Ginasundog Mo ba si Jehova sa Pagpakitag Kahingawa sa Uban?

“ITUGYAN [sa Diyos] ang tanan ninyong mga kabalaka, kay siya may kahingawa kaninyo.” (1 Pedro 5:7) Pagkamahigugmaong pagdapit kana! Si Jehova nga Diyos adunay personal nga kahingawa alang sa iyang katawhan. Kita mahimong mobatig kasegurohan tungod sa iyang pag-atiman kanato.

Kinahanglang ugmaron nato ug ipasundayag ang susamang mahigugmaong pagkamahunahunaon ngadto sa uban. Sanglit dili-hingpit, kinahanglang magbantay kita sa mga lit-ag sa dihang magpakita kitag personal nga kaikag sa uban. Sa dili pa nato hisgotan ang pipila ka lit-ag, ato unang tan-awon ang pipila ka paagi nga si Jehova nagpakitag kahingawa alang sa iyang katawhan.

Sa pagtandi kang Jehova ngadto sa usa ka magbalantay ug karnero, si salmistang David nagbatbat sa kahingawa sa Diyos: “Si Jehova mao ang akong Magbalantay. Walay makulang kanako. Siya nagapahigda kanako sa mga sibsibanan nga malunhaw; siya nagatultol kanako sa daplin sa mga dapit-pahulayan nga maayong pagkatubig. Siya nagapabaskog sa akong kalag. . . . Bisan kon magalakaw ako sa walog sa mabagang kangiob, ako walay kahadlokan nga daotan, kay ikaw magauban kanako.”—Salmo 23:1-4.

Sanglit usa man siya ka magbalantay ug karnero, si David nahibalo kon unsay nalangkit sa pag-atiman sa panon sa mga karnero. Ang magbalantay magapanalipod sa iyang mga karnero batok sa mga manunukob, sama sa mga leyon, lobo, ug mga oso. Iyang bantayan nga ang panon dili magkatibulaag, pangitaon ang nasalaag nga mga karnero, kugoson ang gikapoy nga mga nating karnero, ug atimanon ang masakiton ug napiang. Iyang paimnon ang panon kada adlaw. Kini wala magpasabot nga kontrolahon sa magbalantay ang matag lihok sa mga karnero. Ang mga karnero adunay kagawasan sa paglakawlakaw apan may panalipod.

Kana ang paagi ni Jehova sa pag-atiman sa iyang katawhan. Nagpatin-aw si apostol Pedro: ‘Kamo gipanalipdan sa gahom sa Diyos.’ Ang pulong dinhi nga “gipanalipdan” sa literal nagkahulogang “gibantayan.” (1 Pedro 1:5) Tungod sa iyang tiunayng kahingawa, si Jehova kanunayng nagabantay kanato, nga andam sa pagtabang kanato kon kita mohangyo niini. Hinunoa, gilalang kita ni Jehova nga may kagawasan sa pagpili, busa dili siya manghilabot sa tanan natong mga lihok ug desisyon. Sa unsang paagi masundog nato si Jehova niining bahina?

Sundoga ang Diyos sa Pag-atiman sa Inyong mga Anak

“Ang mga anak maoy panulondon gikan ni Jehova.” Busa, ang mga ginikanan kinahanglang manalipod ug mag-atiman sa ilang mga anak. (Salmo 127:3) Kana tingali naglangkit sa pagdasig sa mga anak nga mopahayag sa ilang panghunahuna ug mga pagbati ug dayon tagdon kana sa dihang makiglabot kanila. Kon mosulay ang mga ginikanan sa pagkontrolar sa tanang lihok sa ilang mga anak, nga dili gayod manumbaling sa ilang mga gusto, nahisama kini sa usa ka magbalantay nga mosulay sa pagkontrolar sa iyang mga karnero pinaagig mga hikot. Walay magbalantay ang gustong moatiman sa iyang mga karnero sa ingon nga paagi; si Jehova dili gayod mohimo niana kanato.

 Si Mariko a miangkon: “Sulod sa daghang katuigan kini ang kanunay nakong isulti sa akong mga anak, ‘Kini ang inyong pagabuhaton’ ug ‘Ayaw ninyo kanag buhata.’ Nagtuo ko nga kini ang akong obligasyon isip ginikanan. Wala ko magdayeg kanila, ug wala gayod ako makigsulti kanila sa sinsero nga paagi.” Bisan pag tagdugay kaayong makigsulti sa telepono ang anak nga babaye ni Mariko sa iyang mga higala, ang pag-estoryahay nila ni Mariko dili magdugay. Nagpadayon si Mariko, “Dayon akong nakita ang kalainan. Sa dihang makigsulti siya sa iyang mga higala, ang akong anak nga babaye mogamit sa mga pulong nga may empatiya, sama sa ‘Oo, uyon ko’ o ‘Mao man usab ko.’ Gigamit ko ang samang mga pulong aron dasigon ang akong anak nga babaye nga ipahayag ang iyang mga pagbati, ug sa wala madugay ang among panag-estoryahay nahimong mas taas ug mas makalingaw.” Kini nagpasiugda sa kahinungdanon sa maayong komunikasyon, nga dili lang usa ka tawo ang mosulti apan ang duha.

Ang mga ginikanan kinahanglang magdasig sa ilang mga anak sa pagpahayag sa ilang mga pagbati ug mga tinguha, ug kinahanglang masabtan sa mga anak kon nganong ang kahingawa sa mga ginikanan sa ilang mga anak manalipod kanila. Ang Bibliya nagtambag sa mga anak sa pagsugot sa ilang mga ginikanan; dayon gisulti niini ang hinungdan: “Aron magmauswagon ka ug molungtad ka sa hataas nga panahon sa yuta.” (Efeso 6:1, 3) Ang mga anak nga bug-os kombinsido sa mga kaayohan sa pagkamapinasakopon mas daling mosugot.

Sa Pag-atiman sa Panon ni Jehova

Ang mahigugmaong kahingawa ni Jehova gibanaag diha sa Kristohanong kongregasyon. Isip Ulo sa kongregasyon, si Jesu-Kristo nagsugo sa mga ansiyano sa pag-atiman sa iyang panon. (Juan 21:15-17) Ang Gregong pulong alang sa magtatan-aw nalangkit sa usa ka berbo nga nagkahulogang “maampingong pagbantay.” Sa pagpasiugda kon sa unsang paagi buhaton kini, giingnan ni apostol Pedro ang mga ansiyano: “Bantayi ninyo ang panon sa Diyos nga ubos sa inyong pag-atiman, dili nga pinugos, kondili kinabubut-on; ni tungod sa gugma sa kinitaan pinaagig limbong, apan maikagon; ni mahariharion ibabaw niadtong panulondon sa Diyos, apan mahimong mga panig-ingnan alang sa panon.”—1 Pedro 5:2, 3.

Oo, ang kaakohan sa mga ansiyano maoy susama nianang sa mga magbalantay. Ang Kristohanong mga ansiyano mag-atiman niadtong masakiton sa espirituwal ug magtabang kanila aron nga ang ilang kinabuhi magpasundayag sa matarong nga mga sukdanan. Ang mga ansiyano ang responsable sa pag-organisar sa mga kalihokan sa kongregasyon, paghimog mga kahikayan alang sa mga tigom, ug pagmentinar sa kahapsay sa kongregasyon.—1 Corinto 14:33.

Hinunoa, ang mga pulong ni apostol Pedro sa ibabaw, nagpasidaan kanato sa usa ka kapeligrohan—ang bahin sa mga ansiyano nga nahimong “mahariharion ibabaw” sa kongregasyon. Ang usa ka ilhanan sa pagharihari sa panon mao ang pagpatuman sa usa ka ansiyano ug wala-kinahanglanang mga lagda. Tungod sa hugot nga pagbati sa kaakohan nga panalipdan ang  panon, ang usa ka ansiyano tingali maghinobra ra. Sa usa ka kongregasyon sa Sidlakan, ang mga ansiyano naghimog mga lagda kon unsaon pagtimbaya ang uban diha sa Kingdom Hall—sama sa kon kinsay unang mosulti—kay nagtuo nga ang pagsunod niining mga lagdaa makaamot sa kalinaw sa kongregasyon. Bisan pag maayo ang ilang motibo, ang maong mga ansiyano ba nagsundog sa kahingawa ni Jehova sa iyang katawhan? Makaiikag, ang tinamdan sa pangisip ni apostol Pablo nabanaag sa iyang mga pulong: “Dili nga kami mao ang mga agalon sa inyong pagtuo, kondili kami mga isigkamagbubuhat alang sa inyong kalipay, kay kamo nagabarog tungod sa inyong pagtuo.” (2 Corinto 1:24) Si Jehova may pagsalig sa iyang katawhan.

Gawas pa sa paglikay nga mohimog dili-Kasulatanhong mga lagda, ang mahigugmaong mga ansiyano magpakita usab sa ilang tiunay nga kahingawa pinaagig dili pagbutyag sa kompidensiyal nga mga butang. Mahunahunaon sila sa pasidaan sa Diyos: “Ayaw ibutyag ang kompidensiyal nga sulti sa laing tawo.”—Proverbio 25:9.

Gipakasama ni apostol Pablo ang kongregasyon sa dinihogang mga Kristohanon sa lawas sa tawo: “Ang Diyos naghiusa sa lawas . . . aron walay pagkabahinbahin diha sa lawas, kondili nga ang mga sangkap niini makabaton ug samang pagtagad alang sa usag usa.” (1 Corinto 12:12, 24-26) Ang Gregong mga pulong alang sa ‘magbaton ug samang pagtagad alang sa usag usa,’ sa literal nagkahulogang ‘kinahanglang mabalaka alang sa usag usa.’ Ang mga membro sa Kristohanong kongregasyon kinahanglang adunay halalom nga kaikag sa usag usa.—Filipos 2:4.

Sa unsang paagi ang matuod nga mga Kristohanon makapasundayag nga sila ‘nabalaka alang sa usag usa’? Sila makapakita sa ilang kahingawa alang sa ubang membro sa kongregasyon pinaagi sa ilang mga pag-ampo ug paghatag ug praktikal nga tabang sa mga nanginahanglan. Kini makahatag gayod ug kaayohan sa uban. Tagda kon sa unsang paagi nakatabang kang Tadataka ang mahigugmaong kahingawa nga gipakita sa uban. Sa dihang gibawtismohan siya sa pangedarong 17 anyos, siya lamang sa iyang pamilya ang nag-alagad kang Jehova. Kini ang iyang asoy: “Usa ka pamilya sa kongregasyon ang kanunayng magdapit kanako sa ilang balay alang sa mga salosalo ug tapoktapok. Sa halos kada buntag mohapit ko sa ilang balay sa dili pa ko moadto sa eskuylahan aron among mahisgotan ang inadlawng teksto sa Bibliya. Ako gitambagan kon unsaon pagsagubang ang mga problema sa eskuylahan, ug magkauban kami sa pag-ampo bahin niini. Nakat-onan ko ang espiritu sa pagkamanggihatagon gikan sa maong pamilya.” Gipadapat karon ni Tadataka ang iyang nakat-onan pinaagi sa pag-alagad sa usa sa mga sangang buhatan sa mga Saksi ni Jehova.

Si apostol Pablo nagpasidaan bahin sa usa ka lit-ag maylabot sa pagpakitag interes sa uban. Iyang gihisgotan ang mga babaye nga nahimong “mga tabian ug hilabtanon sa mga kalihokan sa ubang mga tawo, nga manulti sa mga butang nga dili nila angayng isulti.” (1 Timoteo 5:13) Bisan tuod angay kitang magpakitag interes sa uban, kinahanglang magbantay kita nga dili kita maghinobra sa punto nga manghilabot na kita sa ilang personal nga mga kalihokan. Ang atong naghinobrang interes sa uban madayag pinaagig ‘pagsulti sa mga butang nga dili nato angayng isulti,’ sama sa pagpanaway.

Angay natong hinumdoman nga ang mga Kristohanon tingali dili managsama maylabot sa ilang pagdumala sa ilang personal nga mga kalihokan, kon unsay ilang gustong kan-on, ug matang sa mapuslanong kalingawan nga ilang pilion. Basta dili lang molapas sa mga prinsipyo sa Bibliya, ang matag usa may kagawasan sa pagdesisyon kon unsay iyang buhaton. Si Pablo nag-awhag sa mga Kristohanon sa Roma: “Dili na kita maghinukmanay sa usag usa. . . . Atong tinguhaon ang mga butang nga mopatunghag pakigdait ug ang mga butang nga makapalig-on sa usag usa.” (Roma 14:13, 19) Kinahanglang ipakita nato ang atong tiunayng kahingawa alang sa usag usa diha sa kongregasyon, dili pinaagi sa pagpanghilabot sa mga kalihokan sa uban kondili pinaagi sa atong pagkaandam nga motabang kanila. Kon kita mahingawa sa usag usa niining paagiha, ang gugma ug panaghiusa molambo sulod sa pamilya ug sa kongregasyon.

[Footnote]

[Hulagway sa panid 19]

Dasiga ang imong mga anak sa pagpahayag sa ilang panghunahuna ug pagbati pinaagi sa pagdayeg ug pagpakitag empatiya