Kon Nganong Hapit Nang Matapos ang Tanang Pag-antos

“Ang Bato, hingpit ang iyang kalihokan.”—DEUTERONOMIO 32:4.

1, 2. (a) Nganong imong gipabilhan ang paglaom nga mabuhi sa walay kataposan? (b) Unsay nakapugong sa daghan sa pagtuo sa Diyos nga nagsaad ug kahibulongang mga butang alang sa umaabot?

 GUSTO mo bang handurawon ang kinabuhi sa Paraiso? Tingalig handurawon nimo nga nagsuroysuroy ka niining kahibulongang planeta ug nagkat-on bahin sa maorag way-kinutoban nga nagkadaiyang kalalangan. O namalandong ka tingali nga natagbaw ka samtang nagbuhat duyog sa uban sa pag-atiman sa yuta ug sa pagtabang paghimo niini nga tibuok-yutang parke. O namalandong ka tingali sa mga kahanas nga imong maugmad sa natad sa arte, arkitektura, musika, o sa ubang mga pangagpas nga wala kay panahon alang niana karon tungod sa puliki kaayong kinabuhi. Bisan kon unsay kahimtang, imong gipabilhan ang paglaom nga magkinabuhi sa gitawag sa Bibliya ug “tinuod nga kinabuhi”—ang kinabuhing gituyo ni Jehova alang kanato hangtod sa kahangtoran.—1 Timoteo 6:19.

² Dili ba makalilipay ug talagsaong pribilehiyo ang pagpaambit sa uban nianang gipasukad-sa-Bibliya nga paglaom? Ugaling lang, gisalikway sa uban ang maong paglaom. Ilang giisip kini ingong panghanduraw, dili-realistikong damgo alang sa motuo-dayon nga mga tawo. Mahimong nalisdan sila sa pagtuo sa Diyos nga nagsaad sa walay-kataposang kinabuhi sa Paraiso. Ngano? Ang pipila nalibog tungod sa isyu bahin sa pagkadaotan, sumala sa kasagarang pagtawag niana. Nagtuo sila nga kon naglungtad ang Diyos ug nga siya labing gamhanan ug mahigugmaon, ang pagkadaotan ug ang pag-antos sa kalibotan dili mapatin-aw. Dili mahimong adunay Diyos nga nagtugot sa pagkadaotan, sila nangatarongan—o kon naglungtad man siya, dili siya labing gamhanan o kaha siya walay pagtagad kanato. Maorag makataronganon kini alang sa pipila. Si Satanas hanas kaayo nga nagbuta sa kaisipan sa mga tawo.—2 Corinto 4:4.

3. Unsang lisod nga pangutana sa mga tawo nga makatabang kita sa pagtubag, ug nganong makatabang gayod kita sa pagtubag niana?

³ Ingong mga Saksi ni Jehova, kita makatabang sa mga tawo nga nalimbongan ni Satanas ug sa kaalam niining kalibotana. (1 Corinto 1:20; 3:19) Atong nasabtan kon nganong daghan ang dili motuo sa mga saad sa Bibliya. Sila wala lang gayod makaila kang Jehova. Wala tingali sila makaila sa iyang ngalan ug sa kahulogan niini, ug lagmit sila may diyutay rang kahibalo o kaha wala mahibalo sa iyang mga hiyas o sa iyang dungog bahin sa pagtuman sa  iyang mga saad. Kita bulahan kaayo nga nahibalo niana. Matag karon ug unya, maayong repasohon nato kon sa unsang paagi kita makatabang sa mga tawong “anaa sa kangitngit sa kaisipan” aron ilang masayran ang tubag sa usa sa mga pangutana sa mga tawo nga lisod kaayong matubag, “Nganong gitugotan sa Diyos ang pagkadaotan ug pag-antos?” (Efeso 4:18) Ato unang hisgotan kon sa unsang paagi mapahiluna ang pasikaranan sa makapatagbaw nga tubag. Dayon hisgotan nato kon sa unsang paagi madayag ang mga hiyas ni Jehova diha sa iyang paagi sa pagdumala sa pagkadaotan.

Pagkaplag sa Hustong Paagi sa Pagtubag

4, 5. Unsay una natong himoon kon may mangutana kon nganong gitugotan sa Diyos ang pag-antos? Ipatin-aw.

⁴ Kon adunay mangutana kon nganong gitugotan sa Diyos ang pag-antos, sa unsang paagi matubag nato kana? Lagmit ipatin-aw dayon nato kana sa detalyadong paagi, sugod sa nahitabo sa tanaman sa Eden. Sa pipila ka kahimtang, kana mahimong haom. Apan, may pahimatngon. Mahimong gikinahanglan ang sukaranang kahibalo. (Proverbio 25:11; Colosas 4:6) Atong hisgotan ang tulo ka punto nga makatabang sa usa ka tawo sa dili pa nato hisgotan ang tubag sa maong pangutana.

⁵ Una, kon adunay tawo nga nalibog pag-ayo sa pagkaylap sa pagkadaotan sa kalibotan, mahimong siya mismo o iyang mga minahal apektado niini. Nan, mahimong maalamon nga masugdan ang pagtubag pinaagi sa pagpakitag tinuod nga empatiya. Si apostol Pablo mitambag sa mga Kristohanon: “Hilak uban sa mga tawong nanghilak.” (Roma 12:15) Ang pagpakitag empatiya o “pagbati alang sa isigkaingon” lagmit makapatandog sa maong tawo. (1 Pedro 3:8) Kon iyang masabtan nga kita matinagdanon kaniya, lagmit mamati siya sa atong isulti.

6, 7. Nganong tukmang makadayeg kita sa usa ka sinserong tawo nga mopatunghag lisod nga Biblikanhong pangutana nga nakapalibog kaniya?

⁶ Ikaduha, mahimong dayegon nato ang maong sinserong tawo tungod sa pagpangutana niana. Ang pipila ka tawo mahimong makahinapos nga tungod kay sila nalibog sa maong mga pangutana, sila walay pagtuo o pagtahod sa Diyos. Mahimong gisultihan sila niana sa usa ka klerigo. Ang pagpangutana niana wala hinuon magpasabot nga sila walay pagtuo sa Diyos. Ngani, ang matinuohong mga tawo sa panahon sa Bibliya nagpatunghag susamang mga pangutana. Pananglitan, ang salmistang si David nangutana: “Nganong nagatindog ka sa halayo, Oh Jehova? Nganong nagtago ka sa mga panahon sa kasakit?” (Salmo 10:1) Sa susama, ang manalagnang si Habacuc nangutana: “Hangtod kanus-a, Oh Jehova, nga ako magatuaw alang sa tabang, ug ikaw dili mamati? Hangtod kanus-a nga ako magpakitabang kanimo tungod sa kapintasan, ug ikaw dili magaluwas? Nganong gipakita mo kanako ang makadaot, ug ikaw nagatan-aw lamang sa kasamok? Ug nganong ang pagpanglaglag ug kapintasan ania sa akong atubangan, ug nganong adunay panag-away, ug nganong nagakahitabo ang panagbangi?”—Habacuc 1:2, 3.

⁷ Kana sila maoy matinuohong mga tawo nga may dakong pagtahod sa Diyos. Gibadlong ba sila tungod sa pagpatungha nianang makapalibog nga mga pangutana? Sa kasukwahi, gipasulat ni Jehova ang ilang sinserong mga pangutana diha sa iyang Pulong. Karong adlawa, ang usa ka tawo nga nalibog sa pagkaylap sa pagkadaotan mahimong gigutom gayod sa espirituwal—nga nangandoy sa mga tubag nga makita lamang sa Bibliya. Hinumdomi, gidayeg ni Jesus kadtong gigutom sa espirituwal, o “mahunahunaon sa ilang espirituwal nga panginahanglan.” (Mateo 5:3) Madungganon gayod ang pagtabang nianang mga tawhana aron makaplagan nila ang kalipay nga gisaad ni Jesus!

8. Unsang makapalibog nga mga pagtulon-an ang miagak sa mga tawo sa pagtuo nga ang Diyos mao ang nakaingon sa pag-antos, ug sa unsang paagi makatabang kita kanila?

⁸ Ikatulo, angay natong tabangan ang maong tawo aron iyang masabtan nga ang Diyos dili mao ang nakaingon sa pagkadaotan nga kaylap kaayo sa kalibotan. Natudloan ang daghang tawo nga ang Diyos mao ang nagmando niining kalibotana nga atong gipuy-an, nga ang Diyos nagtino daan dugay na kanhi sa tanang mahitabo kanato, ug nga siya adunay misteryoso, dili-matugkad nga mga katarongan sa pagpahinabog kalisdanan sa katawhan. Bakak ang maong mga pagtulon-an.  Ilang gipakaulawan ug gipasanginlan ang Diyos sa pagkadaotan ug pag-antos sa kalibotan. Busa angay natong gamiton ang Pulong sa Diyos sa pagtul-id nianang mga butanga. (2 Timoteo 3:16) Si Jehova dili mao ang magmamando niining hiwi nga sistema sa mga butang; si Satanas nga Yawa mao ang magmamando niini. (1 Juan 5:19) Si Jehova wala magtino daan kon unsay dangatan sa iyang intelihenteng mga linalang; iyang gihatagan ang matag usa ug kagawasan ug mga kahigayonan sa pagpili tali sa maayo ug daotan, sa husto ug sayop. (Deuteronomio 30:19) Ug si Jehova dili gayod ang tinubdan sa pagkadaotan; iyang gidumtan ang pagkadaotan ug siya may pagtagad niadtong nag-antos sa inhustisya.—Job 34:10; Proverbio 6:16-19; 1 Pedro 5:7.

9. Unsay pipila ka basahon nga gitagana sa “matinumanon ug maalamong ulipon” aron tabangan ang mga tawo sa pagsabot kon nganong gitugotan ni Jehova nga Diyos ang pag-antos?

⁹ Sa dihang imo nang napahimutang kanang sukaranang kahibalo, imong madiskobrehan nga ang namati kanimo andam nang mahibalo kon nganong gitugotan sa Diyos nga magpadayon ang pag-antos. Aron matabangan ka, ang “matinumanon ug maalamong ulipon” nagtaganag daghang bililhong mga basahon. (Mateo 24:45-47) Pananglitan, panahon sa “Diyosnong Pagkamasinugtanon” Distritong Kombensiyon sa 2005/06, giluwatan ang usa ka tract nga nag-ulohang Ang Tanang Pag-antos Matapos Na sa Di-Madugay! Kon kini anaa sa imong pinulongan, nganong dili nimo basahon kini? Sa susama, ang librong Unsay Tinuod nga Gitudlo sa Bibliya?, nga karon anaa na sa 157 ka pinulongan, naggahin ug usa ka kapitulo alang niining hinungdanong pangutana. Gamita gayod kanang mga basahona. Kana nagpatin-aw sa Kasulatanhong sukaranang impormasyon bahin sa isyu sa pagkasoberano sa uniberso nga gipatungha sa Eden ug kon nganong gisulbad ni Jehova ang maong isyu sumala sa iyang gihimo. Hinumdomi usab nga samtang imong gihisgotan ang maong ulohan, imong gipahayag sa namati kanimo ang hinungdanon kaayong matang sa kahibalo. Kini ang kahibalo bahin kang Jehova ug sa iyang kahibulongang mga hiyas.

 Ipasiugda ang mga Hiyas ni Jehova

10. Nganong daghan ang malisdan sa pagsabot bahin sa pagtugot sa Diyos sa pag-antos, ug unsang kahibalo ang makatabang kanila?

¹⁰ Samtang imong tabangan ang mga tawo sa pagsabot kon nganong gitugotan ni Jehova ang mga tawo sa pagmando sa ilang kaugalingon ilalom sa impluwensiya ni Satanas, paningkamoti gayod ang pagpasiugda sa kahibulongang mga hiyas ni Jehova. Nahibalo ang daghang tawo nga ang Diyos gamhanan; sila naanad na sa pagkabati nga gitawag siyang Diyos nga Labing Gamhanan. Bisan pa niana, mahimong malisdan sila pagsabot kon nganong siya wala mogamit sa iyang dakong gahom sa pagtapos dihadiha sa inhustisya ug pag-antos. Mahimong sila wala kaayo makasabot sa ubang mga hiyas ni Jehova, sama sa iyang pagkabalaan, hustisya, kaalam, ug gugma. Si Jehova nagpasundayag niining mga hiyasa sa paaging hingpit nga pagkabalanse. Busa ang Bibliya nag-ingon: “Hingpit ang iyang kalihokan.” (Deuteronomio 32:4) Sa unsang paagi imong ikapasiugda ang maong mga hiyas samtang imong gitubag ang mga pangutana bahin sa maong mga isyu nga sagad gipatungha? Atong hisgotan ang pipila ka pananglitan.

11, 12. (a) Nganong dili posible ang pagpasaylo kang Adan ug Eva sa dihang sila nakasala? (b) Nganong dili itugot ni Jehova ang sala hangtod sa hangtod?

¹¹ Mahimo ba nga gipasaylo lang unta ni Jehova si Adan ug Eva? Dili gayod posible ang pagpasaylo niining kahimtanga. Isip hingpit nga mga tawo, tinuyong gipili ni Adan ug Eva ang pagsalikway sa pagkasoberano ni Jehova ug ang pagdawat sa giya ni Satanas. Dili katingad-anan, walay timailhan nga naghinulsol ang mga rebelde. Bisan pa niana, sa dihang ang mga tawo mangutana kon nganong si Jehova wala lang magpasaylo kanila, sila mahimong mahibulong kon nganong wala lang ipaubos ni Jehova ang iyang sukdanan ug itugot ang paglungtad sa sala ug rebelyon. Ang tubag naglangkit sa hiyas nga maoy bahin gayod sa mismong kinaiyahan ni Jehova—ang iyang pagkabalaan.—Exodo 28:36; 39:30.

¹² Ang pagkabalaan ni Jehova gipasiugdag gatosan ka beses diha sa Bibliya. Hinuon, ikasubong pipila ra ka tawo niining hiwi nga kalibotan ang nakasabot nianang hiyasa. Si Jehova hinlo, putli, ug nabulag sa tanang makasasala. (Isaias 6:3; 59:2) Kon bahin sa sala, siya naghikay nag paagi sa pagtabon niana, sa pagpala niana, apan dili niya itugot kana hangtod sa hangtod. Kon kinabubut-ong itugot ni Jehova ang sala hangtod sa hangtod, wala kitay paglaom sa umaabot. (Proverbio 14:12) Sa iyang tinudlong panahon, ipasig-uli ni Jehova ang tanang linalang sa balaang kahimtang. Kini segurado kay kini ang kabubut-on sa Usa nga Balaan.

13, 14. Nganong wala lang laglaga ni Jehova ang mga rebelde sa Eden?

¹³ Mahimo bang gilaglag lang unta ni Jehova ang mga rebelde sa Eden ug siya naglalang pag-usab ug mga tawo? Siya may gahom gayod sa pagbuhat niana; ang maong gahom hapit na niyang gamiton sa paglaglag sa tanang daotan. Mahibulong tingali ang pipila, ‘Nganong wala niya kana himoa sa dihang tulo pa lang ang makasasala sa uniberso? Dili ba masanta unta ang pagkaylap sa sala ug sa tanang kasakitan nga atong nakita sa kalibotan?’ Nganong wala kana himoa ni Jehova? Ang Deuteronomio 32:4 nag-ingon: “Ang tanan niyang dalan hustisya.” Dulot kaayo ang pagbati ni Jehova bahin sa hustisya. Ngani, “si Jehova mahigugmaon sa hustisya.” (Salmo 37:28) Tungod sa iyang gugma sa hustisya, wala dayon laglaga ni Jehova ang mga rebelde sa Eden. Ngano?

¹⁴ Ang pagrebelde ni Satanas nagpatunghag usa ka isyu bahin sa pagkamatarong sa paagi sa pagmando sa Diyos. Tungod sa pagbati ni Jehova bahin sa hustisya, kinahanglang tubagon kana nga gipasukad sa hustisya. Ang dihadihang paglaglag sa mga rebelde, bisan pag angay gayod, dili makahatag sa maong tubag. Kadto makahatag untag dugang ebidensiya sa pagkalabaw sa gahom ni Jehova, apan ang giduhaduhaan dili mao ang iyang gahom. Dugang pa, gipahayag na ni Jehova ang iyang katuyoan kang Adan ug Eva. Sila magpatungha gayod ug mga anak ug pun-on ang yuta, gamhan kini, ug but-an ang tanang linalang sa yuta. (Genesis 1:28) Kon si Jehova naglaglag lang kang Adan ug Eva, makawang ang iyang gipahayag nang katuyoan bahin sa mga tawo. Tungod sa hustisya ni Jehova, dili gayod ikatugot ang maong sangpotanan tungod kay ang iyang katuyoan kanunayng matuman.—Isaias 55:10, 11.

15, 16. Kon ang mga tawo mosugyot ug kapuling “mga solusyon” sa isyu nga gipatungha sa Eden, sa unsang paagi makatabang kita kanila?

 ¹⁵ May usa ba sa uniberso nga makadumala sa rebelyon sa mas maalamong paagi kay kang Jehova? Ang pipila ka tawo tingali mosugyot sa ilang kaugalingong “mga solusyon” alang sa rebelyon sa Eden. Apan sa pagbuhat niana, dili ba ilang gipasabot nga sila makahunahuna ug mas maayong mga paagi sa pagdumala sa isyu? Mahimong buhaton nila kana nga walay daotang motibo, apan wala sila makasabot kang Jehova ug sa iyang makapahinganghang kaalam. Sa pagsulat ngadto sa mga Kristohanon sa Roma, si apostol Pablo nagsusi pag-ayo sa kaalam sa Diyos, lakip na sa “sagradong tinago” maylabot sa katuyoan ni Jehova sa paggamit sa Mesiyanikong Gingharian aron matubos ang matinumanong mga tawo ug mabalaan ang Iyang ngalan. Unsay pagbati ni Pablo bahin sa kaalam sa Diyos nga nagmugna sa maong katuyoan? Gitiklopan sa apostol ang iyang sulat niining mga pulonga: “Ngadto sa Diyos, ang bugtong maalamon, ang himaya pinaagi ni Jesu-Kristo hangtod sa kahangtoran. Amen.”—Roma 11:25; 16:25-27.

¹⁶ Nasabtan ni Pablo nga si Jehova mao ang “bugtong maalamon”—ang adunay kinalabwang kaalam sa uniberso. Kinsa bang dili-hingpit nga tawo ang makahunahuna ug mas maayong paagi sa pagdumala sa bisan unsang suliran—labi na ang labing lisod nga pagsupak sa kaalam sa Diyos nga gihimo sukad? Nan, angay natong tabangan ang mga tawo aron ilang mabatonan ang samang pagtahod alang sa Diyos nga maoy “maalamon sa kasingkasing.” (Job 9:4) Kon mas masabtan nato ang kaalam ni Jehova, mas mosalig kita nga ang iyang paagi sa pagdumala sa mga butang mao ang labing maayo.—Proverbio 3:5, 6.

Pag-ila sa Labing Hinungdanong Hiyas ni Jehova

17. Sa unsang paagi ang mas dakong pagsabot sa gugma ni Jehova makatabang niadtong nabalaka sa pagtugot sa Diyos sa pag-antos?

¹⁷ “Ang Diyos gugma.” (1 Juan 4:8) Pinaagi nianang makapadaning mga pulong, ang Bibliya nagpaila sa labing hinungdanong hiyas ni Jehova, nga labing madanihon sa iyang tanang hiyas ug labing makapahupay alang niadtong nabalaka tungod sa pagkaylap sa pagkadaotan. Si Jehova nagpakitag gugma diha sa tanang bahin sa iyang paagi sa pagdumala sa malaglagon kaayong puwersa sa sala diha sa iyang kalalangan. Ang gugma nagtukmod kang Jehova sa paghatag ug paglaom ngadto sa makasasalang mga anak ni Adan ug Eva, nga nagtagana kanilag paagi sa pagduol Kaniya ug pagdangat sa inuyonang relasyon uban Kaniya. Ang gugma nagtukmod sa Diyos sa pagtaganag lukat nga magpaposible sa bug-os nga kapasayloan sa mga sala ug kapasig-ulian sa hingpit, walay-kataposang kinabuhi. (Juan 3:16) Ug ang gugma nagtukmod kaniya sa pagpailob sa katawhan, nga naghatag ug daghan kaayong higayon aron ilang isalikway si Satanas ug pilion si Jehova ingong ilang Soberano.—2 Pedro 3:9.

18. Bahin sa unsa nga kita bulahan nga nakasabot, ug unsay atong hisgotan sa sunod artikulo?

¹⁸ Sa dihang ang usa ka pastor nagpahayag sa usa ka panon sa katawhan nga nagtigom sa pagsaulog sa anibersaryo sa usa ka pag-atake sa mga terorista diin daghan ang namatay, siya miingon: “Wala kita mahibalo sa katarongan nga gitugotan sa Diyos nga magpadayon ang pagkadaotan ug pag-antos.” Pagkamakapasubo! Dili ba kita bulahan nga nakasabot niining ulohana? (Deuteronomio 29:29) Ug sanglit si Jehova maalamon, may hustisya, ug mahigugmaon, kita nahibalo nga ang tanang pag-antos hapit na niyang taposon. Sa pagkatinuod, nagsaad siya nga iya kanang himoon. (Pinadayag 21:3, 4) Apan, komosta kadtong tanan nga namatay sa nangaging mga siglo? Tungod ba sa paagi ni Jehova sa pagdumala sa isyu sa Eden, sila wala nay paglaom? Dili ingon niana. Tungod sa iyang gugma, iyang gitagana usab ang pagkabanhaw alang kanila. Kana ang ulohan sa sunod artikulo.

Unsaon Nimo Pagtubag?

• Unsay atong ikasulti sa tawo nga mangutana kon nganong gitugotan sa Diyos ang pag-antos?

• Sa unsang paagi dayag ang pagkabalaan ni Jehova ug ang iyang hustisya diha sa iyang paagi sa pagdumala sa mga rebelde sa Eden?

• Nganong angay natong tabangan ang mga tawo aron mas masabtan nila ang gugma ni Jehova?

[Mga Pangutana sa Pagtuon]

[Hulagway sa panid 21]

Tinguhaa ang pagtabang niadtong nabalaka bahin sa pag-antos diha sa kalibotan

[Mga hulagway sa panid 23]

Ang matinuohong si David ug Habacuc may sinserong mga pangutana sa Diyos