Nahadlok Ka ba sa Umaabot?

ADUNAY daghang hinungdan ang kahadlok sa mga tawo. Pananglitan, nahadlok ang pipila kon unsay mahitabo sa kalikopan sa planetang yuta sa umaabot. “Ang katingad-anang mga hitabo sama sa sobrang kainit, mga bagyo, baha, sunog, pagkatunaw sa dagkong yelo nagpasabot nga ang klima sa tibuok yuta grabeng nadaot,” nag-ingon ang magasing Time sa Abril 3, 2006.

Niadtong Mayo 2002, giluwatan sa Programa sa Hiniusang Kanasoran Bahin sa Kalikopan ang usa ka taho nga nag-ulohang “Ang Panglantaw Bahin sa Kalikopan sa Tibuok Yuta-3” Kadto giandam sa nagtinabangay nga kapig 1,000 ka tawo. Sumala sa usa ka balita, kadto nag-ingon: “Midangat na ang planeta sa kritikal nga mga punto sanglit ang nahimong mga desisyon grabeng nakaapektar karon sa kalasangan, kadagatan, kasubaan, kabukiran, ihalas nga kahayopan ug mga tanom ug sa ubang kahikayan sa kalikopan nga gisaligan sa katawhan karon ug sa umaabot.”

Ang kahimtang karon sa kalikopan sa tibuok yuta usa lang ka hinungdan sa kabalaka. Ang katawhan sa tibuok kalibotan nagkinabuhi karon nga nahadlok sa pag-atake sa mga terorista. Ang diputado direktor sa mga kalihokan sa kinatas-ang ahensiya sa pagpangespiya sa Canada miingon: “Dili kita makatulog sa magabii tungod sa pagkabalaka bahin sa mga panghulga nga wala nato hisayri kon kanus-a ug kon sa unsang paagi mahitabo.” Gani, bisan ang pagtan-aw lang sa balita sa telebisyon sa gabii makapabalaka na kaayo!

Ang daghang kugihan ug hingkod nang mga tawo nahadlok nga mawad-an sa ilang trabaho. Ang pagkapahawa sa trabaho, pagsirado sa mga planta, panag-indigay diha sa trabahoan, ug sobrang serbisyo nga gipangayo sa mga amo makamugnag kawalay-kasegurohan bahin sa trabaho. Ang mga tin-edyer nagsagubang sa kahadlok nga isalikway sa ilang mga katalirongan. Daghang bata ang lagmit nahadlok nga ang ilang mga ginikanan wala gayod mahigugma kanila. Apan unsay ilang gibati bahin sa mga kahimtang sa  kalibotan alirong kanila? “Alang sa mga batan-on ug way-kasinatian, ang kalibotan sa gawas sa ilang balay usahay daw samag dakong makahahadlok nga dapit,” matod sa usa ka mabalak-ong inahan. Ug ang daghang ginikanan nabalaka bahin sa epekto sa pagkadaot sa moral sa kalibotan diha sa mga tawong ilang gihigugma, ilabina sa ilang mga anak.

Ang mga tigulang sagad mahadlok nga mahulog sa hagdanan o atakehon sa dalan. Oo, “sila mangahadlok lamang gani sa kon unsay hataas, ug adunay mga kalisang sa dalan.” (Ecclesiastes 12:5) Anaa ang kahadlok bahin sa grabeng sakit. Tungod sa mga taho bahin sa makapatayng mga kagaw sa trangkaso, mga kanser, ug mananakod nga mga sakit, kita lagmit mahadlok matakdan sa bag-o ug katingad-anang sakit nga makapainutil o makapatay kanato ug sa atong pamilya. Sa pagkatinuod, sa dihang atong makita nga masakit ug maluya ang kanhi himsog ug abtik nga mga tawo, di kalikayang mabalaka kita nga mahitabo kana kanato o sa atong mga minahal. Ug makapasubo gayod ang pagtan-aw sa mga mata sa mga masakiton ug pagkakita sa ilang pagkadesperado!

Tungod kay apektado sa daghang hinungdan sa kahadlok, makataronganon ba nga magmalaomon kita bahin sa umaabot? Aduna bay makatabang aron mabatonan nato ang positibong panglantaw? Ang sunod artikulo motubag niining mga pangutanaha.

[Picture Credit Line sa panid 3]

© Jeroen Oerlemans/Panos Pictures