Pagpangita sa Tinuod nga Katuyoan sa Kinabuhi
Pagpangita sa Tinuod nga Katuyoan sa Kinabuhi
“Ang tanang may gininhawa—ipadayeg si Jah.”—SALMO 150:6.
1. Hubita kon giunsa pagpangita sa usa ka batan-ong lalaki ang katuyoan sa kinabuhi.
“AKO nagtuon ug medisina tungod kay gusto nakong gamiton ang akong kinabuhi sa pagtabang sa mga tawo. Nagtuo sab ko nga kon madoktor na ko, ako magmalipayon tungod kay ako mainila na ug masapian usab,” matod pa ni Seung Jin, nga nagdako sa Korea. a “Sa dihang akong naamgohan nga gamay ra diay ang ikatabang sa mga doktor sa panginahanglan sa tawo, ako nahigawad. Dayon nagtuon ako sa pagkapintor, apan ang akong mga dibuho wala kaayo makahatag ug kaayohan sa uban, ug akong gibati nga kaugalingon ra nako ang akong gihunahuna kay ako ra may nalipay sa akong gibuhat. Busa nagtuon ako sa pagkamagtutudlo. Apan sa wala madugay akong naamgohan nga igo lang kong nagpasa ug impormasyon kay wala man ko makahatag ug giya nga mosangpot sa tinuod nga kalipay.” Sama sa daghan pa, si Seung Jin nangita sa tinuod nga katuyoan sa kinabuhi.
2. (a) Unsay gikinahanglan aron makaplagan ang katuyoan sa kinabuhi? (b) Giunsa nato pagkahibalo nga ang Maglalalang adunay katuyoan sa pagbutang kanato dinhi sa yuta?
2 Aron makaplagan ang tinuod nga katuyoan sa kinabuhi, kinahanglan nga kita adunay katarongan nga mabuhi, klarong tumong, ug gipahinungdan sa atong mga paningkamot. Posible bang makaplagan sa mga tawo ang maong katuyoan? Oo! Sanglit gihatagan man kita sa Maglalalang ug intelihensiya, tanlag, ug katakos sa pagpangatarongan, aduna gayod siyay maayong katuyoan sa pagbutang kanato dinhi sa yuta. Busa, atong makaplagan ug matuman ang tinuod nga katuyoan sa kinabuhi pinaagi lamang sa pagkinabuhi nga kaharmonya sa katuyoan sa Maglalalang.
3. Unsay nalangkit sa katuyoan sa Diyos alang sa katawhan?
3 Gipakita sa Bibliya nga ang katuyoan sa Diyos alang kanato naglangkit ug daghang butang. Pananglitan, ang kahibulongang pagkalalang kanato pamatuod gayod sa dakong gugma sa Diyos. (Salmo 40:5; 139:14) Busa, ang pagkinabuhi uyon sa katuyoan sa Diyos nagpasabot nga atong higugmaon ang uban sama sa paghigugma sa Diyos kanato. (1 Juan 4:7-11) Kini nagpasabot usab nga atong tumanon ang mga sugo sa Diyos, nga motabang kanato sa pagkinabuhi nga kaharmonya sa iyang mahigugmaong katuyoan.—Ecclesiastes 12:13; 1 Juan 5:3.
4. (a) Unsay gikinahanglang buhaton aron makaplagan ang tinuod nga katuyoan sa kinabuhi? (b) Unsa ang labing hamili nga katuyoan nga mahimong pangagpason ni bisan kinsa?
4 Katuyoan usab sa Diyos nga ang mga tawo magkinabuhing malipayon ug malinawon uban sa usag usa ug uban sa mga mananap. (Genesis 1:26; 2:15) Apan, unsay atong kinahanglang buhaton aron magmalipayon, mobating luwas, ug may kalinaw sa hunahuna? Ang usa ka bata magmalipayon ug mobating luwas kon siya anaa sa kiliran sa iyang mga ginikanan. Sa samang paagi, atong makaplagan ang tinuod nga kahulogan ug katuyoan sa kinabuhi kon kita adunay maayong relasyon sa atong langitnong Amahan. (Hebreohanon 12:9) Gipaposible sa Diyos ang maong relasyon pinaagi sa pagtugot kanato nga makigsuod kaniya ug pinaagi sa pagpatalinghog niya sa atong mga pag-ampo. (Santiago 4:8; 1 Juan 5:14, 15) Kon kita ‘magalakaw uban sa Diyos’ diha sa pagtuo ug mahimong iyang mga higala, atong mapalipay ug madayeg ang atong langitnong Amahan. (Genesis 6:9; Proverbio 23:15, 16; Santiago 2:23) Mao kana ang labing hamili nga katuyoan nga mahimong pangagpason ni bisan kinsa. Ang salmista misulat: “Ang tanang may gininhawa—ipadayeg si Jah.”—Salmo 150:6.
Unsay Imong Katuyoan sa Kinabuhi?
5. Nganong dili maalamon ang pag-una sa materyal nga mga butang?
5 Ang pag-atiman sa atong kaugalingon ug sa atong pamilya maoy bahin sa katuyoan sa Diyos kanato. Kini naglakip sa pagtagana sa pisikal ug espirituwal nga mga panginahanglan. Apan, kinahanglang magmatimbang sa pagbuhat niini aron dili masapawan sa sekular nga mga kalihokan ang espirituwal nga mga butang nga maoy labing importante. (Mateo 4:4; 6:33) Ikasubo nga daghang tawo ang naggugol sa ilang kinabuhi diha lamang sa pagpangitag materyal nga mga butang. Bisan pa niana, dili maalamon ang pagtagbaw sa atong mga panginahanglan pinaagi lamang sa pagbaton ug materyal nga mga butang. Ang usa ka di pa dugayng surbi bahin sa mga milyonaryo sa Asia nagpadayag nga daghan kanila ang “mibati nga sila walay kasegurohan ug walay kalinaw sa hunahuna, bisan pag sila inila ug nagmalamposon tungod sa ilang bahandi.”—Ecclesiastes 5:11.
6. Unsang tambag ang gihatag ni Jesus maylabot sa pagpangagpas ug mga bahandi?
6 Si Jesus naghisgot bahin sa “malimbongong gahom sa mga bahandi.” (Marcos 4:19) Sa unsang paagi malimbongon ang bahandi? Kini daw makalipay sa tawo, apan sa tinuoray dili diay. May labot niini, miingon ang usa ka maalamong hari nga si Solomon: “Ang mahigugmaon lamang sa salapi dili matagbaw sa salapi.” (Ecclesiastes 5:10) Apan mahimo bang dunganon ang pagpangagpas sa materyal nga mga butang ug ang bug-os-kalag nga pag-alagad sa Diyos? Dili gayod. Si Jesus nagpatin-aw: “Walay usa nga mahimong ulipon sa duha ka agalon; kay mahimong dumtan niya ang usa ug higugmaon ang lain, o unongan niya ang usa ug tamayon ang lain. Dili kamo mahimong ulipon sa Diyos ug sa Bahandi.” Gitambagan ni Jesus ang iyang mga sumusunod nga dili magtigom ug mga bahandi sa yuta, kondili magtigom hinuon ug ‘mga bahandi sa langit,’ sa ato pa, magbaton ug maayong ngalan atubangan sa Diyos, kinsa “nahibalo sa mga butang nga inyong gikinahanglan sa wala pa gani kamo mangayo kaniya.”—Mateo 6:8, 19-25.
7. Sa unsang paagi kita “makapangupot pag-ayo sa tinuod nga kinabuhi”?
7 Diha sa sulat ni apostol Pablo sa iyang isigka-magbubuhat nga si Timoteo, naghatag siya ug bug-at nga tambag niining bahina. Iyang giingnan si Timoteo: “Sugoa ang mga dato . . . [nga] magbutang sa ilang paglaom, dili sa walay-kasegurohang bahandi, kondili sa Diyos, nga dagayang naghatag kanato sa tanang butang aron atong pagakalipayan. . . , nga magmahinatagon, andam sa pagpaambit, nga maampingong magtipig alang sa ilang kaugalingon ug usa ka maayong patukoranan alang sa umalabot, aron sila makapangupot pag-ayo sa tinuod nga kinabuhi.”—1 Timoteo 6:17-19.
Unsa ang “Tinuod nga Kinabuhi”?
8. (a) Nganong daghan ang nanglimbasog nga mahimong dato ug inila? (b) Unsa may wala nila hunahunaa?
8 Alang sa kadaghanang tawo, ang “tinuod nga kinabuhi” nagpasabot ug kinabuhi nga puno sa mga luho ug paglipaylipay. Ang usa ka magasin sa Asia nag-ingon: “Kadtong hinan-awg sine o TV mangandoy nga unta mabatonan nila ang mga butang nga ilang nakita.” Para sa daghan, ang pagkahimong dato ug inila mao ang ilang katuyoan sa kinabuhi. Gisakripisyo sa daghan ang ilang pagkabatan-on, panglawas, pamilya, ug espirituwal nga mga prinsipyo aron lang mabatonan kanang mga butanga. Maihap lang ang mga tawo nga naghunahuna nga ang ilang nakita diha sa mga salida nagbanaag sa “espiritu sa kalibotan”—ang tinamdan nga nag-impluwensiya sa kadaghanan sa mga tawo ug nagtukmod kanila sa pagsupak sa katuyoan sa Diyos kanato. (1 Corinto 2:12; Efeso 2:2) Bantog ra nga daghan kaayo ang dili malipayon karon!—Proverbio 18:11; 23:4, 5.
9. Unsa may dili gayod mahimo sa tawo, ug ngano?
9 Komosta kadtong naghago pag-ayo alang sa kaayohan sa uban, nga naningkamot sa pagwagtang sa gutom, sakit, ug inhustisya? Dalayegon gayod ang ilang mga buhat ug mga pagsakripisyo tungod kay sagad dako kinig nahatag nga kaayohan sa mga tawo. Apan, bisan pa sa ilang paningkamot, dili gayod nila mabag-o kining sistemaha sa mga butang. Ngano man? Tungod kay “ang tibuok kalibotan nailalom sa gahom sa usa nga daotan”—si Satanas—ug dili niya buot nga mabag-o kini.—1 Juan 5:19.
10. Kanus-a matagamtam sa mga matinumanon ang “tinuod nga kinabuhi”?
10 Pagkamakapasubo ang pagkinabuhi niining kalibotana kon kita walay paglaom! “Kon niining kinabuhia lamang kita naglaom diha kang Kristo, sa tanang tawo kita ang labing angayng pagakaluy-an,” misulat si Pablo. Kadtong nagtuo nga mao lamang kini ang kinabuhi nagsagop sa tinamdan nga “mangaon kita ug manginom, kay ugma kita mangamatay.” (1 Corinto 15:19, 32) Apan adunay maayong kaugmaon, usa ka ‘bag-ong mga langit ug usa ka bag-ong yuta nga atong ginapaabot sumala sa saad sa Diyos, ug niini magpuyo ang pagkamatarong.’ (2 Pedro 3:13) Nianang panahona, ang mga Kristohanon makatagamtam sa “tinuod nga kinabuhi,” nga mao ang “kinabuhing walay kataposan” diha sa kahingpitan, sa langit man o sa yuta ilalom sa mahigugmaong pagmando sa Gingharian sa Diyos!—1 Timoteo 6:12.
11. Nganong ang pagpaningkamot sa pagpauswag sa intereses sa Gingharian sa Diyos mao ang kinamaayohang tumong?
11 Ang Gingharian sa Diyos lamang ang bug-os nga makasulbad sa mga suliran sa katawhan. Busa, ang pagpaningkamot sa pagpauswag sa intereses sa Gingharian sa Diyos mao ang kinamaayohang tumong nga mahimong pangagpason ni bisan kinsa. (Juan 4:34) Samtang makigbahin kita nianang buluhatona, atong matagamtam ang maayong relasyon uban sa atong langitnong Amahan. Mabatonan usab nato ang kalipay gumikan sa pag-alagad duyog sa milyonmilyong igsoon sa pagtuo nga nangagpas sa samang tumong sa kinabuhi.
Paghimog Hustong mga Pagsakripisyo
12. Unsay kalainan sa kinabuhi niining presenteng sistema ug sa “tinuod nga kinabuhi”?
12 Ang presenteng kalibotan “nagakahanaw ingon man ang tinguha niini,” nag-ingon ang Bibliya. Ang kalibotan ni Satanas lakip na ang kabantog ug bahandi niini mahanaw gayod, “apan siya nga nagabuhat sa kabubut-on sa Diyos magpabilin hangtod sa kahangtoran.” (1 Juan 2:15-17) Kasukwahi sa walay-kasegurohang mga bahandi, sa lumalabay nga kabantog, ug sa mabaw nga kalipay sa presenteng sistema, “ang tinuod nga kinabuhi”—kinabuhing walay kataposan ilalom sa Gingharian sa Diyos—dumalayon ug takos sa atong pagsakripisyo, kon kita mohimog hustong mga sakripisyo.
13. Unsang hustong mga sakripisyo ang gihimo sa usa ka magtiayon?
13 Tagda pananglitan si Henry ug Suzanne. Sila nagtuo gayod sa saad sa Diyos nga ang tanan nga mangita pag-una sa Gingharian Iyang tabangan. (Mateo 6:33) Busa, gipalabi nila nga magpuyo sa dili-mahalon nga balay aron dili na kinahanglan nga silang duha ang manarbaho ug aron makagugol silag mas taas nga panahon sa espirituwal nga mga kalihokan uban sa ilang duha ka anak nga babaye. (Hebreohanon 13:15, 16) Ang usa ka maayog-tuyo nga higala wala makasabot sa ilang desisyon. Iyang giingnan si Suzanne: “Day, kon buot gayod nimong magpuyo sa mas nindot nga balay, kinahanglan nga duna kay isakripisyo.” Apan, si Henry ug Suzanne nahibalo nga kon ilang unahon si Jehova, ilang mahuptan ang “saad sa kinabuhi karon ug sa umaabot.” (1 Timoteo 4:8; Tito 2:12) Ang ilang mga anak nga babaye nahimong masiboton nga bug-os-panahong mga ministro. Ingong pamilya, ilang gibati nga sila wala mahikawi sa bisan unsa; hinunoa, sila nakabaton ug dakong kaayohan pinaagi sa pagpangagpas sa “tinuod nga kinabuhi.”—Filipos 3:8; 1 Timoteo 6:6-8.
Ayawg ‘Gamita sa Bug-os ang Kalibotan’
14. Unsay mahitabo kon atong makalimtan ang tinuod nga katuyoan sa kinabuhi?
14 Apan, delikado gayod kon makalimtan nato ang tinuod nga katuyoan sa kinabuhi ug molugak ang atong pagpangupot sa “tinuod nga kinabuhi.” Kay peligro nga ‘malinga kita sa mga kabalaka ug sa mga bahandi ug sa mga kalipayan niining kinabuhia.’ (Lucas 8:14) Ang naghingaping tinguha sa pagbaton ug materyal nga mga butang ug ang “mga kabalaka sa kinabuhi” mahimong mosangpot sa sobrang pagkalambigit niining sistemaha sa mga butang. (Lucas 21:34) Ikasubo nga ang uban nalinga kaayo sa ilang tinguha nga madato ug “nahisalaag gikan sa pagtuo ug nagtusaktusak sa ilang kaugalingon sa daghang kasakitan,” ug nawad-an pa gani sa ilang maayong relasyon kang Jehova. Pagkadako gayod sa nawala kanila tungod sa ilang pagkapakyas sa ‘pagpangupot pag-ayo sa kinabuhing walay kataposan’!—1 Timoteo 6:9, 10, 12; Proverbio 28:20.
15. Sa unsang paagi ang usa ka pamilya nakabaton ug kaayohan tungod kay ‘wala nila gamita sa bug-os ang kalibotan’?
15 Si Pablo nagtambag nga “kadtong nagagamit sa kalibotan manig-ingon kanilang wala magagamit niini sa bug-os.” (1 Corinto 7:31) Gisunod ni Keith ug Bonnie kining tambaga. “Ako nahimong Saksi ni Jehova sa dihang hapit na kong mograduwar sa kurso nga pagkadentista,” matod pa ni Keith. “Mahimo kong mamili. Puwede kong modawat ug daghang pasyente ug mokitag dako, apan maibanan niini ang among panahon sa pag-alagad kang Jehova. Ako nakadesisyon nga dili modawat ug daghang pasyente aron duna koy mas dako nga panahon para sa espirituwal ug emosyonal nga kaayohan sa akong pamilya, nga sa ngadtongadto naglakip sa lima ka anak nga babaye. Bisan tuod kasagaran igoigo ra ang among kuwarta, kami nakakat-on sa pagdaginot, ug nakabaton ra gihapon kami sa among gikinahanglan. Ang among pamilya suod sa usag usa, mabination, ug malipayon kaayo. Sa ngadtongadto, kaming tanan nagpayunir. Karon ang among mga anak malipayon sa ilang kaminyoon, nga ang tulo kanila may mga anak na usab. Ang ilang mga pamilya malipayon usab tungod kay nagpadayon sila pag-una sa katuyoan ni Jehova.”
Pag-una sa Katuyoan sa Diyos Diha sa Imong Kinabuhi
16, 17. Unsang mga panig-ingnan sa may katakos nga mga tawo ang narekord sa Bibliya, ug unsay mahinumdoman bahin kanila?
16 Diha sa Bibliya, may mga pananglitan sa mga tawong nagpahiuyon ug wala magpahiuyon sa ilang kinabuhi sa katuyoan sa Diyos. Ang mga pagtulon-an nga mapupo gikan niana mapadapat sa tanan bisag unsay edad, kultura, ug kahimtang sa kinabuhi. (Roma 15:4; 1 Corinto 10:6, 11) Si Nimrod nagtukod ug dagkong mga siyudad, apan iyang gibuhat kana sa pagsupak kang Jehova. (Genesis 10:8, 9) Sa laing bahin, daghan ang maayog panig-ingnan. Ang usa kanila mao si Moises. Wala niya himoang tumong sa kinabuhi ang paghupot sa iyang katungdanan ingong prinsipe sa Ehipto. Hinunoa, iyang giisip ang iyang mga pribilehiyo sa pag-alagad “ingong bahandi nga labaw pa kay sa mga bahandi sa Ehipto.” (Hebreohanon 11:26) Ang doktor nga si Lucas lagmit mitabang kang Pablo ug sa uban pa sa pagtambal sa ilang mga balatian. Apan mas dakong kaayohan ang iyang nahatag ingong magwawali ug magsusulat sa Bibliya. Kon bahin kang Pablo, siya wala mainila ingong batid sa Balaod, kondili ingong usa ka misyonaryo, “usa ka apostol alang sa kanasoran.”—Roma 11:13.
17 Si David mas mahinumdoman ingong “usa ka tawo nga gikahimut-an [sa Diyos],” dili ingong pangulo sa kasundalohan ni ingong musikero ug tigkomposo ug mga awit. (1 Samuel 13:14) Si Daniel nailhan, dili ingong opisyal sa kagamhanan sa Babilonya, kondili ingong maunongong manalagna ni Jehova; si Ester, dili ingong rayna sa Persia, kondili ingong panig-ingnan sa kaisog ug pagtuo; si Pedro, Andres, Santiago, ug Juan, dili ingong malamposong mga mangingisda, kondili ingong mga apostoles ni Jesus. Labaw sa tanan, si Jesus wala nato isipa ingong “ang panday,” kondili ingong “ang Kristo.” (Marcos 6:3; Mateo 16:16) Nasabtan nilang tanan nga bisan unsang mga katakos, kabtangan, o katungdanan nga ilang nahuptan, ang ilang pangunang tumong sa kinabuhi mao ang pag-alagad sa Diyos, dili ang ilang sekular nga mga karera. Nahibalo sila nga ang labing hamili ug magantihong katuyoan sa kinabuhi mao ang pagkahimong mahinadlokon sa Diyos.
18. Unsang desisyon ang nakab-ot sa usa ka batan-ong Kristohanon, ug unsay iyang naamgohan?
18 Sa ngadtongadto nasabtan usab kini ni Seung Jin, nga gihisgotan sa sinugdanan. “Imbes igugol ang akong tanang panahon ug kusog sa pagpanambal, pagdibuho, o pagtudlo diha sa eskuylahan, ako nakahukom nga gamiton ang akong kinabuhi uyon sa akong pagpahinungod sa Diyos,” mipatin-aw siya. “Ako nag-alagad karon diin mas dako ang panginahanglan sa mga magtutudlo sa Bibliya, nga nagtabang sa mga tawo sa pagsubay sa dalan paingon sa kinabuhing walay kataposan. Sa una nagtuo ko nga ang pagkahimong bug-os-panahong ministro dili kaayo makaiikag. Karon ang akong kinabuhi mas makaiikag kay sukad masukad, samtang ako naningkamot sa pagpauswag sa akong personalidad ug sa akong katakos sa pagtudlo sa mga tawo nga lainlaig kultura. Akong naamgohan nga ang pagpahiuyon sa atong kinabuhi sa katuyoan ni Jehova mao lamang makapatagbawng paagi sa pagkinabuhi.”
19. Sa unsang paagi atong makaplagan ang tinuod nga katuyoan sa kinabuhi?
19 Ingong mga Kristohanon, atong nabatonan ang nagaluwas-ug-kinabuhi nga kahibalo ug ang paglaom sa kaluwasan. (Juan 17:3) Busa, ‘dawaton nato ang dili-takos nga kalulot sa Diyos ug dili sipyaton ang katuyoan niini.’ (2 Corinto 6:1) Gamiton nato ang bililhong mga adlaw sa atong kinabuhi sa pagdayeg kang Jehova. Isangyaw nato ang kahibalo nga makahatag ug tinuod nga kalipay karon ug motultol sa kinabuhing walay kataposan. Kon ato kanang buhaton, atong matagamtam ang katumanan sa giingon ni Jesus: “Adunay labaw nga kalipay sa paghatag kay sa pagdawat.” (Buhat 20:35) Gawas pa niana, atong makaplagan ang tinuod nga katuyoan sa kinabuhi.
[Footnote]
a Ang ubang mga ngalan giusab.
Makapatin-aw Ka Ba?
• Unsa ang labing hamili nga katuyoan sa kinabuhi?
• Nganong dili maalamon ang pag-una sa materyal nga mga butang?
• Unsa ang “tinuod nga kinabuhi” nga gisaad sa Diyos?
• Sa unsang paagi atong mapahiuyon ang atong kinabuhi sa katuyoan sa Diyos?
[Mga Pangutana sa Pagtuon]
[Mga hulagway sa panid 18]
Ang mga Kristohanon kinahanglang mohimo sa hustong mga pagsakripisyo