Ang Pulong ni Jehova Buhi

Mga Pangunang Punto Gikan sa Basahon ni Ezequiel—II

DISYEMBRE 609 W.K.P. kadto. Gisugdan sa hari sa Babilonya ang iyang kataposang paglikos sa Jerusalem. Hangtod nianang tuiga, ang tema sa mensahe ni Ezequiel ngadto sa mga binihag sa Babilonya mao ang pagpukan ug paglaglag sa ilang gimahal nga siyudad, ang Jerusalem. Apan karon, nausab ang ulohan sa mga tagna ni Ezequiel. Iyang gihisgotan ang paglaglag sa paganong mga nasod nga maghugyaw sa kalaglagan sa katawhan sa Diyos. Sa dihang napukan ang Jerusalem paglabay sa 18 ka bulan, may bag-ong tema na usab ang mensahe ni Ezequiel—ang mahimayaong pagpasig-uli sa matuod nga pagsimba.

Ang Ezequiel 25:1–48:35 naundan ug mga tagna bahin sa mga nasod palibot sa Israel ug sa pagluwas sa katawhan sa Diyos. a Ang mga tagna giasoy sumala sa pagkasunodsunod sa pagkadawat niya niini ug sumala sa tema niini, gawas lang sa Ezequiel 29:17-20. Kining upat ka bersikulo, bisag dili sumpay sa sunodsunod nga pagkahan-ay sa mga tagna, gisal-ot tungod kay apil kini sa tagna bahin sa Ehipto. Ingong bahin sa inspiradong Kasulatan, ang basahon ni Ezequiel naundan ug mensahe nga “buhi ug gamhanan.”—Hebreohanon 4:12.

‘KANANG YUTAA MAHIMONG INGON SA TANAMAN SA EDEN’

(Ezequiel 25:1–39:29)

Kay nalantawng daan ang reaksiyon sa palibot nga mga nasod sa pagkapukan sa Jerusalem, si Jehova nagsugo kang Ezequiel sa pagtagna batok sa Ammon, Moab, Edom, Filistia, Tiro, ug Sidon. Ang Ehipto mailog. ‘Si Paraon nga hari sa Ehipto ug ang iyang katawhan’ mahisama sa sedro nga pagaputlon sa “espada sa hari sa Babilonya.”—Ezequiel 31:2, 3, 12; 32:11, 12.

Mga unom ka bulan human malaglag ang Jerusalem sa 607 W.K.P., ang usa ka tawo nga nakaikyas miabot ug mitaho kang Ezequiel: “Ang siyudad gipukan!” Ang manalagna “wala na maamang” ug nakasulti na ngadto sa mga binihag. (Ezequiel 33:21, 22) Kinahanglang imantala niya ang mga tagna bahin sa pagpasig-uli. Si Jehova ‘magbangon ug usa ka magbalantay, ang iyang alagad nga si David.’ (Ezequiel 34:23) Ang Edom maawaaw, apan ang Juda mahimong “ingon sa tanaman sa Eden.” (Ezequiel 36:35) Si Jehova nagsaad nga iyang panalipdan ang iyang katawhan sa pag-atake ni “Gog.”—Ezequiel 38:2.

Tubag sa mga Pangutana Bahin sa Kasulatan:

29:8-12—Kanus-a naawaaw ang Ehipto ug 40 ka tuig? Human malaglag ang Jerusalem sa 607 W.K.P., ang nanghibilin sa Juda mikalagiw ngadto sa Ehipto bisan pa sa pasidaan sa manalagnang si Jeremias. (Jeremias 24:1, 8-10; 42:7-22) Apan wala gayod sila makaikyas tungod kay gisulong ni Nabukodonosor ang Ehipto ug gipukan kini. Ang 40 ka tuig nga pagkaawaaw sa Ehipto lagmit nahitabo human niana. Bisag wala kana hisgoti sa sekular nga kasaysayan, kita makasalig nga nahitabo gayod kana tungod kay si Jehova mao ang Magtutuman sa tagna.—Isaias 55:11.

29:18—Sa unsang paagi nga ang “tanang ulo naupaw, ug ang tanang abaga napanit”? Ang paglikos sa siyudad sa dakong yuta (mainland) sa Tiro hilabihan kadugay ug makahago kaayo mao nga naupaw ang ulo sa kasundalohan ni Nabukodonosor kay sige kinig kabag-id sa ilang helmet. Napanit usab ang ilang mga abaga sa pagpinas-an ug mga materyales nga gigamit sa pagtukod ug mga torre ug mga kuta.—Ezequiel 26:7-12.

 Mga Leksiyon Alang Kanato:

29:19, 20. Tungod kay ang mga taga-Tiro miikyas man ngadto sa ilang siyudad nga atua sa isla dala ang halos tanan nilang bahandi, si Haring Nabukodonosor wala kaayoy naagaw sa Tiro. Busa gibayran ni Jehova ang kahago ni Nabukodonosor pinaagi sa paghatag kaniya sa Ehipto ingong “suhol alang sa iyang kasundalohan,” bisan pag siya mapahitas-on ug hakog. Dili ba angay nga sundogon nato ang matuod nga Diyos pinaagi sa pagbayad ug buhis sa gobyerno tungod sa ilang mga serbisyo kanato? Bisan unsa pay gawi sa mga opisyales sa gobyerno o bisan giunsa pa nila paggamit ang salapi, kita obligado sa pagbayad ug buhis.—Roma 13:4-7.

33:7-9. Ang modernong-adlaw nga magbalantay nga matang—ang dinihogang nanghibilin— ug ang mga kauban niini dili gayod mohunong sa pagsangyaw sa maayong balita sa Gingharian ug sa pagpasidaan sa mga tawo bahin sa nagasingabot nga “dakong kasakitan.”—Mateo 24:21.

33:10-20. Ang atong kaluwasan nagdepende sa atong pagbiya sa daotang mga buhat ug sa pagtuman sa kon unsay gikinahanglan sa Diyos. Sa pagkatinuod, ang dalan ni Jehova “matul-id.”

36:20, 21. Tungod kay ang mga Israelinhon wala magtuman sa mga kinahanglanon ingong “katawhan ni Jehova,” ilang gipasipalahan ang ngalan sa Diyos taliwala sa kanasoran. Likayan gayod nato nga mahimong magsisimba ni Jehova sa ngalan lamang.

36:25, 37, 38. Ang espirituwal nga paraiso nga atong natagamtam karon napuno sa “panon sa balaang mga tawo.” Busa ingong bahin niana, kita maningkamot sa pagpabiling hinlo.

38:1-23. Makapadasig gayod ang pagkahibalo nga luwason ni Jehova ang iyang katawhan sa dihang atakehon sila ni Gog sa yuta sa Magog! Si Satanas nga Yawa, “ang magmamando niining kalibotana,” ginganlag Gog human siya palagpota sa langit. Ang Magog nagtumong sa yuta, diin gitambog si Satanas ug ang iyang mga demonyo.—Juan 12:31; Pinadayag 12:7-12.

“TAGDA SA IMONG KASINGKASING ANG TANAN NGA IPAKITA KO KANIMO”

(Ezequiel 40:1–48:35)

Kadto maoy ika-14 na ka tuig human malaglag ang siyudad sa Jerusalem. (Ezequiel 40:1) Singkuwentay-sayis ka tuig pa ang kinahanglang paaboton sa mga binihag. (Jeremias 29:10) Si Ezequiel hapit nang mag-50 anyos. Diha sa usa ka panan-awon, siya gidala ngadto sa yuta sa Israel. Siya giingnan: “Anak sa tawo, tan-awa sa imong mga mata, ug paminawa sa imong mga igdulungog, ug tagda sa imong kasingkasing ang tanan nga ipakita ko kanimo.” (Ezequiel 40:4) Lagmit nga nalipay gayod si Ezequiel sa pagkadawat sa panan-awon bahin sa bag-ong templo!

Ang mahimayaong templo nga nakita ni Ezequiel adunay 6 ka ganghaan, 30 ka lawak-kan-anan, Balaang lawak, Labing Balaang lawak, kahoy nga halaran, ug halaran alang sa halad nga sinunog. “Migula” ang tubig gikan sa templo ug kini nahimong usa ka suba. (Ezequiel 47:1) Si Ezequiel nakadawat usab ug panan-awon maylabot sa paghatag ngadto sa matag tribo sa ilang bahin sa yuta—ang matag bahin gisukod gikan sa  sidlakan ngadto sa kasadpan. Dihay luna taliwala sa yuta sa tribo ni Juda ug Benjamin nga gigahin alang sa pamunoan. Ang “sangtuwaryo ni Jehova” ug ang “siyudad” nga ginganlag “Si Jehova Anaa Diha” nahimutang sa maong luna.—Ezequiel 48:9, 10, 15, 35.

Tubag sa mga Pangutana Bahin sa Kasulatan:

40:3–47:12—Unsay gihulagwayan sa templo diha sa panan-awon? Ang dako kaayong templo nga nakita ni Ezequiel sa panan-awon dili aktuwal nga gitukod. Kini naghulagway sa espirituwal nga templo sa Diyos—ang kahikayan sa putli nga pagsimba karon nga sama nianang sa templo. (Ezequiel 40:2; Miqueas 4:1; Hebreohanon 8:2; 9:23, 24) Ang panan-awon maylabot sa templo natuman sa “kataposang mga adlaw,” sa dihang gidalisay ang pagkasaserdote. (2 Timoteo 3:1; Ezequiel 44:10-16; Malaquias 3:1-3) Apan, kini bug-os nga matuman sa Paraiso. Ang templo sa panan-awon naghatag ug pasalig sa Hudiyong mga binihag nga ang putling pagsimba mapasig-uli ug ang matag Hudiyong banay makabaton ug kaugalingong yuta.

40:3–43:17—Unsay kahulogan sa pagsukod sa templo? Ang pagsukod sa templo maoy usa ka ilhanan nga ang katuyoan ni Jehova maylabot sa putling pagsimba matuman gayod.

43:2-4, 7, 9—Unsa ang “patayng lawas sa ilang mga hari” nga kinahanglang kuhaon gikan sa templo? Ang mga patayng lawas dayag nga nagtumong sa mga idolo. Ang mga magmamando ug ang katawhan sa Jerusalem naghugaw sa templo sa Diyos pinaagi sa mga idolo, nga daw naghimo niana nga ilang mga hari.

43:13-20—Unsa ang gisimbolohan sa halaran nga nakita ni Ezequiel sa panan-awon? Ang simbolikong halaran naghawas sa kabubut-on sa Diyos maylabot sa halad-lukat ni Jesu-Kristo. Pinaagi niini, ang mga dinihogan gipahayag nga matarong ug ang “dakong panon” nahimong hinlo ug putli sa mata sa Diyos. (Pinadayag 7:9-14; Roma 5:1, 2) Lagmit mao kana ang hinungdan kon nganong wala diha sa panan-awon bahin sa templo ang “inumol nga dagat-dagat” sa templo ni Solomon—usa ka dakong dulang sa tubig nga gigamit sa mga saserdote sa pagpanghugas.—1 Hari 7:23-26.

44:10-16—Kinsa ang gihulagwayan sa saserdote nga matang? Ang saserdote nga matang naglandong sa grupo sa dinihogang mga Kristohanon sa atong adlaw. Ang paglunsay kanila nahitabo niadtong 1918 sa dihang si Jehova milingkod ingong “tigdalisay ug tighinlo” sa iyang espirituwal nga templo. (Malaquias 3:1-5) Kadtong mga mahinlo o kadtong naghinulsol padayong nakabaton sa ilang pribilehiyo sa pag-alagad. Dayon, sila kinahanglang maningkamot nga “dili mahugawan sa kalibotan,” sa ingon, sila nahimong panig-ingnan alang sa “dakong panon,” nga gihulagwayan sa dili saserdote nga mga tribo sa Israel.—Santiago 1:27; Pinadayag 7:9, 10.

45:1; 47:13–48:29—Unsay gihulagwayan sa “yuta” ug ang pagbahinbahin niini? Ang yuta naghulagway sa natad sa kalihokan sa katawhan sa Diyos. Bisan asa pa nagpuyo ang usa ka magsisimba ni Jehova, siya anaa sa napasig-uli nga yuta kon iyang gipaluyohan ang matuod nga pagsimba. Ang pagbahinbahin sa yuta bug-os nga matuman sa bag-ong kalibotan sa dihang ang matag usa nga matinumanon makadawat sa iyang kaugalingong panulondon.—Isaias 65:17, 21.

45:7, 16—Unsay gihulagwayan sa pag-amot sa mga  tawo alang sa mga saserdote ug mga pangulo? Sa espirituwal nga templo, kini pangunang nagtumong sa pagpaluyo sa kahikayan sa pagsimba—ang pagtanyag ug tabang ug ang kaandam nga makigtambayayong.

47:1-5—Unsay gihulagwayan sa tubig sa suba diha sa panan-awon ni Ezequiel? Ang tubig naghulagway sa espirituwal nga mga tagana ni Jehova alang sa kinabuhi, nga naglakip sa halad-lukat ni Kristo Jesus ug sa kahibalo bahin sa Diyos nga makaplagan diha sa Bibliya. (Jeremias 2:13; Juan 4:7-26; Efeso 5:25-27) Ang suba nagkalalom aron ang mga bag-ohan nga moanib sa matuod nga pagsimba makainom sa tubig niini. (Isaias 60:22) Panahon sa Milenyo ang tubig sa kinabuhi nga moagos niini nga suba mahimong mas epektibo pa gayod, ug kini maglakip sa mas lalom nga kahibalo gikan sa “mga linukot nga basahon” nga pagabuksan unya.—Pinadayag 20:12; 22:1, 2.

47:12—Unsay gihulagwayan sa mabungahong mga kahoy? Ang simbolikong mga kahoy naghulagway sa espirituwal nga mga tagana sa Diyos sa pagpasig-uli sa tanang katawhan ngadto sa kahingpitan.

48:15-19, 30-35—Unsa ang gihulagwayan sa siyudad sa panan-awon ni Ezequiel? Ang siyudad nga gitawag “Si Jehova Anaa Diha” nahimutang sa “dili balaan” nga yuta, nga nagpaila nga kini naghulagway sa butang nga yutan-on. Ang siyudad daw naghulagway sa yutan-ong administrasyon nga maghatag ug mga benepisyo niadtong maglangkob sa matarong nga “bag-ong yuta.” (2 Pedro 3:13) Ang mga ganghaan sa matag kiliran nagpakita nga sayon ra ang pagsulod niini. Ang mga magtatan-aw taliwala sa katawhan sa Diyos angay nga sayon duolon.

Mga Leksiyon Alang Kanato:

40:14, 16, 22, 26. Ang kinulit nga mga larawan sa kahoyng palma diha sa paril sa mga agianan sa templo nagpakita nga kadto lamang hinlo sa moral ang tugotan sa pagsulod. (Salmo 92:12) Kini nagtudlo kanato nga dawaton lamang ni Jehova ang atong pagsimba kon kita matarong.

44:23. Mapasalamaton gayod kita sa tabang nga gihatag sa modernong-adlaw nga saserdote nga matang! Ang “matinumanon ug maalamong ulipon” nanguna sa pagtaganag tukma-sa-panahon nga espirituwal nga pagkaon nga makatabang kanato sa pag-ila kon unsay mahugaw ug kon unsay mahinlo sa mata ni Jehova—Mateo 24:45.

47:9, 11. Ang kahibalo—usa ka hinungdanong bahin sa simboliko nga tubig—nagpahinabog talagsaong espirituwal nga pagpang-ayo sa atong panahon. Ang mga tawo nga moinom niini mabuhi sa espirituwal nga paagi. (Juan 17:3) Sa laing bahin, kadtong dili modawat niining nagahatag-ug-kinabuhi nga tubig “itugyan sa asin”—pagalaglagon sa dayon. Busa, hinungdanon gayod nga ‘kutob sa atong maarangan atong gamiton ang pulong sa kamatuoran sa hustong paagi’!—2 Timoteo 2:15.

“Balaanon Ko ang Akong Dakong Ngalan”

Human tangtanga sa trono ang kataposang hari sa linya ni David, gipalabay una sa matuod nga Diyos ang taas nga panahon sa wala pa niya palingkora sa trono ang Usa “nga may legal nga katungod.” Bisan pa niana, wala niya kalimti ang iyang pakigsaad kang David. (Ezequiel 21:27; 2 Samuel 7:11-16) Ang tagna ni Ezequiel naghisgot bahin sa “akong alagad nga si David,” nga mamahimong “magbalantay” ug “hari.” (Ezequiel 34:23, 24; 37:22, 24, 25) Kini nagtumong kang Jesu-Kristo sa dihang siya nagmando na sa Gingharian. (Pinadayag 11:15) Balaanon ni Jehova ang iyang dakong ngalan pinaagi sa Mesiyanikong Gingharian.—Ezequiel 36:23.

Sa dili madugay, ang tanang nagpasipala sa balaang ngalan sa Diyos pagalaglagon. Apan kadtong nagbalaan nianang ngalana diha sa ilang kinabuhi pinaagi sa pagsimba kang Jehova sa paagi nga iyang giuyonan makadawat ug kinabuhing walay kataposan. Hinaot pahimuslan nato sa bug-os ang tubig sa kinabuhi nga kusog nga nagaagos sa atong adlaw ug himoon nato ang matuod nga pagsimba nga labing hinungdanon sa atong kinabuhi.

[Footnote]

[Hulagway sa panid 9]

Ang mahimayaong templo diha sa panan-awon ni Ezequiel

[Hulagway sa panid 10]

Unsay gihulagwayan sa suba sa kinabuhi diha sa panan-awon ni Ezequiel?

[Credit Line]

Pictorial Archive (Near Eastern History) Est.