Mga Desisyon nga Makahatag Kanimog Kalipay

“ANUGONA OY! Nganong nasipyat man ko?” Kapila na kana nahitabo nimo? Kitang tanan gustong mohimog mga desisyon nga dili gayod nato pagabasolan, ilabina kon kini makaapektar sa atong kinabuhi. Nan, sa unsang paagi kita makahimog mga desisyon nga makahatag kanatog kalipay?

Una, nagkinahanglan kitag kasaligan gayod nga mga sukdanan. Apan, may kasaligan bang mga sukdanan karon? Wala, matod pa sa daghan. Sumala pa sa usa ka surbi sa Tinipong Bansa, 75 porsiyento sa mograduwaray nga mga estudyante sa kolehiyo nagtuo nga walay sukdanan kon unsay husto ug sayop ug managlahi ang hunahuna bahin niini depende sa “mga prinsipyo sa matag usa ug sa ilang kultura.”

Husto ba ang pag-ingon nga ang sukdanan sa kon unsay maayo ug daotan nagdepende lang sa personal nga opinyon o kon unsay komon nga gisunod sa kadaghanan? Dili gayod. Kon ang mga tawo ray pagbut-on kon unsay ilang buhaton, seguradong magkaguliyang gayod. Kinsay gustong mopuyo sa usa ka dapit nga walay balaod, walay hukmanan, ug walay polis? Gawas pa, dili kanunayng kasaligan ang personal nga opinyon. Mahimong mobuhat kita sa usa ka butang nga sa atong tan-aw husto, pag-ando pa, sayop diay. Sa pagkatinuod, ang tibuok kasaysayan nagpakita nga tinuod ang giingon sa Bibliya: “Dili iya sa tawo nga nagalakaw bisan ang pagtultol sa iyang lakang.” (Jeremias 10:23) Nan, asa man kita makapangayog tabang sa paghimog desisyon maylabot sa mga butang nga hinungdanon sa atong kinabuhi?

Maayo ang gibuhat sa batan-ong magmamando nga gihisgotan sa unang artikulo tungod kay miduol siya kang Jesus. Sa pagtubag sa pangutana sa batan-on, atong nasayran nga gikutlo ni Jesus  ang Balaod sa Diyos. Giila ni Jesus nga si Jehova nga Diyos ang kinalabwang Tuboran sa kahibalo ug kaalam ug Siya nahibalo kon unsay makaayo sa Iyang mga linalang. Mao nga si Jesus miingon: “Ang gitudlo ko dili akoa, kondili iya sa nagpadala kanako.” (Juan 7:16) Sa pagkatinuod, ang Pulong sa Diyos maoy kasaligang tuboran sa giya nga makatabang kanato sa paghimog maalamong mga desisyon. Atong susihon ang pipila ka prinsipyo sa Pulong sa Diyos nga kon sundon makahatag kanatog kalipay.

Ang Bulawanong Lagda

Sa iyang bantog nga Wali sa Bukid, si Jesus nagtudlo ug usa ka hinungdanong prinsipyo nga makatabang kanato sa paghimog maalamong desisyon maylabot sa paghupot ug maayong relasyon sa uban. Siya nag-ingon: “Ang tanang butang nga buot ninyo nga pagabuhaton sa mga tawo nganha kaninyo, kinahanglang pagabuhaton usab ninyo sa ingon ngadto kanila.” (Mateo 7:12) Kini nga prinsipyo sagad tawgon nga Bulawanong Lagda.

Ang uban naggamit sa negatibong bersiyon niini: “Ayaw buhata sa uban ang dili nimo buot nga buhaton diha kanimo.” Aron makita ang kalainan sa duha, atong susihon ang sambingay ni Jesus bahin sa matinabangong Samarianhon. Usa ka Hudiyo ang gikulata ug gibiyaan nga nagbuy-od daplin sa dalan. Dihay saserdote nga miagi ug dayon usa ka Levita apan ila lang gilabyan siya. Kay wala silay gihimo nga makapasamot sa giantos sa maong tawo, ikaingon nga ilang gisunod ang negatibong bersiyon sa Bulawanong Lagda. Sa kasukwahi, pag-agi sa usa ka Samarianhon, siya mihunong ug mitabang. Iyang gitambalan ug gibugkosan ang samad niini ug iyang gidala siya sa usa ka sak-anan. Iyang gibuhat diha sa tawo ang buot niya nga pagabuhaton diha kaniya. Iyang gisunod ang Bulawanong Lagda—ug husto ang desisyon nga iyang gihimo.—Lucas 10:30-37.

Atong mapadapat kini nga lagda sa daghang paagi ug kita makasalig nga mopatungha kinig maayong mga resulta. Pananglitan, may pamilya nga bag-ong mibalhin sa inyong dapit. Nganong dili makigkita kanila ug komostahon sila? Makahimo ka tingali sa pagpailaila kanila sa inyong mga silingan. Basin may mga pangutana sila ug basin gusto nila ug tabang. Kon ikaw ang unang magpakita ug pagkamahunahunaon kanila, nan, imong maugmad ang maayong relasyon sa imong silingan. Mobati ka usab ug katagbawan kay nahibalo ka nga ang imong gibuhat makapahimuot sa Diyos. Dili ba kana maalamong desisyon?

Mga Desisyon nga Gihimo Tungod sa Atong Gugma sa Uban

Gawas sa Bulawanong Lagda, may gihatag pa si Jesus nga mga giya nga makatabang kanato sa paghimog maalamong mga desisyon. Sa dihang gipangutana si Jesus kon unsa ang kinadak-ang sugo sa Moisesnong Balaod, siya mitubag: “‘Higugmaon mo si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan.’ Kini mao ang kinadak-an ug unang sugo. Ang ikaduha, nga susama niini, mao kini, ‘Higugmaon mo ang imong silingan sama sa imong kaugalingon.’ Niining duha ka sugo nagsukad ang tibuok Balaod, ug ang mga Manalagna.”—Mateo 22:36-40.

Sa gabii una sa iyang kamatayon, gihatagan ni Jesus ang iyang mga tinun-an ug usa ka “bag-ong sugo,” nga sila maghigugmaay sa usag usa. (Juan 13:34) Nganong miingon man siya nga bag-o ang maong sugo? Dili ba iya nang gipatin-aw una pa niini nga ang paghigugma sa silingan maoy usa sa duha ka sugo diin nagsukad ang tibuok Balaod? Ubos sa Moisesnong Balaod, ang mga Israelinhon gisugo: “Higugmaon mo ang imong isigkatawo sama sa imong kaugalingon.” (Levitico 19:18) Apan, labaw pa niana ang gisugo ni Jesus sa iyang mga tinun-an. Nianang gabhiona mismo, gitug-anan ni Jesus ang iyang mga tinun-an nga iyang ihatag ang iyang kinabuhi alang kanila. Dayon siya miingon: “Mao kini ang akong sugo, nga maghigugmaay kamo sa usag usa ingon sa akong paghigugma kaninyo. Walay usa nga may gugmang labaw pa kay niini, nga ang usa magtugyan sa iyang kalag alang sa iyang mga higala.” (Juan 15:12, 13) Bag-o gayod kini nga sugo tungod kay kinahanglan nimong unahon ang kaayohan sa uban ayha pa ang imong kaugalingon.

Adunay daghang paagi nga ikapakita nato ang atong dili-mahakogong gugma, nga dili  maghunahuna sa ato lang kaugalingong kaayohan. Pananglitan, nagpuyo ka sa usa ka apartment ug gusto kang maminaw ug kusog kaayong musika apan banhaan niana ang imong silingan. Mahimo ba nimong pahinayan kana aron dili siya matugaw? Sa laing pagkasulti, unahon ba nimo ang kaayohan sa imong silingan?

Tagda ang laing pananglitan. Sa usa ka adlaw sa tingtugnaw sa Canada, usa ka tigulang nga lalaki ang giduaw sa duha ka Saksi ni Jehova. Sa ilang padayong panagsultianay, iyang nahisgotan nga siya may sakit sa kasingkasing maong wala niya mahawani ang atubangan sa iyang balay nga napuno sa niyebe. Mga usa ka oras sa ulahi, nakadungog siyag mga kinagiskis. Mibalik diay ang duha ka Saksi ug ilang gihawanan ang agianan padulong sa iyang balay apil ang hagdan niini. “Karon, akong naamgohan nga duna diay mga Kristohanon nga tinuod nga nahigugma sa uban,” matod pa niya diha sa iyang sulat ngadto sa sangang buhatan sa mga Saksi ni Jehova sa Canada. “Nakapausab gayod kini sa akong negatibong panglantaw sa mga tawo ug mas nakadayeg ako sa inyong tibuok-kalibotang buluhaton.” Tinuod nga ang paghatag ug tabang, bisan unsa pa kini kagamay, dako gayod ug epekto sa uban. Magmalipayon ka gayod kon imong unahon ang kaayohan sa uban!

Mga Desisyon nga Gihimo Tungod sa Atong Gugma sa Diyos

Ang lain pang butang nga angay natong tagdon sa dihang mohimog desisyon mao ang giingon ni Jesus nga kinadak-ang sugo—nga atong higugmaon ang Diyos. Kining mga pulonga gitumong ni Jesus sa mga Hudiyo, nga ingong usa ka nasod, napahinungod na kang Jehova. Bisan pa niana, ang matag Israelinhon kinahanglang mopili kon sila moalagad ba sa Diyos nga bug-os kalag ug bug-os kasingkasing.—Deuteronomio 30:15, 16.

Sa susama, madayag diha sa imong mga desisyon kon unsay imong pagbati sa Diyos. Pananglitan, samtang magkadako ang imong apresasyon sa pagkamapuslanon sa Bibliya, ikaw usab kinahanglang mohimog desisyon. Andam ka bang motuon sa Bibliya, ug mahimong sumusunod ni Jesus? Kon imo kanang buhaton, segurado gayod nga magmalipayon ka tungod kay si Jesus misaad: “Malipayon kadtong mahunahunaon sa ilang espirituwal nga panginahanglan.”—Mateo 5:3.

Wala kita mahibalo kon nagbasol ba ang batan-ong magmamando sa iyang desisyon. Apan, kita nahibalo sa gibati ni Pedro tungod sa iyang pagsunod kang Jesu-Kristo sulod sa daghang katuigan. Sa mga 64 K.P., sa hapit na siyang mamatay, si Pedro nagdasig sa iyang isigka-magtutuo: “Buhata ang kutob sa inyong maarangan nga sa kataposan makaplagan kamo [sa Diyos] nga walay buling ug walay lama ug anaa sa pakigdait.” (2 Pedro 1:14; 3:14) Klaro nga si Pedro wala magbasol sa desisyon nga iyang gihimo mga 30 ka tuig na ang milabay, ug iyang gipalig-on ang uban nga mangupot sa desisyon nga ilang gihimo.

Ang pagsunod sa tambag ni Pedro nagpasabot nga atong pilion ang pagkahimong sumusunod ni Jesus ug tumanon ang mga sugo sa Diyos. (Lucas 9:23; 1 Juan 5:3) Lisod tingali kining buhaton, apan si Jesus nagpasalig kanato: “Umari kanako, kamong tanang nabudlayan ug nabug-atan, ug  ako magapalagsik kaninyo. Isangon diha kaninyo ang akong yugo ug magtuon gikan kanako, kay ako malumog-buot ug mapainubsanon sa kasingkasing, ug kamo makakaplag ug kahayahay alang sa inyong mga kalag. Kay ang akong yugo masayon ug ang akong luwan magaan.”—Mateo 11:28-30.

Tagda ang eksperyensiya ni Arthur. Sa diyes anyos pa siya, si Arthur nagtuon na sa pagtugtog ug biolin ug gusto niya nga mahimong propesyonal nga biolinista. Pag-edad niyag 14, tigtugtog na siya sa mga konsiyerto. Bisan pa niana, siya dili malipayon. Ang iyang amahan may mga pangutana bahin sa kahulogan sa kinabuhi ug nagdapit ug mga magtutudlo sa relihiyon sa ilang balay; apan wala gayod siya matagbaw sa ilang mga tubag. Silang pamilya maghisgot usahay kon tinuod bang naglungtad ang Diyos ug kon nganong gitugotan niya ang pagkadaotan. Dayon, nakaestorya sa amahan ni Arthur ang mga Saksi ni Jehova. Nainteres siya sa ilang gihisgotan ug sa ngadtongadto ang tibuok pamilya nagtuon sa Bibliya.

Sa wala madugay, nakat-onan ni Arthur sa Kasulatan kon nganong gitugotan sa Diyos ang pag-antos, ug iyang nasabtan kon unsa gayoy katuyoan sa kinabuhi. Uban sa tulo ka membro sa ilang pamilya, si Arthur mihimog desisyon nga wala gayod niya basoli. Siya nagpahinungod sa iyang kinabuhi kang Jehova. “Malipayon kaayo ako nga si Jehova nagtudlo kanako sa kamatuoran ug nagluwas kanako gikan sa pag-indigay nga komon kaayo sa kalibotan sa mga musikero. Buhaton nila ang tanan aron lang molampos.”

Ganahan gihapon si Arthur nga motugtog ug biolin sa paglingaw sa iyang mga higala, apan dili na kana panguna sa iyang kinabuhi. Hinunoa, iyang gigamit ang iyang kinabuhi sa pag-alagad sa Diyos. Siya nag-alagad na karon sa usa sa mga sangang buhatan sa mga Saksi ni Jehova. Sama kang Arthur ug sa milyonmilyon pang uban, apan dili sama sa dato nga batan-ong magmamando, ikaw makahimo usab ug desisyon nga makahatag kanimog dakong kalipay—ang pagdawat sa imbitasyon ni Jesus nga mahimong iyang sumusunod.

[Hulagway sa panid 6]

Ang imong desisyon sa pagtabang sa uban dako gayod ug epekto kanila

[Hulagway sa panid 7]

Motuon ka ba sa Bibliya ug mahimong sumusunod ni Jesus?