Ang Pagtuo sa Usa ka Inahan Nakabuntog sa Iyang Kahadlok sa Kamatayon

“Kon nagbasa kamo niining sulata, kana nagpasabot nga wala molampos ang akong operasyon ug ako wala na sa inyong kiliran.”

MAO kini ang pangbukas nga mga pulong sa sulat-panamilit sa usa ka Kristohanong inahan nga si Carmen sa iyang tulo ka anak nga babaye, nga nagpanuigon ug 25, 19, ug 16. Sa nahisgotan na, wala molampos ang operasyon, ug ikasubo nga si Carmen namatay.

Dili gayod lalim ang kasubo nga bation sa usa ka inahan nga mobiya sa iyang mga anak samtang siya nag-ungaw sa kamatayon. Apan, ang iyang lig-ong pagtuo kang Jehova ug sa Iyang mga saad dayag nga nakabuntog sa iyang kahadlok sa kamatayon. Kini naghatag kaniyag kalinaw sa hunahuna nga tataw kaayo diha sa iyang makapatandog nga sulat. Matikdi kon unsay iyang gisulti sa iyang mga anak.

“Una sa tanan, buot kong mahibaloan ninyo nga gihigugma ko gayod kamo. . . . Buotan kaayo mo nga mga anak nga takos ipasigarbo sa usa ka inahan.

“Gusto unta nako nga mag-uban kita sa paglabang-buhi ngadto sa bag-ong kalibotan nga gisaad sa Diyos . . . , apan kay dili man mahimo, ako nangamuyo sa Diyos nga tabangan niya kamo nga makapadayon sa pag-alagad kaniya nga matinumanon. Daghan kitag naantos nga mga pagsulay, ug wala gayod kita pasagdi ni Jehova. . . . Busa padayon sa pagsunod sa giya nga iyang gitagana pinaagi sa iyang organisasyon, ug padayon sa pagpaluyo sa kongregasyon ug sa mga ansiyano. Pakig-ambit kamo sa buluhatong pagsangyaw kutob sa inyong maarangan, ug mahala ninyo ang mga igsoon.

“Magkauban ra unya kita sa umaabot. . . . Pasayloa ko ninyo sa tanan nakong kasaypanan ug sa mga panahon nga wala ko kamo hisabti o wala nako ikasulti kaninyo kon unsa ka dako ang akong pagmahal kaninyo. . . . Nahibalo ko nga ang matag usa kaninyo adunay kaugalingong mga panginahanglan. Si Jehova labaw nga nasayod niana, ug siya magtagana kaninyo sa tanan ninyong gikinahanglan ug magaganti kaninyo tungod sa inyong pagkamainantoson.

“Itutok kanunay ang inyong mga mata sa inyong tumong—ang kinabuhi sa bag-ong kalibotan—ug panglimbasog kamo nga makaabot didto. Hinaot si Jehova magapanalangin ug magapalig-on kaninyo aron kamo magmatinumanon hangtod sa kataposan. . . . Ayaw mog kaguol akong mga pinangga. Gimahal ko kamo!”

Ang kamatayon mahitabo bisan kanus-a ug kang bisan kinsa. “Ang panahon ug ang wala damhang panghitabo modangat kanilang tanan,” misulat si Haring Solomon. (Ecclesiastes 9:11) Apan, kadtong adunay lig-on nga pagtuo sa Diyos makabaton usab sa pagsalig nga sama kang apostol Pablo, kinsa miingon: “Kombinsido ako nga dili ang kamatayon ni kinabuhi . . . ni bisan unsang ubang linalang ang makabulag kanato gikan sa gugma sa Diyos nga anaa kang Kristo Jesus nga atong Ginoo.”—Roma 8:38, 39; Hebreohanon 6:10.