga tumong.

“Pakigbugno sa Maayong Pakigbugno”

14. Nganong ang pagpangab-ot ug espirituwal nga mga tumong dili gayod sayon?

¹⁴ Ang pag-una sa mga tumong nga nagpasidungog kang Jehova mao ang labing maalamong buhaton apan dili gayod kini sayon. Pananglitan, maylabot sa pagpilig karera, pit-oson ka tingali pag-ayo sa imong mga paryente, katalirongan, ug maayog-tuyo nga mga magtutudlo kinsa nagtuo nga ang hataas nga edukasyon ug ang dakog-kita nga karera mao ang sekreto sa tinuod nga kalamposan ug kalipay. (Roma 12:2) Sama kang Timoteo, kinahanglan kang ‘makigbugno sa maayong pakigbugno sa pagtuo’ aron ‘makapangupot pag-ayo sa kinabuhing walay kataposan’ nga gitanyag ni Jehova kanimo.—1 Timoteo 6:12; 2 Timoteo 3:12.

15. Unsang pagsupak ang posibleng giatubang ni Timoteo?

¹⁵ Sa dihang ang dili-magtutuong mga membro sa pamilya mosupak sa imong mga pagpili, mahimong mas grabe ang pagsulay. Posible nga kinahanglang sagubangon ni Timoteo ang maong pagsupak. Sumala sa usa ka basahon, ang pamilya ni Timoteo lagmit “sakop sa hut-ong sa mga edukado ug adunahan.” Tingali gidahom sa iyang amahan nga mokuha siyag hataas nga edukasyon ug dumalahon ang negosyo sa pamilya. a Hunahunaa lang kon unsa kahay reaksiyon sa amahan ni Timoteo sa dihang nahibaloan niya nga gipili ni Timoteo ang mga kapeligrohan ug ang kawalay-kasegurohan sa pinansiyal diha sa misyonaryong buluhaton uban ni Pablo!

16. Sa unsang paagi gisagubang sa usa ka batan-on ang pagsupak sa iyang amahan?

¹⁶ Ang batan-ong mga Kristohanon karon nag-atubang ug susamang mga pagsupak. Si Matthew nga nag-alagad sa usa ka sangang buhatan sa mga Saksi ni Jehova, nahinumdom: “Sa dihang nagsugod ko pagpayunir, ang akong amahan nahigawad kaayo. Gibati niya nga akong ‘giusikan’ ang akong edukasyon pinaagi sa pagtrabaho ingong dyanitor aron sa pagsuportar sa akong ministeryo. Iya kong bugal-bugalan ug subayan kon pila untay akong kitaon kon motrabaho pa ko nga bug-os-panahon.” Sa unsang paagi gisagubang ni Matthew ang maong pagsupak? “Estrikto nakong gisunod ang akong eskedyul sa pagbasa sa Bibliya ug kanunay akong mag-ampo, ilabina sa mga panahon nga hapit nang maupos ang akong pailob.” Gigantihan ang determinasyon ni Matthew. Sa ngadtongadto, miarang-arang ang iyang relasyon sa iyang amahan. Mas nasuod usab si Matthew kang Jehova. “Nakita nako nga si Jehova nag-atiman kanako, nagdasig kanako, ug nagtabang kanako sa paghimog maalamong mga desisyon,” miingon si Matthew. “Dili unta nako maeksperyensiyahan kining mga butanga kon wala pa ko mangab-ot ug espirituwal nga mga tumong.”

Isentro ang Imong Pagtagad sa Espirituwal nga mga Tumong

17. Sa unsang paagi ang uban mahimong makapaluya niadtong nagplano sa pagsulod sa bug-os-panahong pag-alagad? (Mateo 16:22)

¹⁷ Ang dili daling-mamatikdan nga babag sa imong pagpangab-ot ug espirituwal nga mga tumong mahimong maggikan sa mga isigkamagtutuo.  ‘Nganong magpayunir ka man?’ mosukna tingali ang pipila. ‘Puwede kang magkinabuhing normal ug sa gihapon makigbahin sa buluhatong pagsangyaw. Pangitag trabaho nga dakog suweldo aron moasenso ka.’ Morag praktikal kini nga tambag, apan gibansay ba gayod nimo ang imong kaugalingon nga maoy tumong ang diyosnong pagkamahinalaron kon sundon nimo kining tambaga?

18, 19. (a) Sa unsang paagi masentro nimo ang imong pagtagad sa espirituwal nga mga tumong? (b) Ingong usa ka batan-on, ipatin-aw kon unsang mga sakripisyo ang imong ginahimo alang sa Gingharian.

¹⁸ Ang ubang mga Kristohanon sa panahon ni Timoteo dayag nga may susamang mga hunahuna. (1 Timoteo 6:17) Aron matabangan si Timoteo sa pagtutok sa iyang mata sa espirituwal nga mga tumong, gidasig siya ni Pablo, nga nag-ingon: “Walay tawo nga nagserbisyo ingong sundalo ang magpalambigit sa iyang kaugalingon sa mga pamatigayon sa kinabuhi, aron nga mabatonan niya ang pag-uyon sa usa nga nagtala kaniya ingon nga sundalo.” (2 Timoteo 2:4) Ang usa ka sundalo nga aktibo sa iyang katungdanan dili gayod magpalinga sa mga pangagpas nga iya sa mga sibilyan. Ang iyang kinabuhi ug ang kinabuhi sa uban nagdepende sa iyang pagkaandam kanunay nga motuman sa mga mando sa iyang komander. Ingong sundalo ilalom ni Kristo, kinahanglan nga usa ray imong gihunahuna ug likayan nimo nga malambigit sa wala-kinahanglanang materyal nga mga pangagpas nga makapugong kanimo sa pagtuman sa bug-os sa imong nagaluwas-kinabuhi nga ministeryo.—Mateo 6:24; 1 Timoteo 4:16; 2 Timoteo 4:2, 5.

¹⁹ Inay himoong tumong ang haruhay nga kinabuhi, ugmara ang espiritu sa pagsakripisyo-sa-kaugalingon. “Magmaandam sa pagkinabuhi nga walay mga luho, ingong sundalo ni Kristo Jesus.” (2 Timoteo 2:3, The English Bible in Basic English) Sa pagpakig-uban kang Pablo, nakat-onan ni Timoteo ang sekreto sa pagkakontento bisan sa lisod kaayong mga kahimtang. (Filipos 4:11, 12; 1 Timoteo 6:6-8) Mahimo usab nimo kana. Andam ka bang mohimog mga sakripisyo alang sa Gingharian?

Mga Panalangin Karon ug sa Umaabot

20, 21. (a) Hubita ang mga panalangin nga madawat gumikan sa pagpangab-ot ug espirituwal nga mga tumong. (b) Unsay determinado nimong buhaton?

²⁰ Sulod sa mga 15 ka tuig, si Timoteo nag-alagad uban kang Pablo. Nakita mismo ni Timoteo ang pagkatukod sa bag-ong mga kongregasyon samtang ang maayong balita mikaylap ngadto sa halos tanang bahin sa amihanang Mediteranyo. Ang iyang kinabuhi mas makalilipay ug makapatagbaw kay sa iyang maeksperyensiyahan kon mipili pa siya sa pagkinabuhing “normal.” Pinaagi sa pagpangab-ot ug espirituwal nga mga tumong, maani usab nimo ang bililhong espirituwal nga mga panalangin. Masuod ka kang Jehova ug maangkon nimo ang gugma ug pagtahod sa mga isigka-Kristohanon. Inay bation ang kasakit ug kahigawad nga moresulta gumikan sa pagpangitag materyal nga mga bahandi, matagamtam nimo ang tinuod nga kalipay nga nagsumikad sa dili-mahakogong paghatag. Labing bililhon sa tanan, ikaw “makapangupot pag-ayo sa tinuod nga kinabuhi.”—1 Timoteo 6:9, 10, 17-19; Buhat 20:35.

²¹ Busa kon wala pa nimo kana mahimo, mainiton kaming nagdasig kanimo sa pagsugod dayon sa pagbansay sa imong kaugalingon nga maoy tumong ang diyosnong pagkamahinalaron. Pakigsuod sa mga igsoon sa kongregasyon nga makatabang kanimo sa pagkab-ot ug espirituwal nga mga tumong, ug pagpagiya kanila. Himoang prioridad ang regular nga personal nga pagtuon sa Pulong sa Diyos. Magmadeterminado nga suklan ang materyalistikong espiritu niining kalibotana. Ug hinumdomi kanunay nga ang Diyos nga “dagayang naghatag kanato sa tanang butang aron atong pagakalipayan” nagsaad kanimo nga imong mabatonan ang dagayang mga panalangin karon ug sa umaabot kon imong pilion ang mga tumong nga nagpasidungog kaniya.—1 Timoteo 6:17.

[Footnote]

Nahinumdom Ka Ba?

• Asa makakaplag ang mga batan-on ug tabang aron makab-ot ang espirituwal nga mga tumong?

• Nganong hinungdanon kaayo ang makugihong pagtuon sa Bibliya?

• Sa unsang paagi masuklan sa mga batan-on ang materyalistikong impluwensiya niining kalibotana?

• Unsang mga panalangin ang madawat gumikan sa pagpangab-ot ug espirituwal nga mga tumong?

[Mga Pangutana sa Pagtuon]

[Hulagway sa panid 24]

Si Timoteo nangab-ot ug maayong mga tumong

[Mga hulagway sa panid 25]

Unsang positibong mga impluwensiya ang nakatabang kang Timoteo?

[Mga hulagway sa panid 26]

Nagapangab-ot ka ba ug espirituwal nga mga tumong?