Makaayo Kanato ang Pag-antos sa Kalisdanan
Makaayo Kanato ang Pag-antos sa Kalisdanan
“Gipahayag namong malipayon kadtong nakaantos.”—SANTIAGO 5:11.
1, 2. Unsay nagpamatuod nga dili katuyoan ni Jehova nga ang tawo mag-antos?
WALAY tawo nga eksaktog paminsar ang gustong mag-antos; ni gusto sa atong Maglalalang, si Jehova nga Diyos, nga ang mga tawo mag-antos. Masabtan nato kini sa dihang atong susihon ang iyang inspiradong Pulong ug matikdan kon unsay nahitabo pagkahuman sa iyang paglalang sa lalaki ug babaye. Lalaki ang unang gilalang sa Diyos. “Giumol ni Jehova nga Diyos ang tawo gikan sa abog sa yuta ug gihuypan ang mga buho sa iyang ilong sa gininhawa sa kinabuhi, ug ang tawo nahimong buhing kalag.” (Genesis 2:7) Hingpit ang lawas ug kaisipan ni Adan, ug siya dili masakit o mamatay.
2 Komosta man ang kahimtang sa pagpuyo ni Adan? “Si Jehova nga Diyos nagtanom ug usa ka tanaman sa Eden, sa dapit sa sidlakan, ug didto iyang gibutang ang tawo nga iyang giumol. Busa gipatubo ni Jehova nga Diyos gikan sa yuta ang tanang kahoy nga tilinguhaon sa panan-aw ug maayong kan-on.” (Genesis 2:8, 9) Nindot gayod ang pinuy-anan ni Adan ug walay kalisdanan didto sa Eden.
3. Unsay mga palaaboton sa unang magtiayon?
3 Ang Genesis 2:18 nagpahibalo kanato: “Si Jehova nga Diyos miingon: ‘Dili maayo alang sa tawo nga magpadayon nga mag-inusara. Buhatan ko siyag katabang, ingon nga iyang katimbang.’” Unya milalang si Jehova ug hingpit nga asawa alang kang Adan, nga tungod niadto may kalaoman sila nga makabaton ug malipayong pamilya. (Genesis 2:21-23) Ang Bibliya dugang nagpahibalo kanato: “Ang Diyos nagpanalangin kanila ug ang Diyos miingon kanila: ‘Magmabungahon ug magdaghan kamo ug pun-a ang yuta ug gamhi kini.’” (Genesis 1:28) May talagsaong kahigayonan ang unang magtiayon sa pagpadako sa Paraiso sa Eden hangtod ang tibuok yuta mahimo nang paraiso. Ug magpatungha silag malipayong mga anak nga dili mag-antos ug kalisdanan. Pagkanindot nga sinugdanan!—Genesis 1:31.
Nagsugod ang Pag-antos
4. Kon atong susihon ang kasaysayan, unsay dayag bahin sa kahimtang sa katawhan?
4 Apan kon atong susihon ang kahimtang sa tawhanong pamilya latas sa kasaysayan, dayag nga may nakaingon sa daotan kaayong mga kahimtang. Ang daotang mga butang nagkahitabo ug busa grabe ang giantos sa tawhanong pamilya. Latas sa daghang kasiglohan, ang tanang kaliwat ni Adan ug Eva masakit, matigulang, ug sa kataposan mamatay. Ang yuta dili gayod paraiso nga napuno ug mga tawong malipayon. Tukmang gibatbat ang kahimtang sa Roma 8:22: “Ang tibuok kalalangan duyog nga nagpadayon sa pag-agulo ug anaa sa kasakitan hangtod karon.”
5. Sa unsang paagi nalangkit ang atong unang mga ginikanan sa sinugdanan sa mga pag-antos sa katawhan?
5 Si Jehova dili mao ang nakaingon sa labihang kalisdanan nga dugay nang naglungtad. (2 Samuel 22:31) Ang mga tawo mabasol usab. “Sila nagagawi sa ikadaot, sila nagagawi nga dulumtanan sa ilang binuhatan.” (Salmo 14:1) Ang tanang maayong butang gihatag sa atong unang mga ginikanan sa sinugdan. Gibaoran lang sila nga magpadayong masinugtanon sa Diyos, apan gipalabi ni Adan ug Eva nga mobulag kang Jehova. Sukad nga gisalikway sa atong mga ginikanan si Jehova, sila dili na mahimong hingpit. Sila anam-anam nga nadaot hangtod nga namatay. Nakapanunod kita sa ilang pagkadili-hingpit.—Genesis 3:17-19; Roma 5:12.
6. Sa unsang paagi nalangkit si Satanas sa sinugdanan sa pag-antos?
6 Ang espiritung linalang nga nahimong Satanas nga Yawa nalangkit usab sa sinugdanan sa tanang pag-antos. Gihatagan siyag kagawasan sa pagpili. Ugaling lang, sayop niya kanang gigamit tungod sa iyang tinguha nga siya ang simbahon. Apan, si Jehova lamang ang angayng simbahon, dili ang iyang mga linalang. Si Satanas ang nagtental kang Adan ug Eva nga mobulag kang Jehova, nga sa ingon sila “mahisama sa Diyos, nga mahibalo sa maayo ug sa daotan.”—Genesis 3:5.
Si Jehova Lamang ang May Katungod sa Pagmando
7. Unsay gipasundayag sa mga sangpotanan sa pagrebelde batok kang Jehova?
7 Gipasundayag sa daotang mga sangpotanan sa pagrebelde nga si Jehova lang, ingong Soberano sa Uniberso, ang may katungod nga magmando ug iyang pagmando lang ang matarong. Ang miaging libolibo ka katuigan nagpasundayag nga si Satanas, kinsa nahimong “ang magmamando niining kalibotana,” nakapatunghag daotan, dili-matarong, ug mapintasong pagmando nga dili gayod makapatagbaw. (Juan 12:31) Ang dugay na kaayo, magubtanong pagmando sa mga tawo nga gigamhan ni Satanas nagpasundayag usab nga sila walay katakos sa pagmando sa matarong nga paagi. (Jeremias 10:23) Busa, ang tanang matang sa pagmando nga mahunahunaan sa tawo nga bulag kang Jehova seguradong mapakyas. Gipamatud-an gayod kini sa kasaysayan.
8. Unsay katuyoan ni Jehova bahin sa tanang matang sa tawhanong pagmando, ug sa unsang paagi iyang tumanon ang maong katuyoan?
8 Tungod kay gitugotan na ni Jehova ang mga tawo ug kaliboan ka katuigan sa pag-eksperimento sa pagmando nga bulag kaniya, may katarongan na siya nga wagtangon ang tanang matang sa pagmando gikan sa yuta ug pulihan kana sa kaugalingon niyang kagamhanan. Ang usa ka tagna bahin niini nag-ingon: “Sa mga adlaw nianang mga haria ang Diyos sa langit magatukod ug usa ka gingharian [iyang langitnong kagamhanan nga mandoan ni Kristo] nga dili gayod malumpag. . . . Kini magadugmok ug magatapos niining tanang gingharian, ug kini mobarog hangtod sa panahong walay tino.” (Daniel 2:44) Matapos na ang demonyohanon ug tawhanong pagmando, ug ang langitnong Gingharian sa Diyos lamang ang maglungtad ug magmando sa yuta. Si Kristo mao ang Hari, ug siya adunay mga kaubang magmamando nga 144,000 ka matinumanong mga tawo nga gikuha gikan sa yuta.—Pinadayag 14:1.
Mga Kaayohan sa Pag-antos sa Kalisdanan
9, 10. Sa unsang paagi si Jesus nakabatog kaayohan gikan sa mga butang nga iyang giantos?
9 Makaiikag ang pagsusi sa mga katakos niadtong magmando sa langitnong Gingharian. Una, gipadayag ni Kristo Jesus nga siya takos kaayo alang sa iyang papel ingong Hari. Siya migugol ug di-maihap nga panahon tapad kang Jehova nga nagbuhat sa kabubut-on sa iyang Amahan, ingong Iyang “batid nga magbubuhat.” (Proverbio 8:22-31) Sa dihang gihikay ni Jehova nga moanhi siya sa yuta, kinabubut-ong misugot si Jesus. Samtang dinhi sa yuta, gihatagan niyag bug-os nga pagtagad ang pagsulti sa uban bahin sa pagkasoberano ug Gingharian ni Jehova. Si Jesus naghatag usab ug labing maayong panig-ingnan kanatong tanan pinaagi sa bug-os nga pagpasakop sa maong pagkasoberano.—Mateo 4:17; 6:9.
10 Si Jesus nakaagom ug paglutos, ug sa kataposan siya gipatay. Panahon sa iyang ministeryo, iyang napanid-an ang makaluluoy nga kahimtang sa mga tawo sa iyang palibot. Nakahatag bag kaayohan kaniya ang pagkakita niana ug pag-antos mismo sa kalisdanan? Oo. Ang Hebreohanon 5:8 nag-ingon: “Bisan tuod siya Anak [sa Diyos], nakakat-on siya sa pagkamasinugtanon gikan sa mga butang nga iyang giantos.” Tungod sa kasinatian ni Jesus samtang dinhi sa yuta, siya nahimong mas masinabtanon ug mabination. Nakasinati siya mismo sa kahimtang sa katawhan. Siya makasimpatiya sa mga tawong nag-antos ug mas mapabilhan niya ang iyang papel ingong ilang manluluwas. Matikdi kon giunsa kini pagpasiugda ni apostol Pablo diha sa basahong Hebreohanon: “Busa kinahanglan nga siya mahisama sa iyang ‘mga igsoon’ sa tanang paagi, aron siya mahimong maluluy-on ug matinumanong hataas nga saserdote sa mga butang maylabot sa Diyos, aron sa pagtanyag ug halad pasig-uli alang sa mga sala sa katawhan. Tungod kay siya nag-antos sa dihang gisulayan, siya makaarang sa pagtabang kanila nga ginasulayan.” “Kita adunay usa ka dakong hataas nga saserdote, dili usa nga dili mobati sa atong mga kaluyahon, kondili usa nga nasulayan sa tanang paagi sama kanato, apan walay sala. Busa, uban ang kagawasan sa pagsulti, manuol kita sa trono sa dili-takos nga kalulot, aron makadawat kita ug kaluoy ug makakaplag ug dili-takos nga kalulot ingong tabang sa hustong panahon.”—Hebreohanon 2:17, 18; 4:14-16; Mateo 9:36; 11:28-30.
11. Sa unsang paagi ang kasinatian dinhi sa yuta sa umaabot nga mga hari ug mga saserdote nakatabang kanila aron mahimong takos nga mga magmamando?
11 Kana ikaingon usab bahin sa 144,000 nga “gipalit” gikan sa yuta aron mahimong mga kaubang magmamando ni Kristo Jesus sa langitnong Gingharian. (Pinadayag 14:4) Silang tanan natawo sa yuta ug nagtubo sa kalibotan nga napunog kalisdanan ug sila mismo nag-antos niana. Daghan ang gilutos, ug ang pipila gipatay pa tungod sa paghupot sa ilang integridad kang Jehova ug kinabubut-ong pagsunod kang Jesus. Apan sila ‘wala maulaw sa pagpamatuod bahin sa ilang Ginoo, nga nagdawat sa ilang bahin sa pag-antos sa daotan tungod sa maayong balita.’ (2 Timoteo 1:8) Tungod sa ilang kasinatian sa yuta, sila nahimong takos gayod nga mahimong mga maghuhukom sa katawhan gikan sa langit. Nakakat-on sila nga mahimong mas maluluy-on, maluloton, ug maikagong motabang sa mga tawo.—Pinadayag 5:10; 14:2-5; 20:6.
Kalipay Niadtong May Yutan-ong Paglaom
12, 13. Sa unsang paagi ang pag-antos makaayo alang sa mga tawo nga may yutan-ong paglaom?
12 Ang pag-antos karon makahatag bag kaayohan sa mga tawong naglaom nga mabuhing walay kataposan sa paraiso diin wala nay sakit, kasubo, ug kamatayon? Ang sakit ug kagul-anan nga resulta sa pag-antos dili gayod tilinguhaong mga butang. Apan kon antoson nato ang maong mga kasakitan, kita mas makapasundayag sa maayong mga hiyas ug magmalipayon.
13 Tagda ang giingon sa inspiradong Pulong sa Diyos bahin niini: “Bisan kon kamo mag-antos tungod sa pagkamatarong, kamo malipayon.” “Kon kamo gipakaulawan tungod sa ngalan ni Kristo, kamo malipayon.” (1 Pedro 3:14; 4:14) “Malipayon kamo sa dihang pakaulawan kamo sa mga tawo ug pagalutoson kamo ug sa binakak sultihan kamo sa tanang matang sa kadaotan tungod kanako. Pagmaya ug lukso sa kalipay, sanglit dako ang inyong ganti sa mga langit.” (Mateo 5:11, 12) “Malipayon ang tawo nga nagpadayon sa pag-antos sa pagsulay, tungod kay sa pagkahimong inuyonan iyang madawat ang purongpurong sa kinabuhi.”—Santiago 1:12.
14. Sa unsang diwa nga ang pag-antos makapalipay sa mga magsisimba ni Jehova?
14 Ang aktuwal nga pag-antos nga ato tingaling maagoman dili mao ang makapalipay kanato. Kita may kalipay o katagbawan kay kita nahibalo nga kita nag-antos tungod sa pagbuhat sa kabubut-on ni Jehova ug pagsunod sa sumbanan ni Jesus. Pananglitan, sa unang siglo, ang pipila ka apostoles gibilanggo ug unya gitaral atubangan sa hataas nga hukmanan sa mga Hudiyo ug gisaway sa publiko tungod sa pagwali bahin kang Jesu-Kristo. Sila gibunalan ug unya gibuhian. Unsay ilang tinamdan? Ang asoy sa Bibliya nag-ingon nga sila “milakaw gikan sa atubangan sa Sanhedrin, nga nagmaya tungod kay giisip sila nga takos pakaulawan tungod sa iyang ngalan.” (Buhat 5:17-41) Sila nalipay, dili tungod sa pagbunal kanila ug sa panakit sa lawas nga ilang gibati, kondili tungod kay ilang nasabtan nga kadto nahitabo gumikan sa ilang paghupot sa integridad kang Jehova ug pagsunod sa mga lakang ni Jesus.—Buhat 16:25; 2 Corinto 12:10; 1 Pedro 4:13.
15. Sa unsang paagi ang atong pag-antos sa mga kalisdanan karon makaayo kanato sa umaabot?
15 Kon makaantos kita sa pagsupak ug paglutos uban ang hustong tinamdan, maugmad nato ang pagkamalahutayon. Makatabang kini kanato sa pag-antos sa umaabot nga mga kalisdanan. Atong mabasa: “Mga igsoon ko, isipa nga maoy bug-os kalipay kon makasagubang kamo ug nagkadaiyang mga pagsulay, kay nahibalo kamo nga kining sinulayang kalidad sa inyong pagtuo mosangpot ug pagkamainantoson.” (Santiago 1:2, 3) Ang Roma 5:3-5 susamang nagpahibalo kanato: “Magsadya kita samtang anaa sa kasakitan, kay kita nahibalo nga ang kasakitan magpatungha ug paglahutay; ang paglahutay, sa baylo, ug usa ka inuyonang kahimtang; ang inuyonang kahimtang, sa baylo, ug paglaom, ug ang paglaom dili motultol sa pagkahigawad.” Busa kon makaantos kitag mas daghang pagsulay tungod sa atong pagka-Kristohanon, mas masangkapan kita sa pag-antos ug dugang nga mga pagsulay niining daotang sistema sa mga butang.
Gantihan ni Jehova ang mga Tawong Nag-antos
16. Unsay buhaton ni Jehova alang sa umaabot nga mga hari ug mga saserdote ingong ganti sa ilang pag-antos?
16 Bisan pag mawad-an kitag materyal nga mga butang tungod sa pagsupak o paglutos gumikan sa pagsunod sa Kristohanong dalan, kita magmatagbawon kay nasayod nga si Jehova magaganti kanato sa bug-os. Pananglitan, alang sa pipila nga naglaom nga moadto sa langit, si apostol Pablo misulat: “Kamo . . . malipayong nagdawat sa pagpangagaw sa inyong mga gipanag-iya, kay nahibalo nga kamo adunay mas maayo ug dumalayong kabtangan” ingong mga magmamando sa Gingharian sa Diyos. (Hebreohanon 10:34) Ug pagkamalipayon gayod nila sa dihang ilalom sa pagdumala ni Jehova ug ni Kristo sila makig-ambit sa paghatag ug kahibulongang mga panalangin sa mga molupyo sa yuta diha sa usa ka bag-ong kalibotan. Pagkatinuod ang mga pulong ni apostol Pablo ngadto sa matinumanong mga Kristohanon: “Giisip ko nga ang mga pag-antos karong panahona walay bili kon itandi sa himaya nga igapadayag dinhi kanato.”—Roma 8:18.
17. Unsay buhaton ni Jehova alang sa mga tawo nga may yutan-ong paglaom nga maunongong nag-alagad kaniya karon?
17 Sa susamang paagi, bisan kon unsay mawala tingali o kinabubut-ong biyaan karon sa mga tawong may yutan-ong paglaom tungod sa pag-alagad kang Jehova, iya silang gantihan nga madagayaon kaayo tungod sa iyang buhaton sa umaabot. Iya silang hatagan ug hingpit, walay-kataposang kinabuhi diha sa paraisong yuta. Nianang bag-ong kalibotan, si Jehova ‘magapahid sa matag luha gikan sa ilang mga mata, ug ang kamatayon mawala na.’ (Pinadayag 21:4) Pagkatalagsaong saad! Walay bisan unsa nga kinabubut-on o dili-kinabubut-on natong biyaan tingali niining kalibotana karon tungod kang Jehova ang makatumbas sa kahibulongang kinabuhi sa umaabot, nga iyang ihatag sa iyang matinumanong mga alagad nga nag-antos sa mga pagsulay.
18. Unsang makapahupay nga saad ang gihatag kanato ni Jehova diha sa iyang Pulong?
18 Ang bisan unsa pa nga ato tingaling antoson dili gayod makaapektar sa atong pagpahimulos sa kinabuhing walay kataposan sa bag-ong kalibotan sa Diyos. Kanang tanan bug-os nang mapulihan ug nindot kaayong mga kahimtang sa bag-ong kalibotan. Ang Isaias 65:17, 18 nagsulti kanato: “Ang unang mga butang dili na pagahinumdoman, ni kini sila motungha pa sa kasingkasing. Apan pagsadya kamo ug paglipay hangtod sa kahangtoran sa kon unsay akong gilalang.” Busa, ang igsoon ni Jesus sa inahan nga si Santiago haom nga mipahayag: “Gipahayag namo nga malipayon kadtong nakaantos.” (Santiago 5:11) Oo, kon matinumanon natong antoson ang mga pagsulay karon, kini makaayo kanato karon ug sa umaabot.
Unsay Imong Tubag?
• Nganong ang mga tawo nakasinatig pag-antos?
• Unsay mga kaayohan ang mapatungha tingali sa pag-antos alang sa umaabot nga mga magmamando ug mga molupyo sa yuta?
• Nganong kita mahimong malipayon karon bisan pag nag-antos ug mga kalisdanan?
[Mga Pangutana sa Pagtuon]
[Hulagway sa panid 27]
Talagsaon ang kaugmaon sa atong unang mga ginikanan
[Hulagway sa panid 29]
Tungod kay nakapaniid sa pag-antos, si Jesus naandam nga mahimong usa ka maayong Hari ug Hataas nga Saserdote
[Hulagway sa panid 31]
Ang mga apostoles ‘nagmaya nga giisip sila nga takos pakaulawan’ tungod sa ilang pagtuo