“Usa ka Matinumanong Saksi sa Kalangitan”

DUGAY nang gidayeg sa mga magbabalak ug mga tigkomposog awit ang katahom sa bulan. Pananglitan, ang usa ka inspiradong awit naghisgot ug usa ka babaye nga “matahom sama sa takdol nga bulan.” (Awit ni Solomon 6:10) Ug ang usa ka salmista balaknong nagtawag sa bulan nga “usa ka matinumanong saksi sa kalangitan.” (Salmo 89:37) Unsay kahulogan niining mga pulonga maylabot sa bulan?

Ang bulan way-sipyat nga molibot sa yuta matag 27.3 ka adlaw. Busa ang pagkamatinumanon sa bulan mahimong nagtumong sa pagkakasaligan niini. Hinunoa, ang salmista mahimong naghunahuna pag mas lawom nga kahulogan. Iyang gitawag ang bulan nga “usa ka matinumanong saksi” diha sa matagnaong awit bahin sa Gingharian nga gitudlo ni Jesus nga iampo sa iyang mga sumusunod.—Mateo 6:9, 10.

Kapin sa 3,000 ka tuig kanhi, si Jehova nga Diyos mihimog pakigsaad kang Haring David sa karaang Israel bahin sa Gingharian. (2 Samuel 7:12-16) Ang katuyoan sa maong pakigsaad mao ang pagpahimutang ug legal nga basehanan aron nga si Jesu-Kristo, ingong manununod ni David, makapanag-iya sa trono hangtod sa hangtod. (Isaias 9:7; Lucas 1:32, 33) Sa pagtumong sa trono sa “binhi” ni David, ang salmista miawit: “Ingon sa bulan kini lig-ong matukod hangtod sa panahong walay tino, ug ingon nga usa ka matinumanong saksi sa kalangitan.”—Salmo 89:36, 37.

Ang bulan, nga mao ang ‘banwag nga maghari sa gabii,’ maoy haom nga pahinumdom sa pagkamalungtaron sa pagmando ni Kristo. (Genesis 1:16) Mahitungod sa iyang Gingharian, ang Daniel 7:14 nag-ingon: “Ang iyang pagmando maoy usa ka pagmando nga mohangtod sa panahong walay tino nga dili mahanaw, ug ang iyang gingharian dili magun-ob.” Ang bulan maoy usa ka saksi nga magpahinumdom kanato bahin sa maong Gingharian ug sa mga panalangin nga ihatag niini alang sa katawhan.

[Picture Credit Line sa panid 32]

Moon: NASA photo