Nganong Gitugotan sa Diyos ang Pagkadaotan?

ANG pagkadaotan ug pag-antos kaylap bisag asa. Daghang sibilyan ug mga sundalo ang namatay tungod sa mga gubat. Kaylap usab ang krimen ug ang kapintasan. Lagmit di pa dugay ikaw nabiktima sa pagpihigpihig o inhustisya. Tungod sa imong nakita ug nasinatian, lagmit nakapangutana ka, ‘Nganong gitugotan sa Diyos ang pagkadaotan?’

Kanang pangutanaha dili bag-o. Mga 3,600 ka tuig kanhi, ang usa ka maunongong alagad sa Diyos nga si Job nangutana: “Ngano man nga ang mga daotan nagpadayong buhi?” (Job 21:7) Mga 2,600 ka tuig usab kanhi, ang manalagnang si Jeremias natugaw usab sa daotan mga buhat sa iyang mga katagilungsod ug nangutana: “Ngano man nga ang dalan sa mga daotan mao ang nagmalamposon, nga ang tanang nagaluib mao ang wala mabalaka?” (Jeremias 12:1) Si Job ug Jeremias nahibalo nga ang Diyos matarong. Apan sila nahibulong kon nganong kaylap kaayo ang pagkadaotan. Lagmit nahibulong ka usab niini.

Nagtuo ang pipila ka tawo nga ang Diyos maoy nakaingon sa pagkadaotan ug pag-antos. Ang uban nangutana sa ilang kaugalingon: ‘Kon ang Diyos labing gamhanan, matarong, ug mahigugmaon, nganong wala man niya wagtanga ang pagkadaotan ug pag-antos? Nganong iya mang gitugotan ang pagkadaotan nga magpadayon hangtod karon?’ Hisgotan sa mosunod nga artikulo ang mga tubag niining mga pangutanaha ug ang uban pang hinungdanong mga pangutana.

[Picture Credit Line sa panid 3]

AP Photo/Adam Butler