Magkinabuhi nga Naghunahuna sa Ugma

“AYAW gayod kamo kabalaka bahin sa sunod nga adlaw,” matod ni Jesu-Kristo diha sa iyang iladong wali sa bukid sa Galilea. Sumala sa pagkahubad diha sa The New English Bible, si Jesus mipadayon: “Ang sunod nga adlaw ray mag-igo sa iyang kaugalingon.”—Mateo 6:34.

Sa imong hunahuna, unsay gipasabot nianang mga pulonga, “ang sunod nga adlaw ray mag-igo sa iyang kaugalingon”? Nagpasabot ba kini nga angay kang magkinabuhi alang lamang karon ug dili hunahunaon ang sunod nga adlaw o ugma? Nahiuyon ba gayod kana sa gituohan ni Jesus ug sa iyang mga sumusunod?

“Hunong Na sa Pagkabalaka”

Basaha ang tanang gipamulong ni Jesus nga anaa sa Mateo 6:25-32. Sa bahin siya miingon: “Hunong na sa pagkabalaka bahin sa inyong mga kalag kon unsay inyong kan-on o kon unsay inyong imnon, o bahin sa inyong mga lawas kon unsay inyong isul-ob. . . . Panid-i pag-ayo ang mga langgam sa langit, tungod kay sila wala magapugas ug binhi o magaani o magatigom sa mga balay-tipiganan; sa gihapon ginapakaon sila sa ilang langitnong Amahan. . . . Kinsa ba kaninyoy makadugang ug usa ka maniko sa gitas-on sa iyang kinabuhi pinaagi sa pagkabalaka? Unya, bahin usab sa besti, nganong mabalaka man kamo? Kuhaig pagtulon-an ang mga lirio sa kapatagan, kon giunsa nila sa pagtubo; wala sila magbudlay, ni magkalinyas . . . Busa ayaw gayod pagkabalaka ug moingon, ‘Unsa may among kan-on?’ o, ‘Unsa may among imnon?’ o, ‘Unsa may among isul-ob?’ Kay kining tanan mao ang mga butang nga maikagong ginapangagpas sa mga nasod. Kay ang inyong langitnong Amahan nahibalo nga gikinahanglan ninyo kining tanang butanga.”

Gitapos ni Jesus kining bahina sa iyang wali uban ang duha ka tambag. Ang una: “Nan, magpadayon sa pagpangita pag-una sa gingharian [sa Diyos] ug sa iyang pagkamatarong, ug kining tanang ubang mga butang igadugang ra kaninyo.” Ang ikaduha: “Busa, ayaw gayod kamo kabalaka bahin sa sunod nga adlaw,  kay ang sunod nga adlaw adunay iyang kaugalingong mga kabalaka. Igo na sa matag adlaw ang iyang kaugalingong pagkadaotan.”—Mateo 6:33, 34.

Ang Inyong Amahan Nahibalo Kon Unsay Inyong Gikinahanglan

Sa imong hunahuna, gitambagan ba ni Jesus ang iyang mga tinun-an, lakip ang mga mag-uuma, batok sa ‘pagpugas, pag-ani, o paghipos sa ilang mga abot sa mga kamalig’? O sa ‘pagbudlay ug pagkalinyas’ aron sila may ikabesti? (Proverbio 21:5; 24:30-34; Ecclesiastes 11:4) Wala gayod. Kon sila mohunong pagtrabaho, seguradong sila “magapakilimos sa ting-ani,” nga walay makaon o ikabesti.—Proverbio 20:4.

Unsay ikasulti bahin sa kabalaka? Gipasabot ba ni Jesus nga dili na gayod mabalaka ang mga tawo nga naminaw kaniya? Dili kana realistiko. Si Jesus mismo nakasinatig dakong kaguol ug kabalaka sa gabii nga siya gidakop.—Lucas 22:44.

Gipahayag lamang ni Jesus ang usa ka hinungdanong kamatuoran. Ang sobrang kabalaka dili gayod makatabang sa pagsulbad sa imong mga problema. Pananglitan, dili kini makatabang sa pagpataas sa imong kinabuhi. Dili kini “makadugang ug usa ka maniko sa gitas-on sa [imong] kinabuhi,” matod ni Jesus. (Mateo 6:27) Sa pagkatinuod, ang hingaping kabalaka lagmit pang makapamubo sa imong kinabuhi.

Mapuslanon gayod ang iyang tambag. Ang daghang butang nga atong gikabalak-an dili man gani mahitabo. Naamgohan kini sa Britanikong estadista nga si Winston Churchill maylabot sa makapasubo nga panahon sa Gubat sa Kalibotan II. Mahitungod sa pipila sa iyang mga gikabalak-an niadto, siya misulat: “Sa dihang mamalandong ako sa tanan kong gikabalak-an, mahinumdoman ko ang sugilanon sa usa ka tigulang nga lalaki kinsa miingon sa hapit na siyang mamatay nga daghan kaayo siyag suliran nga gikabalak-an sa iyang kinabuhi apan ang kadaghanan niana wala gayod mahitabo.” Busa, maalamon gayod ang pagtagad sa mga suliran sa matag adlaw lamang, ilabina kon ang atong mga suliran daling makahatag kanatog tumang kabalaka.

‘Magpadayon sa Pagpangita Pag-una sa Gingharian sa Diyos’

Sa pagkatinuod, dili lang pisikal ug emosyonal nga kaayohan sa iyang mga mamiminaw ang gihunahuna ni Jesus. Nahibalo siya nga tungod sa pagkabalaka nga makabaton sa mga kinahanglanon sa kinabuhi ug sa hingaping pagtinguhag mga kabtangan ug mga kalingawan, dili na nila mahatagag  pagtagad ang mas hinungdanong mga butang. (Filipos 1:10) ‘Unsa bay mas hinungdanon kay sa pagkabaton sa mga kinahanglanon sa kinabuhi?’ makapangutana ka tingali. Ang tubag mao ang espirituwal nga mga butang nga adunay kalabotan sa atong pagsimba sa Diyos. Gipasiugda ni Jesus nga ang pangunang butang sa atong kinabuhi kinahanglang mao ang ‘pagpadayon sa pagpangita pag-una sa gingharian sa Diyos ug sa iyang pagkamatarong.’—Mateo 6:33.

Sa panahon ni Jesus, maikagong gipangagpas sa mga tawo ang materyal nga mga butang. Giuna nila sa ilang kinabuhi ang pagtigom ug bahandi. Apan giawhag ni Jesus ang iyang mamiminaw nga magbaton ug lahing panglantaw. Ingong katawhang napahinungod sa Diyos, ang ilang “tibuok nga obligasyon” mao ang ‘pagkahadlok sa matuod nga Diyos ug pagtuman sa iyang mga sugo.’—Ecclesiastes 12:13.

Tungod sa paghunahuna kanunay sa materyal nga mga butang—“ang kabalaka niining sistema sa mga butang ug ang malimbongong gahom sa mga bahandi”—ang pagtagad sa iyang mga mamiminaw wala na masentro diha sa mga butang may kalabotan sa pagsimba sa Diyos. (Mateo 13:22) Misulat si apostol Pablo: “Sila nga determinadong madato mangahulog sa tentasyon ug sa lit-ag ug sa daghang binuang ug makadaot nga mga tinguha, nga nagbanlod sa mga tawo sa kalaglagan ug sa kadaotan.” (1 Timoteo 6:9) Sa pagtabang kanilang makalikay niini nga “lit-ag,” gipahinumdoman ni Jesus ang iyang mga sumusunod nga ang ilang langitnong Amahan nahibalo nga gikinahanglan nila kining tanang butanga. Tagan-an sila sa Diyos ug materyal nga mga butang maingon nga iyang gitagan-an ang “mga langgam sa langit.” (Mateo 6:26, 32) Imbes sobrang mabalaka, kinahanglang buhaton nila ang kutob sa ilang maarangan sa pagtagana sa ilang materyal nga mga panginahanglan ug unya itugyan kana kang Jehova.—Filipos 4:6, 7.

Sa miingon si Jesus “ang sunod nga adlaw ray mag-igo sa iyang kaugalingon,” iya lamang gipasabot nga dili kita angayng sobrang mabalaka sa mahitabo ugma kay kana makadugang ra sa atong mga suliran karon. Gihubad sa laing bersiyon sa Bibliya ang iyang giingon: “Ayaw kabalaka bahin sa ugma; kini adunay kaugalingong mga suliran. Dili na kinahanglang dugangan pa ang mga suliran sa matag adlaw.”—Mateo 6:34, Today’s English Version.

“Paanhia ang Imong Gingharian”

Hinuon, adunay dakong kalainan tali sa dili sobrang pagkabalaka bahin sa ugma ug sa bug-os nga dili paghunahuna niana. Wala gayod dasiga ni Jesus ang iyang mga tinun-an nga dili nila hunahunaon ang ugma. Sa kasukwahi, iyang giawhag sila nga magmaikagon kaayo sa ugma. Angay gayod nga sila moampo alang sa ilang presenteng mga panginahanglan, sama sa ilang pagkaon matag adlaw. Apan angay una silang moampo sa mga butang nga umaabot pa—nga paanhion ang Gingharian sa Diyos ug nga matuman unta ang kabubut-on sa Diyos dinhi sa yuta.—Mateo 6:9-11.

Dili gayod kita manig-ingon sa mga tawo sa adlaw ni Noe. Napuliki kaayo sila sa ‘pagpangaon ug pag-inom, ang mga lalaki nagminyo ug ang mga babaye gihatag sa kaminyoon’ nga sila ‘wala magtagad’ kon unsay hapit nang mahitabo. Ug unsay midangat? “Miabot ang baha ug gibanlas silang tanan.” (Mateo 24:36-42) Gigamit ni apostol Pedro ang maong tinuod nga panghitabo sa pagpahinumdom kanato nga kinahanglan kitang magkinabuhi nga naghunahuna sa ugma. “Sanglit kining tanang butanga pagatunawon man sa ingon,” siya misulat, “angay nga unsang matanga nga mga tawo kamo unya diha sa balaang mga buhat sa panggawi ug mga buhat sa diyosnong pagkamahinalaron, nga nagapaabot ug nagabutang kanunay sa hunahuna sa presensiya sa adlaw ni Jehova!”—2 Pedro 3:5-7, 11, 12.

Pagtigom ug mga Bahandi sa Langit

Busa, kinahanglan natong ‘ibutang kanunay sa hunahuna’ ang adlaw ni Jehova. Ang paghimo niana dakog epekto kon giunsa nato paggamit ang atong panahon, kusog, mga kahanas, katigayonan, ug mga abilidad. Dili kita angayng mapuliki pag-ayo sa pagpangagpas ug materyal nga mga butang—mga kinahanglanon kaha o mga kalipayan sa kinabuhi—nga diyutay na lang ang atong panahon alang sa mga buhat nga magpaila sa “diyosnong pagkamahinalaron.” Ang pagsentro sa atong pagtagad sa kinabuhi karon morag makahatag ug dihadihang mga resulta, apan bisan ang maayong mga resulta adunay temporaryo lamang nga mga kaayohan. Miingon si Jesus nga labi pang maalamon ang ‘pagtigom alang sa atong kaugalingon ug mga bahandi sa langit’ inay sa mga bahandi sa yuta.—Mateo 6:19, 20.

 Kanang puntoha gipasiugda ni Jesus diha sa iyang sambingay bahin sa usa ka tawo nga naghimog dagkong mga plano alang sa ugma. Ang Diyos wala ilakip niadtong mga planoha. Mabungahon kaayo ang yuta niadtong tawhana. Nakahukom siya sa pagguba sa iyang mga kamalig ug pagtukod ug mas dagko pa aron magpahayahay sa iyang kinabuhi, nga mokaon, moinom, ug maglipaylipay. Unsa may daotan niana? Siya namatay nga wala makapahimulos sa mga bunga sa iyang pagbudlay. Apan mas daotan pa, wala niya maugmad ang usa ka relasyon uban sa Diyos. Mihinapos si Jesus: “Ingon usab niana ang tawo nga magatigom ug bahandi alang sa iyang kaugalingon apan dili dato ngadto sa Diyos.”—Lucas 12:15-21; Proverbio 19:21.

Unsay Imong Mahimo?

Ayawg himoa ang sayop nga gihimo sa tawo nga gihubit ni Jesus. Susiha kon unsay gitagana sa Diyos alang sa ugma, ug isentro ang imong kinabuhi niana. Ipahibalo gayod sa Diyos sa mga tawo kon unsay iyang pagabuhaton. Misulat ang karaang manalagna nga si Amos: “Ang Soberanong Ginoong Jehova dili mobuhat sa usa ka butang gawas kon gikapadayag niya ang iyang kompidensiyal nga butang ngadto sa iyang mga alagad nga mga manalagna.” (Amos 3:7) Ang gipadayag ni Jehova pinaagi sa iyang mga manalagna mabasa na karon diha sa mga panid sa iyang inspiradong Pulong, ang Bibliya.—2 Timoteo 3:16, 17.

Ang usa ka butang nga gibutyag sa Bibliya mao nga ang mga panghitabo sa dili na madugay adunay walay-ingon nga epekto unya sa tibuok yuta. Si Jesus miingon: “Aduna unyay dakong kasakitan nga ang ingon niana wala pa mahitabo sukad sa sinugdan sa kalibotan hangtod karon.” (Mateo 24:21) Walay tawo nga makapugong niana. Sa tinuoray, walay katarongan nga gusto kanang pugngan sa matuod nga mga magsisimba. Ngano man? Kay kining hitaboa magpapha sa tanang kadaotan gikan sa yuta, ug human niini modangat ang “usa ka bag-ong langit ug usa ka bag-ong yuta,” nga mao ang usa ka bag-ong langitnong kagamhanan ug usa ka bag-ong yutan-ong katilingban. Nianang bag-ong kalibotan, ‘pagapahiran sa Diyos ang tanang luha gikan sa mga mata sa katawhan, ug ang kamatayon mawala na, ni may pagbangotan ni pagtiyabaw ni may kasakit pa.’—Pinadayag 21:1-4.

Busa, dili ba makataronganong mogahin ug panahon sa pagsusi kon unsay giingon sa Bibliya bahin nianang mga hitaboa? Nagkinahanglan ka bag tabang sa pagbuhat niana? Hangyoa ang mga Saksi ni Jehova sa pagtabang kanimo. O pagsulat sa mga magpapatik niining magasina. Paneguroa gayod nga magkinabuhi dili lamang alang karon kondili alang usab sa masanag nga ugma.

[Mga hulagway sa panid 7]

“Ayaw gayod kamo kabalaka . . . Ang sunod nga adlaw adunay iyang kaugalingong mga kabalaka”