Mga Pangutana Gikan sa mga Magbabasa

Sayop ba ang pagpatuo ni Jacob nga siya si Esau, sumala sa giingon sa Genesis 27:18, 19?

Lagmit sinati ka niining asoya. Sa dihang tigulang na si Isaac, iyang gisugo si Esau sa pagpangayam, nga nag-ingon: “Pakan-a ako, aron ang akong kalag magpanalangin kanimo sa dili pa ako mamatay.” Kay nadunggan ni Rebeca ang gisulti sa iyang bana, nagluto siya ug lamiang pagkaon ug iyang gisugo si Jacob: “Dad-on mo [ang pagkaon] sa imong amahan ug siya mokaon niini, aron siya magpanalangin kanimo sa dili pa ang iyang kamatayon.” Busa gipasul-ob ni Rebeca kang Jacob ang besti ni Esau ug iyang gibutangan usab ug panit sa nating kanding ang kamot ug liog niini. Dayon, gidala ni Jacob ang lamiang pagkaon ngadto sa iyang amahan. Sa dihang gipangutana siya ni Isaac, “Kinsa ka man, anak ko?” Si Jacob mitubag: “Ako si Esau nga imong panganay.” Si Isaac mituo kaniya ug iyang gipanalanginan siya.—Genesis 27:1-29.

Ang Bibliya wala maghatag sa tanang detalye kon nganong gibuhat kini ni Rebeca ug Jacob, apan atong masabtan nga wala nila kini planohang daan. Angay natong tagdon nga wala uyoni o sawaya sa Pulong sa Diyos ang gihimo ni Rebeca ug Jacob, busa dili kini basehanan nga puwede rang mamakak o manglimbong. Apan, ang Bibliya naghatag ug impormasyon bahin sa nahitabo.

Una, ang asoy nagpakita nga si Jacob takos nga modawat sa panalangin sa iyang amahan. Si Esau dili takos niana kay iya nang gibaligya ang iyang pagkapanganay sa iyang kaluha nga si Jacob. Wala siyay pagpabili niini kay iya lang kining gibaylo sa pagkaon aron sa pagtagbaw sa iyang kagutom. “Gitamay ni Esau ang katungod sa pagkapanganay.” (Genesis 25:29-34) Busa, sa dihang miduol si Jacob sa iyang amahan, siya nangayo sa panalangin nga para gayod kaniya.

Ikaduha, sa dihang nahibaloan ni Isaac nga kang Jacob diay niya gihatag ang panalangin, wala niya kini bakwia. Lagmit nahinumdom siya nga sa wala pa matawo ang kaluha, si Jehova miingon kang Rebeca: “Ang magulang mag-alagad sa manghod.” (Genesis 25:23) Maayong tagdon usab nga sa dihang molakaway na si Jacob paingon sa Haran, gipanalanginan pa siya ni Isaac.—Genesis 28:1-4.

Labaw sa tanan, angayng hinumdoman nga si Jehova nahibalo ug interesado sa maong panghitabo. Ang panalangin nga gihatag ni Isaac kang Jacob nalangkit sa saad sa Diyos kang Abraham. (Genesis 12:2, 3) Kon dili pa gusto sa Diyos nga si Jacob ang makadawat sa panalangin, mibabag unta siya. Hinunoa, gisubli ni Jehova ang maong panalangin kang Jacob: “Pinaagi sa imong binhi ang tanang banay sa yuta tinong magapanalangin sa ilang kaugalingon.”—Genesis 28:10-15.