Giyagyag ang Hinungdan sa Pagkadaotan!

SA UNANG siglo, daghan sa mga Hudiyo ang naghulat sa pag-abot sa gisaad nga Mesiyas. (Juan 6:14) Pag-abot ni Jesus, siya nagdalag kahupayan ug kalamdagan. Iyang giayo ang mga masakiton, gipakaon ang gigutom, gipalinaw ang unos, gibanhaw pa gani ang mga patay. (Mateo 8:26; 14:14-21; 15:30, 31; Marcos 5:38-43) Gisulti usab niya ang mga pulong ni Jehova ug gisaad ang walay-kataposang kinabuhi. (Juan 3:34) Sa sulti ug buhat, bug-os nga gipasundayag ni Jesus nga siya ang Mesiyas, ang usa nga magpahigawas sa katawhan gikan sa sala ug sa tanang daotang mga epekto niini.

Ang Hudiyong mga lider sa relihiyon kaniadto mao untay angayng moabiabi kang Jesus, mamati kaniya, ug malipayng modawat sa iyang pagtultol. Apan, wala nila kana buhata. Hinunoa, siya ilang gidumtan, gilutos, ug gisabotan nga patyon!—Marcos 14:1; 15:1-3, 10-15.

Angayan lamang nga hukman ni Jesus kadtong daotang mga tawo. (Mateo 23:33-35) Apan, nahibalo siya nga diha pay lain nga angayng manubag sa pagkadaotan nga anaa sa ilang kasingkasing. Giingnan niya sila: “Kamo gikan sa inyong amahan nga Yawa, ug buot ninyong buhaton ang mga tinguha sa inyong amahan. Kana siya usa ka mamumuno sa iyang pagsugod, ug siya wala mobarog nga lig-on diha sa kamatuoran, tungod kay ang kamatuoran wala kaniya. Inigsulti niya sa bakak, siya nagsulti sumala sa iyang kinaiya, tungod kay siya usa ka bakakon ug ang amahan sa bakak.” (Juan 8:44) Bisan tuod nahibalo si Jesus nga ang mga tawo makahimog mga buhat nga daotan, iyang gipaila ang mismong hinungdan sa pagkadaotan—si Satanas nga Yawa.

Sa pag-ingon nga si Satanas “wala mobarog nga lig-on diha sa kamatuoran,” gipadayag ni Jesus nga kining espiritung linalang maoy usa ka matinumanong alagad sa Diyos kaniadto apan mitipas gikan nianang matarong nga dalan. Nganong mirebelde man si Satanas kang Jehova? Tungod kay taas kaayo ang iyang paglantaw sa kaugalingon hangtod sa punto nga iyang gitinguha ang pagsimba nga iya lamang sa Diyos. a—Mateo 4:8, 9.

Ang pagrebelde ni Satanas nadayag didto sa tanaman sa Eden sa dihang iyang gilimbongan si Eva sa pagkaon sa gidili nga bunga. Pinaagi sa paglitok sa kinaunahang bakak ug sa pagpasipala kang Jehova, gihimo ni Satanas ang iyang kaugalingon nga “amahan sa bakak.” Dugang pa, pinaagi sa paghaylo kang Adan ug Eva sa pagsupak sa Diyos, iyang gipahinabo nga ang sala maoy magmando kanila, nga misangpot sa ilang kamatayon ug nianang sa umaabot nga mga kaliwatan. Busa, gihimo usab ni Satanas ang iyang kaugalingon nga “usa ka mamumuno”—sa pagkatinuod, ang labing mangtas nga mamumuno sa tanan!—Genesis 3:1-6; Roma 5:12.

Ang daotang impluwensiya ni Satanas nakaabot pa gani sa dapit sa espiritung mga linalang, diin iyang gihaylo ang ubang mga manulonda sa pagduyog kaniya sa pagrebelde. (2 Pedro 2:4) Sama kang Satanas, kining daotang mga espiritu gitugkan ug sayop nga kaikag sa mga tawo. Apan sa ilang kahimtang, kadto maoy hiwi nga seksuwal nga kaibog,  nga may malaglagon ug daotan nga mga sangpotanan.

Ang Pagkadaotan Milukop sa Yuta

Ang Bibliya nagtug-an kanato: “Sa dihang ang mga tawo misugod pagdaghan . . . ug ang mga anak nga babaye nangatawo kanila, unya ang mga anak sa matuod nga Diyos nakamatikod sa mga anak nga babaye sa mga tawo, nga sila maanyag; ug sila nagkuhag mga asawa alang sa ilang kaugalingon, nga mao, ang tanan nga ilang napili.” (Genesis 6:1, 2) Kinsa kadtong “mga anak sa matuod nga Diyos”? Sila maoy espiritung mga linalang, dili mga tawo. (Job 1:6; 2:1) Giunsa nato pagkahibalo? Ang usa ka rason mao nga niadtong panahona ang kaminyoon tali sa mga tawo ginapahigayon na sulod sa mga 1,500 ka tuig ug wala kini hisgoti sa linain nga paagi. Sanglit gihisgotan man nga ang “mga anak sa matuod nga Diyos” nagsul-ob ug tawhanong lawas ug nagkuha “sa mga anak nga babaye sa mga tawo” ug nakigsekso kanila, tataw nga gipunting sa maong asoy ang usa ka kahimtang nga wala pa mahitabo sukad ug abnormal.

Napamatud-an kini nga abnormalidad diha sa mga liwat nga maoy bunga niining maong mga kaminyoon. Sila gitawag ug mga Nepilim, mga mestiso nga nahimong mga higante. Sila mga daogdaogan kaayo. Sa pagkatinuod, ang “Nepilim” nagpasabot ug “mga Tigpukan,” o “kadtong nagpahinabo nga mapukan ang uban.” Kining maong mga maton gihubit ingong “mga gamhanan sa kakaraanan, ang mga tawong bantogan.”—Genesis 6:4.

Hilabihan ka daotan ang mga Nepilim ug ang ilang mga amahan. “Ang yuta nadaot sa panan-aw sa matuod nga Diyos ug . . . napuno sa kapintasan,” nag-ingon ang Genesis 6:11. Oo, gisagop sa mga tawo ang mapintas ug hiwi nga mga paagi sa mga Nepilim ug sa mga amahan niini.

Sa unsang paagi naimpluwensiyahan sa mga Nepilim ug sa ilang mga amahan ang katawhan sa pagbuhat ug daotan? Pinaagi sa pagpukaw sa makasasalang hilig ug mga tinguha sa tawo. Unsay resulta? “Ang tanang unod nagdaot sa dalan niini ibabaw sa yuta.” Sa kataposan, gilaglag ni Jehova kadtong kalibotana pinaagi sa tibuok-globong Lunop, nga nagluwas lamang sa matarong nga si Noe ug sa iyang pamilya. (Genesis 6:5, 12-22) Apan, ang mga manulonda nga nagsul-ob ug tawhanong lawas namalik sa ilang dapit sa espiritung mga linalang nga nawad-an na sa pabor sa Diyos. Ingong sinalikway nga mga demonyo, nagpadayon sila sa pagsupak sa Diyos ug sa iyang matarong nga pamilya sa maunongong mga manulonda. Dayag nga sukad niadtong panahona, gidid-an na sa Diyos kining daotang mga espiritu sa pagsul-ob ug tawhanong lawas. (Judas 6) Bisan pa niana, dako gihapon silag impluwensiya sa mga kalihokan sa tawo.

Ang Daotan Bug-os nga Giyagyag!

Ang gilapdon sa daotang impluwensiya ni Satanas gipadayag diha sa 1 Juan 5:19, nga nag-ingon: “Ang tibuok kalibotan nailalom sa gahom sa usa nga daotan.” Giyudyod sa Yawa ang katawhan ngadto sa unos sa nagkadaghang kaalaotan. Gani, mas determinado siya kay sukad masukad nga mohimog kadaot. Ngano? Tungod kay siya ug ang iyang mga demonyo gipalayas gikan sa langit human matukod ang Gingharian sa Diyos niadtong 1914. Mahitungod sa pagpalayas kaniya, ang Bibliya nagtagna: “Alaot ang yuta . . . , tungod kay ang Yawa nanaog kaninyo, nga may dakong kasuko, kay nahibalo nga hamubo na lamang ang iyang panahon.” (Pinadayag 12:7-12) Nan, sa unsang paagi giimpluwensiyahan ni Satanas ang katawhan karon?

Sa panguna gibuhat kana ni Satanas pinaagi sa pagpalambo sa usa ka tinamdan nga nagagahom sa panghunahuna ug panglihok sa mga tawo. Busa, ang Efeso 2:2 nagtawag sa Yawa nga “magmamando sa awtoridad sa hangin, ang espiritu  [o, nagpatigbabaw nga tinamdan] nga nagalihok karon diha sa mga anak sa pagkadili-masinugtanon.” Imbes magpatunghag diyosnong kahadlok ug pagkamaayo, kining demonyohanong “hangin” magtukmod sa mga tawo sa pagrebelde batok sa Diyos ug sa iyang mga sukdanan. Busa si Satanas ug ang iyang mga demonyo nagpalambo ug nagpasamot sa pagkadaotan nga gihimo sa mga tawo.

“Ampingi ang Imong Kasingkasing”

Ang usa ka timailhan niini nga “hangin” mao ang hampak sa pornograpiya, nga makahaling sa dili-angayng seksuwal nga mga tinguha ug maghimo sa ngil-ad nga binuhatan nga makapadani. (1 Tesalonica 4:3-5) Ang mga esena sa pagpanglugos, sadismo, babaye nga gitabangag lugos, pagpakigsekso sa mananap, ug seksuwal nga pag-abuso sa mga bata maoy pipila sa buhat nga gihulagway sa pornograpiya ingong makalingaw. Bisan sa dili kaayo grabeng matang niini, ang pornograpiya makapagiyan pag-ayo ug makadaot niadtong nagtan-aw o nagbasa niana, nga mabatasan na nila ang pagtan-aw niini. b Kini usa ka matang sa pagkadaotan nga magbungkag sa tawhanong mga relasyon ug sa relasyon sa usa uban sa Diyos. Ang pornograpiya nagbanaag sa makauulawng panghunahuna sa mga demonyo nga nagpalambo niana—mga rebelde kansang hiwi nga seksuwal nga mga tinguha nagsugod sa adlaw ni Noe sa wala pa ang Lunop.

May maayong katarongan nga ang maalamong tawo nga si Solomon nagtambag: “Labaw sa tanan nga pagabantayan, ampingi ang imong kasingkasing, kay niana nagagikan ang mga tuboran sa kinabuhi.” (Proverbio 4:23) Sa pagpadapat niana, ang pag-amping sa imong kasingkasing aron dili kini malit-agan sa pornograpiya mahimong magpasabot sa pagbalhin sa laing estasyon sa TV o pagpatay sa kompiyuter kon motungha ang mga larawan nga makapukaw sa seksuwal nga gana, ug hinungdanon nga molihok gayod dayon! Hunahunaa nga ikaw usa ka sundalo nga naningkamot sa pagsagang sa udyong nga gipuntirya sa imong kasingkasing. Gipuntirya ni Satanas ang imong mahulagwayong kasingkasing—ang sentro sa imong panukmod ug tinguha—ug naningkamot siya sa pagdaot niana.

Kinahanglang panalipdan usab nimo ang imong kasingkasing aron dili kini mahigugma sa kapintasan, kay nahibalo ang Yawa nga “si bisan kinsa nga nahigugma sa kapintasan ginadumtan gayod [ni Jehova].” (Salmo 11:5) Dili ka direktang himoon ni Satanas nga uhaw-sa-dugo nga kriminal aron mahimo kang kaaway sa Diyos; kinahanglan lamang niyang ugmaron sa imong galamhan ang gugma sa kapintasan. Dili ikatingala nga nagdagsang karon ang mapintas nga mga kalingawan nga sagad naglakip ug espiritismo. Ang mga Nepilim dugay nang nangamatay, apan ang ilang mga taras ug panggawi kaylap gihapon kaayo! Gipakita ba sa imong pagpili ug kalingawan nga imong gisuklan ang mga laraw ni Satanas?—2 Corinto 2:11.

 Kon sa Unsang Paagi Masuklan ang Daotang Impluwensiya ni Satanas

Ang daotang mga puwersa daw lisod kaayong lupigon. Nag-ingon ang Bibliya nga kadtong naningkamot sa pagpahimuot sa Diyos “adunay pakigdumog . . . batok sa daotang mga puwersa nga espirituhanon,” gawas pa sa ilang pagpakigbisog sa ilang dili kahingpitan. Aron makadaog ug maangkon ang pabor sa Diyos, kinahanglang pahimuslan nato ang daghang tagana gikan sa Diyos.—Efeso 6:12; Roma 7:21-25.

Kining maong mga tagana naglakip sa labing gamhanang puwersa sa uniberso, nga mao ang balaang espiritu sa Diyos. Si apostol Pablo misulat ngadto sa unang-siglong mga Kristohanon: “Atong nadawat, dili ang espiritu sa kalibotan, kondili ang espiritu nga gikan sa Diyos.” (1 Corinto 2:12) Kadtong gigiyahan sa espiritu sa Diyos nakakat-on sa paghigugma sa gihigugma sa Diyos ug sa pagdumot sa iyang gidumtan. (Amos 5:15) Sa unsang paagi madawat sa usa ang balaang espiritu? Sa panguna pinaagi sa pag-ampo, pagtuon sa Bibliya—ang Bibliya mismo nasulat sa tabang sa balaang espiritu—ug maayong pakig-ubanay niadtong tinuod nga nahigugma sa Diyos.—Lucas 11:13; 2 Timoteo 3:16; Hebreohanon 10:24, 25.

Pinaagi sa pagpahimulos niining mga tagana sa Diyos, imong masul-ob ang “kompletong armadura gikan sa Diyos,” ang bugtong seguradong proteksiyon batok “sa mga malipatlipatong kaugdahan sa Yawa.” (Efeso 6:11-18) Ang bug-os nga paggamit niining maong mga tagana mas dinalian karon kay sukad masukad. Sa unsang paagi?

Hapit Nang Matapos ang Pagkadaotan!

“Sa dihang ang mga daotan manurok ingon sa katanoman ug molambo ang tanang mamumuhat sa butang nga makadaot, kini mao nga sila pagalaglagon hangtod sa kahangtoran,” miingon ang salmista. (Salmo 92:7) Oo, sama sa adlaw ni Noe, ang pagdagsang karon sa pagkadaotan maoy pamatuod nga hapit nang ipahamtang sa Diyos ang iyang paghukom, dili lamang batok sa daotang mga tawo kondili batok usab kang Satanas ug sa iyang mga demonyo, kinsa itambog ngadto sa bung-aw sa pagkawalay-kalihokan sa dili pa sila bug-os nga laglagon sa ulahi. (2 Timoteo 3:1-5; Pinadayag 20:1-3, 7-10) Kinsa may mopahamtang sa maong paghukom? Walay lain kondili si Jesu-Kristo, nga bahin kaniya atong mabasa: “Tungod niini nga katuyoan nga gipadayag ang Anak sa Diyos, nga mao, aron sa pagbungkag sa mga buhat sa Yawa.”—1 Juan 3:8.

Nangandoy ka ba nga matapos ang pagkadaotan? Kon mao, mahupayan ka sa mga saad nga anaa sa Bibliya. Walay laing basahon nga nagyagyag sa hinungdan sa pagkadaotan, si Satanas, ug walay laing basahon nga nagpakita kon sa unsang paagi siya ug ang tanan niyang daotang mga buhat pagawagtangon. Giawhag ka namo sa pagkuhag tukmang kahibalo sa Bibliya aron mapanalipdan nimo ang imong kaugalingon batok sa daotang mga impluwensiya ni Satanas karon ug seguradong maangkon ang paglaom nga mabuhi sa kalibotan nga wala nay pagkadaotan.—Salmo 37:9, 10.

[Mga footnote]

[Kahon/​Hulagway sa panid 6]

Tinuod-ug-Diyutay nga mga Kasugiran

Ang mga sugilanon bahin sa mga diyos nga katunga tawo, mga higante, ug sa usa ka malaglagong lunop makaplagan diha sa karaang mga mitolohiya sa tibuok kalibotan. Pananglitan ang Akkadian Epic of Gilgamesh naghisgot sa usa ka lunop, barko, ug mga nangaluwas. Si Gilgamesh mismo gihubit ingong maulagon, mapintas nga diyos nga katunga tawo. Ang mitolohiya sa mga Aztec naghisgot bahin sa usa ka karaang kalibotan nga gipuy-an sa mga higante ug naghisgot usab sa usa ka dakong lunop. Ang karaang sugilanon sa mga Norse naghubit sa usa ka rasa sa mga higante ug sa usa ka maalamong tawo nga ginganlag Bergelmir kinsa nagtukod ug usa ka dakong barko ug nagluwas sa iyang kaugalingon ug sa iyang asawa. Ang mga testimonya nianang tanang karaang mga sugilanon nagpamatuod sa giingon sa Bibliya nga ang tanang tawo maoy kaliwat niadtong nangaluwas sa usa ka lunop nga milaglag sa karaang daotan nga kalibotan.

[Hulagway]

Papan nga bato nga gikulitan sa Epic of Gilgamesh

[Credit Line]

The University Museum, University of Pennsylvania (neg. # 22065)

[Hulagway sa panid 5]

Ang mga taras sa mga Nepilim makita diha sa mga tawo karon

[Hulagway sa panid 7]

Ang tukmang kahibalo magpalig-on kanato batok sa daotang mga impluwensiya