Ikaw ba “Dato Ngadto sa Diyos”?
Ikaw ba “Dato Ngadto sa Diyos”?
“Ingon usab niana ang tawo nga magatigom ug bahandi alang sa iyang kaugalingon apan dili dato ngadto sa Diyos.”—LUCAS 12:21.
1, 2. (a) Alang sa unsa nga ang mga tawo andam nga mosakripisyo? (b) Unsang kalisdanan ug kapeligrohan ang kinahanglang sagubangon sa mga Kristohanon?
SA DUGAY nang panahon, ang mga tawo sa daghang kayutaan naghago pag-ayo sa pagpangitag natago nga bahandi. Pananglitan, niadtong ika-19ng siglo, ang mga tawo nanghugop ngadto sa mga minahan ug bulawan sa Australia, Habagatang Aprika, Canada, ug sa Tinipong Bansa. Sila andam nga mobiya sa ilang panimalay ug mga minahal aron mangitag bahandi sa mga lugar nga wala pa nila maadtoi diin lisod usahay ang kahimtang. Sa pagkatinuod, daghang mga tawo ang andam mosugal sa ilang kinabuhi ug mohimog mga sakripisyo aron lang mabatonan ang mga bahandi nga ilang gitinguha.
2 Bisan tuod ang kadaghanang tawo karon dili literal nga nangitag natago nga bahandi, sila kinahanglang maghago aron mangitag pangabuhian. Apan ning atong panahon, lisod ug budlay kaayo ang pagpangitag pangabuhian. Dali ra kitang malinga sa pagpangitag pagkaon, besti, ug kapuy-an nga tungod niana ato nang mapasagdan o malimtan pa gani ang mas hinungdanong mga butang. (Roma 14:17) Si Jesus naghatag ug usa ka ilustrasyon, o sambingay, nga tukmang naghubit niini nga kahuyangan sa tawo. Mabasa nato kini sa Lucas 12:16-21.
3. Iasoy sa mubo ang ilustrasyon ni Jesus nga nasulat sa Lucas 12:16-21.
3 Kini nga ilustrasyon gisulti ni Jesus human siya magpasidaan bahin sa kahinungdanon nga magbantay batok sa hakog nga pangibog, nga atong gituki pag-ayo sa miaging artikulo. Siya naghisgot bahin sa usa ka tawong dato nga wala makontento sa iyang mga kamalig nga puno sa maayong mga butang. Siya naghunahuna nga iya kining gub-on ug magtukod ug mas dagkong kamalig aron mas daghan pang butang ang iyang ikasulod niini. Apan, sa dihang naghunahuna siya nga mahimo na siyang magpahayahay ug maglipaylipay, ang Diyos miingon kaniya nga matapos na ang iyang kinabuhi ug ang tanang maayong mga butang nga iyang natigom maiya sa lain. Dayon si Jesus miingon: “Ingon usab niana ang tawo nga magatigom ug bahandi alang sa iyang kaugalingon apan dili dato ngadto sa Diyos.” (Lucas 12:21) Unsang pagtulon-an ang atong makat-onan niini nga sambingay? Sa unsang paagi mapadapat nato kini?
Usa ka Tawong May Problema
4. Unsay atong ikaingon bahin sa tawo nga gihisgotan sa sambingay ni Jesus?
4 Daghan ang sinati niini nga ilustrasyon ni Jesus. Atong namatikdan nga gisugdan ni Jesus ang ilustrasyon pinaagi sa pag-ingon: “Ang yuta sa usa ka datong tawo nagpatungha ug maayong abot.” Wala moingon si Jesus nga nakuha sa tawo ang iyang bahandi pinaagi sa pagpanglimbong o sa ilegal nga paagi. Sa ato pa, dili siya daotan. Gani, base sa gisulti ni Jesus, atong ikahinapos nga ang maong tawo kugihan. Ikaingon usab nato nga ang maong tawo nagplano ug nagtigom ug bahandi alang sa umaabot, nga tingali naghunahuna sa kaayohan sa iyang pamilya. Busa, sa tawhanong panglantaw, siya kugihan nga tawo nga seryosong nagtuman sa iyang mga obligasyon.
5. Unsay problema sa tawo diha sa sambingay ni Jesus?
5 Bisan unsa pay atong ikasulti bahin sa maong tawo, si Jesus nag-ingon nga siya dato, buot ipasabot, daghan na siyag nabatonang materyal nga mga butang. Hinunoa, sumala sa paghubit ni Jesus kaniya, ang tawong dato may problema. Abunda kaayo ang abot sa iyang yuta nga dili na niya kini maato o wala na siyay kabutangan niini. Unsay angay niyang buhaton?
6. Unsang mga desisyon ang kinahanglang himoon sa mga alagad sa Diyos karon?
6 Daghan sa mga alagad ni Jehova karon ang nag-atubang ug mga situwasyon nga susama gayod nianang sa tawong dato. Ang matuod nga mga Kristohanon naningkamot nga mahimong matinud-anon, kugihan, ug kasaligan nga mga trabahante. (Colosas 3:22, 23) Nangempleyo man sila o may kaugalingong negosyo, subsob nga sila maayong motrabaho o mopalakaw ug negosyo. Busa, sa dihang sila tanyagan ug mas taas nga posisyon o tanyagan ug laing negosyo, sila kinahanglang modesisyon. Dawaton ba nila ang maong promosyon o negosyo aron mokita pag dako? Sa laing bahin, daghan usab sa batan-ong mga Saksi ang hawod sa klase. Tungod niini, sila makadawat ug mga pasidungog o tanyagan nga mahimong eskolar sa iladong mga unibersidad. Dawaton ba nila kini sama sa gihimo sa kadaghanang estudyante?
7. Unsay nahunahunaan sa tawo nga solusyon sa iyang problema?
7 Balik sa ilustrasyon ni Jesus, unsay gibuhat sa tawong dato sa dihang abunda kaayo ang iyang abot nga wala na siyay kabutangan niini? Nakahunahuna siya nga gub-on ang iyang mga kamalig ug magtukod ug mas dagko pa nga kasudlan sa tanan niyang abot ug sa uban pang maayong mga butang. Dayag nga ang maong plano naghatag kaniyag kasegurohan ug katagbawan, busa siya naghunahuna: “Ako moingon sa akong kalag: ‘Kalag, aduna kay daghang maayong mga butang nga natigom alang sa daghang katuigan; pagpahayahay, kaon, inom, paglipaylipay.’”—Lucas 12:19.
Nganong Gitawag nga “Walay Buot”?
8. Unsang hinungdanong butang ang wala matagad sa tawo diha sa sambingay ni Jesus?
8 Apan base sa giingon ni Jesus, ang plano sa tawong dato wala makahatag kaniya ug tinuod nga kasegurohan. Bisan tuod daw praktikal ang iyang plano, dihay hinungdanong butang nga wala niya matagad—ang kabubut-on sa Diyos. Ang tawo wala nay laing gihunahuna kondili magpahayahay na lang ug mokaon, moinom, ug maglipaylipay. Siya naghunahuna nga tungod kay nakabaton siya ug “daghang maayong mga butang,” mabuhi usab siya sa “daghang katuigan.” Apan ikasubo, dili kana maoy nahitabo. Sa giingon na ni Jesus, “bisag ang usa ka tawo adunay kadagaya ang iyang kinabuhi wala magagikan sa mga butang nga iyang gipanag-iya.” (Lucas 12:15) Nianang gabhiona, ang tanang gihagoan sa maong tawo mahanaw sa usa lang ka pagpamilok, kay ang Diyos miingon kaniya: “Ikaw nga walay buot, karong gabhiona ilang pangayoon nga mapugsanon ang imong kalag gikan kanimo. Nan, kinsa ang magapanag-iya sa mga butang nga imong gitigom?”—Lucas 12:20.
9. Nganong ang tawo diha sa sambingay gitawag nga walay buot?
9 Ania na kita sa hinungdanong punto sa ilustrasyon ni Jesus. Gitawag sa Diyos ang tawo nga walay buot. Ang Exegetical Dictionary of the New Testament nagpatin-aw nga ang pulong nga gigamit diha sa Grego “kanunayng nagtumong sa pagkawalay salabotan.” Kini nag-ingon nga niini nga sambingay, ang Diyos migamit nianang pulonga aron iyagyag “ang pagkawalay-pulos sa mga plano sa tawong dato.” Ang maong pulong nagtumong, dili sa tawong kulang ug kabuot, kondili “sa tawo nga walay pagsalig sa Diyos.” Ang paghubit ni Jesus sa tawong dato makapahinumdom kanato kon unsay iyang giingon sa mga Kristohanon sa unang-siglong kongregasyon sa Laodicea, sa Asia Minor: “Ikaw nagaingon: ‘Ako dato ug nakabatog mga bahandi ug wala na manginahanglan ug bisan unsa pa,’ apan wala ka mahibalo nga ikaw alaot ug makaluluoy ug kabos ug buta ug hubo.”—Pinadayag 3:17.
10. Nganong ang pagbaton ug “daghang maayong mga butang” dili garantiya nga mabuhi sa “daghang katuigan”?
10 Angay natong palandongon ang pagtulon-an niini nga sambingay. Kita ba sama sa tawo diha sa sambingay—naghago pag-ayo aron makabaton ug “daghang maayong mga butang” apan wala mobuhat kon unsay gikinahanglan aron mahuptan ang paglaom nga mabuhi sa “daghang katuigan”? (Juan 3:16; 17:3) Ang Bibliya nag-ingon: “Ang bililhong mga butang wala unyay kapuslanan sa adlaw sa mabangis nga kasuko,” ug “ang nagasalig sa iyang mga bahandi—siya mapukan.” (Proverbio 11:4, 28) Busa, diha sa kataposan sa sambingay, si Jesus nagtambag: “Ingon usab niana ang tawo nga magatigom ug bahandi alang sa iyang kaugalingon apan dili dato ngadto sa Diyos.”—Lucas 12:21.
11. Nganong kawang lamang ang bug-os nga pagsalig sa materyal nga mga butang?
11 Sa pag-ingon ni Jesus nga “ingon usab niana,” iyang gipakita nga ang nahitabo sa tawong dato diha sa ilustrasyon mahitabo usab niadtong bug-os nga nagsalig sa materyal nga mga butang. Ang sayop dili ang ‘pagtigom ug bahandi alang sa kaugalingon’ kondili ang pagkapakyas nga mahimong “dato ngadto sa Diyos.” Ang disipulong si Santiago naghatag ug susamang pasidaan sa dihang siya misulat: “Umari, karon, kamong nagaingon: ‘Karong adlawa o ugma mangadto kami niining siyudara ug mogugol didto ug usa ka tuig, ug magpatigayon kami ug manapi,’ samtang kamo wala masayod kon unsay dangatan sa inyong kinabuhi ugma.” Unsay angay nilang buhaton? “Hinunoa, angay unta nga kamo moingon: ‘Kon pagbuot ni Jehova, kami mabuhi ug usab magbuhat niini o niana.’” (Santiago 4:13-15) Bisan unsa pa tingali kadato ang usa ka tawo o bisan unsa pa kadaghan ang iyang nabatonan, ang tanan kawang lamang kon siya dili dato ngadto sa Diyos. Nan, unsay buot ipasabot sa pagkahimong dato ngadto sa Diyos?
Ang Pagkahimong Dato Ngadto sa Diyos
12. Unsay makapahimo kanatong dato ngadto sa Diyos?
12 Sumala sa gipakita ni Jesus, ang pagtigom ug bahandi alang sa kaugalingon, o ang pagkahimong dato sa materyal dili makapahimong dato ngadto sa Diyos. Busa, ang buot ingnon ni Jesus mao nga ang pagbaton ug bahandi o ang pagpahimulos niana dili angay nga mahimong panguna sa atong kinabuhi. Hinunoa, angay natong gamiton ang atong nabatonan sa pagpauswag, o pagpalig-on, sa atong relasyon kang Jehova. Sa pagbuhat niana, kita mahimo gayong dato ngadto sa Diyos. Ngano man? Tungod kay siya dagayang magapanalangin kanato. Ang Bibliya nagpasalig kanato: “Ang panalangin ni Jehova—mao kana ang makapadato, ug dili niya kana dugangan ug kasakit.”—Proverbio 10:22.
13. Sa unsang paagi ang panalangin ni Jehova “makapadato”?
13 Sa dihang si Jehova magpanalangin sa iyang katawhan, iya gayong ihatag kanila ang kinamaayohan. (Santiago 1:17) Pananglitan, sa dihang gihatagan ni Jehova ang mga Israelinhon ug dapit nga kapuy-an, kadto maoy “usa ka yuta nga nagaagay sa gatas ug dugos.” Ingon usab niana ang paghubit sa yuta sa Ehipto. Apan lahi ang yuta nga gihatag ni Jehova sa mga Israelinhon tungod kay, sumala pa sa giingon ni Moises, kadto “usa ka yuta nga ginaatiman ni Jehova nga imong Diyos.” Sa ato pa, sila magmauswagon tungod kay si Jehova mag-atiman kanila. Kon ang mga Israelinhon magpabiling matinumanon kang Jehova, siya dagayang magapanalangin kanila ug ilang matagamtam ang kinabuhi nga mas maayo pa kay nianang sa mga nasod sa ilang palibot. Tinuod gayod nga ang panalangin ni Jehova mao ang “makapadato.”—Numeros 16:13; Deuteronomio 4:5-8; 11:8-15.
14. Unsay matagamtam niadtong dato ngadto sa Diyos?
14 Ang pamulong nga “dato ngadto sa Diyos” gihubad usab ug “dato sa atubangan sa Diyos” (Maayong Balita Biblia) o “dato sa mga mata sa Diyos.” (The New Testament in Modern English, ni J. B. Phillips) Kadtong dato sa materyal kasagarang naghunahuna kon unsay panglantaw sa uban kanila. Sagad nga makita kini sa ilang paagi sa pagkinabuhi. Gusto nilang dayegon sa mga tawo ang ilang “mapagawalong pagpasundayag sa mga kahinguhaan sa kinabuhi.” (1 Juan 2:16) Sa laing bahin, kadtong dato ngadto sa Diyos makatagamtam sa iyang pag-uyon, pabor, ug dili-takos nga kalulot, ug sila masuod kaniya. Kini makahatag gayod kanilag kalipay ug kasegurohan nga dili ikahatag sa materyal nga mga bahandi. (Isaias 40:11) Apan, unsa may atong buhaton aron mahimong dato sa mga mata sa Diyos?
Dato sa mga Mata sa Diyos
15. Unsay kinahanglan natong buhaton aron mahimong dato ngadto sa Diyos?
15 Sa ilustrasyon ni Jesus, ang tawo nagplano ug naghago aron lang magpadato, ug tungod niana siya gitawag nga walay buot. Busa aron mahimong dato ngadto sa Diyos, kita kinahanglang magkugi pag-ayo ug bug-os nga makig-ambit sa mga buluhaton nga bililhon ug makapahimuot sa Diyos. Usa niini mao ang sugo ni Jesus: “Busa panglakaw kamo ug paghimog mga tinun-an sa katawhan sa tanang kanasoran.” (Mateo 28:19) Ang paggamit sa atong panahon, kusog, ug mga katakos, dili aron moasenso, kondili sa pagsangyaw sa Gingharian ug sa paghimog mga tinun-an mahimong ipakasama sa pagpamuhonan. Kadtong nagbuhat niana nakaganansiya ug dako sa espirituwal, ingon sa gipakita sa mosunod nga mga eksperyensiya.—Proverbio 19:17.
16, 17. Pag-asoy ug mga eksperyensiya nga nagpakita sa matang sa kinabuhi nga makapahimo sa usa nga dato sa mga mata sa Diyos.
16 Tagda ang pananglitan sa usa ka Kristohanong lalaki sa usa ka nasod sa Asia. Dako siyag suweldo ingong tig-ayo ug kompiyuter. Apan, halos mapupos na ang iyang panahon tungod sa iyang trabaho ug wala na kaayo siyay panahon para sa espirituwal nga mga butang. Busa, imbes maningkamot nga motaas pa ang iyang posisyon, siya miluwat sa iyang trabaho ug nanuroy ug sorbetes aron duna siyay mas dakong panahon sa pag-atiman sa iyang espirituwal nga mga panginahanglan ug mga responsibilidad. Tungod niini, giyagayagaan siya sa iyang kanhing mga kauban sa trabaho. Apan, unsa may resulta sa iyang pagsakripisyo? “Sa tinuoray lang, mas dako pa kog kita sa pagpanuroy ug sorbetes kay sa dihang tig-ayo pa kog kompiyuter,” matod pa niya. “Mas malipayon ako niining trabahoa kay sa akong trabaho kaniadto nga daghag problema. Ug labaw sa tanan, mas nasuod ako kang Jehova.” Tungod niini nga kausaban sa trabaho siya nakahimo sa pagsulod sa bug-os-panahong ministeryo, ug sa pagkakaron siya nag-alagad diha sa sangang buhatan sa mga Saksi ni Jehova sa iyang nasod. Ang panalangin ni Jehova mao gayod ang “makapadato.”
17 Ang lain pang pananglitan mao kanang sa babaye nga nagdako diha sa usa ka panimalay nga naghunahuna nga importante kaayo ang pagkuha ug taas nga edukasyon. Siya gipaeskuyla sa unibersidad sa Pransiya, Mexico, ug Switzerland ug dako kaayog purohan nga siya magmalamposon sa iyang karera. “Ako maayog trabaho, tinamod, ug nakapahimulos ug daghang pribilehiyo,” matod pa niya, “apan ako mibatig kahaw-ang ug kawalay-katagbawan.” Dayon nakakat-on siya bahin kang Jehova. Siya miingon: “Samtang ako miuswag sa espirituwal, ang akong tinguha nga pahimut-an si Jehova ug suklian bisag gamay ang tanan niyang gibuhat kanako, nakatabang kanako nga makita kon unsay angay nakong buhaton—ang pag-alagad kaniya nga bug-os-panahon.” Siya miluwat sa iyang trabaho ug wala madugay siya nabawtismohan. Sa milabayng 20 ka tuig, siya malipayong nag-alagad nga bug-os-panahon diha sa ministeryo. “Ang uban naghunahuna nga akong giusikan ang akong propesyon,” matod niya, “apan ilang nakita nga ako malipayon, ug sila nakadayeg sa mga prinsipyo nga akong gisubay. Kada adlaw, ako mag-ampo nga tabangan ko ni Jehova nga magpabiling mapaubsanon aron akong mabatonan ang iyang pag-uyon.”
18. Sama kang Pablo, sa unsang paagi kita mahimong dato ngadto sa Diyos?
18 Si Saulo, nga nahimong apostol Pablo, dako untag purohan nga mahimong inila sa kalibotan. Apan, sa ulahi siya misulat: “Sa pagkatinuod giisip ko usab ang tanang butang nga kapildihan tungod sa pagkalabaw ug bili sa kahibalo ni Kristo Jesus nga akong Ginoo.” (Filipos 3:7, 8) Alang kang Pablo, ang mga bahandi nga iyang nabatonan pinaagi kang Kristo maoy labaw sa bisan unsa nga ikatanyag sa kalibotan. Sa samang paagi, pinaagi sa pagsalindot sa bisan unsang hakog nga mga ambisyon ug pagkinabuhi uban ang diyosnong pagkamahinalaron, kita usab mahimong dato sa mga mata sa Diyos. Ang Pulong sa Diyos nagpasalig kanato: “Ang sangpotanan sa pagpaubos ug pagkahadlok kang Jehova maoy bahandi ug himaya ug kinabuhi.”—Proverbio 22:4.
Makapatin-aw Ka Ba?
• Unsay problema sa tawo diha sa ilustrasyon ni Jesus?
• Nganong ang tawo diha sa sambingay ni Jesus gitawag nga walay buot?
• Unsay buot ipasabot sa pagkahimong dato ngadto sa Diyos?
• Sa unsang paagi kita mahimong dato ngadto sa Diyos?
[Mga Pangutana sa Pagtuon]
[Hulagway sa panid 26]
Nganong ang tawong dato gitawag nga walay buot?
[Hulagway sa panid 27]
Sa unsang paagi ang mga kahigayonan nga moasenso usa gayod ka pagsulay kanato?
[Hulagway sa panid 28]
“Ang panalangin ni Jehova—mao kana ang makapadato”