Mainantosong Nagpaabot sa Adlaw ni Jehova
Mainantosong Nagpaabot sa Adlaw ni Jehova
“Ipuno sa inyong pagtuo . . . ang pagkamainantoson.”—2 PEDRO 1:5, 6.
1, 2. Unsay ipasabot sa pagkamainantoson o pagkamalahutayon, ug nganong gikinahanglan kini sa mga Kristohanon?
DUOL na gayod ang adlaw ni Jehova. (Joel 1:15; Sofonias 1:14) Ingong mga Kristohanon nga determinado sa paghupot sa atong integridad sa Diyos, kita maikagong nagpaabot sa panahong bayawon na ang pagkasoberano ni Jehova. Kasamtangan, atong giatubang ang pagdumot, pakaulaw, paglutos, ug ang kamatayon tungod sa atong pagtuo. (Mateo 5:10-12; 10:22; Pinadayag 2:10) Kini nagkinahanglag pagkamainantoson—ang katakos sa pag-antos sa mga kalisdanan. Si apostol Pedro miawhag kanato: “Ipuno sa inyong pagtuo . . . ang pagkamainantoson.” (2 Pedro 1:5, 6) Kinahanglan kitang moantos o molahutay kay si Jesus miingon: “Siya nga nakalahutay hangtod sa kataposan mao ang maluwas.”—Mateo 24:13.
2 Kita mahimong masakit, magmasulub-on tungod sa pagkamatay sa usa ka minahal, ug makaagom pag ubang mga pagsulay. Si Satanas malipay gayod kon mawad-an kitag pagtuo! (Lucas 22:31, 32) Sa tabang ni Jehova atong maantos ang nagkalainlaing pagsulay. (1 Pedro 5:6-11) Tagda ang pipila ka aktuwal nga mga kasinatian nga magpamatuod nga kita makapaabot sa adlaw ni Jehova uban ang pagkamainantoson ug way-pagkatarog nga pagtuo.
Ang Sakit Wala Makababag Kanila
3, 4. Paghatag ug pananglitan nga magpasundayag nga makaalagad kitang matinumanon kang Jehova bisan pag kita may sakit.
3 Ang atong sakit dili ayohon sa Diyos sa milagrosong paagi karon, apan mohatag siya kanatog kalig-on aron makaantos kita sa atong sakit. (Salmo 41:1-3) “Sukad sa pagkatimaan nakog buot,” matod ni Sharon, “kanunay ko nang gigamit ang silyang may ligid. Wala ako makasinati sa mga kalipay sa pagkabata tungod sa paralisis sa utok sukad sa akong pagkatawo.” Ang pagkakat-on ni Sharon bahin kang Jehova ug sa iyang gisaad nga hingpit nga panglawas nakahatag kaniyag paglaom. Bisan pag maglisod siya sa pagsulti ug paglakaw, siya malipay nga makigbahin sa Kristohanong ministeryo. Mga 15 ka tuig kanhi, siya miingon: “Mahimong mograbe pa ang akong sakit, apan ang akong pagsalig sa Diyos ug ang akong relasyon uban kaniya nakapalig-on kanako. Pagkamalipayon ko nga nahimong bahin sa katawhan ni Jehova ug wala gayod siya mapakyas sa pagtabang kanako!”
4 Giawhag ni apostol Pablo ang mga Kristohanon sa Tesalonica sa ‘paghupay sa magul-anong mga kalag.’ (1 Tesalonica 5:14) Ang pagbatig dakong kapakyasan mahimong makapaguol pag-ayo. Niadtong 1993, si Sharon misulat: “Kay gibati kong pakyas kaayo . . . akong naagoman ang grabeng depresyon sulod sa tulo ka tuig. . . . Gihupay ug gitambagan ako sa mga ansiyano. . . . Pinaagi sa Ang Bantayanang Torre, si Jehova malulotong nagtagana kanatog impormasyon bahin sa grabeng depresyon. Siya nahingawa gayod sa iyang katawhan ug nakasabot sa atong mga pagbati.” (1 Pedro 5:6, 7) Si Sharon nagaalagad gihapon nga matinumanon sa Diyos samtang siya nagpaabot sa dakong adlaw ni Jehova.
5. Unsa ang pamatuod nga ang mga Kristohanon makaantos sa mapait nga mga kasinatian?
5 Ang pipila ka Kristohanon gihasol sa mapait nga mga kasinatian sa ilang kinabuhi. Si Harley nakasaksi ug grabeng mga kombatehay sa Gubat sa Kalibotan II ug siya may daotang mga damgo bahin sa maong gubat. Samtang natulog, siya makasinggit: “Bantay! Hapa!” Sa dihang mahigmata, siya matumog sa singot. Bisan pa niana, siya nakapadayon sa pag-alagad sa Diyos, ug sa ngadtongadto, ang iyang mga damgo dili na kaayo ngil-ad ug panagsa na lang.
6. Sa unsang paagi gisagubang sa usa ka Kristohanon ang iyang grabeng suliran sa emosyon?
6 Ang pagsangyaw sa balay-balay lisod kaayo alang sa usa ka Kristohanong may grabeng suliran sa emosyon (bipolar disorder). Apan ang maong igsoong lalaki nagpadayon sa pagsangyaw sa balay-balay tungod kay siya nahibalo nga pinaagi sa pagsangyaw siya ug kadtong mosanong niana mahimong maluwas. (1 Timoteo 4:16) Usahay dili gani siya makahimo sa pagtimbre sa pultahan, apan siya miingon: “Sa taudtaod,” matod niya, “mapugngan ko na ang akong emosyon, moadto sa sunod nga balay ug mosulay na usab sa pagsangyaw. Pinaagi sa padayong pagpakigbahin sa ministeryo, ako himsog sa espirituwal.” Ang pagtambong sa mga tigom malisod usab, apan nagtuo siya nga ang pagpakig-uban sa mga igsoon sa pagtuo hinungdanon kaayo. Busa, naningkamot gayod siyang makatambong.—Hebreohanon 10:24, 25.
7. Bisan pag ang pipila tingali mahadlok nga mosulti sa publiko o motambong sa tigom, sa unsang paagi nagpasundayag silag pagkamalahutayon?
7 Ang pipila ka Kristohanon mobatig sobrang kahadlok sa pipila ka kahimtang o butang. Pananglitan, sila tingali mahadlok nga mosulti sa publiko o motambong sa tigom. Tiaw mo unsa ka lisod alang kanila ang pagkomento panahon sa Kristohanong mga tigom o paghatag ug pakigpulong sa Teokratikanhong Tunghaan sa Ministeryo! Apan sila milahutay, ug nalig-on kita pag-ayo sa ilang pagtambong ug pagkomento sa mga tigom.
8. Unsay ilabinang makatabang sa dihang nagsagubang ug mga suliran sa emosyon?
8 Ang dugang pagpahulay ug pagkatulog tingali makatabang aron ang usa ka tawo makaantos sa mga suliran sa emosyon. Maayo tingaling mokonsultag doktor. Hinuon, ilabinang makatabang ang pagsalig sa Diyos pinaagi sa mga pag-ampo. “Itugyan ang imong palas-anon kang Jehova, ug siya magasapnay kanimo,” matod sa Salmo 55:22. “Dili gayod niya itugot nga matarog ang matarong.” Nan, ‘salig gayod kang Jehova sa bug-os mong kasingkasing.’—Proverbio 3:5, 6.
Pag-antos Samtang Nagbangotan
9-11. (a) Unsay makatabang kanato sa pag-antos sa kasub-anan sa dihang ang usa ka minahal mamatay? (b) Sa unsang paagi ang panig-ingnan ni Ana makatabang kanato sa pag-antos sa pagbangotan?
9 Kon adunay membro sa pamilya nga mamatay, mahimong bation ang dakong kasub-anan tungod niana. Si Abraham mihilak tungod sa pagkamatay ni Sara, ang iyang minahal nga asawa. (Genesis 23:2) Bisan ang tawong hingpit nga si Jesus “mihilak” sa pagkamatay sa iyang higalang si Lazaro. (Juan 11:35) Busa natural lang nga kita masubo sa dihang ang usa ka minahal mamatay. Hinuon, nahibalo ang mga Kristohanon nga adunay pagkabanhaw. (Buhat 24:15) Busa, dili sila “masubo ingon sa uban usab nga mga walay paglaom.”—1 Tesalonica 4:13.
10 Sa unsang paagi atong masagubang ang pagbangotan? Tingali makatabang ang usa ka ilustrasyon. Kasagarang dili magdugay ang atong kasub-anan inigbiyahe sa usa ka higala sanglit nagdahom man kita nga ato siyang makita pag-usab inigpauli niya. Tingalig kita dili na kaayo masubo kon atong isipon sa ingon niana ang pagkamatay sa usa ka matinumanong Kristohanon tungod kay kita nahibalo nga siya seguradong mabanhaw.—Ecclesiastes 7:1.
11 Ang bug-os nga pagsalig sa “Diyos sa tanang paghupay” makatabang kanato sa pag-antos sa pagbangotan. (2 Corinto 1:3, 4) Ang pagpalandong sa gihimo sa balo nga si Ana makatabang usab kanato. Nabalo siya human sa pito ra ka tuig nga kaminyoon. Bisag 84-anyos na si Ana, siya nag-alagad gihapon kang Jehova didto sa templo. (Lucas 2:36-38) Ang iyang pagkadebotado sa Diyos nakatabang gayod kaniya sa pag-antos sa kasub-anan ug kamingaw. Ang kanunayng pagpakigbahin sa Kristohanong mga kalihokan, lakip ang pagsangyaw bahin sa Gingharian, makatabang kanato sa pag-antos sa pagbangotan.
Pagsagubang sa Nagkalainlaing Pagsulay
12. Unsang mga pagsulay sulod sa pamilya ang giantos sa pipila ka Kristohanon?
12 Ang pipila ka Kristohanon magaantos gayod ug mga pagsulay sulod sa pamilya. Pananglitan, kon ang usa ka kapikas makapanapaw, kana makapaguol kaayo sa pamilya! Ang giluibang kapikas tingali dili makatulog tungod sa labihang kalagot ug kaguol, ug dili niya mapugngan ang paghilak. Ang ginagmayng mga trabaho daw bug-at kaayo mao nga siya magkasayopsayop o kaha mahitabo pa ang mga aksidente. Ang giluibang kapikas tingali dili na ganahang mokaon, magniwang, ug mabalisa kaayo. Mahimong lisdan na siya sa pagpakigbahin sa Kristohanong mga kalihokan. Ug kana makadaot gayod kaayo sa mga anak!
13, 14. (a) Ang pag-ampo ni Solomon sa panahon sa inagurasyon sa templo makadasig kanimo sa pagbuhat sa unsa? (b) Nganong mag-ampo man kita alang sa balaang espiritu?
13 Sa dihang makasinati kita sa maong mga pagsulay, si Jehova motabang gayod kanato. (Salmo 94:19) Ang Diyos magpatalinghog sa mga pag-ampo sa iyang katawhan, sama sa gipakita sa pag-ampo ni Haring Solomon sa panahon sa inagurasyon sa templo ni Jehova. Si Solomon miampo sa Diyos: “Bisan unsa nga pag-ampo, bisan unsa nga hangyo alang sa pabor nga himoon ni bisan kinsa nga tawo o sa tibuok nimong katawhang Israel, tungod kay ang matag usa kanila nahibalo sa hampak sa iyang kaugalingong kasingkasing, ug sila gayod magabayaw sa ilang mga kamot nganhi niining balaya, nan maminaw ka unta gikan sa mga langit, ang imong pihong dapit nga puloy-anan, ug ikaw magapasaylo ug molihok ug mohatag sa matag usa sumala sa tanan niyang mga dalan, tungod kay ikaw nahibalo sa iyang kasingkasing (tungod kay ikaw lamang ang nahibalo sa kasingkasing sa tanang anak sa katawhan); aron nga sila mahadlok kanimo sa tanang adlaw nga sila buhi ibabaw sa nawong sa yuta nga imong gihatag sa among mga katigulangan.”—1 Hari 8:38-40.
14 Ilabinang makatabang ang pag-ampo kanunay alang sa balaang espiritu. (Mateo 7:7-11) Ang mga bunga sa espiritu naglakip sa mga hiyas nga sama sa kalipay ug sa pakigdait o kalinaw. (Galacia 5:22, 23) Makapahupay gayod sa dihang tubagon sa atong langitnong Amahan ang atong mga pag-ampo—kalipay imbes kasubo, kalinaw imbes sobrang kabalaka!
15. Unsang mga kasulatan ang makapahupay sa atong kabalaka?
15 Natural lang nga mabalaka kita kon aduna kitay bug-at nga suliran. Apan mahupay tingali ang pipila sa maong kabalaka kon atong hinumdoman ang mga pulong ni Jesus: “Hunong na sa pagkabalaka bahin sa inyong mga kalag kon unsay inyong kan-on o kon unsay inyong imnon, o bahin sa inyong mga lawas kon unsay inyong isul-ob. . . . Nan, magpadayon sa pagpangita pag-una sa gingharian ug sa pagkamatarong [sa Diyos], ug kining tanang ubang mga butang igadugang ra kaninyo.” (Mateo 6:25, 33, 34) Giawhag kita ni apostol Pedro nga ‘itugyan sa Diyos ang tanan natong kabalaka, kay siya may kahingawa kanato.’ (1 Pedro 5:6, 7) Tukma ang pagpaningkamot aron masulbad ang usa ka suliran. Apan kon ato nang gihimo ang kutob sa atong maarangan, ang pagkabalaka dili makatabang kanato, apan pag-ampo ang makatabang. “Itugyan kang Jehova ang imong dalan, ug salig kaniya, ug siya molihok,” miawit ang salmista.—Salmo 37:5.
16, 17. (a) Nganong kita mabalaka gihapon? (b) Unsay atong masinati kon ipadapat nato ang Filipos 4:6, 7?
16 Si Pablo misulat: “Ayaw kabalaka sa bisan unsang butang, apan sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya sa Diyos; ug ang kalinaw sa Diyos nga labaw sa tanang panghunahuna magbantay sa inyong mga kasingkasing ug sa inyong mga gahom sa pangisip pinaagi kang Kristo Jesus.” (Filipos 4:6, 7) Siyempre, mabalaka gihapon ang dili-hingpit nga mga kaliwat ni Adan. (Roma 5:12) Ang Hitihanon nga mga asawa ni Esau “maoy tinubdan sa kapaitan sa espiritu” alang sa iyang diyosnong mga ginikanan, si Isaac ug si Rebeca. (Genesis 26:34, 35) Ang sakit maoy hinungdan sa kabalaka ni Timoteo ug Trofimo. (1 Timoteo 5:23; 2 Timoteo 4:20) Nabalaka si Pablo bahin sa iyang mga isigkamagtutuo. (2 Corinto 11:28) Apan ang “Tigpatalinghog sa pag-ampo” andam kanunay nga motabang niadtong nahigugma kaniya.—Salmo 65:2.
17 Samtang nagpaabot kita sa adlaw ni Jehova, ang “Diyos sa kalinaw” nagpaluyo ug naghupay kanato. (Filipos 4:9) Si Jehova “maluluy-on ug mapuangoron,” siya “maayo ug andam sa pagpasaylo,” ug ‘siya nahinumdom nga kita abog.’ (Exodo 34:6; Salmo 86:5; 103:13, 14) Busa, atong ‘ipahibalo kaniya ang atong mga pangaliya,’ kay moresulta kini sa atong pagkasinati sa “kalinaw sa Diyos”—ang pagkamalinawon nga labaw sa tawhanong panghunahuna.
18. Sumala sa giingon sa Job 42:5, sa unsang paagi mahimong ‘makita’ ang Diyos?
18 Sa dihang matubag ang atong mga pag-ampo, nahibalo kita nga ang Diyos nagauban kanato. Human maantos ni Job ang iyang mga pagsulay, siya miingon: “Sa hulungihong nakadungog ako bahin kanimo [Jehova], apan karon ang akong mata nakakita kanimo.” (Job 42:5) Pinaagi sa mata sa pagsabot, pagtuo, ug pagkamapasalamaton, kita makapamalandong sa mga pagpakiglabot sa Diyos kanato ug ‘makakita’ kaniya nga labaw pa sukad masukad. Pagkatalagsaong kalinaw sa kasingkasing ug kaisipan ang atong masinati tungod sa atong pagkasuod sa Diyos!
19. Unsay mahitabo kon atong ‘itugyan ang atong tanang kabalaka kang Jehova’?
19 Kon atong ‘itugyan ang atong tanang kabalaka kang Jehova,’ atong maantos ang mga pagsulay uban ang pagkamalinawon nga magabantay sa atong kasingkasing ug mga gahom sa panghunahuna. Sa kahiladman sa atong simbolikong kasingkasing, dili na kita mabalisa, mahadlok, ug mabalaka. Dili magubot ang atong hunahuna tungod sa kalibog o kabalaka.
20, 21. (a) Unsang ebidensiya bahin sa pagkamalinawon ang gihatag ni Esteban sa dihang siya gilutos? (b) Isaysay ang usa ka modernong panig-ingnan sa pagkamalinawon sa dihang magaantos ug mga pagsulay.
20 Ang pagkamalinawon gipasundayag sa tinun-ang si Esteban sa dihang naagoman niya ang grabeng pagsulay sa iyang pagtuo. Una pa sa iyang kataposang pagpamatuod, ang tanang sakop sa Sanhedrin ‘nakakita nga ang iyang nawong sama sa nawong sa manulonda.’ (Buhat 6:15) Ang iyang panagway malinawon nga sama sa iya sa manulonda, nga mensahero sa Diyos. Human ibutyag ni Esteban nga ang mga maghuhukom sad-an tungod sa pagkamatay ni Jesus, sila “nasakitan pag-ayo sa ilang mga kasingkasing ug nagpakagot sa ilang mga ngipon batok kaniya.” Apan si Esteban, “nga puno sa balaang espiritu, mitutok sa langit ug iyang nakita ang himaya sa Diyos ug si Jesus nga nagbarog sa tuong kamot sa Diyos.” Tungod kay nalig-on sa maong panan-awon, si Esteban nagmatinumanon hangtod sa kamatayon. (Buhat 7:52-60) Bisan kita wala hatagig mga panan-awon, kita makabaton ug kalinaw gikan sa Diyos sa dihang pagalutoson.
21 Tagda ang pagbati sa pipila ka Kristohanon nga gipatay sa mga Nazi panahon sa Gubat sa Kalibotan II. Usa kanila miasoy bahin sa iyang kasinatian sa hukmanan, ug siya miingon: “Gipakanaog na ang hukom nga kamatayon. Ako namati, ug human nako malitok ang mga pulong, ‘Magmatinumanon ka hangtod sa kamatayon,’ ug ang pipila ka ubang pulong sa atong Ginoo, ang tanan natapos. . . . Apan ayaw na mog kabalaka bahin niana. Kay gibati ko ang tumang kamalinawon nga dili gayod mahanduraw!” Usa ka batan-ong Kristohanon nga gisentensiyahan ug kamatayon pinaagig pagpunggot misulat sa iyang mga ginikanan: “Lapas na sa tungang gabii. May panahon pa ako sa pag-usob sa akong hunahuna. Magmalipayon pa ba ko niining kalibotana kon isalikway ko ang atong Ginoo? Dili na gayod! Apan kamo makasalig na karon nga ako mobiya niining kalibotana nga may kalipay ug kalinaw.” Sa walay duhaduha, si Jehova nagpaluyo gayod sa iyang maunongong mga alagad.
Makalahutay Ka!
22, 23. Makasalig ka sa unsa samtang mainantoson kang nagpaabot sa adlaw ni Jehova?
22 Dili ka tingali makasinati sa pipila ka suliran nga atong nahisgotan. Bisan pa niana, husto si Job sa miingon siya: “Ang tawo, nga natawo sa usa ka babaye, mubo ug kinabuhi ug tugob sa kasamok.” (Job 14:1) Tingali ikaw usa ka ginikanan nga naningkamot pag-ayo nga giyahan ang imong mga anak sumala sa mga prinsipyo sa Bibliya. Sila magaantos gayod ug mga pagsulay sa eskuylahan, apan malipay ka gayod kon sila lig-ong mobarog dapig kang Jehova ug sa iyang matarong nga mga prinsipyo! Mahimong nakasinati kag mga kalisdanan ug tentasyon sa imong gitrabahoan. Apan, ikaw makaantos niini ug sa uban pang mga pagsulay tungod kay ‘si Jehova sa adlaw-adlaw nagapas-an sa imong luwan.’—Salmo 68:19.
23 Basin naghunahuna ka nga ikaw ordinaryo lamang, apan hinumdomi nga si Jehova dili gayod mahikalimot sa imong buhat ug sa gugma nga imong gipakita alang sa iyang ngalan. (Hebreohanon 6:10) Imong maantos ang mga pagsulay sa pagtuo tungod sa iyang tabang. Busa ilakip ang pagbuhat sa kabubut-on sa Diyos sa imong mga pag-ampo ug mga plano. Unya ikaw makasalig nga panalanginan ug paluyohan ka sa Diyos samtang mainantoson kang nagpaabot sa adlaw ni Jehova.
Unsay Imong Tubag?
• Nganong kinahanglang magmainantoson ang mga Kristohanon?
• Unsay makatabang kanato sa pag-antos sa sakit ug pagbangotan?
• Sa unsang paagi ang pag-ampo makatabang kanato sa pag-antos sa mga pagsulay?
• Nganong posible ang mainantosong pagpaabot sa adlaw ni Jehova?
[Mga Pangutana sa Pagtuon]
[Hulagway sa panid 29]
Kon kita mosalig kang Jehova, atong maantos ang pagbangotan
[Hulagway sa panid 31]
Ang kinasingkasing nga pag-ampo makatabang kanato sa pag-antos sa mga pagsulay sa pagtuo