“Nahibalo Ka ba sa Ngalan sa Diyos?”

KANANG pangutanaha nakapukaw sa interes sa usa ka babaye sa habagatan-kasadpang bahin sa Sentral Asia. Ang maong pangutana makita sa hapin sa Enero 22, 2004, nga gula sa kaubang magasin niini nga Pagmata! Ang maong babaye misulat sa mga magpapatik: “Sukad gayod sa sinugdan, naikag ako sa pagbasa sa inyong magasin, ug kini nakatabang kanako sa pagsentro sa akong hunahuna sa moral nga mga prinsipyo. Ang akong panglantaw sa kinabuhi anam-anam nga nahimong positibo. Akong gisultihan ang tanan nakong ikaestorya bahin sa atong Diyos ug sa kalinaw nga ikahatag tungod niining kahibaloa.”

Diha sa daghang dapit, hangtod pa gani sa “kinalay-ang dapit sa yuta,” ang mga tawo anam-anam nga nakaila sa ngalan sa Diyos, nga Jehova. (Buhat 1:8) Pananglitan, kining ngalana nga sa Turkmen nga pinulongan maoy Yehowa, dali rang makaplagan sa Turkmen nga hubad sa Balaang Kasulatan. Diha sa Salmo 8:1, kini ang mabasa: “Jehova nga among Ginoo, pagkahalangdon sa imong ngalan sa tibuok nga yuta!”

Aron makakat-on pag dugang bahin kang Jehova nga Diyos, ang maong babaye mihangyog kopya sa 32-panid nga brosyur nga Ang Balaang Ngalan nga Magapadayon sa Walay Kataposan. Makahangyo ka usab niining brosyura gikan sa usa sa mga Saksi ni Jehova.