Pagtuli​—Timailhan sa Pagkalalaki?

SA DAGHANG bahin sa kalibotan, tulion ang mga batang lalaki aron moayo ang lawas. Sa ubang bahin sa yuta, naandan na nga ang mga lalaki dili magpatuli. Alang sa pipila, sama sa mga Hudiyo ug Muslim, ang pagtuli ginahimo dili lang tungod sa panglawas, kondili tungod sa relihiyon.

Apan, diha sa ubang nasod, ginahimo ang pagtuli sa dihang ang bata usa na ka hingkod nga lalaki. Kasagarang ipadala siya ngadto sa usa ka linain nga eskuylahan, diin siya tulion ug mahimulag sa katilingban sulod sa pipila ka semana hangtod nga maalim ang iyang samad. Niining panahona, siya kinahanglang mosunod sa espesipikong mga rituwal ug tudloan nga mahimong tinuod nga lalaki. Kini bang matanga sa pagtuli gikinahanglan aron mapamatud-an nga hingkod na gayong lalaki ang imong anak? Atong tagdon kon unsay giingon sa Bibliya bahin sa panglantaw sa Diyos niini.—Proverbio 3:5, 6.

Panglantaw sa Diyos sa Pagtuli

Nabatasan na sa pipila ka tawo sa karaang panahon, sama sa mga Ehiptohanon, ang pagpatuli. Himoon kini pinaagi sa pag-abis sa yamis sa kinatawo sa lalaki. Hinunoa, si Abraham wala matawo sa maong kultura. Sa pagkatinuod, sa dakong bahin sa iyang kinabuhi, si Abraham wala matuli. Dugang pa, samtang siya dili pa tuli, gipamatud-an ni Abraham nga siya usa ka maisog nga lalaki. Kauban ang pipila ra ka lalaki, iyang gigukod ug gilupig ang mga sundalo sa upat ka hari nga nagbihag sa pag-umangkon niyang si Lot. (Genesis 14:8-16) Mga 14 ka tuig sa ulahi, ang Diyos nagsugo kang Abraham nga magpatuli ug tulion ang tibuok niyang panimalay. Nganong gisugo kana sa Diyos?

Tino nga dili kana timailhan nga si Abraham hingkod na. Sa pagkatinuod, siya 99 anyos na niadtong higayona! (Genesis 17:1, 26, 27) Ang Diyos naghatag sa rason sa maong sugo, nga nag-ingon: “Kamo magpatuli sa unod sa inyong mga yamis, ug magsilbi kining ilhanan sa pakigsaad tali kanako ug kaninyo.” (Genesis 17:11) Kana nga pakigsaad kang Abraham naglakip sa saad sa Diyos nga pinaagi ni Abraham, ang “tanang banay sa yuta” makadawat ug daghang panalangin. (Genesis 12:2, 3) Busa, sa panglantaw sa Diyos, ang pagtuli dili timailhan sa pagkalalaki o pagkahingkod na. Kini gihimo aron ipaila nga ang usa ka tawo maoy sakop sa Israelinhong kaliwatan ni Abraham, nga adunay pribilehiyo ingong ‘piniyalan sa sagradong mga pahayag sa Diyos.’—Roma 3:1, 2.

Sa ngadtongadto, ang nasod sa Israel napamatud-ang dili takos ingong piniyalan tungod kay gisalikway niini ang tinuod nga Binhi ni Abraham, si Jesu-Kristo. Busa, sila gisalikway sa Diyos, ug ang ilang pagkatinuli wala nay kapuslanan sa panglantaw sa Diyos. Apan, ang pipila ka Kristohanon sa unang siglo K.P. miinsistir nga ang pagtuli gibaod gihapon sa Diyos. (Buhat 11:2, 3; 15:5) Tungod niana, si apostol Pablo nagpadala kang Tito ngadto sa lainlaing kongregasyon aron ‘tul-iron ang mga butang nga depektoso.’ Ngadto kang Tito, si Pablo nagsulat bahin sa usa ka depekto: “Adunay daghang tawo nga masupilon, mga tigsultig walay pulos, ug mga maglilimbong sa hunahuna, ilabina kadtong mga tawo nga mitapot sa pagkatinuli. Kinahanglan nga patak-omon ang ilang baba, kay kini mismong mga tawhana nagadaot sa tibuok nga panimalay pinaagi sa pagtudlo nila ug mga butang nga dili angay tungod sa kinitaan pinaagig limbong.”—Tito 1:5, 10, 11.

 Ang tambag ni Pablo mapadapat gihapon karon. Sukwahi gayod sa Kasulatan kon ang usa ka matuod nga Kristohanon mag-awhag sa ubang mga ginikanan nga ipatuli ang ilang anak. Imbes mahimong “hilabtanon sa mga butang sa uban,” pasagdan sa usa ka Kristohanon nga ang mga ginikanan sa bata maoy mohimog personal nga desisyon labot niana. (1 Pedro 4:15) Dugang pa, si Pablo gigiyahan sa balaang espiritu sa pagsulat bahin sa pagtuli sumala sa Moisesnong Balaod: “Aduna bay tawo nga tinuli nga gitawag? Dili siya angayng magpakahimong dili-tinuli. Aduna bay tawo nga dili-tinuli nga gitawag? Dili siya angayng magpatuli. Ang pagkatinuli dili mahinungdanon, ug ang pagkadili-tinuli dili mahinungdanon, kondili ang pagsunod sa mga sugo sa Diyos. Sa bisan unsa man nga kahimtang nga ang matag usa gitawag, angayng magpabilin siya diha niana.”—1 Corinto 7:18-20.

Komosta ang Bahin sa “mga Eskuylahan sa Pagtuli”?

Komosta kon ang Kristohanong mga ginikanan mohukom nga ipatuli ang ilang mga anak? Nahiuyon ba sa Bibliya ang pagpadala sa ilang mga anak ngadto sa gitawag nga mga eskuylahan sa pagtuli nga gihisgotan ganina? Ang pagpadala sa mga anak ngadto sa maong mga eskuylahan wala lang maglangkit sa pagtuli. Sulod sa pipila ka semana, ang usa nga nagtungha didto mouban pagpuyo sa mga batang lalaki ug mga magtutudlo nga dili magsisimba ni Jehova. Daghang butang nga gitudlo sa maong mga eskuylahan ang sukwahi sa hataas nga moral nga mga sukdanan sa Bibliya. Ang Bibliya nagpasidaan: “Ang daotang pakig-uban makadaot sa mapuslanong pamatasan.”—1 Corinto 15:33.

Nagkadaghan usab ang mga kaso sa pisikal nga kadaot sa pagtungha sa maong mga eskuylahan. Sa 2003, ang South African Medical Journal nagpasidaan: “Ang makalilisang nga mga sangpotanan sa pagtuli nakita na usab niining tuiga. Gisibya sa tanang pangunang ahensiya sa balita sa tibuok kalibotan nga adunay nangamatay ug may nakaagom usab ug kadaot sa ilang kinatawo. . . . Sa mubong pagkasulti, daghan nianang gitawag nga ‘mga eskuylahan sa pagtuli’ karon maoy mini, ug peligroso kaayo.”

Gawas pa sa kapeligrohan nga madaot ang kinatawo sa usa tungod sa dili maayong pamaagi sa pagtuli, adunay mas dakong kapeligrohan nga madaot ang iyang espirituwalidad. Ang mga pagtulon-an ug mga tulumanon diha sa maong mga eskuylahan nalangkit pag-ayo sa espiritismo ug sa pagsimba sa patay nang mga katigulangan. Pananglitan, imbes moangkon nga nahitabo ang kadaot tungod sa dili-mainampingong mga siruhano ug sa dili hinlong kahimtang, daghan ang nagtuo nga nahitabo kini tungod kay ang usa gibarang o kaha wala-kahimut-i sa patay nang mga katigulangan. Kon bahin sa pagkalangkit sa bakak nga relihiyon, ang Bibliya nagsugo: “Ayaw pagpayugo nga dili timbang sa mga dili-magtutuo. Kay aduna bay panag-ubanay ang pagkamatarong ug ang kalapasan? O aduna bay pakig-ambitay ang kahayag uban sa kangitngit? . . . ‘Busa gumula kamo gikan sa ilang taliwala, ug ilain ang inyong kaugalingon,’ nagaingon si Jehova, ‘ug hunong na sa paghikap sa mahugaw nga butang’; ‘ug pasudlon ko kamo.’” (2 Corinto 6:14-17) Tungod niining maong tambag, dili gayod maalamon alang sa Kristohanong mga ginikanan nga ipadala ang ilang mga anak ngadto sa eskuylahan sa pagtuli.

Unsay Makapahimong Tinuod nga Lalaki sa Usa ka Kristohanon?

Ang pagkatinuli o pagkadili-tinuli sa usa ka Kristohanon dili timailhan sa iyang pagkalalaki. Ang labing hinungdanon alang sa matuod nga mga Kristohanon mao ang pagkahimong kahimut-anan sa mga mata sa Diyos, dili ang ‘paghimog maanindot nga dagway diha sa unod.’—Galacia 6:12.

Hinunoa, aron makapahimuot sa Diyos, ang usa ka Kristohanon kinahanglang ‘magpatuli sa kasingkasing.’ (Deuteronomio 10:16; 30:6; Mateo 5:8) Himoon kana, dili pinaagi sa pag-abis kondili pinaagi sa pagsalikway sa sayop nga mga tinguha ug magarbohong mga hunahuna, sama sa pagtuo nga mas labaw ang usa ka tawo kay sa uban tungod kay siya natuli. Pinaagi sa pag-antos sa mga pagsulay ug pagbarog nga “malig-on sa pagtuo,” ang usa ka Kristohanon makapamatuod nga siya tinuod nga lalaki, natuli man siya o wala.—1 Corinto 16:13; Santiago 1:12.