Sugilanon sa Kinabuhi

Ang Pag-alagad Kang Jehova​—Usa ka Dakong Kadungganan

Sumala sa giasoy ni Zerah Stigers

Ang akong bana, nga kanunay nakong ikauban diha sa bug-os-panahong ministeryo, namatay sa 1938. Tungod niana, nahipatong sa akong abaga ang pag-atiman sa among masuso ug sa among diyes-anyos nga anak nga lalaki. Gusto gihapon nakong mag-alagad ingong bug-os-panahong ministro, apan unsaon man nako pagpadayon sa maong buluhaton? Sa dili pa nako ipatin-aw kana, paasoya una ko sa lakbit bahin sa akong kaagi.

WALA madugay human ako matawo niadtong Hulyo 27, 1907, sa Alabama, U.S.A., ang akong mga ginikanan ug kaming upat ka managsoon namalhin sa Georgia. Gikan didto, kami mitawon sa Tennessee ug dayon ngadto sa usa ka lugar nga duol sa Tampa, Florida. Niadtong 1916, samtang didto pa mi namuyo, among nakita ang “Photo-Drama of Creation,” usa ka pelikula nga dinuyogan ug tingog. Dili pa kaayo ugmad niadtong panahona ang pamelikula, busa ang tanan giganahan kaayo sa salidang “Photo-Drama”!

Ang akong mga ginikanan himasa kaayo sa Ang Bantayanang Torre ug sa ubang mga publikasyon nga binase sa Bibliya. Bisan tuod ganahang mobasa si Papa sa maong mga publikasyon, nianang tungora dili siya aktibong nakig-uban sa mga Estudyante sa Bibliya, nga maoy pagtawag kaniadto sa mga Saksi ni Jehova. Apan, ikuyog mi ni Mama sa mga tigom. Gani, wala madugay human mi mamalhin sa Niles, Michigan, kami kanunayng mobiyahe ug kapin sa napulo ka milya sakay sa tren paingon sa South Bend, Indiana, aron motambong sa mga tigom.

Ngadtongadto, niadtong Hulyo 22, 1924, ako nabawtismohan  isip simbolo sa akong pagpahinungod kang Jehova. Wala madugay human niana, giorganisar ni Mama ang iyang mga buluhaton aron siya mahimong colporteur, nga maoy pagtawag kaniadto sa bug-os-panahong mga ministro sa mga Saksi ni Jehova. Tungod sa iyang maayong panig-ingnan ug nianang sa ubang mga colporteur, nadasig ako sa pagsulod usab sa bug-os-panahong pag-alagad.

Pagkakaplag ug Kapikas sa Kinabuhi

Niadtong 1925, samtang ako mitambong sa usa ka dakong kombensiyon sa Indianapolis, Indiana, akong nahimamat si James Stigers, nga taga-Chicago. Dihadiha nakadayeg ako kaniya tungod kay dasig kaayo siya sa pag-alagad kang Jehova. Ang gilay-on sa among pinuy-anan gikan sa Chicago mokabat ug 160 kilometros, busa panagsa ra ming magkita. Niadtong panahona, usa ray kongregasyon nianang dako nga siyudad, ug ang mga tigom gihimo sa usa ka inabangang lawak sa ikaduhang andana. Si James subsob nga mosulat aron dasigon ako sa pagpadayon sa pag-alagad. Naminyo mi sa Disyembre 1926, ug mga usa ka tuig sa ulahi, natawo ang among unang anak, si Eddie.

Wala madugay human niana, nagpayunir mi ni James. Kami nagsangyaw diha sa walo ka estado—Michigan, Louisiana, Mississippi, South Dakota, Iowa, Nebraska, California, ug Illinois—diin among natagamtam ang labing malipayong yugto sa among kinabuhi. Apan natibhangan ang among kalipay sa dihang si James nasakit.

Tungod niana nagkalisodlisod mi, busa nakahukom mi nga mamalik sa Chicago sa 1936 aron moipon sa akong ugangang babaye, nga Saksi usab. Sa dihang migrabe na ang sakit ni James ug ako niadtong tungora nagsabak usab sa among ikaduhang anak, ako nanarbaho diha sa usa ka karinderya nga gisuholan ug $1 kada adlaw. Tinagan-an mi sa akong minahal nga ugangan ug daghang pagkaon, ug dili gani siya modawat sa kuwarta nga akong itunol agig tampo sa mga galastohan. Giatiman gayod niya kami pag-ayo.

Mga duha ka tuig nga giantos ni James ang encephalitis o paghubag sa utok. Namatay siya niadtong Hulyo 1938. Samtang siya nagmasakiton, siya dili makadrayb sa awto o makauban sa pagpamalaybalay, apan naningkamot siya nga makasangyaw sa uban sa matag higayon. Aron makaabag sa mga galastohan sa among pamilya, miundang una ko pagpayunir. Daghan kog nasudlan nga trabaho, apan kadto pulos dili-permanente.

Ang among anak nga si Bobby natawo sa Hulyo 30, 1938, walo lamang ka adlaw human mamatay ang iyang amahan. Apan, dili mosugot ang akong ugangan nga adto ko manganak sa ospital nga walay bayad. Busa, gihikay niya nga maadmit ako sa maarang-arang nga ospital ug didto giatiman ako sa iyang doktor. Unya, siya pa gyoy miabaga sa mga bayranan, usa ka pamatuod sa Kristohanong gugma nga ako gayong gipabilhan.

Pagsulod Pag-usab sa Bug-os-Panahong Ministeryo

Nagpadayon kami sa pagpuyo uban sa akong ugangan hangtod nga si Bobby nag-edad nag kapin sa 2 ka tuig ug nianang panahona si Eddie 12 anyos na. Bisan tuod kinahanglang mopasibo ako sa akong bag-ong kahimtang, hugot gihapon ang akong tinguha nga moalagad kang Jehova nga bug-os-panahon. Sa 1940, sa kombensiyon sa Detroit, Michigan, nahimamat nako ang usa ka magtiayong payunir nga nagdasig kanako sa pagpayunir didto sa South Carolina. Busa mipalit ko ug 1935 Pontiac nga modelo sa awto nga mibalor ug $150 ug nangandam sa pagbalhin didto. Sa 1941, ang tuig diin ang Tinipong Bansa nalangkit sa Gubat sa Kalibotan II, ako ug ang akong mga anak mipaingon sa habagatan, ug sa makausa pa ako misulod sa bug-os-panahong ministeryo.

Pagbalhin namo sa South Carolina, mipuyo  una mi sa Camden, dayon sa Little River, ug unya sa Conway. Sa Conway, nakapalit ko ug mobile home, o maguyod-guyod nga balay. Gitugtan ko sa usa ka buotan nga tawo nga moparking duol sa iyang gasolinahan, mogamit sa iyang suplay sa gas ug elektrisidad, ug bisan sa ilang kasilyas. Panahon sa Gubat sa Kalibotan II, girasyon ang gasolina, ug wala koy mapalit bisag diyutay. Busa mipalit na lang kog segunda mano nga bisikleta. Dayon, sa 1943, sa dihang morag imposible na nga makapadayon ko sa pagpayunir tungod kay wala na mi kuwarta, ako natudlo ingong espesyal payunir; busa makadawat na akog gamayng kantidad kada bulan nga makatabang sa among mga galastohan. Sulod sa daghang katuigan, si Jehova kanunay gayong nagtabang kanako!

Walay laing Saksi sa Conway niadtong panahona, ug malisdan ming mosangyaw nga kamikami ra. Busa mihangyo ako sa Sosyedad nga unta padad-an akog partner nga espesyal payunir. Tuod man, pagka 1944, gihatagan kog buotan nga partner, si Edith Walker! Magkauban kami diha sa ubay-ubayng mga asaynment sulod sa 16 ka tuig. Apan, ikasubo nga tungod sa dili maayong panglawas, siya kinahanglang mopauli sa Ohio.

Dili Makalimtang mga Panalangin

Daghan kog makalilipayng mga kasinatian niadtong panahona. Apan ang dili gyod nako malimtan mao ang 13-anyos nga si Albertha, nga nagpuyo sa Conway ug nag-atiman sa iyang baldadong apohang babaye ug duha ka manghod nga lalaki. Interesado kaayo siya sa kamatuoran sa Bibliya nga akong gitudlo kaniya ug buot niyang ipaambit kana sa uban. Naugmad usab niya ang dulot nga pagpabili sa payunir nga pag-alagad ug nagpayunir siya human mograduwar sa hayskul niadtong 1950. Kapin sa 57 ka tuig sa ulahi, siya usa gihapon ka bug-os-panahong ministro!

Sa 1951, si Edith ug ako giasayn ug kadiyot sa Rock Hill, South Carolina, diin diyutay ra ang Saksi. Dayon gibalhin kami sa Elberton, Georgia, ug nag-alagad didto sulod sa tulo ka tuig. Unya mibalik na usab kami sa South Carolina, diin ako nagpabilin gikan sa 1954 ngadto sa 1962. Sa Walhalla, nahimamat nako ang usa ka tigulang ug bungol nga babaye nga ginganlag Nettie, kinsa nag-inusara pagpuyo sa iyang balay diha sa banika. Sa among pagtuon, iyang basahon ang usa ka parapo diha sa publikasyon, akong itudlo ang pangutana diha sa ubos sa panid, ug dayon iyang itudlo ang tubag diha sa parapo.

Kon duna siyay dili masabtan, iyang isulat sa papel ang iyang pangutana, ug akong isulat usab ang tubag. Sa ngadtongadto, midako pag-ayo ang pagpabili ni Nettie sa kamatuoran sa Bibliya nga tungod niana nagtambongan na siya sa mga tigom sa kongregasyon ug nakigbahin usab sa pagpamalaybalay. Siya rang usa ang moduol sa mga tagbalay, apan diha ra sab ko sa duol, kasagaran anaa lang sa tabok sa karsada, nga andam motabang kaniya kon gikinahanglan.

Samtang didto ko sa Walhalla, ang akong awto dili na modagan. Diha koy nagustoang awto nga mikantidad ug $100, apan wala koy kuwarta. Nanghulam ko sa usa ka Saksi nga may negosyo, ug gipautang ko niya ug $100. Wala madugay human niana, nakadawat kog sulat gikan sa akong manghod nga babaye nga nag-ingon nga nadiskobrehan nila nga pagkamatay sa among amahan, may kuwarta diay siya sa bangko. Ilang gihisgotan kon unsaon kana, ug nagkasabot sila nga ipadala kana kanako. Ang kuwarta mikantidad ug $100!

Pagpayunir Uban sa Akong mga Anak

Sa mga bata pa si Eddie ug Bobby, sila kanunayng kauban nako sa pagsangyaw sa kanataran. Niadtong panahona, wala kaayoy mga giyanon sa droga, ug dili parehas karon kakusog ang impluwensiya sa imoral nga mga buhat. Ang paghupot sa among kinabuhi nga simple ug ang pag-una sa buluhatong pagsangyaw nakatabang kanako nga  makalikay sa daghang problema nga gisagubang sa mga ginikanan karon sa pagmatuto sa ilang mga anak sa pag-alagad kang Jehova.

Si Eddie nag-eskuyla sa didto pa kami sa Camden hangtod nga natapos niya ang ikawalong ang-ang, ug dayon nagpayunir siya uban nako. Nalipay kami sa pagpayunir nga magkauban sulod sa pipila ka tuig. Dayon nagtinguha siya sa pagboluntaryo sa hedkuwarter sa mga Saksi ni Jehova sa Brooklyn, New York, diin siya nag-alagad gikan sa 1947 hangtod sa 1957. Sa 1958 siya naminyo kang Albertha, ang gitun-an nako sa Bibliya kaniadto, ug silang duha nagpayunir. Pagkamakalilipay nga niadtong 2004, kaming tulo dungan nga mitambong sa Tunghaan sa Payunir nga Pag-alagad!

Akong nahinumdoman nga sa bata pa si Bobby, siya miampo kang Jehova nga unta tabangan ako nga makapalit ug gasolina aron magamit nako ang awto sa pagduaw nga regular sa mga interesado nga akong ginatun-an sa Bibliya. Sa tibuok niyang kinabuhi, gimahal pag-ayo ni Bobby ang ministeryo, ug nagpayunir siya sulod sa ubay-ubayng katuigan. Ikasubo, may trahedya usab nga nahitabo sa iyang pamilya. Niadtong 1970, sa dihang mga duha ka tuig pa lang ang ilang kaminyoon, ang iyang asawa naunong sa dihang nanganak sa ilang kaluha. Sukad niadto managsilingan na mi ni Bobby, busa nasuod kami pag-ayo sa usag usa.

Nagpayunir Gihapon!

Niadtong 1962, ako giasayn sa usa ka kongregasyon sa Lumberton, North Carolina, diin ako nag-alagad sulod na sa 45 ka tuig. Ako ray modrayb sa akong awto hangtod sa pag-edad nakog kapin sa 80 anyos. Sa pagkakaron, usa sa mga pamilyang Saksi nga silingan ra nako ang modala nako sa mga tigom ug sa pagsangyaw.

Duna koy abag sa paglakaw (walker) ug wheelchair, apan wala nako kana kinahanglana, tungod kay makalakaw pa man ko bisag way moagak. Mapasalamaton ko kang Jehova nga maayo kaayo ang akong panglawas, ugaling lang ning bag-o pa morag halap na ang akong panan-aw. Wala gyod ko makapalta ug tigom sa kongregasyon gawas lang kon may sakit ko, ug ako nagpadayon sa pag-alagad ingong infirm regular pioneer o payunir nga mubo rag oras nga kab-oton.

Sa akong malipayon nga pag-alagad ingong payunir sulod sa kapin sa 70 ka tuig, ako makaingon gayod nga si Jehova nagtabang kanako sa tibuok nakong kinabuhi. a Akong naamgohan nga bisag ako dili kaayo utokan o dili kaayo abtik motrabaho, si Jehova nahibalo kon unsay akong mahimo ug kon unsay dili nako mahimo. Mapasalamaton kaayo ko nga siya nahibalo nga ako naningkamot gayod sa pag-alagad kaniya ug mapasalamaton usab ako tungod sa iyang paghatag kanako niining pribilehiyoa.

Akong gibati nga hinungdanon gayod nga moalagad kita kang Jehova kutob sa atong maarangan tungod kay utang nato kaniya ang tanan. Samtang makahimo pa ko, gusto gayod nakong magpadayon sa pagpayunir. Pagkanindot nga pribilehiyo kini! Nanghinaot ko nga makaalagad kang Jehova hangtod sa kahangtoran.

[Footnote]

[Hulagway sa panid 13]

Kami sa akong bana naggamit niining sakyanana diha sa among buluhaton isip mga colporteur

[Hulagway sa panid 14]

Uban sa akong mga anak niadtong 1941

[Hulagway sa panid 15]

Uban kang Eddie ug Bobby ning bag-o pa