Ang Pagkabanhaw—Tinuod ba Kini Alang Kanimo?
Ang Pagkabanhaw—Tinuod ba Kini Alang Kanimo?
“Aduna unyay pagkabanhaw.”—BUHAT 24:15.
1. Nganong daw segurado man ang kamatayon?
“WALAY segurado niining kalibotana gawas lang sa kamatayon ug buluhisan.” Kanang komentoha, nga gisulat niadtong 1789 sa Amerikanong estadista nga si Benjamin Franklin, giisip sa uban nga pagkamasinabtanon. Bisan pa niana, daghang dili-matinud-anong tawo ang manglimbong sa ilang buluhisan. Ang kamatayon daw segurado pa. Kon walay tabang, walay bisan usa kanato ang makalikay niana. Kitang tanan dili makalikay niana. Tungod kay dili matagbaw, ang Sheol—ang komong lubnganan sa katawhan—molamoy sa mga tawong atong gimahal. (Proverbio 27:20) Apan pamalandonga ang makapahupayng kamatuoran.
2, 3. (a) Nganong daghan ang wala makaamgo nga may mga tawong makalikay sa kamatayon? (b) Unsay hisgotan nato niining artikuloha?
2 Ang Pulong ni Jehova nagpadayag sa seguradong paglaom sa pagkabanhaw, ang pagkamabuhi pag-usab. Dili lang kini usa ka damgo, ug walay puwersa sa uniberso ang makapugong kang Jehova sa pagtuman sa maong paglaom. Hinuon, daghan ang wala makaamgo karon nga may mga tawo nga makalikay sa kamatayon. Ngano? Tungod kay ang di-maihap nga “dakong panon” makalabang-buhi sa “dakong kasakitan,” nga hapit nang moabot. (Pinadayag 7:9, 10, 14) Sila magpadayong buhi pagkahuman niana, nga makalaom nga mabuhing dayon. Busa, sila makalikay sa kamatayon. Dugang pa, “ang kamatayon pagawagtangon.”—1 Corinto 15:26.
3 Angay natong isipong segurado ang pagkabanhaw sama sa pag-isip niana ni apostol Pablo, kinsa miingon: “Aduna unyay pagkabanhaw sa mga matarong ug sa mga dili-matarong.” (Buhat 24:15) Atong hisgotan ang tulo ka pangutana bahin sa pagkabanhaw. Una, nganong segurado kaayo ang maong paglaom? Ikaduha, sa unsang paagi personal kang mahupay sa paglaom sa pagkabanhaw? Ikatulo, sa unsang paagi ang maong paglaom makaapektar sa imong paagi sa pagkinabuhi karon mismo?
Segurado ang Pagkabanhaw
4. Sa unsang paagi ang pagkabanhaw hinungdanon kaayo diha sa katuyoan ni Jehova?
4 Adunay daghang hinungdan nga segurado ang pagkabanhaw. Labaw sa tanan, kini hinungdanon kaayo diha sa katuyoan ni Jehova. Hinumdomi, si Satanas nag-agak sa tawo sa pagpakasala, nga may di-kalikayang sangpotanan, ang kamatayon. Busa, si Jesus miingon bahin kang Satanas: “Kana siya usa ka mamumuno sa iyang pagsugod.” (Juan 8:44) Apan si Jehova nagsaad nga ang iyang “babaye,” o samag-asawa nga organisasyon sa langit, magpatunghag usa ka “binhi” nga magsamad sa maong “orihinal nga halas” diha sa ulo, nga magdugmok kang Satanas ug bug-os maglaglag kaniya. (Genesis 3:1-6, 15; Pinadayag 12:9, 10; 20:10) Samtang inanayng gipadayag ni Jehova ang iyang katuyoan maylabot sa maong Mesiyanikong Binhi, nadayag nga ang Binhi mohimog labaw pa kay sa paglaglag lamang kang Satanas. Ang Pulong sa Diyos nag-ingon: “Tungod niini nga katuyoan nga gipadayag ang Anak sa Diyos, nga mao, aron sa pagbungkag sa mga buhat sa Yawa.” (1 Juan 3:8) Ang kamatayon nga gipahinabo sa sala nga atong napanunod gikan ni Adan maoy panguna sa mga buhat ni Satanas ug katuyoan ni Jehova ang pagwagtang o pagbungkag niini pinaagi ni Jesu-Kristo. Kon bahin niini, ang halad lukat ni Jesus ug ang pagkabanhaw hinungdanon gayod.—Buhat 2:22-24; Roma 6:23.
5. Nganong ang pagkabanhaw maghimaya sa ngalan ni Jehova?
5 Determinado si Jehova sa paghimaya sa iyang sagradong ngalan. Si Satanas nagpasipala sa ngalan sa Diyos ug nagpalambo sa kabakakan. Iyang gibakakan si Adan ug Eva nga sila ‘dili gayod mamatay’ kon mokaon sila sa bunga nga gidili sa Diyos. (Genesis 2:16, 17; 3:4) Sukad niadto, si Satanas nagpalambo sa susamang mga bakak, sama sa bakak nga pagtulon-an nga aduna konoy kalag nga magpadayong buhi sa pagkamatay sa lawas. Hinuon, pinaagi sa pagkabanhaw, iyagyag ni Jehova nga kanang tanang pagtulon-an maoy bakak. Iyang pamatud-an hangtod sa hangtod nga siya lamang ang Tigtipig ug Tigpasig-uli sa kinabuhi.
6, 7. Unsay pagbati ni Jehova bahin sa pagbanhaw sa mga tawo, ug nganong nahibalo kita sa iyang pagbati bahin niana?
6 Si Jehova nangandoy sa pagpahinabo sa pagkabanhaw. Ang Bibliya nagtin-aw kon unsay pagbati ni Jehova bahin niini. Pananglitan, tagda kining inspiradong mga pulong sa matinumanong tawo nga si Job: “Kon ang usa ka tawo nga lig-on ug lawas mamatay, mabuhi ba siya pag-usab? Paaboton nako ang tanang adlaw sa akong pinugos nga trabaho, hangtod moabot ang akong kahupayan. Ikaw motawag, ug ako motubag kanimo. Kay ikaw mangandoy sa buhat sa imong mga kamot.” (Job 14:14, 15) Unsay ipasabot nianang mga pulonga?
7 Si Job nahibalo nga sa iyang pagkamatay, siya magpaabot sulod sa usa ka yugto sa panahon nga natulog siya sa kamatayon. Giisip niya kanang panahona ingong “pinugos nga trabaho,” nga usa ka yugtong gipugos pagpatuman samtang nagpaabot sa kagawasan. Segurado ang maong kagawasan alang kaniya. Si Job nahibalo nga moabot ang iyang kahupayan. Ngano? Tungod kay siya nahibalo kon unsay pagbati ni Jehova. Si Jehova ‘nangandoy’ nga makakita pag-usab sa iyang matinumanong alagad. Oo, ang Diyos nangandoy sa pagbuhi pag-usab sa tanang tawong matarong. Hatagan usab ni Jehova ang uban ug kahigayonan nga mabuhing walay kataposan sa Paraiso sa yuta. (Lucas 23:43; Juan 5:28, 29) Sanglit kabubut-on sa Diyos ang pagtuman sa maong katuyoan, kinsay makapugong kaniya?
8. Sa unsang paagi si Jehova “naghatag ug garantiya” sa atong paglaom sa umaabot?
8 Ang pagkabanhaw ni Jesus mao ang garantiya sa atong paglaom sa umaabot. Sa dihang si Pablo nagpakigpulong sa Atenas, siya nagpahayag: “[Ang Diyos] nakatakda na ug adlaw aron iyang pagahukman ang gipuy-ang yuta subay sa pagkamatarong pinaagi sa usa ka tawo nga iyang gitudlo, ug siya naghatag ug garantiya ngadto sa tanang tawo sa pagkaagi nga siya nagbanhaw kaniya gikan sa mga patay.” (Buhat 17:31) Ang pipila sa mamiminaw ni Pablo nagyagayaga sa dihang nakadungog sila bahin sa pagkabanhaw. Hinuon, ang pipila nahimong mga magtutuo. Tingali nakadani sa ilang pagtagad ang ideyang may garantiya ang maong paglaom. Sa dihang si Jehova nagbanhaw kang Jesus, Iyang gihimo ang kinadak-ang milagro. Iyang gibanhaw ang iyang Anak gikan sa kamatayon ngadto sa kinabuhi ingon nga usa ka gamhanang espiritu. (1 Pedro 3:18) Mas dako kaayo ang nabanhawng Jesus kay sa iyang una-tawhanong kinabuhi. Si Jesus, nga wala nay kamatayon ug ikaduha lang kang Jehova sa pagkagamhanan, makadawat nag talagsaong mga asaynment gikan sa iyang Amahan. Si Jesus gamiton ni Jehova sa paghimo sa ubang mga pagbanhaw—ngadto kaha sa kinabuhi sa langit o sa kinabuhi sa yuta. Si Jesus mismo miingon: “Ako ang pagkabanhaw ug ang kinabuhi.” (Juan 5:25; 11:25) Pinaagi sa pagbanhaw sa iyang Anak, gihatag ni Jehova ang garantiya sa maong mga paglaom alang sa tanang matinumanong mga tawo.
9. Sa unsang paagi gipamatud-an sa talaan sa Bibliya nga tinuod ang pagkabanhaw?
9 Ang pagkabanhaw gipasundayag atubangan sa mga tawong nakasaksi ug gitala diha sa Pulong sa Diyos. Ang talaan sa Bibliya adunay detalyadong mga asoy bahin sa walo ka pagkabanhaw sa mga tawo nga gibuhi pag-usab ingong mga tawo sa yuta. Ang maong mga milagro gihimo sa dayag, dili sa tago, nga kasagarang atubangan sa mga tawong nakasaksi. Si Jesus nagbanhaw kang Lazaro, kinsa patay nag upat ka adlaw, atubangan sa panon sa mga tawong nagbangotan—nga seguradong naglakip sa iyang pamilya, mga higala, ug mga silingan. Puwersado kaayo kadtong ebidensiya nga si Jesus maoy pinadala sa Diyos nga ang pagkahitabo niadto wala gayod ilimod sa relihiyosong mga kaaway ni Jesus. Naglaraw pa gani sila sa pagpatay kang Jesus, ug kang Lazaro usab! (Juan 11:17-44, 53; 12:9-11) Sa pagkatinuod, makasalig kita nga segurado ang pagkabanhaw. Ang Diyos naghatag kanatog talaan sa nangaging mga pagbanhaw aron hupayon kita ug palig-onon ang atong pagtuo.
Pagkaplag ug Kahupayan Diha sa Paglaom sa Pagkabanhaw
10. Unsay makatabang kanato sa pagbatog kahupayan gikan sa mga asoy bahin sa pagkabanhaw diha sa Bibliya?
10 Nangandoy ka bag kahupayan sa dihang nag-atubang sa kamatayon? Ang usa ka seguradong tinubdan sa kahupayan mao ang mga asoy bahin sa pagkabanhaw diha sa Bibliya. Pinaagi sa pagbasa sa maong mga asoy, pagpamalandong niana, ug paghanduraw sa mga panghitabo, ang paglaom sa pagkabanhaw mahimong mas tinuod kanimo. (Roma 15:4) Kini dili lang sugilambong. Kini nahitabo gayod sa tinuod nga mga tawo sama kanato, nga nagkinabuhi sa tinuod nga panahon ug sa tinuod nga dapit. Atong hisgotan sa daklit ang usa ka pananglitan—ang unang pagkabanhaw sa talaan sa Bibliya.
11, 12. (a) Unsang trahedya ang nahitabo sa babayeng balo sa Zarepta, ug unsay iyang sanong sa sinugdan? (b) Batbata kon unsay gipabuhat ni Jehova sa iyang manalagnang si Elias alang sa babayeng balo pinaagi sa gahom nga iyang gihatag kaniya.
11 Handurawa ang esena. Sa pipila ka semana, ang manalagnang si Elias bisita sa babayeng balo sa Zarepta ug siya didto nagpuyo sa usa ka lawak-sa-atop. Kadto maoy panahon sa kasub-anan. Ang rehiyon nakaagom sa hulaw ug kagutmanan. Daghan ang nangamatay. Si Elias gigamit na ni Jehova sa paghimog milagro nga milungtad ug taastaas nga panahon agig ganti sa pagtuo niadtong timawa nga babayeng balo. Siya ug ang iyang batan-ong anak nga lalaki hapit na niadtong makasinatig kagutom, kay ang ilang suplay igo na lang sa kataposang pagkaon, sa dihang ang Diyos naghatag ug gahom kang Elias sa paghimog milagro mao nga ang iyang suplay nga harina ug lana milagrosong wala mahurot. Apan niadtong tungora, ang usa ka trahedya nahitabo kaniya. Ang iyang anak kalit nga nasakit, ug namatay sa wala madugay. Labihan ang kaguol sa babayeng balo! Lisod na man gani ang kinabuhi tungod kay siya walay bana nga magpalig-on ug magsuportar kaniya, ug unya namatay pa niadto ang iyang bugtong anak. Sa iyang kaguol, iya ganing gibasol si Elias ug ang iyang Diyos, si Jehova! Unsay himoon sa manalagna?
12 Si Elias wala magbadlong sa babayeng balo tungod sa iyang bakak nga akusasyon. Hinunoa, siya miingon: “Ihatag kanako ang imong anak nga lalaki.” Human sa pagdala sa batan-on ngadto sa lawak-sa-atop, si Elias balikbalik nga nag-ampo aron mabuhi pag-usab ang batan-on. Sa kataposan milihok si Jehova! Dili tiaw ang kalipay nga mibanaag sa nawong ni Elias sa iyang pagkakita sa dughan sa batan-ong lalaki nga miulbo-ulbo samtang naghanggab ug hangin. Ang mga mata sa batan-on mibuka, ug nagmasidlakon. Gidala ni Elias ang batan-ong lalaki ngadto sa iyang inahan ug miingon: “Tan-awa, buhi ang imong anak nga lalaki.” Ang kalipay sa babayeng balo dili ikabatbat. Siya miingon: “Karon, sa pagkatinuod, ako nahibalo nga ikaw usa ka tawo sa Diyos ug nga ang pulong ni Jehova sa imong baba matuod.” (1 Hari 17:8-24) Ang iyang pagtuo kang Jehova ug sa iyang hawas labi pang nalig-on.
13. Nganong ang asoy bahin sa pagbanhaw ni Elias sa anak nga lalaki sa usa ka babayeng balo makapahupay gayod kanato karon?
13 Ang pagpamalandong sa maong asoy seguradong makapahupay kanimo. Pagkatin-aw nga si Jehova makabuntog sa atong kaaway nga kamatayon! Handurawa lang ang adlaw sa dihang masinati sa libolibong tawo sa yuta ang kalipay sa babayeng balo panahon sa katibuk-ang pagbanhaw sa mga patay! May dakong kalipay usab sa langit samtang si Jehova malipay nga magsugo sa iyang Anak sa pagpamanhaw sa tibuok yuta. (Juan 5:28, 29) Ikaw ba may usa ka minahal nga namatay? Makapahingangha ang pagkahibalo nga si Jehova makahimo sa pagbuhi pag-usab ug buhion gayod niya pag-usab ang mga patay!
Ang Imong Paglaom ug ang Imong Kinabuhi Karon
14. Sa unsang paagi ang paglaom sa pagkabanhaw makaapektar sa imong kinabuhi?
14 Sa unsang paagi ang paglaom sa pagkabanhaw makaapektar sa paagi sa imong pagkinabuhi karon mismo? Mahimo kang mapalig-on sa maong paglaom sa dihang magaatubang kag mga kalisdanan, mga suliran, paglutos, o kapeligrohan. Gusto ni Satanas nga mahadlok ka gayod sa kamatayon nga andam nimong ibugti ang imong integridad sa way-pulos nga saad sa kaluwasan. Hinumdomi nga miingon si Satanas kang Jehova: “Ang tanang butang nga anaa sa usa ka tawo iyang ihatag tungod sa iyang kalag.” (Job 2:4) Sa pagsulti niana, si Satanas nagdaot kanatong tanan, lakip kanimo. Tinuod bang mohunong ka sa pag-alagad sa Diyos kon mag-atubang kag kapeligrohan? Pinaagi sa pagpamalandong sa paglaom sa pagkabanhaw, makapalig-on ka sa imong determinasyon sa pagpadayon sa pagbuhat sa kabubut-on sa imong langitnong Amahan.
15. Sa unsang paagi ang mga pulong ni Jesus nga natala sa Mateo 10:28 makahatag kanatog kahupayan atubangan sa kapeligrohan?
15 Si Jesus miingon: “Ayaw ninyo kahadloki silang makapatay sa lawas apan dili makapatay sa kalag; apan hinunoa kahadloki ninyo siya nga makalaglag sa kalag ug sa lawas sa Gehenna.” (Mateo 10:28) Dili kita angayng mahadlok kang Satanas o sa iyang tawhanong mga hawas. Tinuod, ang pipila tingali may gahom sa pagpahinabog kadaot, bisan kamatayon pa. Bisan pa niana, ang labing grabeng butang nga ilang mahimo maoy temporaryo lamang. Si Jehova makaayo ug moayo sa kadaot nga gihimo ngadto sa iyang matinumanong mga alagad, nga magbanhaw pa kanila. Si Jehova lamang ang angay sa atong kahadlok, sa atong dakong kataha ug pagtahod. Siya lamang ang may gahom sa pagwagtang sa kinabuhi ug sa tanang palaabotong kinabuhi, pinaagi sa paglaglag sa lawas ug kalag sa Gehenna. Ikalipay, dili gusto ni Jehova nga kana mahitabo kanimo. (2 Pedro 3:9) Tungod sa paglaom sa pagkabanhaw, kitang mga alagad sa Diyos makapaneguro kanunay nga layo kita sa kapeligrohan. Ang walay-kataposang kinabuhi anaa sa atong unahan basta kita matinumanon, ug si Satanas o ang iyang mga alagad walay mahimo bahin niana.—Salmo 118:6; Hebreohanon 13:6.
16. Sa unsang paagi ang atong hunahuna bahin sa pagkabanhaw nag-apektar sa mga prioridad nga atong gipahiluna?
16 Kon ang paglaom sa pagkabanhaw tinuod alang kanato, kini makaumol sa atong tinamdan bahin sa kinabuhi. Nahibalo kita nga ‘kon kita mabuhi o kon kita mamatay, kita iya ni Jehova.’ (Roma 14:7, 8) Busa, sa pagpahilunag mga prioridad, atong ipadapat ang tambag ni Pablo: “Hunong na sa pagpaumol sumala niining sistemaha sa mga butang, kondili mag-usab kamo pinaagi sa pagbag-o sa inyong hunahuna, aron inyong ikapamatuod sa inyong kaugalingon ang maayo ug dalawaton ug hingpit nga kabubut-on sa Diyos.” (Roma 12:2) Daghang tawo ang nagdali gayod sa pagtagbaw sa matag tinguha, tingusbawan, sa dihadihang kagustohan. Tungod kay ilang giisip nga hamubo lang ang kinabuhi, sila daw halos desperado sa ilang pagpangagpas sa kalingawan, ug kon sila adunay usa ka matang sa pagsimba, seguradong dili kini sumala sa “hingpit nga kabubut-on sa Diyos.”
17, 18. (a) Sa unsang paagi ang Pulong ni Jehova nagpadayag sa kamubo sa kinabuhi sa tawo, apan unsay gusto sa Diyos alang kanato? (b) Nganong kita matukmod sa pagdayeg kang Jehova kada adlaw?
17 Tinuod, hamubo ang kinabuhi karon. ‘Kini molabay sa madali, ug kita mahanaw,’ tingali sa mga 70 o 80 ka tuig. (Salmo 90:10) Ang mga tawo motungha ug mahanaw sama sa lunhaw nga balili, sama sa lumalabay nga anino, sama sa hinungaw. (Salmo 103:15; 144:3, 4) Apan dili tuyo sa Diyos nga kita matawo ug mohingkod sulod sa pipila ka dekada aron makabatog kaalam ug kasinatian, dayon sa sunod nga pipila ka dekada makaagom sa inanayng pagkadaot sa lawas tungod sa sakit ug dayon mamatay. Gilalang ni Jehova ang mga tawo uban ang tinguha nga mabuhi hangtod sa kahangtoran. “Ang panahong walay tino iyang gibutang sa ilang kasingkasing,” ang Bibliya nag-ingon kanato. (Ecclesiastes 3:11) Mabangis ba ang Diyos, tungod sa paghatag kanato sa maong tinguha ug unya dili diay kana matuman? Dili gayod, tungod kay “ang Diyos gugma.” (1 Juan 4:8) Iyang gamiton ang pagkabanhaw aron ang mga tawong namatay mahimong mabuhi hangtod sa kahangtoran.
18 Tungod sa paglaom sa pagkabanhaw, kita mahimong makabaton ug seguradong kaugmaon. Dili kita angayng mabalaka, nga mapugos kita sa pag-ugmad sa atong tanang katakos sa pagkakaron. Dili nato angayng pahimuslan “sa bug-os” kining laglagonong kalibotan. (1 Corinto 7:29-31; 1 Juan 2:17) Lahi niadtong walay tinuod nga paglaom, atong nabatonan ang talagsaong kahibalo nga kon kita magpabiling matinumanon kang Jehova nga Diyos, kita makadayeg kaniya ug makapahimulos sa kinabuhi hangtod sa kahangtoran. Nan, sa kada adlaw dayegon nato si Jehova, nga naghimo sa paglaom sa pagkabanhaw nga segurado!
Unsaon Nimo Pagtubag?
• Unsay angay natong bation bahin sa pagkabanhaw?
• Unsa ang mga katarongan nga segurado ang paglaom sa pagkabanhaw?
• Sa unsang paagi mahupayan ka sa paglaom sa pagkabanhaw?
• Sa unsang paagi makaapektar ang paglaom sa pagkabanhaw sa imong paagi sa pagkinabuhi?
[Mga Pangutana sa Pagtuon]
[Hulagway sa panid 28]
Si Job nahibalo nga si Jehova nangandoy sa pagbanhaw sa mga matarong
[Hulagway sa panid 29]
“Tan-awa, buhi ang imong anak nga lalaki”