“Nakadayeg Ko sa Iyang Talagsaong Determinasyon”

SI Günter Grass, usa ka Alemang awtor ug mananaog sa Premyong Nobel Alang sa Katitikan niadtong 1999, nagpatik sa kasaysayan sa iyang kinabuhi niadtong 2006. Iyang gihubit diha niana ang panahon nga siya girekluta alang sa sibilyan nga puwersang pangdepensa sa Alemanya. Sa mao ra gihapong libro, iyang gihisgotan ang usa ka lalaki nga nakapahingangha pag-ayo kaniya nga wala gayod niya mahikalimti sulod sa kapig 60 ka tuig. Kadto mao ang usa ka tawo nga lig-ong mibarog alang sa iyang pagtuo ilalom sa paglutos.

Sa usa ka interbiyo nga gipatik sa inadlaw nga mantalaang Frankfurter Allgemeine Zeitung, nahinumdom si Grass niining talagsaong lalaki, kinsa midumili sa paggamit ug pusil. Si Grass miingon nga ang maong lalaki “walay gipaboran nga bisan unsang popular nga mga ideolohiya, kay siya dili usa ka Nazi, ni Komunista, ni Sosyalista. Siya usa ka Saksi ni Jehova.” Nakalimot si Grass sa ngalan niadto nga Saksi, kinsa iyang gitawag ug Dili-kami-mobuhat-niana. Naila sa mga tigdukiduki sa mga Saksi ni Jehova nga siya si Joachim Alfermann. Siya sublisubling gikulata ug gipakaulawan, ug dayon gibartolina. Apan si Alfermann nagpabiling malig-on ug midumili sa paggamit ug pusil.

“Nakadayeg ko sa iyang talagsaong determinasyon,” matod ni Grass. “Gipangutana ko ang akong kaugalingon: Nganong nakaantos siya niadtong tanan? Giunsa niya paghimo kadto?” Human makaagwanta sa daghang pagsulay aron sa pagbungkag sa iyang pagkamaunongon sa Diyos, si Alfermann gipadala sa ulahi ngadto sa kampo konsentrasyon sa Stutthof sa Pebrero 1944. Siya gibuhian sa Abril 1945, nakalabang-buhi sa gubat ug nagpabiling maunongong Saksi ni Jehova hangtod sa iyang kamatayon niadtong 1998.

Si Alfermann maoy usa sa duolag 13,400 ka Saksi sa Alemanya ug sa mga nasod nga gisakop sa mga Nazi nga nakaagom ug kapintasan tungod sa ilang pagtuo. Ilang gituman ang sugo sa Bibliya nga magpabiling neyutral sa politika ug dili mogamit ug hinagiban. (Mateo 26:52; Juan 18:36) Mga 4,200 ka Saksi ang nabilanggo sa mga kampo konsentrasyon, ug 1,490 ang nakabsan sa ilang kinabuhi. Bisan karon, ang ilang baroganan ug kalig-on gidayeg sa daghang tawo nga dili sama nilag pagtuo.

[Hulagway sa panid 32]

Si Joachim Alfermann