Duha ka Talagsaong Hitabo sa Usa ka Kombensiyon sa Georgia

NIADTONG 2006, dihay duha ka talagsaong hitabo sa nasod sa Georgia nga dili gayod malimtan. Sa Hulyo 7 hangtod sa 9, gipahigayon ang tulo ka adlaw nga “Ang Kaluwasan Haduol Na!” Distritong Kombensiyon sa mga Saksi ni Jehova diha sa unom ka lokasyon sa tibuok nasod. Kadto maoy bangkete sa espirituwal nga pagkaon nga giambitan sa kapin sa 17,000 ka tumatambong.

Sa Enero 2006, gisugdan ang pagpangita ug haom nga dapit nga katigoman sa libolibong delegado sa kombensiyon sa Tbilisi, ang kaulohan sa Georgia. Ang mga programa giplanohang ikonektar sa ubang lokasyon sa kombensiyon pinaagig telepono.

Sa milabayng mga katuigan, ang mga Saksi ni Jehova sa Georgia anam-anam nga nakatagamtam ug kagawasan sa pagsimba. Busa, bisan pa sa kaylap nga paglutos nga naagoman sa nangaging panahon, ang mga Saksi nagpabiling lig-on, nga malaomon nga makakita silag kaasembliyahan diha sa kaulohan. Ang mga taga-Georgia mahigalaon ug maabiabihon. Apan, may pipila ka opisyal nga mapihigon gihapon sa mga Saksi. Ila kahang tugotan ang mga Saksi nga makaabang ug pasilidad?

Gisurbi sa mga igsoon nga membro sa Komite sa Kombensiyon ang lainlaing estadyum ug dagkong mga gym. Ang mga tagdumala miuyon nga gamiton ang ilang pasilidad apan mibalibad sila sa dihang ilang nasayran kon unsang petsaha kini gamiton. Busa, nalipay pag-ayo ang komite sa dihang misugot ang administrasyon sa Tbilisi Philharmonic nga abangan sa mga Saksi ni Jehova ang ilang pasilidad. Kini nahimutang sa kinapusoran sa siyudad, diin ginahimo ang kadaghanan sa dagkong mga programa.

Mapasalamaton nga nagbunga ang ilang kahago, ang komite nagsugod sa pag-organisar sa kombensiyon diha sa Tbilisi ug sa mga lungsod  ug ubang siyudad sa tibuok nasod, nga naglakip sa Tsnori, Kutaisi, Zugdidi, Kaspi, ug sa Gori. Dakong trabaho ang pagkonektar sa mga programa pinaagig telepono aron dungan kining madunggan diha sa tanang kombensiyon. Ang tanan naandam na alang sa kombensiyon. Apan, sa kalit lang, mga usa ka semana una pa sa kombensiyon, gikanselar sa tagdumala sa Tbilisi Philharmonic ang kontrata nga wala ipatin-aw ang hinungdan.

Ang Unang Talagsaong Hitabo

Duna pa bay mahimo ang mga igsoon niining ultima ora nga pagbalibad sa tagdumala? Wala na silay laing mahimo gawas sa pagbalik sa Marneuli, usa ka lapad nga umahan 40 kilometros gikan sa Tbilisi. Daghan nang kombensiyon ang gipahigayon kaniadto diha sa propiedad nga gipanag-iya sa usa ka pamilya nga mga Saksi ni Jehova. Kining dapita usa ka dakong hardin kaniadto. Sa milabay nga napulo ka tuig, kini lang ang bugtong lokasyon nga kaasembliyahan sa mga kongregasyon sa Tbilisi. Apan, dinhi usab sa Marneuli naagoman sa mga Saksi ni Jehova ang mapintas nga mga pag-atake sa magubtanong panon.

Ang usa niini nga pag-atake nahitabo niadtong Septiyembre 16, 2000. Ang mga polis sa siyudad sa Marneuli nagbutang ug mga barikada aron dili makalahos ang mga Saksi sa lugar sa kombensiyon. Dayon nangabot ang mga bus nga puno sa mga bugoy nga gipangunahan ni Vasili Mkalavishvili, usa ka Ortodoksong pari nga gihuboan sa katungdanan. Ilang gipahunong ang mga kotse ug mga bus nga nagpaingon sa kombensiyon sa Marneuli, gibitad ang mga delegado pagawas sa sakyanan ug way-kokaluoy nga gikulata, ug gipanguha ang personal nga mga gamit sa ubang mga pasahero, lakip na ang ilang mga Bibliya ug literatura.

Gisulong usab sa mga 60 ka bugoy ang kombensiyonanan sa Marneuli. Mga 40 ka Saksi ang nasamdan. Usa ka brader ang nadunggaban sa dughan. Ang ubang tig-atake nagwarawara sa ilang mga pusil ug nagsigeg pasalba niini. Ang usa kanila nagtion ug pusil sa tag-iya sa umahan ug nagmando kaniya sa paghatag sa iyang kuwarta ug alahas. Gilungkab sa mga bugoy ang iyang balay, nga anaa sa pikas tumoy sa kombensiyonanan, ug gipanguha ang iyang mahalong mga butang. Human pamuaka ang tanang bentana, ilang gidaoban ang mga basahon sa Bibliya ug ang tag-as nga mga bangko nga gituyo paghimo aron kalingkoran sa mga kombensiyonista. Usa ka tonelada ug tunga ang mga basahon nga gipangsunog. Imbes pahunongon ang krimen, ang mga polis miapil na hinuon sa kapintasan nga gihimo batok sa mga Saksi. a

 Ang Komite sa Kombensiyon nabalaka dili lang sa posibleng pagpanghasi kondili kon unsaon usab sa pagpahimutang sa 5,000 ka tawo sa luna nga mosulod lang ug mga 2,500 ka tawo. Unsaon man pagsulbad niini nga usa ka semana na lang magsugod na ang kombensiyon? Nahingangha ang mga igsoon sa dihang ang mga tag-iya sa duha ka propiedad nga sikbit sa luna sa kombensiyon miduol kanila ug mitanyag nga paabangan nila ang ilang umahan.

Dili sayon nga trabaho ang pag-andam sa duha ka umahan aron mahimong haom nga kombensiyonanan. Ang nakapalisod pa kay gadaot ang panahon—nagsigeg ulan sa tibuok semana una pa sa kombensiyon. Ang giabangan nga umahan may tanom nga patatas, ug kinahanglan kining anihon. Una, ang mga boluntaryo nagkalot sa mga patatas bisag nagbunok ang ulan. Dayon, sila nagbalhin sa mga koral ug nagtukod ug tigbayon nga kaatpan aron dili mainitan o maulanan ang mga tumatambong. Kinahanglan pa silang maghimo ug kahoyng mga bangko, ug mag-instalar ug dugang mga espiker sa sound. Ang mga boluntaryo adlaw gabii nga naggabas, nagmartilyo, ug nagbarina, nga ang uban wala nay tulganay.

“Unsaon na lang kon magpadayon ang ulan hangtod sa adlaw sa kombensiyon?” nabalaka ang tanan. “Dili kaha malubong sa lapok ang mga delegado?” Busa, ang mga igsoon namalit ug mga uhot aron itambak sa lapok. Sa kataposan, nagpakita ra gyod ang adlaw! Gikan sa pagsugod sa kombensiyon hangtod sa pagkatapos niini, sanag kaayo ang adlaw.

Pag-abot sa mga delegado, gisugat sila sa maanindot nga talan-awon. Ang malinawong kahimtang sa dapit daw pasiuna sa kon unsa unyay ilang matagamtam sa bag-ong kalibotan. Hayahay kaayong nanglingkod ang mga delegado kay lusot-lusot man ang hangin. Sa ilang palibot, may mga tanom nga igos ug ubang mga prutas, may kamaisan ug kamatisan usab. Ang entablado daw giadornohan ug ubasan. Panahon sa programa, madungog usahay nila ang tinugaok sa mga sunoy ug putak-putak sa mga himungaan samtang gipanguha ang mga itlog niini sa pugaran. Adunay pay laing mga tingog nga kasagarang madunggan sa probinsiya, apan para sa mga nanambong, morag giharanahan sila niini. Wala ra kaayo sila matugaw tungod kay nasentro pag-ayo ang ilang pagtagad sa pagpaminaw sa maayong pagkaandam nga mga bahin sa programa nga gipasukad sa Bibliya. Apan, dili ra kini ang nakapatalagsaon sa kombensiyon.

Ang Ikaduhang Talagsaong Hitabo

Sa kataposang bahin sa sesyon sa Biyernes sa buntag, nalipay kaayo ang mga delegado sa dihang giluwatan ni Geoffrey Jackson, usa ka membro sa Nagamandong Lawas sa mga Saksi ni Jehova,  ang kompletong Bag-ong Kalibotang Hubad sa Balaang Kasulatan diha sa pinulongang Georgian. b Daghan kanila ang nakahilak tungod sa kalipay. Ang usa ka pamilya maikagong nag-ingon: “Mapasalamaton gayod kami kang Jehova niini nga milagro. Tiaw mo na, pagkadako sa trabaho apan kini nahuman sulod lang sa mubong panahon!”

Usa ka sister nga gikan sa lungsod sa Tsalendjikha nga nakapaminaw sa programa pinaagi sa telepono nag-ingon: “Dili nako mahubit sa mga pulong ang kalipay nga akong gibati sa pagkadawat namo sa kompletong hubad sa Bibliya. Salamat kaayo niining tulo ka adlaw nga talagsaong kombensiyon. Halandomon gayod kini!” Ang usa ka pamilya sa kongregasyon sa kasadpang Georgia, nga duol sa Black Sea, nag-ingon: “Usa ray among Bibliya sa pamilya, apan karon apod na ming upat sa Bag-ong Kalibotang Hubad. Ang tagsa-tagsa kanamo makahimo na sa pagtuon sa among personal nga kopya sa Bibliya.”

Apan, wala lang masayod ang mga delegado nga dihay daghang kakulian. Pananglitan, ang kompletong Bag-ong Kalibotang Hubad naimprenta na ug abante nga napadala sa Georgia, apan gipugngan sa mga opisyales sa Departamento sa Aduwana ang kargamento didto sa utlanan. Ang mga igsoon miapelar sa Buhatan sa Ombudsman. Nakuha sa ombudsman ang permiso nga mapagawas ang mga Bibliya sa hapit nang magsugod ang distritong kombensiyon. Iya pa ganing gipaadto sa kombensiyon sa Marneuli ang iyang luyoluyo aron sa pagkuhag mga kopya sa bag-ong Bibliya para sa ilang buhatan.

Mainitong Pag-abi-abi sa mga Taga-Georgia

Para sa mga Saksi ni Jehova sa Georgia, aduna pay laing hinungdan nga nakapatalagsaon sa kombensiyon sa Marneuli. Dihay usa ka membro sa Nagamandong Lawas sa mga Saksi ni Jehova nga mitambong sa asembliya. Ang tanang nanambong nahinangop kaniya ug gusto nilang malamano siya nga maoy ilang naandang paagi sa pag-abi-abi sa bisita. Kinahanglang mobarog si Brader Jackson ug makiglamano sa mga igsoon sa daghang oras, apan nalipay siya sa paghimo niana.

Balik sa 1903, pagkahuman sa laing kombensiyon, usa ka igsoon ang miingon: “Pobre ko, apan bisan bayran pa kog usa ka libo ka dolyar dili gyod nako ibaylo ang akong nakat-onan ug naeksperyensiyahan niini nga kombensiyon.” Kapin sa usa ka siglo sa ulahi, susama gayod niana ang gibati sa mga Saksi nga nanambong sa talagsaong mga kombensiyon nga gipahigayon sa ting-init sa 2006 sa Georgia.

[Mga footnote]

[Kahon sa panid 19]

“Ang Diyutay” Midaghan

Natuman gayod didto sa Georgia ang mga pulong sa Isaias 60:22: “Ang diyutay mahimong usa ka libo, ug ang gamay usa ka gamhanang nasod. Ako, si Jehova, magpadali niini sa kaugalingong panahon niini.” Duolag 20 ka tuig kanhi, wala pay 100 ang mga magmamantala sa Georgia, apan karon aduna nay mga 16,000. Kining masibotong mga ministro sa Pulong sa Diyos nagdumala ug mga 8,000 ka pagtuon sa Bibliya sa balay kada semana. Kini nagpakita nga adunay dakong purohan alang sa dugang pag-uswag sa buluhaton sa Georgia.

[Diagram/​Mga mapa sa panid 16]

(Alang sa aktuwal nga pagkahan-ay, tan-awa ang publikasyon)

RUSSIAN FEDERATION

GEORGIA

⇨ Zugdidi

⇨ Kutaisi

Marneuli ⇨ Gori

⇨ Kaspi

⇨ Tsnori

TBILISI

TURKEY

ARMENIA

AZERBAIJAN

[Credit Line]

Globe: Based on NASA/Visible Earth imagery

[Hulagway sa panid 16]

Monumento sa Tbilisi

[Mga hulagway sa panid 17]

Ang kombensiyon sa Marneuli gikonektar sa lima pa ka lokasyon sa Georgia pinaagig telepono

[Mga hulagway sa panid 18]

Nalipay kaayo ang mga delegado sa dihang giluwatan ang kompletong “Bag-ong Kalibotang Hubad” diha sa pinulongang Georgian