Mga Tigulang—Usa ka Panalangin Alang sa mga Batan-on
Mga Tigulang—Usa ka Panalangin Alang sa mga Batan-on
“Bisan hangtod sa pagkatigulang ug pagkaubanon, Oh Diyos, ayaw ako pagbiyai, hangtod nga makasaysay ako mahitungod sa imong bukton ngadto sa kaliwatan, mahitungod sa imong pagkagamhanan ngadto sa tanan nga moabot.”—SALMO 71:18.
1, 2. Unsay angayng palandongon sa tigulang nang mga alagad sa Diyos, ug unsay atong hisgotan karon?
USA ka ansiyano sa Kasadpang Aprika ang miduaw sa usa ka tigulang nga dinihogan ug mitimbaya kaniya, “Komosta na Brad?” Ang dinihogang igsoon mitubag, “Aw nia, makadagan-dagan, makainiktin, makalukso-lukso, ug makatakingking pa gihapon,” nga nagmostra sa iyang gisulti. “Apan dili ko kalupad,” dugang pa niya. Nasabtan sa ansiyano ang buot niyang ipasabot. ‘Malipay kong buhaton ang mga butang nga akong mahimo, apan dili nako buhaton ang mga butang nga dili nako mahimo.’ Ang miduaw nga ansiyano nagpanuigon na karon ug kapin sa 80 anyos, ug malipay siyang handomon ang pasiaw ug ang pagkamaunongon sa maong igsoon.
2 Kon ang usa ka tigulang magpakitag diyosnong mga hiyas, momarka kini sa hunahuna sa uban. Siyempre, wala kana magpasabot nga awtomatikong mabatonan sa usa ang kaalam ug ang mga hiyas ni Kristo samtang magkatigulang. (Ecclesiastes 4:13) Ang Bibliya nag-ingon: “Ang pagkaubanon maoy usa ka purongpurong sa katahom sa dihang makaplagan kini sa dalan sa pagkamatarong.” (Proverbio 16:31) Kon ikaw usa ka tigulang, napalandong ba nimo kon sa unsang gilapdon ang imong mga pulong ug buhat makabenepisyo sa uban? Tagda ang pipila ka pananglitan sa Bibliya nga nagpakita sa gilapdon nga ang mga tigulang usa ka tinuod nga panalangin alang sa mga batan-on.
Pagtuo nga May Malungtarong mga Epekto
3. Sa unsang paagi ang pagkamatinumanon ni Noe nakahatag ug kaayohan sa tanang tawo karon?
3 Ang pagtuo ug pagkamatinumanon ni Noe nakahatag ug mga kaayohan bisan hangtod karon. Si Noe hapit nang mo-600 anyos sa dihang siya nagtukod sa arka, nagtigom sa mga mananap, ug nagsangyaw sa iyang mga silingan. (Genesis 7:6; 2 Pedro 2:5) Tungod sa iyang kahadlok sa Diyos, si Noe, duyog sa iyang pamilya, nakalabang-buhi sa dakong Lunop ug nahimong ginikanan sa tanang tawo karon sa yuta. Tinuod, si Noe nabuhi sa panahon nga tag-as pag kinabuhi ang mga tawo. Apan, bisan sa dihang tigulang na kaayo siya, si Noe nagpabiling matinumanon, ug kana miresulta sa daghang panalangin. Sa unsang paagi?
4. Sa unsang paagi ang pagkamaunongon ni Noe nakahatag ug kaayohan sa mga alagad sa Diyos karon?
4 Si Noe duolan sa 800 anyos sa dihang gisugdan pagtukod ni Nimrod ang Torre sa Babel ingong pagsupak sa sugo ni Jehova nga ‘pun-on ang yuta.’ (Genesis 9:1; 11:1-9) Apan, si Noe wala moduyog kang Nimrod sa pagrebelde. Busa, lagmit wala mausab ang iyang pinulongan sa dihang gilahugay sa Diyos ang pinulongan sa mga rebelde. Ang pagtuo ug pagkamaunongon ni Noe, dili lamang sa dihang tigulang na siya kondili sa tibuok niyang kinabuhi, takos gayong sundogon sa tanang alagad sa Diyos.—Hebreohanon 11:7.
Impluwensiya Diha sa Pamilya
5, 6. (a) Sa dihang nagpanuigon ug 75 anyos si Abraham, unsay gipabuhat ni Jehova kaniya? (b) Unsay reaksiyon ni Abraham sa sugo sa Diyos?
5 Ang impluwensiya sa mga tigulang sa pagtuo sa ilang pamilya makita diha sa kinabuhi sa mga patriarka human kang Noe. Si Abraham mga 75 anyos na sa dihang giingnan siya sa Diyos: “Lakaw gikan sa imong yuta ug gikan sa imong mga paryente ug gikan sa balay sa imong amahan paingon sa yuta nga akong ipakita kanimo; ug maghimo ako ug usa ka dakong nasod gikan kanimo ug ako magpanalangin kanimo.”—Genesis 12:1, 2.
6 Handurawa nga gisugo ka sa pagbiya sa imong balay, mga higala, yutang natawhan, ug sa imong mga paryente diin ikaw mibating luwas, dayon paadtoon ka sa usa ka yuta nga wala nimo mahibal-i. Mao kanay gipabuhat kang Abraham. Siya “milakaw ingon sa gisulti ni Jehova kaniya,” ug sa tibuok niyang kinabuhi, siya nagpuyo sa mga tolda ingong langyaw ug nagbalhinbalhin ug puyo diha sa yuta sa Canaan. (Genesis 12:4; Hebreohanon 11:8, 9) Bisan tuod miingon si Jehova nga si Abraham mahimong “usa ka dakong nasod,” siya dugay nang namatay una pa modaghan ang iyang kaliwat. Ang iyang asawa nga si Sara nanganak ug usa lang ka anak nga lalaki, si Isaac, ug nahitabo lamang kana human makapuyo si Abraham ug 25 ka tuig diha sa yutang saad. (Genesis 21:2, 5) Bisan pa niana, si Abraham wala mobatig kakapoy ug wala mobalik sa siyudad nga iyang gigikanan. Pagkamaayong panig-ingnan sa pagtuo ug pagkamalahutayon!
7. Unsay epekto sa pagkamalahutayon ni Abraham diha sa iyang anak nga si Isaac, ug unsay resulta niini diha sa katawhan?
7 Ang pagkamalahutayon ni Abraham dakog epekto sa iyang anak nga si Isaac, kinsa migugol sa tibuok niyang kinabuhi—180 anyos—ingong langyawng pumoluyo sa yuta sa Canaan. Ang pagkamalahutayon ni Isaac gipasukad sa iyang pagtuo sa saad sa Diyos, pagtuo nga gitisok diha kaniya sa iyang tigulang nga mga ginikanan ug sa ulahi kana nga pagtuo gipalig-on sa gisulti mismo ni Jehova kaniya. (Genesis 26:2-5) Ang pagkamaunongon ni Isaac may hinungdanong bahin sa katumanan sa saad ni Jehova nga ang usa ka “binhi” nga magpanalangin sa tanang katawhan maggikan sa pamilya ni Abraham. Gatosan ka tuig sa ulahi, si Jesu-Kristo, ang pangunang bahin sa maong “binhi,” nagbukas sa kahigayonan nga ang tanan nga magpasundayag ug pagtuo kaniya makabaton ug maayong relasyon sa Diyos ug makatagamtam ug kinabuhing dayon.—Galacia 3:16; Juan 3:16.
8. Sa unsang paagi gipasundayag ni Jacob ang lig-ong pagtuo, ug unsay epekto niana?
8 Sa baylo, gitabangan ni Isaac ang iyang anak nga si Jacob sa pag-ugmad ug lig-ong pagtuo nga nagpalig-on kaniya bisan panahon sa iyang pagkatigulang. Si Jacob nagpanuigon ug 97 anyos sa dihang nakiglayog siya sa usa ka manulonda sa tibuok gabii aron mahatagan siyag panalangin. (Genesis 32:24-28) Sa wala pa siya mamatay sa panuigon nga 147 anyos, si Jacob may igo pang kusog sa pagpanalangin sa matag usa sa iyang 12 ka anak lalaki. (Genesis 47:28) Ang matagnaong mga pulong nga iyang gibungat, nga nasulat karon sa Genesis 49:1-28, natuman ug nagpadayon sa pagkatuman.
9. Unsay ikaingon bahin sa impluwensiya sa hamtong-sa-espirituwal nga mga tigulang diha sa ilang pamilya?
9 Tataw nga ang mga tigulang nga maunongong nag-alagad sa Diyos mahimong adunay maayong impluwensiya sa ilang pamilya. Kon ang Kasulatan itudlo uban ang maalamong tambag ug panig-ingnan sa pagkamalahutayon, dako gayod kinig ikatabang sa usa ka bata nga modako nga may lig-ong pagtuo. (Proverbio 22:6) Dili gayod angayng pakamenoson sa mga tigulang ang ilang maayong impluwensiya sa ilang pamilya.
Impluwensiya Diha sa mga Isigka-Magsisimba
10. Unsay ‘panugon ni Jose mahitungod sa iyang mga bukog,’ ug unsay epekto niini?
10 Ang mga tigulang mahimong maayo usab nga impluwensiya sa mga isigka-magtutuo. Sa pagkatigulang ni Jose, nga anak ni Jacob, siya mihimog usa ka yanong buhat sa pagtuo nga dako kaayog epekto sa milyonmilyong matuod nga mga magsisimba nga nabuhi human kaniya. Siya nagpanuigon ug 110 anyos sa dihang “siya nanugon mahitungod sa iyang mga bukog,” nga kini dad-on sa mga Israelinhon inigbiya nila sa Ehipto. (Hebreohanon 11:22; Genesis 50:25) Kanang sugoa naghatag sa mga Israelinhon ug paglaom sa dihang sila nakaagom sa mapintas nga pagpangulipon sulod sa daghang katuigan human mamatay si Jose, ug nagpasalig kanila nga moabot ra unya ang ilang kaluwasan.
11. Unsay impluwensiya sa tigulang nang si Moises diha kang Josue?
11 Lakip niadtong napalig-on sa pagtuo ni Jose mao si Moises. Sa dihang si Moises nagpanuigon ug 80 anyos, siya nakapribilehiyo sa pagdala sa mga bukog ni Jose gikan sa yuta sa Ehipto. (Exodo 13:19) Nianang panahona, nakaila niya si Josue, nga manghod kaayo niyag edad. Sa misunod nga 40 ka tuig, si Josue nag-alagad ingong sulugoon ni Moises. (Numeros 11:28) Iyang giubanan si Moises sa pagtungas sa Bukid sa Sinai apan wala ra siya molahos sa ibabaw sa Bukid. Ug iya siyang gisugat sa dihang milugsong si Moises nga nagdala sa mga papan sa Pagpamatuod. (Exodo 24:12-18; 32:15-17) Walay duhaduha nga nakakat-on pag-ayo siya gikan sa mga tambag ug kaalam sa tigulang nang si Moises!
12. Sa unsang paagi si Josue nahimong maayong impluwensiya sa nasod sa Israel sa tibuok niyang kinabuhi?
12 Sa baylo, gidasig ni Josue ang nasod sa Israel sa tibuok niyang kinabuhi. Ang Maghuhukom 2:7 nag-ingon: “Ang katawhan nagpadayon sa pag-alagad kang Jehova sa tanang adlaw ni Josue ug sa tanang adlaw sa mga ansiyano kansang mga adlaw milugway pa human kang Josue ug nga nakakita sa tanang dagkong buhat ni Jehova nga iyang gibuhat alang sa Israel.” Apan, sa pagkamatay ni Josue ug sa ubang mga tigulang sa Israel, nagsugod ang 300-ka-tuig nga pagpalingpaling sa mga tawo tali sa matuod nga pagsimba ug sa bakak, nga misangko sa mga adlaw ni Samuel nga manalagna.
Si Samuel “Nagpatunhay sa Pagkamatarong”
13. Unsay gibuhat ni Samuel sa ‘pagpatunhay sa pagkamatarong’?
13 Walay gisulti ang Bibliya kon pilay edad ni Samuel sa dihang siya namatay, apan ang mga hitabo diha sa basahon sa Unang Samuel mikabat ug mga 102 ka tuig, ug si Samuel nakasaksi sa kadaghanan niana. Sa Hebreohanon 11:32, 33, atong mabasa nga ang matul-id nga mga maghuhukom ug mga manalagna “nagpatunhay sa pagkamatarong.” Oo, naimpluwensiyahan ni Samuel ang pipila sa iyang mga katalirongan sa paglikay o pagtalikod sa sayop nga buhat. (1 Samuel 7:2-4) Sa unsang paagi? Pinaagi sa pagpabiling maunongon kang Jehova sa tibuok niyang kinabuhi. (1 Samuel 12:2-5) Wala siya mahadlok sa paghatag ug bug-at nga tambag bisan ngadto sa hari. (1 Samuel 15:16-29) Dugang pa, si Samuel, nga “tigulang ug ubanon na,” nagpakitag sulondan sa pag-ampo alang sa uban. Siya miingon nga ‘halayo sa iyang hunahuna ang pagpakasala batok kang Jehova pinaagi sa pag-undang sa pag-ampo’ alang sa iyang mga isigka-Israelinhon.—1 Samuel 12:2, 23.
14, 15. Kon bahin sa pag-ampo, sa unsang paagi masundog sa mga tigulang karon si Samuel?
14 Kining tanan nagpakita nga ang mga tigulang makahatag ug maayong impluwensiya sa kaubang mga alagad ni Jehova sa linaing paagi. Bisan pa sa mga kababagan tungod sa panglawas o sa ubang mga sirkumstansiya, ang mga tigulang makaampo alang sa uban. Mahal namong mga tigulang, napalandong ba ninyo kon unsa ka dako ang kaayohan nga inyong mahatag sa kongregasyon pinaagi sa inyong mga pag-ampo? Tungod sa inyong pagtuo sa giula nga dugo ni Kristo, inyong natagamtam ang pag-uyon ni Jehova, ug tungod sa inyong rekord sa pagkamalahutayon, ‘nasulayan ang kalidad’ sa inyong pagtuo. (Santiago 1:3; 1 Pedro 1:7) Ayaw gayod ninyo kalimti: “Ang pangamuyo sa usa ka tawong matarong, sa dihang kini nagalihok, adunay dakong puwersa.”—Santiago 5:16.
15 Gikinahanglan ang inyong mga pag-ampo sa pagpaluyo sa buluhaton sa Gingharian ni Jehova. Ang pipila ka igsoon nato nabilanggo tungod sa ilang Kristohanong neyutralidad. Ang uban nag-antos sa kinaiyanhong mga katalagman, gubat, ug giyera-sibil. Ug ang uban pa, diha sa ato mismong mga kongregasyon, nagsagubang ug mga tentasyon o mga pagsupak. (Mateo 10:35, 36) Kadtong nagapanguna sa buluhatong pagsangyaw ug sa pagdumala sa mga kongregasyon nagkinahanglan usab sa inyong regular nga mga pag-ampo alang kanila. (Efeso 6:18, 19; Colosas 4:2, 3) Pagkamaayo nga iapil ninyo sa inyong mga pag-ampo ang inyong mga igsoon sa pagtuo, sama sa gihimo ni Epafras!—Colosas 4:12.
Pagtudlo sa Umaabot nga Kaliwatan
16, 17. Unsay gitagna diha sa Salmo 71:18, ug sa unsang paagi natuman kini?
16 Ang pagpakig-uban sa matinumanong mga sakop sa “gamayng panon,” kadtong adunay langitnong pagkatinawag, nagtaganag hinungdanong pagbansay alang niadtong sakop sa “ubang mga karnero,” nga may paglaom nga mabuhi sa walay kataposan sa yuta. (Lucas 12:32; Juan 10:16) Gitagna kini sa Salmo 71:18, nga nag-ingon: “Bisan hangtod sa pagkatigulang ug pagkaubanon, Oh Diyos, ayaw ako pagbiyai, hangtod nga makasaysay ako mahitungod sa imong bukton ngadto sa kaliwatan, mahitungod sa imong pagkagamhanan ngadto sa tanan nga moabot.” Ang mga dinihogan-sa-espiritu andam kaayong mobansay sa ilang mga kauban nga sakop sa ubang mga karnero sa pag-abaga ug dugang mga responsibilidad sa dili pa sila mosaka sa langit aron mahimaya uban ni Jesu-Kristo.
17 Ang prinsipyo diha sa Salmo 71:18 bahin sa pagtudlo “sa tanan nga moabot” ikapadapat usab sa ubang mga karnero, kinsa nakadawat ug instruksiyon gikan sa mga dinihogan sa Diyos. Gipiyalan ni Jehova ang mga tigulang ug pribilehiyo sa pagpamatuod bahin kaniya niadtong midawat karon sa matuod nga pagsimba. (Joel 1:2, 3) Gibati sa ubang mga karnero nga bulahan sila tungod sa ilang nakat-onan gikan sa mga dinihogan ug natukmod sila nga ipaambit ang ilang nakat-onan gikan sa Kasulatan ngadto sa uban pa nga nagtinguha sa pag-alagad kang Jehova.—Pinadayag 7:9, 10.
18, 19. (a) Unsang bililhong impormasyon ang ikapaambit sa daghang tigulang nga mga alagad ni Jehova? (b) Bahin sa unsa nga angayng magmasaligon ang tigulang nga mga Kristohanon?
18 Nasaksihan sa tigulang nga mga alagad ni Jehova, nga sakop sa mga dinihogan ug niadtong sa ubang mga karnero, ang hinungdanong makasaysayanhong mga hitabo. Ang pipila kanila nga buhi pa karon nakakita sa unang pagpasalida sa “Photo-Drama of Creation.” Ang uban personal nga nakaila sa mga igsoon nga nanguna sa buluhaton ug nabilanggo niadtong 1918. Ang uban nakigbahin sa mga pagsibya diha sa estasyon sa radyo sa Watchtower, ang WBBR. Daghan ang makaasoy bahin sa panahon nga ang legal nga mga kaso nga naglangkit sa relihiyosong kagawasan sa mga Saksi ni Jehova gisang-at ngadto sa mga korte suprema. Ang uban usab mibarog nga malig-on dapig sa matuod nga pagsimba samtang nagkinabuhi ilalom sa pagmando sa mga diktador. Oo, ang mga tigulang makaasoy kon sa unsang paagi ang pagsabot sa kamatuoran inanay nga gipadayag. Ang Bibliya nagdasig kanato sa pagpahimulos niining daghan kaayong kasinatian.—Deuteronomio 32:7.
19 Ang tigulang nga mga Kristohanon giawhag nga mahimong maayong mga panig-ingnan alang sa mga batan-on. (Tito 2:2-4) Tingali sa pagkakaron dili ninyo makita ang epekto sa inyong paglahutay, mga pag-ampo, ug tambag nganha sa uban. Si Noe, Abraham, Jose, Moises, ug ang uban pa lagmit wala mahibalo sa bug-os nga epekto sa ilang pagkamatinumanon ngadto sa umaabot nga mga kaliwatan. Bisan pa niana, ang ilang rekord sa pagtuo ug integridad dako kaayog epekto; mao man usab ang inyoha.
20. Unsang mga panalangin ang madawat niadtong naghupot sa ilang paglaom nga lig-on hangtod sa kataposan?
20 Kon kamo makalabang-buhi sa “dakong kasakitan” o kaha pagabanhawon, pagkamakalilipay nga matagamtam ang “tinuod nga kinabuhi”! (Mateo 24:21; 1 Timoteo 6:19) Handurawa ang kahimtang panahon sa Usa ka Libo ka Tuig nga Pagmando ni Kristo sa dihang wagtangon na ni Jehova ang mga epekto sa pagkatigulang. Imbes masinati ang padayong pagkadaot sa atong lawas, kita momata kada adlaw nga mag-anam ka maayo ang lawas—mas lagsik, mas tin-aw ang panan-aw, mas klaro ang pandungog, mas maayo ang panagway! (Job 33:25; Isaias 35:5, 6) Kadtong makapribilehiyo nga mabuhi sa bag-ong kalibotan sa Diyos magpabiling batan-on hangtod sa hangtod. (Isaias 65:22) Busa, hinaot nga huptan natong tanan ang atong paglaom nga lig-on hangtod sa kataposan ug magpadayon kita sa pag-alagad kang Jehova nga tibuok kalag. Makasalig kita nga tumanon ni Jehova ang tanan niyang gisaad ug ang iya unyang pagabuhaton labaw pa gayod sa kon unsa tingaliy atong gidahom.—Salmo 37:4; 145:16.
Unsay Imong Tubag?
• Sa unsang paagi ang pagkamatinumanon sa tigulang nga si Noe miresulta sa mga panalangin alang sa tanang katawhan?
• Unsay epekto sa pagtuo sa mga patriarka diha sa ilang mga kaliwat?
• Sa ilang pagkatigulang, sa unsang paagi si Jose, Moises, Josue, ug Samuel nagpalig-on sa ilang mga isigkamagsisimba?
• Unsang rekord ang ikabilin sa mga tigulang?
[Mga Pangutana sa Pagtuon]
[Hulagway sa panid 26]
Ang pagkamalahutayon ni Abraham dakog epekto kang Isaac
[Hulagway sa panid 28]
Ang hamtong nga tambag ni Moises nagdasig kang Josue
[Hulagway sa panid 29]
Ang inyong mga pag-ampo alang sa uban makahatag ug dakong kaayohan
[Hulagway sa panid 30]
Ang mga batan-on makabatog kaayohan pinaagi sa pagpamati sa matinumanong mga tigulang