Nagmaya Tungod kay ‘Nakadaog Pinaagi sa Kordero’

SA USA ka sulat ni Carey W. Barber niadtong 1971, iyang gihinumdoman ang iyang unang 50 ka tuig nga pag-alagad sa matuod nga Diyos: “Kadto maayo gayod kaayong katuigan sa akong pag-alagad kang Jehova. Ang pagpakig-uban sa iyang katawhan; ang panalipod gikan sa mga mamumuhat ug daotan sa kalibotan ni Satanas; ang kalaoman nga makadaog pinaagi sa Kordero, si Jesu-Kristo; ug ang pamatuod sa gugma ni Jehova nagkatingob sa pagpatunghag tilinguhaong kalinaw ug katagbawan sa kahiladman nga magbantay sa kasingkasing ug maghatag ug seguradong paglaom alang sa kataposang kadaogan.”

Unom ka tuig sa ulahi, si Brader Barber, nga usa ka dinihogang Kristohanon, nagsugod sa pag-alagad ingong membro sa Nagamandong Lawas sa mga Saksi ni Jehova. Sulod sa 30 ka tuig nga pag-alagad ingong membro niana nga lawas, nagpadayon siya sa pagpaabot nga “makadaog pinaagi sa Kordero.” Kana iyang nakab-ot pinaagi sa pagpabiling matinumanon hangtod sa iyang kamatayon sa edad nga 101 niadtong Dominggo, Abril 8, 2007.—1 Corinto 15:57.

Si Carey Barber natawo sa Inglaterra sa 1905, ug nabawtismohan sa Winnipeg, Canada, niadtong 1921. Duha ka tuig sa ulahi siya ug ang iyang kaluha nga si Norman, mibalhin sa Brooklyn, New York, aron motabang sa usa ka bag-ong proyekto. Niadtong tungora, ang katawhan ni Jehova hapit nang magsugod sa pagpatik sa kaugalingon nilang mga libro aron ikasangyaw ang maayong balita sa Gingharian “sa tibuok gipuy-ang yuta.” (Mateo 24:14) Ang una sa mga asaynment ni Brader Barber mao ang pagpadagan ug gamayng makina sa pag-imprenta. Lakip sa iyang mga giimprenta mao ang mga instruksiyon bahin sa legal nga mga kaso nga gipasaka sa Korte Suprema sa Tinipong Bansa. Sa ngadtongadto, si Brader Barber nagtrabaho sa Service Department, nga nagtagad ilabina sa mga kalihokan sa kongregasyon ug sa buluhatong pagsangyaw sa tibuok nasod.

Tungod sa maong kasinatian, si Brader Barber may katakos gayod sa dihang giasayn siya niadtong 1948 ingong usa ka nagapanawng magtatan-aw nga magaduaw ug mga asembliya ug mga kongregasyon sa tibuok kasadpang bahin sa Tinipong Bansa. Siya miingon nga gusto kaayo niya ang lab-as nga hangin sa dihang magsangyaw sa kanataran. Tungod sa maong asaynment daghang kaigsoonan ang nakaila kang Brader Barber. Ang iyang abtik nga panghunahuna ug kasibot sa ministeryo nagmapuslanon kaayo sa dihang sa ulahi siya mitungha sa ika-26 nga klase sa Watchtower Bible School of Gilead. Panahon sa klase, nakaila niya ang usa ka isigkaestudyante nga taga-Canada, si Sydney Lee Brewer. Human sa graduwasyon, sila nagpakasal ug ang ilang hanimon mao ang ilang mubong biyahe paingon sa mga kongregasyon sa Chicago, Illinois. Si Sister Barber usa gayod ka bililhong kauban ug kanunayng nagsuportar sa iyang bana sulod sa ilang duha ka dekada nga pag-alagad diha sa nagapanaw nga ministeryo.

Kadtong nakahimamat ug nakaila kang Brader Barber panahon sa daghang dekada nga pag-alagad ingong magtatan-aw sa distrito o sirkito o sulod sa 30 ka tuig nga pagtrabaho ug pagpanaw ingong membro sa Nagamandong Lawas dili gayod makalimot sa iyang mga pakigpulong ug bibo nga mga komento. Aduna gayod kitay katarongan sa pagmaya tungod kay siya ‘nakadaog pinaagi sa Kordero.’