Nganong Kinahanglan man Kitang Motambong sa mga Tigom?

SA KALIT lang, si Christine gibiyaan sa iyang bana human sa 20 ka tuig nga panagtiayon. Nag-inusara na lang si Christine sa pagmatuto sa iyang pito ka anak nga lalaki ug usa ka anak nga babaye. Sila nagpangedaron ug 7 ngadto sa 18 anyos. “Ako na lang karon ang mohimo sa tanang hinungdanong mga desisyon,” matod niya. “Ako nabug-atan niini nga kaakohan ug nangandoy nga duna untay motabang ug mogiya kanako.” Diin man siya nakakaplag sa tabang nga iyang gikinahanglan?

Si Christine miingon: “Ang Kristohanong mga tigom maoy nakatabang kanako ug sa akong pamilya. Panahon sa mga tigom, kami nakadawat ug pagdasig gikan sa among mga higala ug giya gikan sa Pulong sa Diyos. Ang regular nga pagtambong sa mga tigom nakatabang kanamo sa tanang hinungdanong bahin sa among pamilyahanong kinabuhi.”

Niining “makuyaw nga mga panahong lisod sagubangon,” kitang tanan kinahanglang mosagubang ug nagkalainlaing mga pagsulay. (2 Timoteo 3:1) Sama kang Christine, mahimo mong isipon ang mga tigom sa mga Saksi ni Jehova nga hinungdanon sa imong pagtuo, usa ka importanteng bahin sa imong pagsimba kang Jehova. Ang lima ka tigom sa kongregasyon nga gieskedyul kada semana makadasig gayod sa imong gugma alang sa Diyos, makapalig-on sa imong paglaom alang sa umaabot, ug makahatag kanimo ug binase-sa-Bibliya nga giya kon unsaon pag-atubang ang mga pagsulay.

Apan, may pipila nga nalisdan sa pagtambong kanunay sa mga tigom. Sila kapoy na kaayo inigkatapos sa adlaw, ug ang pag-ilis ug haom nga sinina para sa tigom ug ang pagbiyahe paingon didto morag budlay na kaayong himoon. Nalisdan usab ang uban sa pagtambong kanunay sa mga tigom tungod sa ilang eskedyul sa trabaho. Aron matambongan ang tanang tigom, kinahanglang agwantahon na lang nila ang gamayng suweldo o palabihong mawad-an na lag trabaho. Ang uban lagmit dili motambong sa mga tigom tungod kay nagtuo sila nga ang usa ka matang sa paglingawlingaw mas makapahayahay kay sa pagpakig-uban sa kongregasyon.

Busa, unsa ang lig-ong mga katarongan sa pagtambong sa Kristohanong mga tigom? Unsay angay mong himoon aron madasig ka sa maong mga tigom? Aron matabangan kita sa pagtubag niining mga pangutanaha, atong susihon ang mainitong imbitasyon ni Jesus nga narekord diha sa Mateo 11:28-30. Siya miingon: “Umari kanako, kamong tanang nabudlayan ug nabug-atan, ug ako magapalagsik kaninyo. Isangon diha kaninyo ang akong yugo ug magtuon gikan kanako, kay ako malumog-buot ug mapainubsanon sa kasingkasing, ug kamo makakaplag ug kahayahay alang sa inyong mga kalag. Kay ang  akong yugo masayon ug ang akong luwan magaan.”

“Umari Kanako”

Si Jesus miingon: “Umari kanako.” Ang usa ka paagi sa pagsanong niana nga imbitasyon mao ang pagtambong kanunay sa mga tigom. Adunay maayong katarongan sa pagtambong, kay sa laing okasyon si Jesus miingon: “Diin gani adunay duha o tulo nga nagkatigom sa akong ngalan, anaa ako sa ilang taliwala.”—Mateo 18:20.

Sa unang siglo, si Jesus personal nga nagdapit sa lainlaing mga tawo sa pagsunod kaniya. Busa siya naghatag kanila ug kahigayonan nga makapahimulos sa suod nga panag-ubanay uban kaniya. Dihay pipila nga midawat dihadiha. (Mateo 4:18-22) Ang uban nagtugot sa materyal nga mga tinguha sa pagpugong kanila sa pagdawat sa maong imbitasyon. (Marcos 10:21, 22; Lucas 9:57-62) Alang niadtong misunod kang Jesus, siya nagpasalig: “Dili kamo ang nagpili kanako, apan ako ang nagpili kaninyo.”—Juan 15:16.

Human mamatay ug mabanhaw si Kristo, siya dili na presente sa pisikal uban sa iyang mga tinun-an. Apan siya nakig-uban gihapon kanila sa diwa nga iyang gigiyahan ang ilang kalihokan ug gibantayan ang ilang sanong sa iyang tambag. Pananglitan, mga 70 ka tuig human sa pagkabanhaw ni Jesus, siya naghatag ug tambag ug pagdasig ngadto sa pito ka kongregasyon sa Asia Minor. Ang iyang mga komento nagpakita nga siya nahibalo gayod sa maayong mga hiyas ug mga kahuyangan sa tagsatagsa ka indibiduwal sa maong mga kongregasyon.—Pinadayag 2:1–3:22.

Si Jesus interesado gihapon kaayo sa matag usa sa iyang mga tinun-an. Siya nagsaad: “Tan-awa! ako magauban kaninyo sa tanang adlaw hangtod sa kataposan sa sistema sa mga butang.” (Mateo 28:20) Kita nagkinabuhi na karon sa panahon sa kataposan, ug busa kita kinahanglang molihok sumala sa imbitasyon ni Jesus sa pagsunod kaniya. Lakip sa ubang mga butang, kini nagkinahanglan nga kita motambong kanunay sa mga tigom. Gusto ni Jesus nga kita mamati ug ‘matudloan niya’ pinaagi sa binase-sa-Bibliya nga mga pagtuon ug mga pakigpulong nga kanunayng gihatag diha sa mga tigom. (Efeso 4:20, 21) Misanong ka ba sa imbitasyon ni Jesus: “Umari kanako”?

“Kamong Tanang Nabudlayan ug Nabug-atan”

Ang usa ka hinungdanong katarongan sa pagtambong sa Kristohanong mga tigom mao ang pagdawat ug pagdasig. (Hebreohanon 10:24, 25) Daghan kanato ang “nabudlayan ug nabug-atan” gayod sa lainlaing mga paagi. Tingali ikaw nabug-atan sa personal nga mga kabalaka, sama sa mga suliran sa panglawas. Sa Kristohanong mga tigom, ikaw makapahimulos sa pagdinasigay. (Roma 1:11, 12) Pananglitan, makadungog kag mga komento nga makapalig-on sa imong espirituwalidad, mapahinumdoman sa binase-sa-Bibliya nga paglaom, ug makamatikod sa pagtuo sa uban nga nag-antos sa mga pagsulay. Kining tanan makatabang kanimo sa pagsagubang ug paglantaw sa imong mga suliran sa timbang nga paagi.

Tagda kining mga komento sa usa ka Kristohanong babaye nga nag-antos sa usa ka grabeng sakit. “Kinahanglan kong moestar ug dugaydugay sa ospital tungod ning akong sakit,” matod niya. “Ang pagtambong sa mga tigom human maospital medyo lisod, apan mapuslanon kini kanako. Ang kainit ug gugma sa mga kaigsoonan makapalipay kanako, ug ang pagpanudlo ug pagtultol nga gihatag ni Jehova ug ni Jesus naghatag ug katuyoan sa akong kinabuhi.”

“Ang Akong Yugo Masayon ug ang Akong Luwan Magaan”

Matikdi nga sa teksto nga atong gihisgotan, si Jesus miingon: “Magtuon gikan kanako.” Pinaagi sa pagtuon gikan kang Jesus, kita mahimong iyang mga tinun-an, ug atong gisangon ang iyang yugo sa dihang kita nagpahinungod sa Diyos ug nagpabawtismo. (Mateo 28:19, 20) Ang regular nga pagpakigbahin sa mga tigom maoy hinungdanon aron kita makapabiling mga tinun-an ni Jesus. Ngano? Tungod kay panahon sa Kristohanong mga tigom kita gitudloan bahin kang Jesus, sa iyang mga pagtulon-an, ug sa iyang mga pamaagi.

Unsa ang luwan nga gusto ni Kristo nga atong pas-anon? Kini nga luwan mao gihapon ang luwan nga iyang gipas-an mismo—ang pribilehiyo sa pagbuhat sa kabubut-on sa Diyos. (Juan 4:34; 15:8) Ang pagtuman sa mga sugo sa Diyos nagkinahanglan ug paningkamot, apan kini nga luwan dili kaayo bug-at. Kini mahimong morag bug-at kon ato kining  pas-anon sa kaugalingon natong kusog. Apan, kon kita moampo alang sa espiritu sa Diyos ug mokaon sa espirituwal nga pagkaon nga gidalit panahon sa mga tigom, kita makadawat ug “gahom nga labaw sa kasarangan” nga gikan sa Diyos. (2 Corinto 4:7) Pinaagi sa pagpangandam alang sa mga tigom ug pagpakigbahin niana, mas molig-on ang atong gugma alang kang Jehova. Ug kon kita napalihok pinaagi sa maong gugma, ang mga sugo sa Diyos “dili mabug-at.”—1 Juan 5:3.

Sa katibuk-an, ang mga tawo nag-atubang ug mga problema nga sama sa pagpangitag pangabuhian, pagsagubang sa mga balatian, ug pagdumala sa personal nga mga problema. Apan, aron masagubang kini sa malamposong paagi, dili kita mosalig sa kaalam lamang sa tawo. Ang mga tigom sa kongregasyon motabang kanato nga ‘dili na mabalaka,’ tungod kay si Jehova motagana sa atong mga gikinahanglan ug motabang kanato sa pagsagubang sa maong mga problema. (Mateo 6:25-33) Sa pagkatinuod, ang Kristohanong mga tigom maoy pagpahayag sa gugma sa Diyos alang kanato.

“Ako Malumog-Buot ug Mapainubsanon sa Kasingkasing”

Batasan ni Jesus ang pag-adto sa sinagoga, diin gihisgotan ang Pulong sa Diyos. Sa usa ka higayon niana, gikuha ni Jesus ang linukot nga basahon ni Isaias ug gibasa kini: “Ang espiritu ni Jehova ania kanako, tungod kay siya nagdihog kanako aron sa pagpahayag sa maayong balita ngadto sa mga kabos, siya nagpadala kanako aron sa pagwali sa kagawasan ngadto sa mga binihag ug sa kapasig-ulian sa panan-aw ngadto sa mga buta, aron sa pagpalakat sa mga dinaogdaog uban ang kagawasan, aron sa pagwali sa dalawatong tuig ni Jehova.” (Lucas 4:16, 18, 19) Pagkamakapalipay gayod unta nga makadungog kang Jesus nga nagpadapat niadtong mga pulonga nga nag-ingon: “Karong adlawa kining kasulatan nga bag-o lang ninyo nga nadungog natuman.”—Lucas 4:21.

Si Jesus, ang malumog-buot nga “pangulong magbalantay,” mao gihapon ang nagbantay sa espirituwalidad sa iyang mga sumusunod. (1 Pedro 5:1-4) Ubos sa iyang pagtultol, “ang matinumanon ug maalamong ulipon” nagtudlo ug mga lalaki ingong mga magbalantay diha sa mga kongregasyon sa mga Saksi ni Jehova sa tibuok kalibotan. (Mateo 24:45-47; Tito 1:5-9) Kining mga tawhana ‘nagbantay sa kongregasyon sa Diyos’ uban ang kalumo ug naghatag ug maayong panig-ingnan pinaagi sa pagtambong kanunay sa mga tigom. Imong mapakita ang imong pagpabili niining “mga gasa nga mga lalaki” pinaagi sa pagtambong sa mga tigom, diin ikaw makadasig sa uban pinaagi sa imong pagkaatua didto ug sa imong pagpakigbahin.—Buhat 15:30-33; 20:28; Efeso 4:8, 11, 12.

“Kamo Makakaplag ug Kahayahay Alang sa Inyong mga Kalag”

Sa dihang motambong sa Kristohanong mga tigom, sa unsang paagi imong maseguro nga kining mga tigoma makapadasig gayod? Ang usa ka paagi mao ang pagpadapat sa tambag ni Jesus: “Tagda kon giunsa ninyo pagpatalinghog.” (Lucas 8:18) Ang mga tawo nga gusto gayong makakat-on naminaw pag-ayo kang Jesus. Ilang gihangyo si Jesus sa pagpatin-aw sa iyang mga ilustrasyon ug, tungod niana, sila mas nakasabot pa.—Mateo 13:10-16.

Ikaw makasundog sa maong gutom-sa-espirituwal nga mga tawo pinaagi sa pagpaminaw pag-ayo sa mga pakigpulong sa atong mga tigom. (Mateo 5:3, 6) Aron matabangan ka nga masentro ang imong hunahuna, paningkamoting masundan ang mga pangatarongan ug mga argumento sa mamumulong. Suknaa ang imong kaugalingon sa mga pangutanang sama niini: ‘Sa unsang paagi akong ikapadapat kining impormasyona sa akong kinabuhi? Sa unsang paagi akong magamit kini sa pagtabang sa uban? Sa unsang paagi akong ikailustrar kining puntoha?’ Dugang pa, tan-awa ang mga teksto nga gisitar sa mamumulong nga nagpaluyo sa pangunang mga punto nga iyang gihisgotan. Kon ikaw mas igmat sa pagpatalinghog, ang mga tigom mahimong mas makapadasig.

Human sa tigom, hisgoti ang programa sa uban. Isentro ang pagtagad sa maong pakigpulong ug kon sa unsang paagi kini mapadapat. Ang makapadasig nga panagkabildo makapahimo sa mga tigom nga makapalagsik gayod.

Kita aduna gayoy maayong mga katarongan sa pagtambong sa mga tigom. Human marepaso ang mga kaayohan nga bag-o lang nahisgotan, nganong dili pangutan-on ang imong kaugalingon, ‘Sa unsang paagi ako misanong sa imbitasyon ni Jesus: “Umari kanako”?’

[Mga hulagway sa panid 11]

Ang ubang mga kalihokan nakababag ba sa imong pagtambong sa mga tigom?