Gituman ni Jepte ang Iyang Panaad Kang Jehova

USA ka madaogong manggugubat ang mipauli sa ilaha human luwasa ang iyang nasod batok sa pagpanglupig. Ang iyang anak nga babaye nagdagan nga mitagbo kaniya, nga malipayong nagsayawsayaw ug nagtugtog ug tamborin. Sa pagkakita sa iyang anak, imbes malipay, iyang gigisi ang iyang sinina. Ngano man? Wala ba diay siya malipay sama sa iyang anak nga nakabalik siyang buhi? Unsang gubata ang iyang gidaog? Kinsa siya?

Siya mao si Jepte, usa sa mga maghuhukom sa karaang Israel. Apan aron matubag ang uban pang mga pangutana ug masabtan ang leksiyon sa maong asoy, atong susihon ang mga hitabo sa wala pa kining talagsaong panagkita pag-usab.

Lisod nga Kahimtang sa Israel

Si Jepte nagkinabuhi sa panahong lisod ang kahimtang sa nasod. Ang iyang mga isigka-Israelinhon mibiya sa putling pagsimba ug nag-alagad sa mga diyos sa Sidon, Moab, Ammon, ug Pilistia. Busa gitugotan ni Jehova nga sakopon ang iyang katawhan sa mga Ammonhanon ug sa mga Filistehanon, nga nagdaogdaog kanila sulod sa 18 ka tuig. Ang mga molupyo sa Gilead, sa silangang bahin sa Subang Jordan, ang ilabinang nag-antos. a Sa kataposan, ang mga Israelinhon nakaamgo sa ilang sayop nga dalan, ug mahinulsolong nagpakitabang kang Jehova, mialagad na usab kaniya, ug ilang giwagtang ang langyaw nga mga diyos sa ilang taliwala.—Maghuhukom 10:6-16.

Ang mga Ammonhanon nagkampo sa Gilead, ug ang mga Israelinhon nagtigom aron sa pagpakigharong kanila. Apan ang Israel nanginahanglag pangulo. (Maghuhukom 10:17, 18) Sa samang panahon, si Jepte may kaugalingong mga problema. Gipalayas siya sa iyang hakog nga mga igsoon aron maagaw ang iyang panulondon. Busa si Jepte mibalhin sa Tob, usa ka rehiyon sa silangan sa Gilead ug dali rang sulongon sa mga kaaway sa Israel. “Ang mga tawong walay buhat,” lagmit kadtong mga nawad-ag mga trabaho tungod sa ilang mga kaaway o kinsa mirebelde batok sa mga nag-ulipon kanila, nakig-anib kang Jepte. Sila “nagkuyogan kaniya,” tingali nagpasabot nga sila mikuyog kang Jepte samtang iyang gisulong ang pintas nga mga kaaway sa duol. Lagmit tungod kay hawod mang makig-away si Jepte, ang Kasulatan nagtawag kaniyang “usa ka gamhanan, maisog nga tawo.” (Maghuhukom 11:1-3) Busa, kinsa ang mangulo sa Israel batok sa mga Ammonhanon?

“Umari Ka ug Mag-alagad Ka Ingong Among Komandante”

Ang tigulang nga mga lalaki sa Gilead miawhag kang Jepte: “Umari ka ug mag-alagad ka ingong among komandante.” Kon naghunahuna sila nga iya dayong pahimuslan ang kahigayonan aron makabalik siya sa kaugalingon niyang yuta, nasayop sila. Siya mitubag: “Dili ba kamo man ang nagdumot  kanako mao nga ako inyong gihinginlan gikan sa balay sa akong amahan? Ug nganong kamo mianhi kanako karon sa dihang kamo anaa sa kasakitan?” Pagkadili gayod makataronganon nga ila unang gisalikway si Jepte ug dayon sila miadto kaniya aron magpakitabang!—Maghuhukom 11:4-7.

Si Jepte mosugot nga maoy mangulo sa Gilead sa usa lang ka kondisyon. Siya miingon: ‘Kon itugyan ni Jehova ang Ammon kanako, ako mahimong inyong pangulo!’ Ang kadaogan maoy magpamatuod sa pagpaluyo sa Diyos, apan gitinguha usab ni Jepte nga ang pagmando sa Diyos dili gayod isalikway sa mga tawo kon matapos na ang kalisdanan.—Maghuhukom 11:8-11.

Pagpakiglabot sa Ammon

Gisulayan ni Jepte nga makig-areglo sa mga Ammonhanon. Siya nagpadala ug mga mensahero ngadto sa ilang hari aron masayran kon nganong nanulong man ang mga Ammonhanon. Ang tubag naglakip niini nga akusasyon: Sa paggula sa mga Israelinhon sa Ehipto, ilang giokupar ang teritoryo sa mga Ammonhanon, ug kinahanglang ibalik kini kanila.—Maghuhukom 11:12, 13.

Tungod kay daghan man siyag nahibaloan bahin sa kasaysayan sa Israel, mahanason niyang gipanghimakak ang mga pangangkon sa mga Ammonhanon. Iyang giingnan sila nga wala hilabti sa mga Israelinhon ang Ammon, Moab, o ang Edom sa dihang mibiya sila sa Ehipto; ug wala usab panag-iyaha sa Ammon ang giilogan nga yuta panahon sa Paggula sa mga Israelinhon sa Ehipto. Ang mga Amorihanon maoy nanag-iya sa yuta niadtong panahona, apan ang Diyos nagtugyan sa ilang hari, si Sihon, ngadto sa kamot sa Israel. Dugang pa, ang mga Israelinhon nagpuyo nianang yutaa sulod na sa 300 ka tuig. Nganong karon pa man mangangkon ang mga Ammonhanon nianang yutaa?—Maghuhukom 11:14-22, 26.

Gipasiugda usab ni Jepte ang usa ka isyu nga mao gayoy nakaingon sa mga kaalaotan sa Israel: Kinsa ang matuod nga Diyos? Si Jehova ba o ang mga diyos sa yuta nga gipuy-an sa Israel? Kon may gahom pa si Kemos, dili ba niya gamiton ang iyang gahom aron dili mailog ang yuta sa iyang katawhan? Kini maoy panagtigi tali sa bakak nga relihiyon, nga gipaluyohan sa mga Ammonhanon, ug sa matuod nga pagsimba. Busa makataronganong mihinapos si Jepte: “Tugoting si Jehova nga Maghuhukom ang magahukom niining adlawa tali sa mga anak sa Israel ug sa mga anak sa Ammon.”—Maghuhukom 11:23-27.

Wala tagda sa hari sa Ammon ang di-matarog nga mensahe ni Jepte. “Karon ang espiritu ni Jehova mikunsad kang Jepte, ug siya miagi sa Gilead ug sa Manases,” lagmit aron sa pagtigom ug mga tawong lig-on ug lawas alang sa pagpakiggubat.—Maghuhukom 11:28, 29.

Ang Panaad ni Jepte

Kay tim-os nga nagtinguha sa pagtultol sa Diyos, si Jepte nanaad sa Diyos: “Kon sa pagkatinuod imong itugyan sa akong kamot ang mga anak sa Ammon, mahitabo usab nga ang usa nga mogula sa mga pultahan sa akong balay kinsa mogula sa pagsugat kanako, inigpauli ko sa kalinaw gikan sa mga anak sa Ammon, maiya gayod usab kang Jehova, ug igahalad ko siya ingon nga halad-nga-sinunog.” Agig tubag, gipanalanginan sa Diyos si Jepte pinaagi sa pagtugot nga iyang mapukan ang 20 ka siyudad sa Ammon uban ang “dako kaayo nga pagpamatay,” ug busa napildi ang mga kaaway sa Israel.—Maghuhukom 11:30-33.

Sa pag-uli ni Jepte gikan sa gubat, gitagbo siya sa iyang minahal nga bugtong anak nga babaye! Ang asoy nagkanayon: “Sa iyang pagkakita kaniya, iyang gigisi ang iyang besti ug miingon: ‘Intawon, anak ko nga babaye! Gipaubos mo gayod ako, ug ikaw mismo ang akong gisalikway. Ug ako—ako nakabungat na sa akong baba kang Jehova, ug dili ko na mabakwi.’”—Maghuhukom 11:34, 35.

Ihalad ba gayod ni Jepte ang iyang anak? Dili. Wala gayod kana mosantop sa iyang hunahuna. Gidumtan ni Jehova ang paghalad ug literal nga tawo, nga maoy usa sa daotang mga binuhatan sa mga Canaanhon. (Levitico 18:21; Deuteronomio 12:31) Ang espiritu sa Diyos wala lamang molihok diha kang Jepte sa dihang nanaad siya kondili gipanalanginan usab ni Jehova ang iyang mga paningkamot. Ang Kasulatan nagdayeg kang Jepte tungod sa iyang pagtuo ug sa papel nga iyang gidula maylabot sa katuyoan sa Diyos. (1 Samuel 12:11; Hebreohanon 11:32-34) Busa imposible gayod ang paghalad ug usa ka tawo tungod kay kana maoy pagbuno. Nan, unsa may gihunahuna ni Jepte sa dihang nanaad siya sa paghalad ug usa ka tawo ngadto kang Jehova?

 Dayag nga ang gipasabot ni Jepte mao nga iyang igahin kanang tawhana alang lamang sa pag-alagad sa Diyos. Ang Balaod ni Moises nagtugot nga mahimong isaad ngadto kang Jehova ang mga kinabuhi. Pananglitan, ang mga babaye nag-alagad diha sa sangtuwaryo, lagmit ingong mga tigkalos ug tubig. (Exodus 38:8; 1 Samuel 2:22) Wala kaayo kitay nahibaloan bahin sa maong pag-alagad o kon permanente ba kini. Si Jepte lagmit naghunahuna sa maong linaing pag-alagad sa dihang nanaad siya, ug lagmit ang iyang panaad nagpasabot ug permanenteng pag-alagad.

Ang anak nga babaye ni Jepte ug sa ulahi ang batang lalaki nga si Samuel mikooperar aron tumanon ang mga panaad sa ilang diyosnong mga ginikanan. (1 Samuel 1:11) Ingong maunongong magsisimba ni Jehova, ang anak ni Jepte mismo kombinsido sama sa iyang amahan nga kinahanglan tumanon ang iyang panaad. Dako ang isakripisyo, kay kini nagpasabot nga siya dili gayod maminyo. Iyang gihilakan ang iyang pagkaulay tungod kay ang tanang Israelinhon buot mang makabatog anak aron mapreserbar ang ngalan sa pamilya ug ang panulondon. Alang kang Jepte, ang pagtuman sa maong panaad nagpasabot nga dili na niya ikauban ang iyang minahal nga bugtong anak.—Maghuhukom 11:36-39.

Apan ang kinabuhi niining matinumanong babaye dili kay walay kapuslanan. Ang bug-os-panahong pag-alagad diha sa balay ni Jehova maoy maayo kaayo, makapatagbaw, ug dalayegon nga paagi aron iyang mapasidunggan ang Diyos. Busa, “matag tuig ang mga anak nga babaye sa Israel moadto sa pagpasidungog sa anak nga babaye ni Jepte nga Gileadnon.” (Maghuhukom 11:40) Ug seguradong nalipay gayod si Jepte sa iyang pag-alagad kang Jehova.

Daghan taliwala sa katawhan sa Diyos karon ang mipili sa bug-os-panahong pag-alagad ingong mga payunir, misyonaryo, nagapanawng mga ministro, o mga membro sa mga pamilyang Bethel. Kini mahimong magkahulogan nga dili nila kanunayng makita ang ilang mga pamilya sumala sa ilang gusto. Apan, sila ug ang ilang mga pamilya malipay sa maong sagradong pag-alagad nga ilang gihimo kang Jehova.—Salmo 110:3; Hebreohanon 13:15, 16.

Pagsupak sa Paggiya sa Diyos

Sa paghinumdom sa panahon ni Jepte, atong nakita nga gisalikway sa daghang Israelinhon ang pagtultol ni Jehova. Bisan pa sa pamatuod nga si Jepte gipanalanginan sa Diyos, ang mga Epraimnon nakiglalis kaniya. Buot silang masayod kon nganong wala niya tawga sila sa pagpakiggubat. Gusto pa gani nilang daoban ang balay ni Jepte ‘uban kaniya’!—Maghuhukom 12:1.

Si Jepte miingon nga iyang gitawag ang mga Epraimnon, apan wala sila mosanong. Bisag unsa pay kahimtang, ang Diyos maoy midaog sa gubat. Masuko ba sila karon tungod kay wala sila konsultaha sa mga Gileadnon sa dihang ilang gipili si Jepte nga mahimong pangulo? Sa pagkatinuod, ang pagsupak sa mga Epraimnon nagpaila nga sila nakigbatok kang Jehova, ug walay laing sulbad gawas sa pagpakig-away kanila. Sa misunod nga panaggubat, naparot ang mga Epraimnon. Kay dili man tukmang makalitok sa pangsulay nga pulong “Shibboleth,” dali rang nailhan ang nangalagiw nga mga lalaki sa Epraim. Tanantanan, 42,000 ka Epraimnon ang nangamatay sa maong gubat.—Maghuhukom 12:2-6.

Pagkamakapaguol nga panahon kadto sa kasaysayan sa Israel! Ang mga gubat nga gidaog nila ni Maghuhukom Otniel, Ehud, Barak, ug Gideon nakahatag ug kalinaw. Niining higayona wala hisgoti ang kalinaw. Ang asoy yanong gitiklopan: “Si Jepte nagpadayon sa paghukom sa Israel sa unom ka tuig, ug human niadto [siya] namatay ug gilubong sa iyang siyudad sa Gilead.”—Maghuhukom 3:11, 30; 5:31; 8:28; 12:7.

Unsay atong makat-onan gikan niini? Nga bisan tuod punog kalisdanan ang kinabuhi ni Jepte, siya nagmaunongon sa Diyos. Kining maisog nga lalaki naghisgot kang Jehova sa dihang siya nakigsulti sa mga tigulang sa Gilead, sa mga Ammonhanon, sa iyang anak nga babaye, ug sa mga Epraimnon ug, labaw sa tanan, sa dihang siya nanaad. (Maghuhukom 11:9, 23, 27, 30, 31, 35; 12:3) Gipanalanginan sa Diyos si Jepte tungod sa iyang debosyon, nga naggamit kaniya ug sa iyang anak nga babaye sa pagpalambo sa putli nga pagsimba. Sa panahon diin ang uban wala magtuman sa mga sukdanan sa Diyos, si Jepte nagtuman gayod niini. Sama kang Jepte, kanunay mo bang sugton si Jehova?

[Footnote]