Pagpangagpas sa Katuyoan sa Diyos Karon

“[Si Kristo] namatay alang sa tanan aron sila nga nagakinabuhi magkinabuhi dili na alang sa ilang kaugalingon.”—2 CORINTO 5:15.

1. Iasoy ang eksperyensiya sa usa ka misyonaryo diha sa iyang teritoryo.

 “ANG among awto mao ang unang sakyanan sa sibilyan nga nakasulod sa hilit nga baryo sa Aprika pagkahuman sa giyera sibil,” nahinumdom ang usa ka misyonaryo nga ginganlag Aaron. a “Wala na mi kontak sa gamay nga kongregasyon didto, ug kinahanglang atimanon namo ang mga panginahanglan sa mga igsoon. Gawas pa sa pagkaon, besti, ug literatura sa Bibliya, nagdala kami ug kopya sa video nga Jehovah’s Witnesses—The Organization Behind the Name. b Nagpanon ang mga tawo nga gustong motan-aw niana diha sa minaomao nga sinehan sa baryo—usa ka payag nga adunay VHS ug TV—mao nga kaduha namo kini gipasalida. Daghan ang nagtuon sa Bibliya human makakita sa maong video. Wala gayod makawang ang among mga paningkamot.”

2. (a) Nganong ang mga Kristohanon nakahukom sa paggamit sa ilang kinabuhi sa pag-alagad sa Diyos? (b) Unsang mga pangutana ang atong konsiderahon karon?

² Nganong si Aaron ug ang iyang mga kauban mihimo man nianang hago ug malisod nga buluhaton? Tungod kay, agig pasalamat sa halad lukat ni Jesu-Kristo, ilang gipahinungod ang ilang kinabuhi sa Diyos ug buot nilang gamiton kana kaharmonya sa katuyoan sa Diyos. Sama kanila, ang tanang dedikadong mga Kristohanon nakahukom nga “magkinabuhi dili na alang sa ilang kaugalingon” kondili sa pagbuhat sa ilang maarangan alang sa “maayong balita.” (2 Corinto 5:15; 1 Corinto 9:23) Nahibalo sila nga sa dihang matapos na kining sistemaha sa mga butang, ang tanang salapi ug kadungganan niining kalibotana wala na unyay pulos. Busa, buot nilang gamiton ang ilang kinabuhi sa pag-alagad sa Diyos. (Ecclesiastes 12:1) Sa unsang paagi atong mahimo kini? Sa unsang paagi atong mabatonan ang gikinahanglang kaisog ug kusog sa pagbuhat niana? Unsang mga kahigayonan sa pag-alagad ang bukas kanato?

Paghimog Progresibo ug Praktikal nga mga Lakang

3. Unsang paninugdang mga lakang ang nalangkit sa pagbuhat sa kabubut-on sa Diyos?

³ Alang sa matuod nga mga Kristohanon, ang pagbuhat sa kabubut-on sa Diyos maoy tibuok-kinabuhi nga buluhaton. Kasagaran, magsugod kini sa paninugdang mga lakang sama sa pagpalista sa Teokratikanhong Tunghaan sa Ministeryo, pagbasa sa Bibliya adlaw-adlaw, pagpakigbahin sa buluhatong pagsangyaw, ug paghimog mga kausaban aron mabawtismohan. Samtang nag-uswag kita, atong hinumdoman ang giingon ni apostol Pablo: “Palandonga kining mga butanga; hatagi kinig bug-os nga pagtagad, aron ang imong pag-uswag madayag sa tanan nga mga tawo.” (1 Timoteo 4:15) Ang maong pag-uswag himoon, dili sa paghimaya sa atong kaugalingon, kondili aron sa pagpakita sa atong determinasyon nga buhaton ang kabubut-on sa Diyos sa paagi nga dili mahakogon. Ang pagbuhat niana nagpakita nga atong gitugotan ang Diyos sa paggiya sa tanang bahin sa atong kinabuhi, ug makahimo gayod siya niana labaw kay kanato.—Salmo 32:8.

4. Sa unsang paagi mabuntog nato ang dili angay nga kabalaka?

⁴ Apan, ang pagpanuko o sobrang pagkabalaka sa kaugalingon makababag sa atong pag-uswag diha sa pag-alagad sa Diyos. (Ecclesiastes 11:4) Busa, aron atong matagamtam ang tinuod nga kalipay sa pag-alagad sa Diyos ug sa uban, kinahanglang buntogon una nato ang atong mga kabalaka. Pananglitan, si Erik nagplanong mag-alagad sa kongregasyon nga langyaw ug pinulongan.  Apan nabalaka siya: ‘Makauyon kaha sila nako? Magustohan kaha nako ang mga igsoon? Ganahan kaha sila nako?” Siya miasoy: “Sa ngadtongadto akong naamgohan nga kinahanglang hunahunaon nako ang mga igsoon imbes ang akong kaugalingon. Nakahukom ko nga dili na mabalaka niining mga butanga ug buhaton kon unsay akong maarangan sa pagtabang sa uban. Nag-ampo ko alang sa tabang ug midayon ko pagbalhin. Sa pagkakaron, malipayon kaayo ko sa akong pag-alagad didto.” (Roma 4:20) Sa pagkatinuod, kon mas dako ang panahon nga atong igugol sa pag-alagad sa Diyos ug sa uban, mas dako usab ang atong kalipay ug katagbawan.

5. Nganong gikinahanglan ang maayong pagplano diha sa atong pagpangagpas sa katuyoan sa Diyos? Iilustrar.

⁵ Aron molampos kita sa pagpangagpas sa katuyoan sa Diyos, kinahanglan usab nga planohon nato pag-ayo ang atong mga kalihokan. Maalamon nga dili kita magsigeg pangutang kay basig magumon kita niini ug mababagan na hinuon ang atong pag-alagad sa Diyos. Gipahinumdoman kita sa Bibliya: “Ang manghuhulam maoy sulugoon sa tawo nga nagapahulam.” (Proverbio 22:7) Ang pagsalig kang Jehova ug pag-una sa espirituwal nga mga butang motabang kanato sa pagkab-ot sa atong tumong. Pananglitan, si Guoming ug ang iyang duha ka igsoong babaye nagpuyo uban sa ilang inahan diha sa lugar nga mahal kaayo ang abangan sa balay ug lisod ang pagpangita ug permanenteng trabaho. Pinaagi sa pagdaginot ug pagtinabangay sa mga galastohan, nakabaton gihapon sila sa ilang mga panginahanglan, bisan pag dili tanan ang may trabaho. “Usahay, ang uban kanamo way trabaho,” miingon si Guoming. “Bisan pa niana, kami nakapadayon sa pagpayunir ug nakaatiman sa among inahan. Mapasalamaton kami nga dili buot ni Mama nga moundang mi pagpayunir aron lang matagan-an namo siya sa mga luho sa kinabuhi.”—2 Corinto 12:14; Hebreohanon 13:5.

6. Unsang panig-ingnan ang nagpakita nga mahimong ipahiuyon nato ang atong kinabuhi sa katuyoan sa Diyos?

⁶ Kon nalinga ka pag-ayo sa sekular nga mga kalihokan—sa pagpanginabuhi man o sa ubang butang—ang pag-una sa katuyoan sa Diyos mahimong magkinahanglan ug dagkong mga kausaban. Ang maong mga kausaban dili daling himoon, ug kon kita masipyat sa sinugdan, wala kana magpasabot nga wala na kitay paglaom. Tagda si Koichi, kinsa naggugol ug daghan kaayong panahon sa paglingawlingaw. Si Koichi nagtuon sa Bibliya sa tin-edyer pa siya, apan sulod sa daghang katuigan, nagiyan siya sa mga dula sa video (video game). Usa niana ka adlaw gisukmatan ni Koichi ang iyang kaugalingon: ‘Naunsa man ka? Kapin ka na sa 30 anyos, unya wala gihapon kay nahimo sa imong kinabuhi!’ Si Koichi nagtuon pag-usab sa Bibliya ug nakadawat ug tabang gikan sa kongregasyon. Bisan tuod inanay ang iyang nahimong kausaban, wala gayod siya molunga. Pinaagi sa makanunayong pag-ampo ug mahigugmaong pagpaluyo sa uban, sa kadugayan nabuntog ra niya ang iyang pagkagiyan sa maong mga dula. (Lucas 11:9) Sa pagkakaron, si Koichi malipayong nag-alagad ingong ministeryal sa kongregasyon.

Kat-oni ang Pagkahimong Timbang

7. Nganong angay kitang magmatimbang sa atong pag-alagad sa Diyos?

⁷ Ang pagpangagpas sa katuyoan sa Diyos takos gayod sa atong tibuok-kalag nga paningkamot. Dili gayod kita maghinayhinay o kaha magtinapolan sa pagbuhat sa kabubut-on sa Diyos. (Hebreohanon 6:11, 12) Bisan pa niana, dili buot ni Jehova nga atong pasobraan ang atong pagpanglimbasog nga mabug-atan na hinuon kita sa pisikal, mental, o emosyonal. Ang mapainubsanong pag-ila nga dili nato mapalampos ang buluhaton sa Diyos pinaagi sa atong kaugalingong kusog maghimaya kaniya ug magpakita usab sa atong pagkatimbang. (1 Pedro 4:11) Si Jehova nagsaad nga ihatag niya kanato ang gikinahanglang kusog sa pagbuhat sa iyang kabubut-on, apan dili nato pugson ang atong kaugalingon sa paghimo sa mga butang nga dili nato maarangan, nga maningkamot sa pagbuhat ug labaw sa iyang gidahom kanato. (2 Corinto 4:7) Aron makapadayon kita sa pag-alagad sa Diyos nga dili maluya, kinahanglang gamiton nato ang atong kusog sa maalamong paagi.

8. Unsay nahitabo sa dihang gidungan sa usa ka batan-ong Kristohanon ang makapupos-sa-panahon nga trabaho ug ang bug-os-panahong pag-alagad, ug unsang kausaban ang iyang gihimo?

⁸ Pananglitan, sulod sa duha ka tuig si Ji Hye, nga nagpuyo sa Sidlakang Asia, adunay makapupos-sa-panahon nga trabaho. “Gipaningkamotan nako nga dunganon ang bug-os-panahong pag-alagad  ug ang makapupos-sa-panahon nga trabaho,” miasoy siya, “apan lima ka oras na lang ang akong kinatulgan kada gabii.” Sa ngadtongadto, kapoy na kaayo ko nga wala na koy ganang magtuon, ug wala na ko magmalipayon sa akong pag-alagad sa Diyos.” Aron makaalagad kang Jehova uban sa iyang ‘tibuok kasingkasing, kalag, hunahuna, ug kusog,’ si Ji Hye nangitag trabaho nga dili makapupos sa panahon. (Marcos 12:30) “Bisan pag gipugos ko sa among pamilya sa pagpangitag dakog-suweldo nga trabaho, ako naningkamot nga unahon ang kabubut-on sa Diyos,” miingon siya. “Sa pagkakaron ang akong suweldo makasapal gihapon sa akong mga galastohan. Pananglitan, makapalit gihapon kog desenteng mga sinina. Taas-taas na pod kog kinatulgan karon! Malipayon ako sa akong ministeryo ug mas lig-on ako sa espirituwal tungod kay wala na kaayo ko maladlad sa makapadani ug makapalinga nga mga butang sa kalibotan.”—Ecclesiastes 4:6; Mateo 6:24, 28-30.

9. Unsay mahimong epekto sa atong paningkamot diha sa mga tawo sa atong teritoryo?

⁹ Dili tanan ang makaalagad sa Diyos nga bug-os-panahon. Kon ikaw nagsagubang sa katigulangon, dili-maayong panglawas, o uban pang mga kababagan, hinumdomi nga si Jehova nagpabili gayod sa imong pagkamatinumanon ug sa bisan unsang tibuok-kasingkasing nga pag-alagad nga imong maarangan. (Lucas 21: 2, 3) Busa, dili nato angayng pakamenoson ang epekto sa atong mga paningkamot nganha sa uban, bisan pag diyutay ra ang atong mahimo. Pananglitan, ibutang ta nga kita namalaybalay ug wala kitay nakaplagan nga interesado. Pagbiya nato, basin maestoryahan sa mga tagbalay ang atong pagduaw, bisag walay miabli sa pultahan pagtuktok nato! Dili kita makadahom nga mosanong ang tanan sa dala natong maayong balita, apan aduna gayoy pipila nga modawat niana. (Mateo 13:19-23) Ang uban tingali mosanong ra sa ulahi sa dihang mausab ang kahimtang sa kalibotan o sa ilang kinabuhi. Mosanong man sila o dili, kon atong buhaton ang atong maarangan diha sa ministeryo, atong ginabuhat ang buluhaton sa Diyos. Kita “mga isigkamagbubuhat sa Diyos.”—1 Corinto 3:9.

10. Unsang mga kahigayonan ang bukas sa tanan diha sa kongregasyon?

¹⁰ Dugang pa, kitang tanan makatabang sa atong pamilya ug sa mga igsoon sa kongregasyon. (Galacia 6:10) Mahimong dako ug dumalayon ang epekto niini kanila. (Ecclesiastes 11:1, 6) Kon ang mga ansiyano ug ministeryal nga mga alagad makugihong magtuman sa ilang mga katungdanan, sila makatabang sa mga igsoon nga molig-on sa espirituwal ug mahimong mas masiboton sa atong Kristohanong buluhaton. Gipasaligan  kita nga kon kita “kanunayng puliki diha sa buluhaton sa Ginoo,” ang atong paghago “dili makawang.”—1 Corinto 15:58.

Mga Paagi sa Pagpangagpas sa Katuyoan sa Diyos

11. Gawas pa sa pag-alagad diha sa atong kongregasyon, unsang ubang kahigayonan ang bukas kanato?

¹¹ Ingong mga Kristohanon, kita gustong mabuhi, ug buot natong himayaon ang Diyos bisan unsay atong ginabuhat. (1 Corinto 10:31) Kon kita matinumanong magsangyaw sa maayong balita sa Gingharian ug magtudlo sa uban sa pagtuman sa tanang butang nga gisugo ni Jesus, mahimong bukas kanato ang daghang paagi sa pag-alagad sa Diyos nga makahatag kanatog kalipay. (Mateo 24:14; 28:19, 20) Gawas pa sa pag-alagad diha sa atong kongregasyon, basin may kahigayonan nga makaalagad kita diin mas dako ang panginahanglan, sa lain mang teritoryo, pinulongan, o nasod. Ang kuwalipikadong mga ansiyano ug ministeryal nga mga alagad nga dili minyo mahimong dapiton sa pagtambong sa Tunghaan sa Ministeryal nga Pagbansay, ug human niana mag-alagad sa mga kongregasyon diin gikinahanglan ang tabang sa hamtong nga mga Kristohanon, diha sa ilang nasod o sa langyawng teritoryo. Ang mga magtiayon nga anaa sa bug-os-panahong pag-alagad mahimong mokuwalipikar nga bansayon sa Gilead ingong mga misyonaryo ug mag-alagad sa laing nasod. Dugang pa, adunay padayong panginahanglan sa mga boluntaryo nga mohimo sa lainlaing buluhaton sa Bethel ug sa pagpanukod ug pagmentinar sa mga tigomanan ug sangang buhatan.

12, 13. (a) Unsay makatabang kanimo sa pagdesisyon kon unsang matanga sa pag-alagad ang imong pangagpason? (b) Ipatin-aw kon sa unsang paagi ang eksperyensiya nga mabatonan diha sa usa ka asaynment magamit diha sa lain.

¹² Unsang matanga sa pag-alagad ang imong pangagpason? Ingong dedikadong alagad ni Jehova, pangayoa ang iyang pagtultol ug ang direksiyon sa iyang organisasyon. Ang iyang “maayong espiritu” motabang kanimo sa paghimog hustong desisyon. (Nehemias 9:20) Kasagaran, ang usa ka asaynment motultol ngadto sa lain pang asaynment, ug ang eksperyensiya ug kahanas nga atong nabatonan sa usa ka matang sa pag-alagad mahimong magamit sa lain usab nga asaynment.

¹³ Pananglitan, si Dennis ug ang iyang asawa nga si Jenny kanunayng moboluntaryo sa pagpanukod ug mga Kingdom Hall. Human mohapak ang Bagyong Katrina sa habagatang Tinipong Bansa, sila miboluntaryo sa pagtabang niadtong nanginahanglan. Si Dennis nagtaho: “Gikalipay namog dako ang paggamit sa kahanas nga among nakamaohan sa pagpanukod ug mga Kingdom Hall aron sa pagtabang sa among mga igsoon. Natandog gayod ang among kasingkasing sa gipakitang apresasyon niadtong among natabangan. Kadaghanan  sa ubang mga grupo nga mitabang diyutay rag nahimo. Apan ang mga Saksi ni Jehova nakaayo o nakatukod na ug kapin sa 5,300 ka balay ug daghan kaayong Kingdom Hall. Naobserbahan kini sa mga tawo ug karon sila mas interesado na sa among mensahe.”

14. Unsay imong mahimo kon ikaw nagtinguha sa pagsulod sa bug-os-panahong ministeryo?

¹⁴ Makapangagpas ka ba sa katuyoan sa Diyos pinaagi sa pagsulod sa bug-os-panahong ministeryo? Kon mao, makadawat ka gayod ug daghang panalangin. Kon dili kini itugot sa imong kahimtang karon, tingali makahimo kag mga kausaban. Pag-ampo sama kang Nehemias sa dihang nangandoy siya sa pagbuhat sa usa ka hinungdanong asaynment: “Ah, Jehova, palihog, . . . ihatag ang kalamposan sa imong alagad.” (Nehemias 1:11) Unya, nga may pagsalig sa “Tigpatalinghog sa pag-ampo,” lihok uyon sa imong giampo. (Salmo 65:2) Aron panalanginan ni Jehova ang imong mga paningkamot sa pag-alagad kaniya nga mas bug-os pa, kinahanglang himoon una nimo ang maong mga paningkamot. Sa dihang nakahukom ka na sa pagsulod sa bug-os-panahong ministeryo, pabilin sa maong desisyon. Paglabay sa panahon, mahimo kang mas eksperyensiyado ug mas malipayon.

Mapuslanon Gayod nga Kinabuhi

15. (a) Sa unsang paagi kita makabatog kaayohan sa pagpakigsulti ug pagbasa sa sugilanon sa dugay nang mga alagad sa Diyos? (b) Paghisgot ug usa ka sugilanon sa kinabuhi nga ilabinang nakapadasig kanimo.

¹⁵ Unsay imong madahom kon mangagpas ka sa katuyoan sa Diyos? Pakigsulti sa dugay nang mga alagad ni Jehova, ilabina kadtong nakagugol na ug daghang katuigan sa bug-os-panahong ministeryo. Sa walay duhaduha, makapatagbaw gayod ang ilang kinabuhi! (Proverbio 10:22) Suginlan ka nila nga si Jehova wala gayod mapakyas sa pagtagana sa ilang mga panginahanglan bisan sa malisod nga kahimtang ug labaw pa gani niana ang ilang nadawat. (Filipos 4:11-13) Gikan sa 1955 ngadto sa 1961, ang The Watchtower nagpatik ug serye sa mga sugilanon sa kinabuhi sa matinumanong mga igsoon ilalom sa ulohang “Pursuing My Purpose in Life” (Pagpangagpas sa Akong Tumong sa Kinabuhi). Sukad niadto, gatosan pa ka sugilanon sa kinabuhi ang napatik. Ang matag sugilanon nagpakita sa kasibot ug kalipay nga magpahinumdom kanato nianang mabasa nato sa Bibliya, sa basahon sa Buhat. Ang pagbasa nianang makapadasig nga mga sugilanon mag-aghat kanato sa pag-ingon, ‘Mao kanay akong gusto nga kinabuhi!’

16. Unsay makapahimo sa kinabuhi sa usa ka Kristohanon nga makapatagbaw ug malipayon?

¹⁶ Si Aaron nga gihisgotan sa sinugdan, nahinumdom: “Sa Aprika, subsob akong makahibalag ug mga batan-on nga nahadiindiin na lang sa pagpangita sa katuyoan sa kinabuhi. Kadaghanan kanila wala gayod makakaplag niana. Apan kami ania dinhi aron sa pagbuhat sa katuyoan sa Diyos pinaagi sa pagsangyaw sa maayong balita sa Gingharian, ug among natagamtam ang makaiikag ug makapatagbawng kinabuhi. Among naeksperyensiyahan mismo nga adunay mas dakong kalipay sa paghatag kay sa pagdawat.”—Buhat 20:35.

17. Nganong angay kitang mangagpas sa katuyoan sa Diyos karon?

¹⁷ Komosta sa imong bahin? Unsang tumong ang imong ginapangagpas? Kon wala kay espesipikong mga tumong, mahurot ang imong panahon ug kusog sa ubang mga butang. Nganong usikan man nimo ang imong bililhong kinabuhi sa pagpangagpas sa mga butang nga gitanyag sa kalibotan ni Satanas? Sa dili madugay mobundak na ang “dakong kasakitan,” ug ang materyal nga mga butang ug mga posisyon nga gitanyag niining kalibotana wala na unyay kapuslanan. Ang hinungdanon mao gayod ang atong relasyon kang Jehova. Pagkamapasalamaton unya nato nga kita nag-alagad sa Diyos ug sa uban ug bug-os nga nangagpas sa katuyoan sa Diyos diha sa atong kinabuhi!—Mateo 24:21; Pinadayag 7:14, 15.

[Mga footnote]

Makapatin-aw Ka Ba?

• Unsay pagbati ni Jehova sa atong pag-alagad kaniya?

• Sa unsang paagi ang pagkahimong praktikal ug timbang motabang kanato sa pag-alagad sa Diyos ug sa uban?

• Unsang mga kahigayonan ang bukas kanato?

• Sa unsang paagi mabatonan nato karon ang makapatagbaw nga kinabuhi?

[Mga Pangutana sa Pagtuon]

[Mga hulagway sa panid 23]

Gikinahanglan ang pagkatimbang aron makapadayon kita sa pag-alagad kang Jehova nga tibuok kalag

[Mga hulagway sa panid 24]

Adunay daghang matang sa sagradong pag-alagad