Mga Pangutana Gikan sa mga Magbabasa

Ang Proverbio 22:6 nagpasalig ba nga kon maayong pagkabansay ang mga anak sa Kristohanong mga ginikanan, dili na gayod sila mobiya gikan sa dalan ni Jehova?

Kining bersikuloha mabasa: “Bansaya ang bata subay sa dalan nga alang kaniya; bisan kon siya matigulang na dili siya motipas gikan niana.” Maingon nga ang pagbawog sa gamayng sanga makaapektar sa pagtubo niini ingong kahoy, ang mga bata nga maayong pagkabansay mas dakog purohan nga moalagad kang Jehova sa ilang pagdako. Sama sa nahibaloan sa matag ginikanan, ang maong pagbansay nagkinahanglag daghang panahon ug paningkamot. Aron mahimong Kristohanong mga tinun-an ang ilang mga anak, ang mga ginikanan kinahanglang maampingong magtudlo, magpahimangno, magdasig, magdisiplina ug magpakitag maayong panig-ingnan kanila. Ila gayod kining buhaton nga makanunayon ug mahigugmaon sulod sa daghang katuigan.

Apan, kon ang usa ka bata moundang sa pag-alagad kang Jehova, nagpasabot ba kini nga napakyas ang ginikanan? Sa pipila ka kahimtang, tingali kulang pa ang paningkamot sa mga ginikanan sa pagmatuto sa ilang mga anak diha sa disiplina ug sa pagdumala-sa-kaisipan ni Jehova. (Efeso 6:4) Sa laing bahin, kini nga proverbio dili garantiya nga ang maayong pagbansay seguradong mopatunghag mga anak nga maunongon sa Diyos. Dili mahimo sa mga ginikanan ang bisan unsa nga gusto nila alang sa ilang mga anak. Ang mga bata, sama sa mga hamtong, adunay kagawasan sa pagpili ug sila ray makapili sa dalan sa kinabuhi nga gusto nilang subayon. (Deuteronomio 30:15, 16, 19) Bisan pag gibuhat na sa mga ginikanan ang tanan nilang maarangan, ang pipila ka anak mahimong dili magmatinumanon, sama kang Solomon, nga maoy nagsulat sa bersikulo nga atong gihisgotan. Bisan gani si Jehova, adunay mga anak nga wala magmatinumanon kaniya.

Busa, kining tekstoha wala magpasabot nga sa tanang kahimtang ang usa ka bata ‘dili motipas gikan niana’ kondili kana nagtug-an lamang sa kasagarang sangpotanan. Makapadasig gayod kini alang sa mga ginikanan! Ang mga ginikanan madasig sa pagkahibalo nga ang ilang makugihong mga paningkamot sa pagbansay sa ilang mga anak sumala sa paagi ni Jehova mopatunghag maayong mga resulta. Sanglit hinungdanon man ang ilang papel ug dako ang ilang impluwensiya, ang mga ginikanan gidasig nga seryosong tagdon ang ilang katungdanan.—Deuteronomio 6:6, 7.

Bisan pag ang mga bata moundang sa pag-alagad kang Jehova, ang mga ginikanan nga makugihong nagbansay sa ilang mga anak makalaom nga ang ilang mga anak basin makaamgo ra sa ulahi. Ang kamatuoran sa Bibliya gamhanan, ug ang pagbansay sa ginikanan dili daling malimtan.—Salmo 19:7.