Mga Pangutana Gikan sa mga Magbabasa

May mga tiil ba ang halas nga nakigsulti kang Eva?

Sumala sa narekord sa Genesis 3:14, si Jehova nga Diyos nakigsulti sa halas nga naglimbong kang Eva didto sa tanaman sa Eden. Ang Diyos miingon: “Tungod kay gibuhat mo kining butanga, tinunglo ikaw sa tanang anad nga mga hayop ug sa tanang ihalas nga mga mananap sa kapatagan. Pinaagi sa imong tiyan ikaw magakamang ug abog ang imong pagakan-on sa tanang adlaw sa imong kinabuhi.” Wala klaroha sa Bibliya kon ang halas nga gigamit sa pagtental kang Eva may mga tiil ba kanhi apan sa ulahi nawad-an niini. Bisan tuod ang pagkasulti sa Genesis 3:14 mahimong makapahunahuna sa pipila nga kana ang nahitabo, kita dili angayng mohinapos nga ang mga halas may mga tiil sa wala pa kini tungloha. Nganong dili man?

Sa panguna, kini tungod kay ang tinuod nga gihukman ni Jehova mao si Satanas—ang dili-makitang espiritu nga naggamit sa ubos nga halas sa sayop nga paagi. Ang Bibliya naghubit kang Satanas nga “ang amahan sa bakak” ug “ang orihinal nga halas.” Kining duha ka panultihon dayag nga nagtumong sa paggamit ni Satanas ug literal nga halas ingong iyang tigpamaba aron sa pag-agni kang Eva sa pagsupak sa sugo sa Diyos.—Juan 8:44; Pinadayag 20:2.

Ang Diyos naglalang ug mga halas, ug lagmit ginganlan ni Adan ang mga halas sa wala pa gamita ni Satanas ang usa ka halas sa paglimbong kang Eva. Ang dili-intelihenteng halas nga nakigsulti kang Eva dili mao ang mabasol. Kini wala gayoy kalibotan nga gikontrolar diay kini ni Satanas, ug kini wala makasabot sa hukom nga gipahamtang sa Diyos batok sa mga rebelde.

Nan, nganong naghisgot man ang Diyos nga ang halas literal nga gipaubos? Ang kinaiyanhong paglihok sa halas, nga nagkamang pinaagi sa tiyan niini ug nagwitikwitik sa dila niini nga morag nagtilap ug abog, haom nga naghulagway sa gipaubos nga kahimtang ni Satanas. Siya nagpahimulos kanhi ug hataas nga posisyon ingong usa sa mga manulonda sa Diyos, apan karon siya gibalhog na ngadto sa ubos nga kahimtang nga gitawag sa Bibliya nga Tartaro.—2 Pedro 2:4.

Dugang pa, maingon nga ang literal nga halas makasamad sa tikod sa tawo, si Satanas diha sa iyang gipaubos nga kahimtang ‘magsamad sa tikod’ sa “binhi” sa Diyos. (Genesis 3:15) Ang pangunang bahin sa maong binhi mao si Jesu-Kristo, kinsa temporaryong nag-antos diha sa mga kamot sa mga ahente ni Satanas. Apan sa ngadtongadto, ang simbolikong ulo sa halas permanenteng dugmokon ni Kristo ug sa nabanhaw nga dinihogang mga Kristohanon nga iyang mga kauban. (Roma 16:20) Busa, sa dihang gitunglo sa Diyos ang literal nga halas, kadto haom nga naghulagway sa gipaubos ug bug-os nga kalaglagan sa dili-makitang “orihinal nga halas,” si Satanas nga Yawa.