Mga Pangutana Gikan sa mga Magbabasa
Mga Pangutana Gikan sa mga Magbabasa
Human mapatay ni David si Goliat, nganong nangutana man si Haring Saul kang David, “Kinsang anak ka man, Dong?” nga una pa niana nagpasugo man si Saul nga kuhaon si David aron mag-alagad kaniya?—1 Samuel 16:22; 17:58.
Ang usa ka posibilidad mao nga nakalimot si Saul kon kinsa si David tungod kay daklit lang ang ilang unang panagkita. Apan, lagmit nga dili kana husto tungod kay gipakita sa asoy sa 1 Samuel 16:18-23 nga si Haring Saul mismo ang nagpakuha kang David ug siya nahigugma pag-ayo kang David ug naghimo kaniyang tigdala sa iyang armadura. Busa si Saul nakaila gayod kang David.
Giisip sa pipila ka eskolar sa Bibliya nga ang 1 Samuel 17:12-31 ug 17:55–18:5 gidugang lamang tungod kay kining mga bersikuloha dili kono makita diha sa Gregong Septuagint, usa ka hubad sa Hebreohanong Kasulatan sa ikaduhang siglo W.K.P. Apan, ang paghimo sa maong konklusyon base lamang sa Septuagint dili maalamon. a
Dayag nga sa pagpangutana ni Saul kang Abner ug dayon kang David mismo, siya dili lamang interesado nga mahibaloan ang ngalan sa amahan ni David. Human makita ni Saul ang dakong pagtuo ug kaisog ni David sa pagpatay kang Goliat, gusto niyang mahibaloan kon unsang matanga sa tawo ang nagmatuto kang David. Tingali naghunahuna si Saul nga iyang iapil sa iyang kasundalohan ang amahan ni David nga si Jese, o ang ubang membro sa iyang pamilya, kay lagmit gayod nga maisog usab sila sama kang David.
Diha sa 1 Samuel 17:58 ang tubag ni David mubo lang, “anak ako sa imong sulugoon nga si Jese nga taga-Betlehem,” apan gipakita sa sunod nga bersikulo nga lagmit dugaydugay ang ilang panagsultihay. Maylabot niining puntoha, matikdi ang mga komento ni C. F. Keil ug F. Delitzsch: “Ang giingon sa [1 Samuel 18:1], ‘sa pagkahuman niya sa pagpakigsulti kang Saul,’ nagpakita nga si Saul nagpadayon sa pagpakig-estorya kang David bahin sa iyang pamilya, sanglit ang maong mga pulong nagpasabot ug dugaydugay nga panag-estoryahay.”
Base sa nahisgotan na, kita makahinapos nga sa pag-ingon ni Saul, “Kinsang anak ka man, Dong?” wala siya mangutana kon kinsay amahan ni David, kay nahibalo na man siya niana, kondili gusto niyang masayod ug dugang bahin kang David.
[Footnote]
a Alang sa pamatuod nga bahin gayod sa Bibliya kining mga teksto nga wala sa Septuagint, tan-awa ang Insight on the Scriptures, Tomo 2, panid 855, nga gipatik sa mga Saksi ni Jehova.
[Hulagway sa panid 31]
Nganong nangutana man si Saul kang David kon kang kinsa siyang anak?