Pagkaplag ug Paglaom Diha sa Kalibotan nga Napunog Kasakitan

“ANG ordinaryong mga tawo adunay mas dakong katakos sa paghimog mapuslanong butang alang sa katilingban ug sa pagsulbad sa kasagarang mga suliran kay sukad masukad sa kasaysayan sa tawo.” Kanay gisulti sa kaniadto Presidente Bill Clinton sa T.B. panahon sa usa ka komperensiya sa Ottawa, Canada, niadtong Marso 2006. Mihinapos siya pag-ingon nga ang maayong kabubut-on nagakaugmad taliwala sa mga tawo sa lainlaing mga nasod sukad sa tsunami niadtong 2004, ug siya malaomong miingon nga sa pagkakaron ang kalibotan nakasinati sa “panahon sa pagsaliganay nga wala pa sukad mahitabo.”

Ato bang madahom nga tungod sa kinaiyanhong mga katalagman, ang mga tawo sa bisan diin molihok sa pagkab-ot sa mas maayong kaugmaon? Ang “pagsaliganay nga wala pa sukad mahitabo” mao bay kasaligang pasikaranan aron makalaom kitag kaugmaon nga may matuod nga kalinaw ug malungtarong kasegurohan?

Tinubdan sa Matuod nga Paglaom

Ang taas nga kasaysayan sa pagpaningkamot sa tawo latas sa kapig unom ka milenyo nagpasundayag nga ang mga tawo balikbalik nga nagpakyas sa usag usa. Nan, makataronganon  gayod nga gitambagan kita sa inspiradong Kasulatan: “Ayaw ibutang ang inyong pagsalig sa mga hamili, ni sa anak sa yutan-ong tawo, nga kaniya walay kaluwasan.” (Salmo 146:3) Ang pagbutang sa atong paglaom diha sa mga organisasyon niining kalibotana, sa materyal nga mga butang, ug sa mga tingusbawan niini mosangpot lamang sa kahigawad. Ngano? Tungod kay “ang kalibotan nagakahanaw ingon man ang tinguha niini.”—1 Juan 2:17.

Hinuon, ang Diyos mao ang dili-mapakyas nga gilaoman sa matarong nga mga tawo sulod sa daghang kasiglohan. Ang Bibliya nagtawag kaniyang “ang paglaom sa [karaang] Israel” ug ‘ang paglaom sa katigulangan sa Israel,’ ug aduna kiniy daghang pahayag bahin sa paglaom ug pagsalig kaniya. (Jeremias 14:8; 17:13; 50:7) Sa pagkatinuod, ang Kasulatan nagdasig kanato nga ‘molaom kang Jehova.’—Salmo 27:14.

Ang Proverbio 3:5, 6 nag-awhag kanato: “Salig kang Jehova sa bug-os mong kasingkasing ug ayaw pagsalig sa kaugalingon mong pagsabot. Sa tanan mong mga dalan tagda siya, ug siya magatul-id sa imong mga alagianan.” Aduna kay bug-os nga katarongan sa pagbutang ug hingpit nga pagsalig sa maong saad kay si Jehova nga Diyos dili mausab, kasaligan, ug kanunayng motuman sa iyang saad. (Malaquias 3:6; Santiago 1:17) Iyang gitinguha ang labing maayo alang kanimo, ug kon ikaw kanunayng mosunod sa giingon diha sa iyang Pulong, ang Bibliya, kana malamposong mogiya kanimo latas niining makahahadlok nga mga panahon.—Isaias 48:17, 18.

Ang tawo nga sa bug-os kasingkasing mosunod sa giya sa Diyos makasalig niining saara: “Ayaw kahadlok, kay ako uban kanimo. Ayaw iliraw ang imong panan-aw, kay ako imong Diyos. Ako magapalig-on kanimo. Ako sa pagkatinuod magatabang kanimo. Ako sa pagkatinuod magahawid kanimo sa akong tuong kamot sa pagkamatarong.” (Isaias 41:10) Ang tim-os nga pag-ampo duyog ang pagpamalandong sa maong pasalig makapahupay gayod sa tanang tinuod nga nahigugma kang Jehova nga Diyos, kay kini motabang kanila sa pagsagubang sa lisod nga mga kahimtang ug sa mga kabalaka.

Tagda si Andrea, usa ka Saksi ni Jehova ug inahan sa duha ka anak. Siya nag-ingon: “Pinaagi lamang sa pag-ampo ug pagpamalandong sa mga saad ni Jehova nga nakabaton ako sa kusog nga magpalig-on pag-usab kanako inig-abot sa mga yugto sa kawalay-kasegurohan sa akong kinabuhi. Kon isipon ko kanunay si Jehova ingong dili mausab, malig-ong saliganan sa akong kinabuhi, mas sayon nga magmalig-on kanunay.”

Lig-ona ang Imong Paglaom Kang Jehova

Sa pagpasiugda nga bililhon ang paglaom kang Jehova, usa ka salmista miingon: “Ang dagayang pakigdait iya niadtong nahigugma sa imong balaod, ug alang kanila walay kapandolan.” (Salmo 119:165) Ang sinserong pagtuon sa Pulong sa Diyos makatabang gayod sa pagpuno sa imong kaisipan ug kasingkasing sa makaayo-sa-espirituwal ug makapalig-ong ‘mga butang matuod, maugdang, matarong, maputli, hiligugmaon, dungganon, may pagkahamili, ug dalayegon.’ Kon maningkamot ka gayod sa pagpamati, pagkat-on, pagdawat, ug pagbuhat nianang mga butanga, “ang Diyos sa kalinaw magauban kaninyo.”—Filipos 4:8, 9.

Sa pagpahayag pinasukad sa personal nga kasinatian sa daghang katuigan, si John miingon: “Aron mabag-o ang akong pagbati bahin sa kaugmaon, hinungdanong makat-onan ko nga gikinahanglan ang dako kaayong kausaban sa akong personalidad ug panghunahuna aron makalaom ko sa pag-ugmad ug relasyon uban sa hingpit, dili-makitang Diyos. Pinaagi lamang sa pagkahimong mahunahunaon sa Diyos nga akong naugmad ang maong relasyon. Kana naglakip sa pagkausab ngadto sa paghunahuna kanunay sa Diyos, nga kanunayng naghinumdom sa mga panghunahuna sa Diyos bahin sa mga butang pinaagi sa pagbasa sa iyang inspiradong Pulong ug pagpamalandong niana.”

Kon ikaw moinom sa makapapresko, mohatag-ug-kinabuhi nga tubig sa kamatuoran nga anaa sa inspiradong Kasulatan, imong mapadapat ang matuod ug nasulayang paagi sa pagsumpo sa nagdagsang nga daotang mga butang nga gipahayag adlaw-adlaw pinaagi sa media. Ang pagpadapat sa gisulti diha sa Bibliya makapalig-on sa bugkos sa inyong pamilya ug makapamenos sa kabalaka. Dugang pa, ang Diyos nagsaad nga andam siyang ‘magpakita sa iyang kusog alang niadtong kansang kasingkasing maoy bug-os alang kaniya.’ (2 Cronicas 16:9) Iyang sulbaron ang mga butang sa paagi nga wala kay angayng kahadlokan.

Si Pinehas, kinsa nakalabang sa gubat ug sa mga pagpatay ug daghang katawhan, nag-ingon: “Ako nakakat-on sa pagtugyan sa akong kinabuhi diha  kang Jehova. Ang pagsunod sa mga prinsipyo sa Bibliya nakatabang kanako sa paglikay sa daghang suliran.” Kon ikaw mosalig gayod kang Jehova nga Diyos, siya makatabang kanimo sa pagkatkat sa paril sa kalisdanan. (Salmo 18:29) Ang usa ka bata nga suod sa iyang mga ginikanan bug-os nga makasalig kanila ug mobatig kasegurohan sa ilang pagkamatinagdanon bisan pag siya masakit o makasugamak ug suliran. Kana usab ang imong bation kon maningkamot ug modawat ka sa pagdapit nga molaom kang Jehova.—Salmo 37:34.

Lig-ong Patukoranan sa Paglaom

Giingnan ni Jesu-Kristo ang iyang mga sumusunod: “Mag-ampo kamo sa ingon niini nga paagi: ‘Amahan namo nga anaa sa mga langit, pagabalaanon unta ang imong ngalan. Paanhia ang imong gingharian. Matuman unta ang imong kabubut-on, maingon sa langit, mao man usab sa yuta.’” (Mateo 6:9, 10) Kanang langitnong Gingharian—usa ka kagamhanan diha sa mga kamot ni Jesu-Kristo—maoy paagi sa Diyos sa pagpahayag sa Iyang angayang pagkasoberano sa yuta.—Salmo 2:7-12; Daniel 7:13, 14.

Ang daghang hinungdan sa kahadlok nga nag-apektar sa matag bahin sa kinabuhi karon maoy tin-awng ilhanan nga kinahanglang mosalga ang Diyos. Ikalipay nga hapit na siyang mosalga! Si Jesu-Kristo, nga karon gipalingkod na sa Diyos ingong Mesiyanikong Hari, gitugyanan ug awtoridad aron bayawon ang pagkasoberano ni Jehova ug balaanon ang Iyang ngalan. (Mateo 28:18) Sa dili na madugay, iliso na sa Gingharian ang pagtagad sa yuta aron wad-on ang tanang hinungdan sa kahadlok ug kabalaka. Ang Isaias 9:6 naghisgot sa mga katakos ni Jesus nga nagpakita nga siya angayang Magmamando nga makawagtang sa atong mga kahadlok. Pananglitan, siya ginganlag “Amahang Walay Kataposan,” “Kahibulongang Magtatambag,” ug “Prinsipe sa Pakigdait.”

Tagda ang mabinationg mga pulong nga “Amahang Walay Kataposan.” Sa ingon si Jesus adunay gahom ug awtoridad—ingon man tinguha—sa paghatag sa masinugtanong mga tawo ug kalaoman nga mabuhing walay kataposan sa yuta pinasukad sa iyang halad lukat. Nagpasabot kini nga sila sa kataposan mapagawas gikan sa sala ug pagkadili-hingpit nga napanunod gikan sa makasasalang unang tawo, si Adan. (Mateo 20:28; Roma 5:12; 6:23) Gamiton usab ni Kristo ang iyang hinatag-sa-Diyos nga awtoridad aron banhawon ang daghan nga namatay.—Juan 11:25, 26.

Sa dinhi si Jesus sa yuta, siya nagpamatuod nga “Kahibulongang Magtatambag.” Tungod sa iyang kahibalo bahin sa Pulong sa Diyos ug sa iyang talagsaong pagsabot sa tawhanong kinaiya, si Jesus nahibalo kon unsaon pagsulbad ang mga suliran sa adlaw-adlaw nga kinabuhi. Sukad sa iyang pagkaentrono sa langit, si Kristo nagpadayon nga “Kahibulongang Magtatambag,” nga nagsilbing pangunang persona diha sa paagi sa pagpakigkomunikar ni Jehova sa mga tawo. Ang tambag ni Jesus, nga natala sa Bibliya, kanunayng maalamon ug walay sayop. Ang pagkahibalo ug pagtuo niini mahimong mogiya kanimo ngadto sa usa ka kinabuhing may kasegurohan ug walay makaparalisar nga kahadlok.

Ang Isaias 9:6 nagpaila usab kang Jesus ingong “Prinsipe sa Pakigdait.” Sa maong katungdanan, hapit nang gamiton ni Kristo ang iyang gahom sa pagwagtang sa tanang walay panag-angay—sa natad sa politika, sa katilingban, ug sa ekonomiya. Sa unsang paagi? Pinaagi sa pagsakop sa katawhan ilalom sa malinawong pagmando sa Mesiyanikong Gingharian.—Daniel 2:44.

Ilalom sa pagmando sa Gingharian, ang malungtarong kalinaw mohari sa tibuok yuta. Nganong makapaneguro kita niini? Ang hinungdan gipadayag diha sa Isaias 11:9, diin atong mabasa: “Dili sila [ang mga sakop sa gingharian] magadaot ni magagun-ob sa tibuok nakong bukid nga balaan; tungod kay ang yuta mapuno sa kahibalo kang Jehova ingon sa katubigan nga nagtabon sa dagat mismo.” Sa kataposan, ang tanang tawo sa yuta makabaton ug tukmang kahibalo bahin sa Diyos ug magmasinugtanon kaniya. Makapalipay ba kanimo ang maong kalaoman? Kon mao, ayaw paglangan sa pagbaton ug bililhong “kahibalo kang Jehova.”

Mabatonan mo ang makapalig-on-sa-pagtuo ug mohatag-ug-kinabuhi nga kahibalo bahin sa Diyos pinaagi sa pagsusi kon unsay tinuod nga gitudlo sa Bibliya bahin sa mga panghitabo sa atong adlaw ug sa masanagong kaugmaon nga gisaad diha sa Bibliya. Busa giawhag ka namo sa pagdawat sa libreng programa sa pagtuon sa Bibliya nga gitanyag sa mga Saksi ni Jehova diha sa inyong dapit. Kini maoy paagi sa paghupay sa kahadlok ug pagkaplag sa matuod nga paglaom diha sa kalibotan nga napunog kasakitan.

 [Kahon/​Mga hulagway sa panid 7]

Kon Nganong ang Gingharian Makahatag ug Paglaom

Si Jesu-Kristo, ingong Hari sa Gingharian sa Diyos, gihatagan sa katakos ug katungod sa pagmando sa tibuok kalibotan. (Mateo 28:18) Iyang ipasig-uli ang hingpit nga pagkatimbang sa sistema sa ekolohiya sa yuta. Siya makasumpo usab sa sakit ug balatian. Ang mga milagrong gihimo ni Jesus samtang dinhi sa yuta maoy mga patilaw sa mas talagsaong mga panalangin nga mahitabo ilalom sa iyang pagmando ingong hingpit ug kasaligang Hari. Unsang mga hiyas niining Mesiyanikong Hari nga gilista sa ubos ang makapadani gayod kanimo?

▪ Sayon duolon.—Marcos 10:13-16.

▪ Makataronganon ug dili mapihigon.—Marcos 10:35-45.

▪ Kasaligan ug dili hakog.—Mateo 4:5-7; Lucas 6:19.

▪ Matarong ug matul-id.—Isaias 11:3-5; Juan 5:30; 8:16.

▪ Mahunahunaon, may konsiderasyon, ug mapaubsanon.—Juan 13:3-15.

[Hulagway sa panid 4]

Makakat-on gayod kita sa paglaom kang Jehova pinaagi sa pagbasa ug pagpamalandong sa Bibliya