Usa ka Datong Magmamando Mihimog Di-Maalamong Desisyon

ANG dato nga batan-ong magmamando buotan, masinundanon sa balaod, ug relihiyoso. Sa pagduol kang Jesus, siya miluhod ug nangutana: “Maayong Magtutudlo, unsay kinahanglan ko nga buhaton aron makapanunod sa kinabuhing walay kataposan?”

Agig tubag, giingnan siya ni Jesus nga aron maangkon ang kinabuhi, kinahanglan nga padayon niyang sundon ang mga sugo sa Diyos. Sa dihang nangutana siya kon unsa kanang mga sugoa, si Jesus mitubag: “Dili ka magbuno, Dili ka manapaw, Dili ka mangawat, Dili ka magsaksig bakak, Pasidunggi ang imong amahan ug ang imong inahan, ug, Higugmaon mo ang imong silingan sama sa imong kaugalingon.” Kini maoy pangunang mga sugo sa Balaod nga gihatag sa Diyos kang Moises. Dayon, ang tawo miingon: “Akong gisunod kining tanan; unsa pay akong kulang?”—Mateo 19:16-20.

Si Jesus “mibatig gugma alang kaniya” ug miingon: “Usa ka butang ang kulang kanimo: Lakaw, ibaligya ang unsa mang mga butang nga imong nabatonan ug ipanghatag sa mga kabos, ug makabaton ka ug bahandi sa langit, ug umari ka, mahimong akong sumusunod.”—Marcos 10:17-21.

Nianang tungora, ang batan-ong magmamando nag-atubang ug bug-at nga desisyon. Unsa may iyang himoon? Ipanghatag ba niya ang iyang bahandi ug mahimong sumusunod ni Jesus, o tipigan lang kana para sa iyang kaugalingon? Mangita ba siyag bahandi sa yuta, o mangitag bahandi sa langit? Naglisod gayod siya kon unsay iyang pilion. Dayag nga mahunahunaon siya sa iyang relasyon sa Diyos tungod kay nagtuman siya sa Balaod ug nangutana kon unsa pay iyang himoon aron uyonan sa Diyos. Unsa may iyang nakab-ot nga desisyon? Siya “milakaw nga naguol, kay siya naghupot man ug daghang kabtangan.”—Marcos 10:22.

Dili maalamon ang desisyon sa batan-ong magmamando. Kon iya pang gidawat ang imbitasyon ni Jesus nga mahimong iyang matinumanong sumusunod, madawat gayod unta niya ang iyang gitinguha—ang kinabuhing walay kataposan. Wala kita suginli kon unsay nahitabo sa maong batan-on. Apan, mga upat ka dekada  sa ulahi, ang rekord nagpakita nga gipayhag sa Romanong mga sundalo ang Jerusalem ug ang uban pang dapit sa Judea. Daghang Hudiyo ang nawad-an sa ilang bahandi ug sa ila mismong kinabuhi.

Apan, dili sama sa batan-ong magmamando, si apostol Pedro ug ang ubang mga tinun-an nakahimog maalamong desisyon. Ilang ‘gibiyaan ang tanang butang’ ug misunod kang Jesus. Walay duhaduha nga ang maong desisyon nakahatag gayod kanilag kaayohan. Si Jesus misaad nga mas daghan pa ang ilang madawat kay sa mga butang nga ilang gibiyaan. Ug dili kay kana ra, makapanunod usab silag kinabuhing walay kataposan. Wala gayod sila magbasol sa desisyon nga ilang gihimo.—Mateo 19:27-29.

Kitang tanan mohimog mga desisyon—ginagmay man o dinagko. Unsay tambag ni Jesus maylabot sa paghimog desisyon? Imo bang sundon ang maong tambag? Kon imo kanang sundon, ikaw pagagantihan gayod. Atong hisgotan karon kon sa unsang paagi atong masunod si Jesus ug kon sa unsang paagi kita makapahimulos sa iyang mga tambag.