Dayega ang Disenyo; Ilha ang Tigdisenyo

LAGMIT nakabati ka na bahin sa Italyanong pintor ug eskultor nga si Michelangelo. Bisan pag wala ka makakitag orihinal nga obra maestra sa Italyanong henyo, mouyon ka gayod sa usa ka historyano bahin sa arte nga nagngalan kaniya nga “talagsaon ug di-hitupngang pintor ug eskultor.” Ang mga abilidad ni Michelangelo dili gayod ikalimod. Kinsa bay modayeg sa mga dibuho ug eskultura ni Michelangelo ug unya dili siya ilhong talagsaong pintor ug eskultor?

Hunahunaa ra ang katingalahan, komplikado, ug nagkadaiya nga buhing mga butang nga nag-alirong kanato sa yuta. Ang The New York Times haom nga mikutlo sa usa ka propesor sa biolohiya nga nag-ingon: “Adunay daghan kaayong ebidensiya sa disenyo diha sa buhing mga butang, ug dili ikalimod nga may nagdisenyo niana.” Makataronganon ba ang pagdayeg sa disenyo unya dili ilhon ang tigdisenyo niana?

Si apostol Pablo, nga usa ka maidlot nga maniniid sa mga butang alirong niya, naghisgot nga “nagsimba ug nag-alagad sila sa mga binuhat, inay sa Magbubuhat.” (Roma 1:25, Ang Biblia, Bag-ong Hubad nga Binisaya) Tungod kay naimpluwensiyahan sa kaylap nga mga ideya sa ebolusyon, ang uban dili motuo nga ang disenyo nagpaila nga aduna gayoy tigdisenyo. Apan ang teoriya ba sa ebolusyon tinuod nga siyensiya? Matikdi ang giingon ni Christoph Schönborn, Katolikong arsobispo sa Vienna, nga gipahayag sa The New York Times: “Ang bisan unsang teoriya nga nagsalikway sa daghang ebidensiya sa disenyo diha sa buhing mga butang maoy pangagpas lamang, dili siyensiya.”

Ang Pagtuo sa Maglalalang Makapahunong ba sa Pagpangdiskobre sa Siyensiya?

Hinunoa, ang uban naghunahuna nga ang pagtuo nga adunay Maglalalang “makababag sa panukiduki.” Ang maong kabalaka gipahayag sa usa ka artikulo sa magasing New Scientist, nga nagpatuo nga “ang way-kinutobang pagpangdiskobre sa siyensiya mohunong na, kay dili na sila mangitag mga katarongan alang sa pipila ka kinaiya sa buhing mga butang tungod kay kana pagbuot man sa Diyos.” May basehanan ba ang maong kabalaka? Wala gayod. Hinunoa, ang sukwahi maoy tinuod. Ngano?

Ang pagtuo nga ang atong uniberso ug ang kinabuhi sa yuta sulagma lang nga mitungha ug unya miagi sa proseso sa ebolusyon mao gayoy pagsalikway sa paningkamot nga mangitag makahuloganong katin-awan. Sa laing bahin, ang pagtuo nga usa ka intelihente nga Maglalalang maoy nagbuhat sa tanang butang nga atong makita sa palibot makaagak kanato sa pagsusi kon unsang matang ug kon giunsa pagpadapat ang iyang intelihensiya ingon nga gipadayag diha sa pisikal nga uniberso. Tagda kini: Ang pagkahibalo nga si Leonardo da Vinci ang nagdibuho sa “Mona Lisa” wala makababag sa mga historyano sa arte sa pagsusi  kon unsay iyang teknik ug kon unsang materyales ang iyang gigamit sa pagdibuho. Sa samang paagi, ang pagtuo nga adunay Tigdisenyo angayng magdasig kanato sa pagsusi sa iyang detalyado ug komplikado nga mga disenyo ug mga linalang.

Inay makababag sa dugang panukiduki, ang Bibliya nagdasig kanato sa pagpangitag mga tubag sa mga pangutana bahin sa kinaiyahan ug bahin usab sa Diyos. Gipalandong ni Haring David ang pagkagama sa iyang maayong pagkalilok nga lawas, ug siya miingon: “Sa makalilisang nga paagi ako katingalahan nga pagkabuhat. Ang imong mga buhat katingalahan, ingon sa nasayran pag-ayo sa akong kalag.” (Salmo 139:14) Sa pagkatinuod, gipadayag sa Bibliya nga ang Maglalalang nangutana sa patriarkang si Job: “Makinaadmanon mo bang napalandong ang lapad nga mga luna sa yuta?” (Job 38:18) Wala gayod kana magpasabot nga nababagan ang pagsusi ug pagdukiduki. Sa kasukwahi, ang Batid nga Tigdisenyo nagdapit kanato sa pagtuon sa iyang mga binuhat. Tagda usab ang pagdapit nga gisulat sa manalagnang si Isaias nga nagdasig kanato nga pauswagon ang atong pagsabot bahin sa Usa nga maoy naglalang sa buhing mga butang alirong nato: “Iyahat ang inyong mga mata sa itaas ug tan-awa. Kinsay naglalang niining mga butanga?” Unya, ang Isaias 40:26 nagpahayag gayod sa kamatuoran nga ang uniberso gipatungha sa usa nga tinubdan sa dinamikong enerhiya ug puwersa. Kini nahiuyon sa siyentipikanhong mga kaplag.

Tinuod, ang mga tubag sa mga pangutana bahin sa kalalangan dili kanunayng mabatonan. Tungod kay limitado ang atong katakos sa pagsabot ug dili kompleto ang atong nasabtan bahin sa kalibotan nga atong gipuy-an. Nakasabot niini si Job. Iyang gidayeg ang Maglalalang, nga nagbuhat ug nagpahiluna sa atong yuta nga walay gibitayan ug nagpahinabo nga ang napunog-tubig nga mga panganod mag-utaw-utaw sa kahanginan. (Job 26:7-9) Bisan pa niana, nahibalo si Job nga ang maong katingalahang mga butang ‘maoy kadaplinan lamang sa mga dalan sa Maglalalang.’ (Job 26:14) Walay duhaduha, gusto ni Job nga dugang makakat-on bahin sa kalibotan alirong niya. Ug si David miangkon sa iyang mga limitasyon, nga misulat: “Kanang maong kahibalo katingalahan kaayo alang kanako. Hataas kaayo kini nga dili ko arang makab-ot.”—Salmo 139:6.

Ang pagtuo nga may Maglalalang dili makababag sa siyentipikanhong kauswagan. Ang pagpangitag mas bug-os nga kahibalo bahin sa pisikal ug espirituwal nga mga butang wala gayoy kinutoban ug dumalayon. Ang usa ka hari sa karaang panahon nga nainila tungod sa iyang dakong kahibalo mapainubsanong misulat: “Iyang gibutang ang mga hunahuna bahin sa panahong walay kataposan diha sa kaisipan sa tawo, bisan pa niana ang tawo dili makatugkad sa buhat nga nahimo sa matuod nga Diyos sukad  sa sinugdan hangtod sa kataposan.”—Ecclesiastes 3:11, Holy Bible—New Life Version.

Diyos nga Panghulip Lamang?

Ang pipila motutol nga ang Diyos gamiton dihadiha ingong solusyon kon walay siyentipikanhong katin-awan, nga samag ang “Diyos” maoy madyik nga pulong. Apan unsa ba ang nakulang nga mga katin-awan? Kana ba gagmay ug way-hinungdang mga kakulangan sa atong kahibalo? Dili, kini aktuwal nga dagkong mga kakulangan sa pagkakatuohan sa teoriya sa ebolusyon ni Darwin. Kini maoy dagkong mga kakulangan sa daghang bahin sa biolohiya nga dili ikapatin-aw sa teoriya sa ebolusyon. Sa pagkatinuod, ang mga ebolusyonistang nagsalig sa way-ebidensiya nga mga pangagpas naghimo gayod sa teoriya ni Darwin ingon nga ilang Diyos nga panghulip lamang.

Ang Maglalalang nga gipadayag sa Bibliya dili Diyos nga panghulip lamang. Hinunoa, ang iyang mga kalihokan dayag diha sa tanang hugna, bahin, ug detalye sa kalalangan. Ang salmista nagpasiugda sa mabug-osong pagpanglalang ni Jehova: “Ikaw ang tinubdan sa tanang kinabuhi, ug tungod sa imong kahayag kami nakakita sa kahayag.” (Salmo 36:9, Today’s English Version) Siya gibatbat ingong ang Usa “nga naghimo sa langit ug sa yuta ug sa dagat ug sa tanang butang diha niana.” (Buhat 4:24; 14:15; 17:24) Ang usa ka magtutudlo sa unang siglo makataronganong misulat nga ang Diyos “maoy naglalang sa tanang butang.”—Efeso 3:9.

Dugang pa, ang Diyos nagpahimutang sa “mga lagda sa kalangitan,” ang pisikal nga mga balaod nga maoy nagagahom sa materya ug enerhiya, nga ang maong mga balaod gitun-an pa gihapon sa mga siyentipiko. (Job 38:33) Ang iyang disenyo maoy kompleto ug may katuyoan, nga nagtuman sa iyang tumong nga mao ang pagbuhat sa yuta aron puy-an sa nagkadaiyang buhing mga butang.

Disenyo ug Sentido Komon

Sa kataposan, angay natong hisgotan ang isyu bahin sa sentido komon. Sa pagkomento bahin sa pagkakatuohan sa nagkalainlaing teoriya sa siyensiya, ang magsusulat bahin sa siyensiya nga si John Horgan miingon: “Kon ang ebidensiya dili pa tino, dili nato ikaulaw ang paggamit sa atong sentido komon ingong giya.”

Makataronganon ba ang pagtuo nga ang kinabuhi mitungha lang nga sulagma o tungod sa dili-intelihenteng mga puwersa? Bisan pa sa pagkapopular sa teoriya sa ebolusyon, daghang utokang mga tawo, lakip mga siyentipiko, ang kombinsido nga adunay usa ka intelihenteng Maglalalang. Usa ka propesor sa siyensiya miingon nga ang kadaghanang tawo “naghunahuna ug nakasabot gayod nga may naglalang sa kinabuhi.” Nganong tinuod kana? Mouyon dayon ang kadaghanang tawo sa mga pulong ni apostol Pablo: “Ang matag balay adunay nagtukod.” (Hebreohanon 3:4) Unya si Pablo makataronganong mihinapos: “Siya nga nagtukod sa tanang butang mao ang Diyos.” Pinasukad sa giingon sa Bibliya, dili makataronganon nga pagailhon sa usa ka tawo nga may tigdisenyo ug magtutukod ang usa ka balay ug sa samang higayon moingon nga sulagma lamang nga mitungha ang usa ka komplikadong selula.

Nagpahayag ang Bibliya bahin sa mga tawo nga dili motuo nga may Tigdisenyo ug Maglalalang: “Ang walay salabotan nag-ingon diha sa iyang kasingkasing: ‘Walay Jehova.’” (Salmo 14:1) Gibadlong dinhi sa salmista ang mga tawo nga kombinsihonon pa. Ang usa ka tawo mahimong  gigiyahan sa personal nga opinyon inay sa dili-mapihigong panghunahuna. Sa laing bahin, ang tawong maalamon ug masinaboton sa kamapainubsanon moila nga adunay Maglalalang.—Isaias 45:18.

Alang sa daghang tawo nga tigpaminsar, tin-aw kaayo ang ebidensiya nga may Supremong Tigdisenyo.

Mahimo Nimong Mailhan ang Maglalalang

Kon nagtuo kita nga may naglalang kanato, nganong gilalang man kita? Unsay katuyoan sa atong kinabuhi? Ang siyensiya sa kaugalingon dili makahatag ug makapatagbawng mga tubag sa maong mga pangutana. Apan ang maong dagkong mga isyu nagkinahanglag katuohan ug makapatagbawng mga tubag. Niining bahina ang Bibliya mapuslanon kaayo. Gipaila niini si Jehova ingon nga Maglalalang ug May-Katuyoan, nga adunay maayong mga katarongan sa iyang ginabuhat. Gipadayag sa Kasulatan ang katuyoan sa Diyos alang sa katawhan, nga naghatag kanatog kaugmaon ug paglaom.

Apan kinsa si Jehova? Unsang matanga siya sa Diyos? Ang mga Saksi ni Jehova nagdapit kanimo nga ilhon ang atong Batid nga Tigdisenyo ingong tinuod nga persona. Mahimo nimong mailhan ang iyang ngalan ug mahibaloan ang iyang mga hiyas ug mga pagpakiglabot sa katawhan. Pinaagi sa mga panid sa Bibliya, imong masabtan kon nganong angayng dayegon nato dili lamang ang iyang nindot kaayong disenyo kondili dayegon usab siya ingong Tigdisenyo.—Salmo 86:12; Pinadayag 4:11.

[Hulagway sa panid 4]

Si Michelangelo

[Mga hulagway sa panid 5]

Ang pagtuo nga may Tigdisenyo nahiuyon sa matuod nga siyensiya

[Hulagway sa panid 6]

Ang kadaiyahan ug katakos sa pagpahiangay maoy ebidensiya sa pagkaadunay lainlaing klase sulod sa usa ka linalang nga batid kaayong pagkadisenyo

[Mga hulagway sa panid 7]

Ang disenyo nagpaila nga adunay tigdisenyo