“Lainlaig Pinulongan Apan Nagkahiusa Tungod sa Gugma”

Kaluwasan. Kagawasan. Sulod sa dugay nang panahon, ang mga tawo nangandoyg kahupayan gikan sa tanang problema ug mga kasakit. Sa unsang paagi nato masagubang ang mga suliran sa kinabuhi? Makalaom pa ba kita nga makalingkawas niining tanan? Kon oo, sa unsang paagi?

MAO kanay gihisgotan diha sa serye sa tulo-ka-adlaw nga distritong kombensiyon nga gihikay sa mga Saksi ni Jehova sugod sa Mayo 2006. Ang tema maoy “Ang Kaluwasan Haduol Na!”

Siyam niining mga kombensiyona gitambongan ug linibo ka delegado gikan sa lainlaing nasod. Kini gipahigayon sa bulan sa Hulyo ug Agosto 2006 sa Prague, ang kaulohan sa Czech Republic; sa Bratislava, ang kaulohan sa Slovakia; sa Chorzow ug Poznan, Polandia; a ug sa lima ka siyudad sa Alemanya—sa Dortmund, Frankfurt, Hamburg, Leipzig, ug sa Munich. Kapin sa 313,000 tanan ang nanambong.

Unsay nasinatian sa mga delegado panahon sa kombensiyon? Unsay komento sa mga tawo bahin sa mga Saksi? Ug unsay gibati sa mga delegado human sa kombensiyon?

Pagpangandam

Ang mga bisita ug ang lokal nga mga Saksi naghinamhinam sa pagtambong sa kombensiyon tungod kay usa kini ka halandomong okasyon. Dakong trabaho ang paghikay ug kaabtan sa mga delegado. Pananglitan, sa Chorzow, ang Polakong mga Saksi nagtanyag sa ilang mga balay aron kasak-an sa halos 13,000 ka delegado gikan sa Sidlakang Uropa. Ang mga delegado naggikan sa Armenia, Belarus, Estonia, Georgia, Kazakhstan, Kyrgyzstan, Latvia, Lithuania, Moldova, Rusya, Tajikistan, Tinipong Bansa, Turkmenistan, Ukraine, ug Uzbekistan.

Daghan sa mga delegado ang naghinayhinay na sa pagpangandam bisag dugay pa kaayo ang kombensiyon. Si Tatiana, nga bug-os-panahong magwawali sa Kamchatka—usa ka lawis sa Rusya nga amihanan-sidlakan sa Hapon—nagsugod pagtigom ug kuwarta usa ka tuig nga abante. Siya kinahanglang mobiyaheg 10,500 ka kilometro. Aron makaabot sa Chorzow, siya mobiyaheg 5 ka oras sa ayroplano, dayon halos tulo ka adlaw sa tren, ug 30 ka oras sa bus.

Linibo ang nagboluntaryo sa paghinlo sa mga estadyum ug sa palibot niini aron mahimo kining haom nga dapit sa pagsimba. (Deuteronomio 23:14) Sa paghisgot ug usa ka pananglitan,  gihinloag maayo sa mga Saksi sa Leipzig ang estadyum, ug misaad sila nga hinloan kana pag-usab human sa kombensiyon. Tungod niana, gikunhoran sa tagdumala ang ilang abang sa estadyum.

Pagpanagtag ug Imbitasyon

Ang mga kongregasyon sa tibuok kalibotan nanagtag ug mga imbitasyon sa “Ang Kaluwasan Haduol Na!” nga kombensiyon. Masiboton kaayong nakigbahin niini ang mga Saksi nga mitambong sa internasyonal nga mga kombensiyon. Gani, usa ka adlaw una magsugod ang kombensiyon, padayon pa silang nanagtag bisag gabii na kaayo. Nagbunga ba ang ilang kasibot?

Si Bogdan, nga usa ka Polakong Saksi, nakahibalag ug usa ka tigulang nga gustong motambong apan dili makaarang sa plete paingon sa Chorzow, nga 120 kilometros ang gilay-on. Maayo na lang kay dunay bakante sa bus nga giabangan sa kongregasyon. Si Bogdan miingon: “Giingnan namo siya nga makakuyog siya namo basta moabot siya sa tagboanan sa alas 5:30 sa buntag.” Misugot siya ug mitambong sa kombensiyon. Sa ulahi misulat siya sa mga igsoon, nga nag-ingon: “Human ko makatambong sa kombensiyon, midako ang akong tinguha nga mahimong mas maayong tawo.”

Sa Prague, ang usa ka tawo nga nag-abot sa usa sa mga hotel nga gisak-an sa mga delegado gikan sa Britanya miingon usa ka gabii niana nga siya mitambong usab sa kombensiyon nianang adlawa. Unsay nakaaghat kaniya sa pagtambong? Siya miingon nga nakadesisyon siya sa pagtambong human makadawat ug napulo ka imbitasyon gikan sa lainlaing Saksi nga nanagtag niini diha sa kadalanan sa siyudad. Nakadayeg kaayo siya sa kombensiyon ug gusto niyang mokat-on pag dugang.—1 Timoteo 2:3, 4.

Makapatagbaw nga Espirituwal nga Programa

Gihisgotan sa programa kon unsaon pagsagubang ang lainlaing problema. Ang prangkang mga tambag sa Bibliya nagpatin-aw kon sa unsang paagi masulbad o maantos kining mga problemaha.

Ang mga tawo nga nag-antos tungod sa pagkatigulang, sakit, pagkamatay sa mga minahal o nagsagubang sa uban pang problema nakadawat ug pagdasig gikan sa Bibliya nga nakatabang kanila sa paghupot ug positibong panglantaw sa kinabuhi. (Salmo 72:12-14) Ang mga magtiayon ug mga ginikanan nakadungog ug mga tambag sa Bibliya kon sa unsang paagi matagamtam ang malipayong kaminyoon ug kon sa unsang paagi molampos sila sa pagmatuto sa ilang mga anak. (Ecclesiastes 4:12; Efeso 5:22, 25; Colosas 3:21) Ang batan-ong mga Kristohanon—nga nag-atubang ug makadaot nga mga impluwensiya diha sa tunghaan apan gigiyahan sa maalamong tambag gikan sa Pulong sa Diyos diha sa panimalay ug sa kongregasyon—nakadawat ug praktikal nga tambag kon sa unsang paagi mabuntog nila ang pagpit-os sa ilang isigkabatan-on ug kon sa unsang paagi sila ‘makakalagiw gikan sa mga tinguha nga iya sa pagkabatan-on.’—2 Timoteo 2:22.

Tinuod nga Panag-igsoonay sa mga Tawo nga Lainlaig Nasyonalidad

Diha sa ilang mga tigom, ang mga Saksi ni Jehova kanunayng makadawat  ug praktikal nga mga giya gikan sa Bibliya. (2 Timoteo 3:16) Apan linain kining mga kombensiyona tungod kay gitambongan kini sa mga delegado gikan sa lainlaing nasod. Gipresentar usab niining mga kombensiyona ang susamang espirituwal nga programa diha sa lainlaing pinulongan. Matag adlaw, ang mga membro sa Nagamandong Lawas sa mga Saksi ni Jehova naghatag ug mga pakigpulong, ug dihay mga taho gikan sa ubang kayutaan nga nakahimo sa kombensiyon nga mas makaiikag. Kini nga mga pakigpulong ug mga taho gihubad aron masabtan sa tanang delegado.

Ang mga delegado naghinamhinam sa paghimamat sa ilang mga igsoon gikan sa laing nasod. “Dili babag ang kalainan sa pinulongan,” matod pa sa usa ka delegado. “Mas nakapasadya pa hinuon kini sa okasyon. Bisag lainlain ug kultura ang mga bisita, sila nahiusa tungod sa ilang pagtuo.” Ang mga kombensiyonista sa Munich miingon: “Ang mga tawo lainlaig pinulongan apan nagkahiusa tungod sa gugma.” Bisan unsa pay ilang nasyonalidad ug pinulongan, ang mga nanambong mibati nga gilibotan sila sa tinuod nga mga higala—ang ilang mga igsoon sa pagtuo.—Zacarias 8:23.

Mga Pahayag sa Pagpasalamat

Ang klima panahon sa kombensiyon sa Polandia nagsulay sa tinamdan ug kamainantoson sa mga delegado. Gawas nga nagsigeg ulan, tugnaw pa gyod kaayo—halos 14 grado Celsius. Ang usa ka brader gikan sa Tinipong Bansa miingon: “Mao pa ko katambong ug kombensiyon nga nagdaot pag-ayo ang panahon ug tugnaw pa gyod, ug gamay ra kog nasabtan. Apan balewala ra kadto tungod sa makapadasig nga panag-ubanay, maayong tinamdan ug talagsaong kamaabiabihon sa mga igsoon. Di gyod nako makalimtan kadtong kombensiyona!”

Dili malimtan sa mga kombensiyonista nga nagsultig Polako ang pahibalo nga luwatan ang Insight on the Scriptures sa ilang pinulongan—usa ka maayong balos sa ilang pag-antos sa kaulan ug katugnaw. Gikalipay usab sa mga nanambong ang pagluwat sa bag-ong publikasyon nga Pagkinabuhi nga Naghunahuna sa Adlaw ni Jehova.

Duna pay laing hinungdan kon nganong dili gayod malimtan sa daghang nanambong ang maong kombensiyon. Si Kristina, usa ka sister nga taga-Czech Republic nga miuban sa usa ka bus nga puno sa mga delegado gikan sa laing nasod, nahinumdom: “Sa among pagpanamilitay, giduol ug gigakos ko sa usa ka sister, ug giingnan ko niya: ‘Maayo kaayo ang inyong pag-atiman namo! Gihatdan mi ninyog pagkaon ug tubig sa among mga lingkoranan. Salamat kaayo sa inyong gugma ug mga sakripisyo.’” Ang iyang gipasabot mao ang gidalit nga paniudto para sa mga delegado gikan sa laing nasod. “Mao pa mi kasulay ato,” misaysay ang usa ka brader. “Adlaw-adlaw ming mag-apod-apod ug pagkaon para sa halos 6,500 ka igsoon. Makapadasig gyod nga daghan kaayo ang miboluntaryo, apil mga bata!”

Usa ka sister nga taga-Ukraine, nga mitambong sa kombensiyon sa Chorzow, miingon: “Natandog mi pag-ayo sa gugma, pag-atiman, ug kamaabiabihon sa mga igsoon. Dili ikahubit ang among pagpasalamat.” Ug ang usa ka otso anyos nga batang babaye sa Pinlandia nga si Annika misulat ngadto sa sangang buhatan sa mga Saksi ni Jehova sa Polandia: “Wala ko magdahom nga ingon adto diay ka nindot ang kombensiyon. Pagkamaayo gayod nga mahimong sakop sa organisasyon ni Jehova kay makaamigo tag mga igsoon sa lainlaing nasod!”—Salmo 133:1.

 Komento sa mga Tawo

Antes sa kombensiyon, dihay kahikayan nga isuroy ang mga delegado. Sa kabanikanhan sa Bavaria, ang mga bisita mihapit sa mga Kingdom Hall, diin giabiabi sila sa mga Saksi sa maong dapit. Ang usa ka dili Saksi nga tiggiya sa mga turista nakadayeg pag-ayo sa gugma nga gipakita sa mga igsoon. “Sa pagpaingon namo sa among hotel,” matod pa sa usa ka delegado, “ang tiggiya miingon nga lahi kaayo mi sa ubang mga turista. Maayo kono mig pamiste, ug ang tanan mikooperar sa nanguna sa grupo. Wala mi mamalikas ug wala magkaguliyang. Siya natingala nga dali ra kaayong nagkaamigohay ang mga delegado bisag mao pay ilang pagkita.”

Ang usa ka brader nga naasayn sa News Service Department sa kombensiyon sa Prague nag-ingon: “Sa Dominggo sa buntag, ang opisyal sa mga polis nga naasayn sa kombensiyon miduaw kanamo. Miingon siya nga malinawon ang kombensiyon maong wala siyay himoon. Misulti usab siya nga ang pipila ka molupyo duol sa estadyum nangutana bahin sa programa. Sa dihang iyang hisgotan nga kini iya sa mga Saksi ni Jehova, sagad nga negatibo ang ilang reaksiyon, mao nga ingnan niya sila: ‘Kon sundogon lang unta sa mga tawo ang mga Saksi ni Jehova bisan gamay, dili na kinahanglan ang mga polis.’”

Daghan ang Nahigawas Na!

Ang Pulong sa Diyos, ang Bibliya, maoy hinungdan kon nganong adunay pakigdait ug panaghiusa taliwala sa mga Kristohanon. (Roma 14:19; Efeso 4:22-24; Filipos 4:7) Napamatud-an kini diha sa “Ang Kaluwasan Haduol Na!” nga internasyonal nga kombensiyon. Ang mga Saksi ni Jehova nahigawas na sa daghang suliran nga nagsakit niining kalibotana. Ang pagkamapihigon ug kapintasan nga maoy pipila sa mga problema sa katilingban halos wala na sa ilang taliwala, ug sila nagpaabot sa panahon nga kini bug-os nang mawagtang.

Ang tanang nanambong nakasinati mismo sa panaghiusa taliwala sa mga Saksi nga lainlaig nasyonalidad ug kultura. Dayag kaayo kini sa dihang natapos ang kombensiyon. Ang tanan namakpak, naggaksanay, ug nagletratohay. (1 Corinto 1:10; 1 Pedro 2:17) Kay malipayon ug kombinsido nga haduol na ang kaluwasan gikan sa tanang problema, ang mga delegado namauli sa ilang mga pinuy-anan nga mas determinado sa pagpangupot nga hugot sa “pulong sa kinabuhi” gikan sa Diyos.—Filipos 2:15, 16.

[Footnote]

[Kahon/Hulagway sa panid 10]

Nagsultig 26 ka Pinulongan Apan Nagkahiusa

Sa siyam ka kombensiyon, ang mga programa gipahayag diha sa lokal nga mga pinulongan. Sa Alemanya, ang mga pakigpulong gipahayag sa 18 pa ka pinulongan. Sa Dortmund, ang mga pakigpulong gipahayag sa Arabiko, Farsi, Portuges, Kinatsila, ug Ruso; Iningles, Pranses, ug Serbiano/Kroasiano sa Frankfurt; Danes, Olandes, Sweko, ug Tamil sa Hamburg; Ininsek, Polako, ug Turko sa Leipzig; Grego, Italyano, ug Sign Language nga Aleman usab sa Munich. Sa kombensiyon sa Prague, ang tanang pakigpulong gipahayag sa Czech, Iningles, ug Ruso. Sa Bratislava ang programa gipresentar sa Hungariano, Iningles, Slovak ug Sign Language nga Slovak. Sa Chorzow, ang gigamit maoy Polako, Ruso, Ukrainiano, ug Sign Language nga Polako. Ug sa Poznan, Polako ug Pinlandes ang gigamit.

Bayente-sayis ka pinulongan tanan! Tinuod, ang nanambong lainlaig pinulongan apan sila nagkahiusa tungod sa gugma.

[Hulagway sa panid 9]

Ang mga delegado sa Frankfurt nga taga-Croatia nalipay sa pagdawat sa “Bag-ong Kalibotang Hubad” sa ilang kaugalingong pinulongan