Pagpanulat​—Ang Kahinungdanon Niini sa Karaang Israel

NAKABASA ka na ba sa Iliad o Odyssey, ang duha ka bantogang mga balak-sugilanon sa karaang Gresya? Gituohan nga ang maong mga balak gikomposo sa ikasiyam o ikawalong siglo W.K.P. Unsay kalainan sa maong mga balak-sugilanon kon itandi sa Bibliya, nga abanteg daghang siglo ang pagsugod sa pagsulat niini? Ang basahong The Jewish Bible and the Christian Bible nag-ingon: “Ang mga sulat ug sinulat nga dokumento gihisgotan sa Bibliya ug labing menos 429 ka beses. Hinungdanon kini kon hinumdoman nga ang sulat kausa lang hisgoti diha sa Iliad ug wala gayod diha sa Odyssey.”

Ang The Oxford Encyclopedia of Archaeology in the Near East nagpatin-aw nga “ang pagpanulat kinahanglanon kaayo sa pagsimba sa karaang Israel.” Pananglitan, ang pakigsaad sa Balaod gipasulat ug sa ulahi regular nga gibasa sa publiko atubangan sa tanang kalalakin-an, kababayen-an, ug kabataan. Gibasa ug gitun-an usab kini sa mga tawo nga ginurupo ug sa pribado. Human masusi ang pipila ka bahin sa Balaod, si Alan Millard, senyor nga instruktor sa Unibersidad sa Liverpool, mihinapos: “Dayag nga gituohan nga ang kadaghanan kanila makabasa ug makasulat.”—Deuteronomio 31:9-13; Josue 1:8; Nehemias 8:13-15; Salmo 1:2.

Gipatin-aw ni apostol Pablo kon sa unsang paagi angayng lantawon sa mga Kristohanon ang balaang mga sinulat: “Ang tanang butang nga gisulat kanhi gisulat alang sa pagtudlo kanato, aron nga pinaagi sa atong pag-antos ug pinaagi sa paghupay gikan sa mga Kasulatan kita makabatog paglaom.” Personal mo bang gipabilhan ang Bibliya pinaagi sa pagbasa kanunay niini?—Roma 15:4.