Nakasala Ka ba Batok sa Balaang Espiritu?
Nakasala Ka ba Batok sa Balaang Espiritu?
“Adunay sala nga makamatay.”—1 JUAN 5:16.
1, 2. Nganong nahibalo kita nga ang usa ka tawo posibleng makasala batok sa balaang espiritu sa Diyos?
“NAHASOL ang akong hunahuna nga basin ako nakasala batok sa balaang espiritu.” Kana ang gisulat sa usa ka babaye nga taga-Alemanya, bisan pag siya usa ka alagad sa Diyos. Mahimo bang makasala ang usa ka Kristohanon batok sa balaang espiritu o aktibong gahom sa Diyos?
2 Posible kaayo nga makasala ang usa ka tawo batok sa balaang espiritu ni Jehova. “Ang tanang matang sa sala ug pasipala igapasaylo sa mga tawo,” matod ni Jesu-Kristo, “apan ang pasipala batok sa espiritu dili pagapasayloon.” (Mateo 12:31) Kita gipasidan-an: “Kon kita tinuyo nga magpakasala human makadawat sa tukmang kahibalo sa kamatuoran, wala nay halad nga nahibilin alang sa sala, apan may usa ka makahahadlok nga pagpaabot sa paghukom.” (Hebreohanon 10:26, 27) Unya si apostol Juan misulat: “Adunay sala nga makamatay.” (1 Juan 5:16) Apan ang tawong nakahimo ug seryosong sala mao ba ang magtino kon siya nakahimog “sala nga makamatay”?
Kon May Paghinulsol May Pagpasaylo
3. Unsay lagmit tinuod kon naguol kita pag-ayo tungod sa nahimo natong sala?
3 Si Jehova ang ultima nga Maghuhukom sa mga mamumuhat ug daotan. Sa pagkatinuod, kitang tanan manubag kaniya, ug sa tanang panahon siya nagbuhat kon unsay matarong. (Genesis 18:25; Roma 14:12) Si Jehova ang maghukom kon nakahimo ba kitag dili-mapasaylo nga sala, ug mahimo niyang kuhaon ang iyang espiritu gikan kanato. (Salmo 51:11) Bisan pa niana, kon naguol kita pag-ayo tungod sa nahimo natong sala, lagmit tinuod gayod ang atong paghinulsol. Apan unsay tinuod nga paghinulsol?
4. (a) Unsay kahulogan sa paghinulsol? (b) Nganong makapahupay ang Salmo 103:10-14?
4 Ang paghinulsol nagkahulogan nga giusob nato ang atong tinamdan bahin sa nangagi o sa gilaraw natong buhat nga daotan. Kini nagkahulogan nga kita naguol o gibasolan ug gitalikdan na nato ang maong sala. Kon kita nakahimog seryosong sala apan may gihimo nang mga tikang nga nagpakita sa tinuod natong paghinulsol, ang mga pulong sa salmista makapahupay kanato: “Wala niya [Jehova] buhata kanato ang angay sa atong kasal-anan; ni nagpahamtang siya kon unsay angay kanato pinasukad sa atong kasaypanan. Kay ingon nga ang mga langit hataas kay sa yuta, ang iyang mahigugmaong-kalulot labaw ngadto kanila nga nahadlok kaniya. Ingon sa pagkalayo sa sidlakan gikan sa kasadpan, sa mao nga gilay-on iyang gipahilayo gikan kanato ang atong mga kalapasan. Ingon sa usa ka amahan nga magapakitag kaluoy sa iyang mga anak, si Jehova nagpakitag kaluoy kanila nga nahadlok kaniya. Kay siya nahibalo pag-ayo sa atong pagkaumol, nga nahinumdom nga kita abog.”—Salmo 103:10-14.
5, 6. Isaysay ang pangunang punto sa 1 Juan 3:19-22, ug ipatin-aw ang kahulogan sa mga pulong ni apostol Juan.
5 Ang mga pulong ni apostol Juan makapahupay usab: “Pinaagi niini kita mahibalo nga kita nagagikan sa kamatuoran, ug makapasalig kita sa atong mga kasingkasing sa iyang atubangan bahin sa bisan unsa nga ihukom kanato sa atong mga kasingkasing, tungod kay ang Diyos mas labaw kay sa atong mga kasingkasing ug nahibalo sa tanang butang. Mga hinigugma, kon ang atong mga kasingkasing wala maghukom kanato, kita adunay kagawasan sa pagsulti ngadto sa Diyos; ug bisan unsay atong pangayoon atong madawat gikan kaniya, tungod kay atong ginabantayan ang iyang mga sugo ug ginabuhat ang mga butang nga makapahimuot sa iyang mga mata.”—1 Juan 3:19-22.
6 Kita ‘nahibalo nga kita nagagikan sa kamatuoran’ tungod kay kita nagpadayag ug inigsoong gugma ug wala magbatasan sa pagpakasala. (Salmo 119:11) Kon mobati kitang hinukman tungod sa usa ka hinungdan, angay natong hinumdoman nga “ang Diyos mas labaw kay sa atong mga kasingkasing ug nahibalo sa tanang butang.” Si Jehova magpakitag kaluoy kanato tungod kay siya nahibalo sa atong “dili-salingkapaw nga inigsoong pagbati,” sa atong pagpakigbisog batok sa sala, ug sa atong paningkamot sa pagbuhat sa iyang kabubut-on. (1 Pedro 1:22) Ang atong kasingkasing ‘dili mohukom kanato’ kon kita mosalig kang Jehova, magpadayag ug inigsoong gugma, ug wala magbatasan sa tinuyong sala. Kita aduna unyay “kagawasan sa pagsulti ngadto sa Diyos” diha sa pag-ampo, ug siya magpatalinghog kanato tungod kay atong ginabantayan ang iyang mga sugo.
Mga Tawong Nakasala Batok sa Espiritu
7. Unsay magtino kon mapasaylo ba o dili ang usa ka sala?
7 Unsa ang mga sala nga dili mapasaylo? Aron matubag kana, atong hisgotan ang pipila ka pananglitan sa Bibliya. Angay kining makapahupay kanato kon tinuod kitang naghinulsol bisan pag naguol gihapon pag-ayo tungod sa seryoso natong mga sala. Masabtan nato nga ang pagkamapasaylo o dili sa usa ka sala magdepende sa motibo, sa kondisyon sa kasingkasing, ug kon tinuyo ba ang pagpakasala, ug kini wala magdepende kon unsang matanga ang sala.
8. Nganong ang pipila ka Hudiyong pangulo sa relihiyon sa unang siglo nakasala batok sa balaang espiritu?
8 Ang Hudiyong mga pangulo sa relihiyon sa unang siglo nga grabeng misupak kang Jesu-Kristo nakasala batok sa balaang espiritu. Sila nakakita nga ang espiritu sa Diyos naggiya kang Jesus samtang naghimo siyag mga milagro nga nagpasidungog kang Jehova. Bisan pa niadto, ang mga kaaway ni Kristo miingon nga ang maong gahom naggikan kang Satanas nga Yawa. Si Jesus miingon nga ang mga nagpasipala batok sa balaang espiritu sa Diyos nianang paagiha nakahimog sala nga dili na mapasaylo niining “sistemaha sa mga butang ni nianang sa umaabot.”—Mateo 12:22-32.
9. Unsay pasipala, ug unsay giingon ni Jesus bahin niini?
9 Ang pasipala maoy mabutangbutangon, makadaot, o mapasipad-anon nga sinultihan. Sanglit ang balaang espiritu gikan sa Diyos, ang pagsulti batok sa iyang espiritu maoy sama ra sa pagsulti batok kang Jehova. Kanang matanga sa sinultihan nga walay paghinulsol dili gayod mapasaylo. Ang panghitabo nga nakatukmod kang Jesus sa paghisgot sa maong matang sa sala nagpakita nga ang gitumong ni Jesus mao ang mga tawo nga tinuyong nagsupak sa paglihok sa balaang espiritu sa Diyos. Tungod kay nakita man sa mga Pariseo nga si Jesus gigiyahan sa espiritu ni Jehova apan sila miingon nga kadtong gahoma naggikan sa Yawa, sila nagpasipala ug nakasala batok sa espiritu. Busa si Jesus miingon: “Si bisan kinsa nga magapasipala batok sa balaang espiritu wala nay kapasayloan hangtod sa kahangtoran, kondili sad-an sa walay kataposang sala.”—Marcos 3:20-29.
10. Nganong si Judas ginganlan ni Jesus ug “anak sa kalaglagan”?
10 Tagda usab ang kahimtang ni Judas Iskariote. Siya wala magmatinud-anon kay siya nangawat gikan sa kahon sa salapi nga gisalig kaniya. (Juan 12:5, 6) Si Judas miduol sa ulahi sa mga Hudiyong pangulo sa relihiyon ug gihikay niya ang pagbudhi kang Jesus baylo sa 30 ka pirasong plata. Bisag naguol si Judas human sa iyang pagbudhi kang Jesus, apan wala niya hinulsoli ang iyang tinuyong sala. Busa, si Judas dili takos nga banhawon. Mao nga ginganlan siya ni Jesus ug “anak sa kalaglagan.”—Juan 17:12; Mateo 26:14-16.
Mga Tawong Wala Makasala Batok sa Espiritu
11-13. Sa unsang paagi nakasala si Haring David uban kang Bat-seba, ug nganong ang paagi sa paghusay sa Diyos kanila makapahupay kanato?
11 Ang mga Kristohanon nga nakasugid na sa ilang seryosong sala ug natabangan na sa mga ansiyano sa kongregasyon usahay mabalaka gihapon bahin sa nangagi nilang mga kalapasan sa balaod sa Diyos. (Santiago 5:14) Kon ingon usab niini ang atong gibati, maayong tagdon nato ang giingon sa Kasulatan bahin sa mga tawo nga nakasala ug unya napasaylo na.
12 Si Haring David nakahimog bug-at nga sala uban kang Bat-seba, ang asawa ni Urias. Tungod kay si David nakakita niining matahom nga babaye nga naligo samtang siya midungaw gikan sa atop sa haduol niyang palasyo, iyang gipakuha ug gipaadto si Bat-seba sa palasyo ug siya nakigsekso kaniya. Sa dihang sa ulahi gipahibalo si David nga si Bat-seba namabdos, iyang gihikay nga ang bana ni Bat-seba nga si Urias makigdulog sa iyang asawa aron dili mabutyag ang ilang pagpanapaw. Kay napakyas man ang maong laraw, gihikay sa hari nga si Urias mamatay sa panggubatan. Human niadto, giminyoan ni David si Bat-seba ug siya nanganak apan sa wala madugay ang bata namatay.—2 Samuel 11:1-27.
13 Si Jehova ang naghusay sa kaso ni David ug Bat-seba. Ang Diyos nagpasaylo kang David, lagmit tungod sa iyang paghinulsol ug sa pakigsaad sa Gingharian nga gihimo uban niya. (2 Samuel 7:11-16; 12:7-14) Dayag nga si Bat-seba mahinulsolon, tungod kay siya nakapribilehiyo nga mahimong inahan ni Haring Solomon ug katigulangan ni Jesu-Kristo. (Mateo 1:1, 6, 16) Kon kita nakahimog sala, maayong hinumdoman nga si Jehova magmatikod sa atong paghinulsol.
14. Sa unsang paagi nadayag kon asa kutob ang pagpasaylo sa Diyos sa kahimtang ni Haring Manases?
14 Gipadayag usab sa kahimtang ni Haring Manases sa Juda kon asa kutob ang pagpasaylo ni Jehova. Si Manases nagbuhat ug daotan sa mga mata ni Jehova. Siya nagpatindog ug mga halaran alang sa mga Baal, nagyukbo sa “tanang panon sa kalangitan,” ug nagtukod pag mga halaran alang sa bakak nga mga diyos sulod sa duha ka sawang sa templo. Siya nagpaagi sa iyang kaugalingong mga anak sa kalayo, nagdasig sa mga buhat sa espiritismo, ug nagdaldal sa mga molupyo sa Juda ug Jerusalem “sa pagbuhat ug labi pa ka daotan kay sa kanasoran nga gilaglag ni Jehova gikan sa atubangan sa mga anak sa Israel.” Wala siya mamati sa mga pasidaan nga gipahayag sa mga manalagna sa Diyos. Sa kataposan, si Manases nabihag sa hari sa Asirya. Samtang binihag, si Manases naghinulsol ug mapainubsanong nag-ampo kanunay sa Diyos mao nga siya gipasaylo ug gipasig-uli ingong hari sa Jerusalem, diin iyang gipalambo ang matuod nga pagsimba.—2 Cronicas 33:2-17.
15. Unsang panghitabo sa kinabuhi ni apostol Pedro ang nagpakita nga si Jehova magpasaylo “sa madagayaon gayod”?
15 Paglabay sa daghang siglo, si apostol Pedro nakahimog grabeng sala tungod sa iyang paglimod kang Jesus. (Marcos 14:30, 66-72) Bisan pa niadto, si Jehova nagpasaylo kang Pedro “sa madagayaon gayod.” (Isaias 55:7) Ngano? Tungod kay si Pedro tinuod nga naghinulsol. (Lucas 22:62) May tin-awng ebidensiya nga ang Diyos nagpasaylo kaniya paglabay sa 50 ka adlaw sa dihang sa adlaw sa Pentekostes, si Pedro nakapribilehiyo sa pagpamatuod nga maisogon bahin kang Jesus. (Buhat 2:14-36) Ang Diyos magpasaylo usab sa mga Kristohanon karon nga tinuod nga naghinulsol. “Kon mga kasaypanan mao pa ang imong gibantayan, Oh Jah, Oh Jehova, kinsa ba ang makabarog?” miawit ang salmista, “kay ang matuod nga pagpasaylo anaa kanimo.”—Salmo 130:3, 4.
Paghupay sa Kabalaka Bahin sa Sala
16. Ubos sa unsang mga kahimtang nga ang Diyos magpasaylo?
16 Ang gihisgotang mga pananglitan angayng makapahupay sa atong kabalaka bahin sa pagkasala batok sa balaang espiritu. Gipadayag sa maong mga pananglitan nga si Jehova magpasaylo gayod sa mahinulsolong mga makasasala. Ang sinserong pag-ampo sa Diyos maoy hinungdanon kaayo. Kon kita nakasala, makapangaliyupo kita alang sa pasaylo pinasukad sa halad lukat ni Jesus, sa kaluoy ni Jehova, sa napanunod natong pagkadili-hingpit, ug sa atong rekord sa matinumanong pag-alagad. Kay nahibalo kita sa dili-takos nga kalulot ni Jehova, makapangayo kitag pasaylo, kay masaligon nga dili kana ihikaw kanato.—Efeso 1:7.
17. Unsay angayng buhaton kon kita nakasala ug nagkinahanglag espirituwal nga tabang?
17 Apan unsa man kon ang sala nga atong nahimo nakadaot pag-ayo sa atong relasyon kang Jehova ug gibati nato nga dili na kita makahimo sa pag-ampo kaniya? Bahin niini ang tinun-ang si Santiago misulat: “Magpatawag siyag mga ansiyano sa kongregasyon, ug paampoa sila alang kaniya, nga maghaplas kaniya ug lana sa ngalan ni Jehova. Ug ang pag-ampo sa pagtuo mag-ayo sa usa nga naluya, ug si Jehova magbangon kaniya. Dugang pa, kon siya nakasala, siya pagapasayloon.”—Santiago 5:14, 15.
18. Nganong ang sala sa usa ka tawo dili ikaingon nga dili na mapasaylo bisan pag siya gipalagpot sa kongregasyon?
18 Bisan pag ang usa ka mamumuhat ug daotan dili mahinulsolon ug siya gipalagpot sa kongregasyon, dili ikaingon nga ang iyang sala dili na mapasaylo. Mahitungod sa usa ka gipalagpot nga dinihogan tungod kay nakabuhat ug daotan didto sa Corinto, si apostol Pablo misulat: “Kini nga pagbadlong nga gihatag sa kadaghanan igo na sa maong tawo, mao nga, sa kasukwahi karon, angay kamong malulotong magpasaylo ug maghupay kaniya, aron ang maong tawo dili lamyon sa iyang tumang kasubo.” (2 Corinto 2:6-8; 1 Corinto 5:1-5) Hinuon, aron mapasig-uli ang ilang relasyon kang Jehova, angayng dawaton sa mga nakasala ang tabang nga gipasukad sa Bibliya gikan sa Kristohanong mga ansiyano ug kinahanglang magpakita silag ebidensiya sa tinuod nga paghinulsol. Kinahanglang sila ‘magpatunghag mga bunga nga nahiangay sa paghinulsol.’—Lucas 3:8.
19. Unsay makatabang kanato nga magpabiling “himsog sa pagtuo”?
19 Unsa kahay hinungdan nga kita mobating nakasala batok sa balaang espiritu? Ang dili-maayong paminsar ug luyang panglawas lagmit maoy mga hinungdan niana. Sa maong kahimtang, ang pag-ampo ug dugang nga pagpahulay makatabang. Dili gayod nato tugotan si Satanas sa pagbugnaw kanato aron kita mohunong sa pag-alagad sa Diyos. Sanglit si Jehova dili malipay sa kamatayon sa mga daotan, segurado nga dili siya malipay kon may mohunong sa pag-alagad kaniya. Busa kon kita nabalaka nga nakasala batok sa espiritu, kinahanglang mopadayon kita sa pagtuon sa Pulong sa Diyos, lakip sa makapahupayng basahon sa Mga Salmo. Kinahanglang mopadayon kita sa pagtambong sa mga tigom sa kongregasyon ug sa pagsangyaw bahin sa Gingharian. Ang maong kalihokan makatabang kanato nga mahimong “himsog sa pagtuo” ug dili mabalaka nga kita nakahimog sala nga dili mapasaylo.—Tito 2:2.
20. Unsang pangatarongan ang makatabang sa usa ka tawo sa pagsabot nga wala siya makasala batok sa balaang espiritu?
20 Si bisan kinsang nabalaka nga siya nakasala batok sa balaang espiritu makasukna sa iyang kaugalingon: ‘Ako ba nakapasipala batok sa balaang espiritu? Sanglit gihinulsolan ko na ang akong sala, nausob na ba ang akong tinamdan bahin sa maong paghinulsol? Nagtuo ba ako sa pagkamapinasayloon sa Diyos? Ako ba usa ka apostata nga nagsalikway sa espirituwal nga kahayag?’ Ang maong mga tawo lagmit makaamgo nga wala sila makapasipala batok sa balaang espiritu sa Diyos, ni sila nahimong mga apostata. Sila mahinulsolon ug padayong nagtuo sa pagkamapinasayloon ni Jehova. Kon mao, wala sila makasala batok sa balaang espiritu ni Jehova.
21. Unsang mga pangutana ang hisgotan sa sunod artikulo?
21 Makapahupay gayod nga atong natino nga kita wala makasala batok sa balaang espiritu! Bisan pa niana, may mga pangutana bahin sa balaang espiritu nga hisgotan sa sunod artikulo. Pananglitan, makasukna kita sa atong kaugalingon: ‘Gigiyahan ba gayod ako sa balaang espiritu sa Diyos? Ako bang gipasundayag ang mga bunga niini sa akong kinabuhi?’
Unsay Imong Tubag?
• Nganong makaingon kita nga posible nga makasala batok sa balaang espiritu?
• Unsay kahulogan sa paghinulsol?
• Sa dihang si Jesus dinhi sa yuta, kinsay nakasala batok sa espiritu?
• Sa unsang paagi mahupay ang kabalaka nga ang usa nakahimog dili-mapasaylo nga sala?
[Mga Pangutana sa Pagtuon]
[Hulagway sa panid 17]
Kadtong miingon nga si Jesus naghimog mga milagro gumikan sa gahom ni Satanas nakasala batok sa balaang espiritu sa Diyos
[Hulagway sa panid 18]
Bisan pag gilimod ni Pedro si Jesus, siya wala makahimog dili-mapasaylo nga sala