Gipabilhan ni Jehova ang Imong Pagkamasinugtanon
Gipabilhan ni Jehova ang Imong Pagkamasinugtanon
“Magmaalamon, anak ko, ug lipaya ang akong kasingkasing.”—PROVERBIO 27:11.
1. Unsang espiritu ang lapnag sa katilingban karon?
LAPNAG karon sa kalibotan ang espiritu sa pagkaindependente ug pagkadili-masinugtanon. Gipatin-aw ni apostol Pablo ang hinungdan diha sa iyang sulat ngadto sa mga Kristohanon sa Efeso: “Kamo kaniadto milakaw uyon sa sistema sa mga butang niining kalibotana, uyon sa magmamando sa awtoridad sa hangin, ang espiritu nga nagalihok karon diha sa mga anak sa pagkadili-masinugtanon.” (Efeso 2:1, 2) Sa pagkatinuod, ikaingon nga gihugawan ni Satanas nga Yawa, “ang magmamando sa awtoridad sa hangin,” ang tibuok kalibotan pinaagi sa espiritu sa pagkadili-masinugtanon. Iyang gihimo kini sa unang siglo, ug mas grabe pa niyang ginahimo kini sukad sa pagtambog kaniya gikan sa langit panahon sa Gubat sa Kalibotan I.—Pinadayag 12:9.
2, 3. Unsay mga katarongan nga magmasinugtanon kita kang Jehova?
2 Hinuon, ingong mga Kristohanon, nahibalo kita nga si Jehova nga Diyos takos sa kinasingkasing natong pagkamasinugtanon kay siya mao ang atong Maglalalang, Tigsustento sa atong kinabuhi, mahigugmaong Soberano, ug atong Tigpagawas. (Salmo 148:5, 6; Buhat 4:24; Colosas 1:13; Pinadayag 4:11) Ang mga Israelinhon sa adlaw ni Moises nahibalo nga si Jehova mao ang ilang Maghahatag-ug-Kinabuhi ug ilang Tigluwas. Busa, si Moises miingon kanila: “Magmatngon kamo sa pagbuhat sumala sa gisugo ni Jehova nga inyong Diyos kaninyo.” (Deuteronomio 5:32) Oo, angay silang magmasinugtanon kang Jehova. Ugaling lang, sa wala madugay sila nahimong dili-masinugtanon sa ilang Soberano.
3 Unsa ka hinungdanon nga magmasinugtanon kita sa Maglalalang sa uniberso? Kas-a niana ang Diyos nagsugo sa manalagnang si Samuel sa pagsulti kang Haring Saul: “Ang pagsunod mas maayo pa kay sa halad.” (1 Samuel 15:22, 23) Nganong matuod man kini?
Kon sa Unsang Paagi ang Pagkamasinugtanon “Mas Maayo Pa kay sa Halad”
4. Sa unsang diwa aduna kitay ikahatag kang Jehova?
4 Ingong Maglalalang, si Jehova ang tag-iya sa tanang materyal nga butang nga atong nabatonan. Tungod niana, kita ba adunay ikahatag kaniya? Oo, makahatag kita kaniyag bililhon kaayong butang. Unsa ba kana? Atong mabatonan ang tubag gikan sa mosunod nga tambag: “Magmaalamon, anak ko, ug lipaya ang akong kasingkasing, aron matubag ko siya nga nagatamay kanako.” (Proverbio 27:11) Ikahatag nato sa Diyos ang atong pagkamasinugtanon. Bisan pag nagkalainlain ang atong kahimtang ug kagikan, pinaagi sa pagkamasinugtanon, ang matag usa kanato makatubag sa sayop nga pangangkon ni Satanas nga Yawa nga ang mga tawo dili magmaunongon sa Diyos atubangan sa mga pagsulay. Pagkatalagsaon kanang pribilehiyoa!
5. Sa unsang paagi apektado ang Maglalalang sa pagkadili-masinugtanon? Iilustrar.
5 Ang Diyos interesado sa mga desisyon nga atong gihimo. Kon dili kita magmasinugtanon, siya maapektohan. Sa unsang paagi? Siya masakitan kon siya makakita nga adunay mosubay nianang dili-maalamong dalan. (Salmo 78:40, 41) Ipananglit natong ang usa ka diabeteson wala magsunod sa makaayo-sa-panglawas nga diyeta nga gisugyot kaniya ug nagpadayon siya pagkaon ug kontrang pagkaon. Unsay bation sa iyang matinagdanong doktor? Makapaneguro kita nga si Jehova masakitan sa dihang ang mga tawo mosupak kaniya, kay siya nahibalo sa sangpotanan kon dili sundon ang iyang kalagdaan alang sa kinabuhi.
6. Unsay makatabang kanato aron magmasinugtanon kita sa Diyos?
6 Unsay makatabang sa tagsatagsa kanato aron magmasinugtanon? Ang matag usa kanato angayng mangayo sa Diyos ug “kasingkasing nga masinugtanon,” sama ni Haring Solomon. Siya nangayo sa maong matang sa kasingkasing aron “sa pag-ila tali sa maayo ug sa daotan” diha sa paghukom sa iyang mga isigka-Israelinhon. (1 Hari 3:9) Nagkinahanglan kitag “kasingkasing nga masinugtanon” aron masabtan nato kon unsay maayo ug daotan sa kalibotan nga natuphan sa espiritu sa pagkadili-masinugtanon. Ang Diyos nagtagana kanato sa iyang Pulong, sa mga basahong tabang sa pagtuon sa Bibliya, sa Kristohanong mga tigom, ug sa matinagdanong mga ansiyano sa kongregasyon aron makaugmad kitag “kasingkasing nga masinugtanon.” Gipahimuslan ba nato ang maong mahigugmaong mga tagana?
7. Nganong mas gipasiugda ni Jehova ang pagkamasinugtanon kay sa mga halad?
7 May kalabotan niini, hinumdomi nga sa kanhing panahon si Jehova nagbutyag ngadto sa iyang karaang katawhan nga ang pagkamasinugtanon mas hinungdanon pa kay sa mga halad nga hayop. (Proverbio 21:3, 27; Oseas 6:6; Mateo 12:7) Nganong naingon niana nga si Jehova nagsugo man sa iyang katawhan sa pagtanyag sa maong mga halad? Aw, unsa ba ang motibo sa usang nagtanyag sa halad? Kadto ba iyang gihimo aron pahimut-an ang Diyos? O nagtuman ba lang siyag rituwal? Kon ang usa ka magsisimba gusto gayong magpahimuot sa Diyos, angay niyang sugton ang tanang sugo sa Diyos. Wala kinahanglana sa Diyos ang halad nga mga hayop, apan ang atong pagkamasinugtanon maoy bililhong butang nga atong ikahatag kaniya.
Usa ka Mapasidan-ong Pananglitan
8. Nganong ang Diyos nagsalikway kang Saul ingong hari?
8 Ang asoy sa Bibliya bahin ni Haring Saul nagpasiugda nga ang pagkamasinugtanon mahinungdanon. Sa sinugdanan sa paghari ni Saul, siya mapainubsanon ug makasaranganong magmamando, nga siya ‘gamay sa iyang panan-aw.’ Apan, sa kadugayan ang iyang mga desisyon naapektohan sa garbo ug sayop nga pangatarongan. (1 Samuel 10:21, 22; 15:17) Usa niana ka higayon, si Saul kinahanglang makiggubat batok sa mga Filestihanon. Gisultihan ni Samuel si Saul nga hulaton siya aron motanyag ug mga halad kang Jehova ug siya mohatag ug dugang instruksiyon. Ugaling lang, si Samuel wala dayon makaabot sumala sa gidahom, ug ang mga tawo misugod na pagbiya. Sa pagkakita niadto, si Saul “naghalad sa halad-nga-sinunog.” Nasuko si Jehova niadto. Sa pag-abot ni Samuel, ang hari nagpakamatarong sa iyang pagkadili-masinugtanon, nga miingon nga tungod kay naulahi man si Samuel, siya “napugos” sa pagtanyag sa halad-nga-sinunog aron pagpalukmay sa nawong ni Jehova. Alang kang Haring Saul, ang pagtanyag niadtong maong halad mas hinungdanon kay sa pagsugot sa sugo nga kinahanglang maghulat siya kang Samuel sa paghalad niadto. Giingnan siya ni Samuel: “Milihok ka nga binuangbuang. Wala ka magtuman sa sugo ni Jehova nga imong Diyos nga iyang gisugo kanimo.” Tungod kay wala magmasinugtanon, si Saul natangtangan sa iyang pagkahari.—1 Samuel 10:8; 13:5-13.
9. Sa unsang paagi si Saul nagpadayag sa kiling nga dili magmasinugtanon sa Diyos?
9 Nakakat-on ba ug leksiyon ang hari gikan sa maong kasinatian? Wala! Sa ulahi, si Jehova nagsugo kang Saul sa paglaglag sa bug-os sa nasod sa Amalek, nga sa nangagi miatake sa Israel sa wala lay hinungdan. Bisan ang ilang binuhing kahayopan angayng laglagon ni Saul. Siya misugot kang Jehova pinaagi sa ‘pagpukan sa Amalek gikan sa Havila hangtod sa Sur.’ Sa dihang si Samuel misugat kaniya, ang hari nalipay tungod sa kadaogan ug miingon: “Binulahan ikaw ni Jehova. Akong gituman ang pulong ni Jehova.” Apan, nga supak sa tin-awng mga instruksiyon nga ilang nadawat, si Saul ug ang iyang katawhan wala magpatay kang Haring Agag ug sa “kinamaayohan sa mga karnero ug sa mga baka ug sa mga matambok ug sa mga laking karnero ug sa tanan nga maayo.” Gihatagan ni Haring Saul ug katarongan ang iyang pagkadili-masinugtanon pinaagi sa pag-ingon: “Ang katawhan naluoy sa kinamaayohan sa panon sa mga karnero ug sa mga baka, aron ikahalad kang Jehova nga imong Diyos.”—1 Samuel 15:1-15.
10. Unsang leksiyon ang wala makat-oni ni Saul?
10 Niana si Samuel miingon kang Saul: “May dako bang kalipay si Jehova sa mga halad-nga-sinunog ug sa mga halad sama sa pagsunod sa tingog ni Jehova? Tan-awa! Ang pagsunod mas maayo pa kay sa halad, ang pagpamati kay sa tambok sa mga laking karnero.” (1 Samuel 15:22) Sanglit gihukom ni Jehova nga kadtong mga hayopa pagalaglagon, kadto dili madawat ingong mga halad.
Magmasinugtanon sa Tanang Butang
11, 12. (a) Unsay pag-isip ni Jehova sa atong mga paningkamot sa pagpahimuot kaniya diha sa atong pagsimba? (b) Sa unsang paagi mahimong limbongan sa usa ka tawo ang iyang kaugalingon sa paghunahuna nga siya nagbuhat sa kabubut-on sa Diyos bisan pag sa pagkatinuod siya wala magmasinugtanon?
11 Dako gayod ang kalipay ni Jehova sa dihang iyang makita nga ang iyang maunongong mga alagad magpabiling lig-on bisan pa sa paglutos, nga magmantala sa Gingharian bisan pa sa dili-matinagdanong mga tawo, ug motambong sa Kristohanong mga tigom bisan pag naglisod sa ilang panginabuhi! Ang atong pagkamasinugtanon sa maong hinungdanong mga bahin sa atong espirituwalidad makapalipay sa iyang kasingkasing! Ang atong paningkamot sa pagsimba kang Jehova bililhon kaniya sa dihang kana itanyag gumikan sa gugma. Mahimong dili magtagad ang mga tawo sa atong pagkugi, apan ang Diyos makamatikod sa atong kinasingkasing nga mga halad ug mahinumdom niana.—Mateo 6:4.
12 Apan aron bug-os natong mapahimut-an ang Diyos, kinahanglang magmasinugtanon kita sa tanang bahin sa atong kinabuhi. Dili gayod nato limbongan ang atong kaugalingon sa paghunahuna nga ang mga balaod sa Diyos mahimo natong supakon basta ato lang siyang ginasimba sa ubang bahin sa kinabuhi. Pananglitan, basin limbongan sa usa ka tawo ang iyang kaugalingon sa paghunahuna nga kon siya nagtuman sa pipila ka kahikayan sa pormal nga pagsimba, siya makalingkawas sa silot tungod sa imoralidad o pagbuhat ug ubang daotan kaayong buhat. Pagkasayop gayod niana!—Galacia 6:7, 8.
13. Sa pribado, sa unsang paagi mahimong sulayon ang atong pagkamasinugtanon kang Jehova?
13 Busa, makasukna kita sa atong kaugalingon, ‘Nagmasinugtanon ba ako kang Jehova sa adlaw-adlaw kong kalihokan, bisan sa pribadong mga butang?’ Si Jesus miingon: “Ang tawo nga kasaligan sa labing gamay kasaligan usab sa dako, ug ang tawo nga dili-matarong sa gamay dili-matarong usab sa dako.” (Lucas 16:10) Kita ba ‘nagalakaw sa integridad sa atong kasingkasing’ bisan ‘sulod sa atong balay,’ diin dili kita makita sa uban? (Salmo 101:2) Oo, bisan anaa kita sulod sa atong balay, ang atong integridad mahimong sulayon. Sa daghang nasod diin ang mga kompiyuter maoy ordinaryong kasangkapan sa balay, makita dayon ang malaw-ayng mga hulagway pinaagi sa pila ra ka pagtulpok sa mouse sa kompiyuter. Sa miaging pila lang ka tuig, ang maong mga hulagway dili makita sa usa ka tawo kon dili siya moadto sa mga dapit nga nagpasundayag ug imoral nga kalingawan. Masinugtanon ba natong pamatian ang mga pulong ni Jesus: “Ang matag usa nga magpadayon sa pagtan-aw sa usa ka babaye aron sa pagbaton ug kaibog kaniya nakapanapaw na uban kaniya diha sa iyang kasingkasing”? Oo, dumilian ba nato bisan ang pagtan-awg imoral nga mga hulagway? (Mateo 5:28; Job 31:1, 9, 10; Salmo 119:37; Proverbio 6:24, 25; Efeso 5:3-5) Unsay ikasulti bahin sa pintas nga mga salida sa TV? Kita ba nahiuyon sa atong Diyos, kansang kalag ‘nagdumot gayod sa kapintasan’? (Salmo 11:5) O unsay ikasulti bahin sa sobrang pag-inom ug alkoholikong ilimnon sa pribado? Ang Bibliya nagsaway sa paghuboghubog, apan nagpasidaan usab kini sa mga Kristohanon nga dili maulipon sa “daghang bino.”—Tito 2:3; Lucas 21:34, 35; 1 Timoteo 3:3.
14. Unsay pipila ka paagi nga madayag ang atong pagkamasinugtanon sa Diyos maylabot sa panalapi?
14 Ang laing natad nga kinahanglan kitang magmaigmat mao ang bahin sa panalapi. Pananglitan, makiglangkit ba kita sa daling-madato nga palakaw sa negosyo nga halos pagpanikas na? Matental ba kita sa paggamit ug supak-sa-balaod nga paagi aron dili makabayad ug buhis? O ato ba hinuong sundon ang sugo nga “ibayad ngadto sa tanan ang mga nahiangay kanila, kaniya nga nangayog buhis, ang buhis”?—Roma 13:7.
Pagkamasinugtanon Gumikan sa Gugma
15. Nganong imong gisugot ang mga sugo ni Jehova?
15 Ang pagsugot sa mga lagda sa Diyos magpatunghag mga panalangin. Pananglitan, pinaagi sa dili pagtabako, pagsunod sa matarong nga mga sukdanan sa moral sa kinabuhi, ug pagtahod sa pagkabalaan sa dugo, dili kita mataptan sa pipila ka sakit. Dugang pa, pinaagi sa pagkinabuhi nga nahiuyon sa kamatuoran sa Bibliya diha sa ubang bahin sa kinabuhi, mahimong mouswag ang atong panginabuhi, pagpakiglabot sa isigkatawo, o sa pamilya. (Isaias 48:17) Ang maong dayag nga mga benepisyo maisip sa tukma ingong mga panalangin nga nagpamatuod nga ang mga balaod sa Diyos mapuslanon gayod. Bisan pa niana, ang pangunang hinungdan nga magmasinugtanon kita kang Jehova mao nga kita nahigugma kaniya. Wala kita mag-alagad sa Diyos tungod sa hinakog nga mga hinungdan. (Job 1:9-11; 2:4, 5) Ang Diyos mihatag kanato sa kagawasan sa pagpili sa pagsugot kang bisan kinsang gusto nato. Atong gipili ang pagsugot kang Jehova tungod kay gusto natong pahimut-an siya ug tungod kay gitinguha nato ang pagbuhat kon unsay matarong.—Roma 6:16, 17; 1 Juan 5:3.
16, 17. (a) Sa unsang paagi si Jesus nagpakitag pagkamasinugtanon sa Diyos gumikan sa kinasingkasing nga gugma? (b) Sa unsang paagi makasundog kita kang Jesus?
16 Si Jesus naghatag ug hingpit nga panig-ingnan sa pagsugot kang Jehova tungod sa kinasingkasing nga gugma alang Kaniya. (Juan 8:28, 29) Samtang dinhi sa yuta, si Jesus “nakakat-on sa pagkamasinugtanon gikan sa mga butang nga iyang giantos.” (Hebreohanon 5:8, 9) Sa unsang paagi? Si Jesus “nagpaubos ug nagmasinugtanon hangtod sa kamatayon, oo, kamatayon sa estaka sa pagsakit.” (Filipos 2:7, 8) Bisan pag si Jesus nagmasinugtanon na sa langit, ang iyang pagkamasinugtanon dugang nga nasulayan sa yuta. Makapaneguro kita nga si Jesus may bug-os nga katakos sa pag-alagad ingong Hataas nga Saserdote alang sa iyang espirituwal nga mga igsoon ug sa uban pang matinuohong mga tawo.—Hebreohanon 4:15; 1 Juan 2:1, 2.
17 Komosta man kita? Makasundog kita kang Jesus kon atong unahon ang pagkamasinugtanon sa kabubut-on sa Diyos. (1 Pedro 2:21) Kita magmatagbawon sa dihang ang atong gugma alang sa Diyos magdasig kanato sa pagtuman kon unsay gisugo ni Jehova, bisan pag kita pit-oson o tentalon usahay sa dili pagsugot niana. (Roma 7:18-20) Naglakip kini sa atong pagkaandam mosunod sa mga direksiyon gikan niadtong nagapanguna sa matuod nga pagsimba, bisan pag dili sila hingpit. (Hebreohanon 13:17) Ang atong pagkamasinugtanon sa mga sugo sa Diyos sa atong pribadong kinabuhi maoy bililhon sa panan-aw ni Jehova.
18, 19. Unsay resulta kon kinasingkasing kitang magmasinugtanon sa Diyos?
18 Karong panahona, ang atong pagkamasinugtanon kang Jehova mahimong maglakip sa pag-antos sa paglutos aron padayong makahupot sa atong integridad. (Buhat 5:29) Gawas pa, ang atong pagsugot sa sugo ni Jehova nga magwali ug manudlo nagkinahanglan sa atong paglahutay hangtod sa kataposan niining sistemaha sa mga butang. (Mateo 24:13, 14; 28:19, 20) Kinahanglan kitang molahutay sa pagpadayon sa pagpakigtigom uban sa atong mga igsoon sa pagtuo, bisan pag mahimong mobati kitag kapit-osan tungod sa mga kalisdanan gikan sa kalibotan. Ang atong mahigugmaong Diyos nahibalo gayod sa atong mga paningkamot nga magmasinugtanon sa maong mga kahimtang. Apan aron bug-os magmasinugtanon, kinahanglan natong buntogon ang atong makasasalang unod ug molikay sa daotan samtang atong ginaugmad ang gugma alang sa maayo.—Roma 12:9.
19 Sa dihang kita mag-alagad kang Jehova gumikan sa gugma ug uban ang mapasalamatong kasingkasing, “siya maoy tigganti sa mga matinuorong nagapangita kaniya.” (Hebreohanon 11:6) Ang tukmang mga pagsakripisyo kinahanglanon ug tilinguhaon, apan ang bug-os nga pagkamasinugtanon gumikan sa gugma kang Jehova labi pang makapahimuot kaniya.—Proverbio 3:1, 2.
Unsay Imong Tubag?
• Nganong makaingon kita nga aduna kitay ikahatag kang Jehova?
• Unsang mga kasaypanan ang nahimo ni Saul?
• Sa unsang paagi ikapakita nimo nga nagtuo ka nga ang pagkamasinugtanon mas maayo kay sa halad?
• Unsay nagdasig kanimo sa pagsugot kang Jehova?
[Mga Pangutana sa Pagtuon]
[Hulagway sa panid 26]
Unsay bation sa matinagdanong doktor bahin sa pasyenteng wala magsunod sa iyang mga sugyot?
[Hulagway sa panid 28]
Nganong nasuko si Jehova kang Haring Saul?
[Mga hulagway sa panid 30]
Gisugot mo ba ang mga sugo sa Diyos diha sa pribasiya sa imong balay?