Nakita Ka ba sa Diyos?

MAKITA ba kita ni Jehova, ang Batid nga Maglalalang? Siyempre! Ang Bibliya nag-ingon: “Ang Usa nga nagaumol sa mata, dili ba siya makakita?” (Salmo 94:9) Ang mga mata ni Jehova makakita ug labaw pa kay sa makita sa mga tawo. Siya dili lamang makakita sa atong panagway kondili siya usab “ang tig-usisa sa mga kasingkasing,” ug siya “nagatimbang sa mga kasingkasing.” (Proverbio 17:3; 21:2) Sa pagkatinuod, siya may katakos sa pagsusi sa atong panghunahuna, panukmod, ug mga tinguha.

Nakita ni Jehova ang mga kalisdanan nga atong gisagubang, ug motubag siya sa atong mga pangamuyo. Ang salmista misulat: “Ang mga mata ni Jehova gipunting sa mga matarong, ug ang iyang mga igdulungog gikiling sa ilang pagtuaw alang sa tabang. Si Jehova haduol niadtong mga dugmok ug kasingkasing; ug siya magaluwas niadtong mga nahugno sa espiritu.” (Salmo 34:15, 18) Makapahupay gayod ang pagkahibalo nga si Jehova nakasabot sa atong kahimtang ug magpatalinghog sa atong mga pangamuyo!

Nakita ni Jehova nga Diyos ang mga buhat nga gihimo sa tago. Oo, “walay linalang nga dili dayag sa iyang panan-aw, apan ang tanang butang hubo ug binuksan sa mga mata niya nga kaniya manubag kita.” (Hebreohanon 4:13) Busa, maayo man o daotan ang atong gibuhat, kining tanan nakita sa Diyos. (Proverbio 15:3) Pananglitan, ang Genesis 6:8, 9 nag-ingon nga “si Noe nakakaplag ug pabor sa mga mata ni Jehova” ug siya “naglakaw uban sa matuod nga Diyos.” Oo, naangkon ni Noe ang pag-uyon ug panalangin ni Jehova tungod kay siya matinumanong nagsunod sa matarong nga mga prinsipyo sa Diyos. (Genesis 6:22) Sa kasukwahi, ang mga tawo sa adlaw ni Noe mapintas ug mahilayon. Ang Diyos wala magpakabuta-bungol niini. Iyang ‘nakita nga ang pagkadaotan sa tawo dagaya diha sa yuta ug ang matag kiling sa mga hunahuna sa iyang kasingkasing daotan lamang sa tanang panahon.’ Sa ngadtongadto, gilaglag ni Jehova ang mga daotan apan iyang giluwas si Noe ug ang pamilya niini.—Genesis 6:5; 7:23.

Maangkon ba nimo ang pag-uyon ni Jehova? Sa pagkatinuod, ang mga mata ni Jehova “nagalibotlibot sa tibuok nga yuta aron ipakita ang iyang kusog alang niadtong kansang kasingkasing maoy bug-os alang kaniya.” (2 Cronicas 16:9) Sa dili madugay wagtangon na usab niya gikan sa yuta ang tanang mga daotan ug luwason niya ang mga maaghop.—Salmo 37:10, 11.