Ang Gahom sa Dila

ANG gitas-on sa dila sa giraffe moabot ug 45 sentimetros ug kini maunat-unat ug kusgan kaayo sa pagharos ug mga dahon gikan sa mga sanga sa kahoy. Ang dila sa asul nga balyena susama ka bug-at sa usa ka elepante. Handurawa lang ang kusog nga gikinahanglan sa pagpalihok niini!

Ang dila sa tawo morag walay bili kon itandi ang gidak-on, gibug-aton, ug kakusgan niini. Apan, kini mas gamhanan pa. “Kamatayon ug kinabuhi anaa sa gahom sa dila,” nag-ingon ang Bibliya bahin niining gamayng sangkap sa lawas sa tawo. (Proverbio 18:21) Sa pagkatinuod, kapila na ba kita makadungog sa malaglagong gahom sa dila sa tawo nga gigamit sa pagpamakak ug sa pagsultig sayop nga mga testimonya nga nagpahinabog kadaot, kamatayon pa gani, sa inosenteng mga biktima?

Sa susama, ang mga panaghigalaay nga dugay nang naglungtad nangadaot tungod sa masakit nga mga komento. Ang mga pagbati nangahugno tungod sa hait nga sinultihan. “Hangtod kanus-a nga kamo magpalagot sa akong kalag ug magpahugno kanako pinaagi sa mga pulong?” mituaw ang gibutangbutangan pag-ayo nga si Job. (Job 19:2) Ang tinun-ang si Santiago tin-awng naghulagway sa malaglagong gahom sa wala-mapugnging dila. Siya nag-ingon: “Ang dila maoy usa ka gamayng sangkap apan nagapanghambog ug dagkong mga butang. Tan-awa! Pagkagamay sa gikinahanglang kalayo aron sa pagsunog sa dako kaayong kakahoyan! Buweno, ang dila usa ka kalayo.”—Santiago 3:5, 6.

Sa laing bahin, ang gahom sa dila mahimong makasalbar usab ug kinabuhi. Tungod sa mabination ug makahupayng mga pulong, ang pipila naluwas gikan sa depresyon ug paghikog. Nasalbar ang kinabuhi sa mga tig-abusog droga ug bangis nga mga kriminal gikan sa sayong kamatayon sa dihang ilang gisunod ang maayong tambag. Sa pagkatinuod, ang bunga sa dila sa usa ka matarong maoy “usa ka kahoy sa kinabuhi,” ug “ang usa ka pulong nga gisulti sa hustong panahon maoy sama sa mansanas nga bulawan diha sa linilok nga plata.”—Proverbio 15:4; 25:11.

Apan, ang kinamaayohang gamit sa dila maoy alang sa pagdayeg kang Jehova nga Diyos, pagmantala sa maayong balita sa Gingharian sa Diyos, ug pagtudlo sa uban bahin sa bililhong mga kamatuoran sa Bibliya. Ngano? Nag-ingon si Jesus: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.”—Juan 17:3; Mateo 24:14; 28:19, 20.