Pagsagubang sa mga Kalisdanan Aron Ikahatod ang Maayong Balita

NAGSINGABOT ang among trak sa usa ka tsekpoint nga gibantayan ug mga 60 ka armadong mga lalaki, babaye, ug tin-edyer. Ang pipila nag-uniporme ug ang uban wala. Daghan kanila ang armado. Maorag ila kaming gipaabot. May kagubot sa nasod.

Upat ka adlaw na kaming nagbiyahe nga nagdalag napulo ka toneladang literatura sa Bibliya. Ambot kon ila ba kaming paagion. Mangayo kaha silag kuwarta? Makombinsir kaha dayon sila nga malinawon ang among misyon?

Nagpabuto ang usa ka tawo sa iyang riple aron ipaila nga siya ang dakodako. Iyang nakita ang among mga cellphone ug mimando nga amo kining ihatag kaniya. Kay nagpanuko man kami, misenyas siya nga iyang gulgolon ang among liog kon di mi mosugot. Mao nga amo kadtong gihatag.

Sa kalit usa ka babaye nga nag-uniporme mikuha sa iyang pusil ug miduol kanamo. Siya ang “sekretarya,” ug buot niyang may ihatag usab kami kaniya. Lisod ang kinabuhi, ug ang gamayng “gasa” makatabang na kaniya. Dayon gibuksan sa laing sundalo ang among tangke sa gasolina aron sudlan ang iyang galon. Wala niya tagda ang among pagtutol kay nagtuman ra kono siya sa gimando kaniya. Wala kamiy arang mahimo. Nanghinaot lang kami nga ang uban dili mosunod sa iyang gihimo.

Sa kataposan, ang ali gikuha ug nakapadayon mi sa among biyahe. Ako ug ang akong kauban nahupayan. Kulba ang kahimtang apan naanad na kami sa maong makuyaw nga mga tsekpoint. Tali sa Abril 2002 ug Enero 2004, nakahimo mig 18 ka biyahe gikan sa pantalan sa Douala, Cameroon, ngadto sa Bangui, ang kaulohan sa Central African Republic. Ang 1,600 ka kilometrong biyahe kanunayng may mga kapeligrohan ug mga sorpresa. a

“Daghan mig nakat-onan sa maong mga biyahe,” matod ni Joseph ug Emmanuel, ang mga drayber nga tigbiyahean dinhi. “Maalamon gayod ang pag-ampo kanunay sa hilom ug unya magpabiling  kalmado. ‘Sa Diyos ako nagasalig. Dili ako mahadlok. Unsay arang mahimo sa yutan-ong tawo kanako?’ misulat ang salmista. Gipaningkamotan namong mahuptan ang samang tinamdan. Segurado kaming nahibalo si Jehova nga ang katuyoan sa among biyahe mao ang paghatod sa mensahe sa paglaom nga gikinahanglan gayod pag-ayo.”—Salmo 56:11.

Daghang Nasod ang Nalangkit Aron Ikatagana ang Espirituwal nga Pagkaon

Daghang tawo niining bahina sa Aprika ang gustong makadungog sa maayong balita sa Gingharian sa Diyos. Ang literatura nga among gihatod maoy alang sa pagtagbaw sa ilang espirituwal nga panginahanglan. (Mateo 5:3; 24:14) Ang sangang buhatan sa mga Saksi ni Jehova sa Cameroon nga anaa sa Douala mao ang tigsuplay ug mga literatura sa kapin sa 30,000 ka magmamantala sa Gingharian ug sa mga tawong interesado nga nagpuyo sa Cameroon ug sa upat ka sikbit nga kanasoran.

Layo nag gibiyahean kini nga literatura. Kadaghanan niini gipatik sa Alemanya, Espanya, Inglaterra, Italya, ug Pinlandia. Dayon gipadala kini pinaagig barko gikan sa Pransiya. Kasagarang adunay moabot nga usa ka kontiner nga literatura sa Bibliya sa pantalan sa Douala matag duha ka semana.

Ang kontiner ikarga sa trak nga magdala niana ngadto sa sangang buhatan. Bahigon kana didto sa mga boluntaryo sa Shipping Department segun sa destinasyon niini. Dili sayon ang paghatod ug mga publikasyon ngadto sa hilit nga mga bahin niining mga nasora. Apan kini maoy bahin sa paghatod sa maayong balita “hangtod sa kinalay-ang dapit sa yuta.” (Buhat 1:8) Makasalig gayod ang sangang buhatan sa masakripisyohong mga boluntaryo nga andam mosagubang sa peligrosong mga biyahe. Busa, regular nga makaabot ang literatura sa Bibliya ngadto sa minilyong tawo sa kinatung-ang bahin sa Aprika.

Usa ka Kasagarang Biyahe

Ihatod ug trak ang literatura para sa Cameroon, Chad, Equatorial Guinea, Gabon, ug Central African Republic. Ubanan nato ang usa ka trak ug ang mga drayber niini. Handurawa nga milingkod ka  tapad sa mga drayber, ug nangandam alang sa kulbahinam nga biyahe nga dangtag napulo ka adlaw o kapin pa.

Unom ka drayber ang nagdala niini nga biyahe. Sila kinahanglang kusgan, may katakos, mapailobon, ug maayog pamesti. Sila magsul-ob ug Aprikanhong besti o kaha polo nga may korbata. Sa miagi, ang mga opisyales sa aduwana mikomento: “Tan-awa kining hinlo nga trak ug ang maayog-pamesti nga mga drayber, sama gayod sa imong makita sa mga hulagway diha sa ilang mga basahon.” Apan ang kaandam sa mga drayber nga mobiyahe sa bisan diin aron makaalagad sa uban mas hinungdanon pa kay sa ilang panagway.—Salmo 110:3.

Kinahanglang mogikan kami sa Duoala ug mga alas-sayis sa buntag, sa pagsilang gayod sa adlaw, aron makalikay sa sobrang trapik niining mauswagon nga siyudad. Sa pagtabok sa usa ka tulay duol sa sangang buhatan ug paglatas sa siyudad, mipasilangan kami paingon sa Yaoundé, ang kaulohan sa Cameroon, ang una namong destinasyon.

Isugid kanimo sa unom ka drayber kon unsa ka lisod ang pagdrayb ug trak nga kargadog napulo ka toneladang libro. Wala ra kaayoy suliran ang among dagan sa unang tulo ka adlaw diha sa aspaltado nga dalan, bisan tuod gikinahanglan ang bug-os nga konsentrasyon. Unya kalit nga mibunok ang ulan. Gikan dinhi ang dalan dili na aspaltado. Dili na kini maklaro ug danglog pa, ug tungod sa mga libaong kinahanglan kaming magpahinay. Hapit na ang kilumkilom. Oras nang mohunong, mokaon, ug mosulay sa pagkatulog nga ang among mga tiil gitungtong sa dashboard. Mao kini ang kahimtang niining mga biyahea!

Pagkaugma, sayo kaming mipadayon sa among biyahe. Ang usa sa mga drayber motabang sa pagtan-aw sa kahimtang sa dalan. Iya dayon kaming pasidan-an kon maduol na kami sa daplin sa kanal. Nahibalo pag-ayo ang mga drayber nga kon mahulog sila sa kanal, dangtag daghang adlaw una pa makagawas. Gubaon gihapon ang dalan samtang milatas kami sa utlanan ngadto sa Central African Republic. Sa misunod nga 650 ka kilometro, moagi kami sa matahom, lunhaw ug bungtoron nga kabanikanhan. Mokaway kanamo ang mga bata, mga tigulang, ug mga inahan nga nagbaba sa ilang mga masuso samtang molabay kami sa ilang mga balangay. Tungod sa mga rebelde, talagsa ra ang sakyanan nga moagi niining mga dalana, busa ang mga tawo motan-aw kanamo nga mahibulong.

Makapahimuot nga mga Kasinatian

Si Janvier, usa sa mga drayber, misugilon kanamo nga bisan pa sa apeke nga eskedyul, kasagarang mohunong sila sa gagmayng mga balangay aron mopahulay kadiyot ug managtag ug mga basahon sa Bibliya. Siya nahinumdom: “Sa Baboua kanunay kaming makigsulti sa usa ka atendant sa ospital nga interesado kaayo sa mensahe sa Gingharian, ug magdumalag mubong pagtuon sa Bibliya  uban kaniya. May adlaw pa ganing among gipasalida ang video bahin kang Noe ngadto kaniya ug sa iyang pamilya. Nangabot ang iyang mga higala ug mga silingan ug pagkataudtaod napuno ang iyang balay sa naghinamhinam nga mga tumatan-aw. Nakadungog na ang tanan bahin kang Noe, ug niadtong panahona sila makatan-aw sa iyang sugilanon diha sa telebisyon. Natandog kami sa ilang pagpabili. Human niadto, ila kaming gidulotan ug lamiang pagkaon agig pasalamat, ug gihawiran pa kaming matulog nianang gabhiona. Ugaling lang, kinahanglang mobiya mi dayon aron ipadayon ang among taas nga biyahe, apan nalipay kaming nakapaambit sa maayong balita uban niining mapaubsanong mga tawo.”

Ang laing drayber, si Israel, nakahinumdom ug mga panghitabo sa laing biyahe paingon sa Bangui, ang among destinasyon. Siya miasoy: “Sa nagkaduol na kami sa Bangui, mas daghang ali ang among nakita sa dalan. Maayo na lang kay daghang sundalo ang mahigalaon ug nakahinumdom sila sa trak sa nangaging mga biyahe. Gipalingkod nila kami ug malipayon nilang gidawat ang mga basahon sa Bibliya. Ang usa ka libro dako kaayog bili para nila, mao nga sulatan nila kana sa ilang mga ngalan, petsa, ug ngalan sa naghatag niana. Ang ubang mga sundalo may mga paryenteng Saksi, mao nga sila mahigalaon.”

Si Joseph, ang labing eksperyensiyadong drayber, nag-asoy sa giisip niyang labing makapainteres nga bahin sa maong mga biyahe—ang pag-abot sa destinasyon. Bahin sa usa ka biyahe, siya nahinumdom: “Pipila ka kilometro gikan sa Bangui, giteleponohan namo ang mga igsoon nga hapit na ming moabot. Gikuyogan mi nila latas sa siyudad, ug gitabangan kami sa gikinahanglang mga papeles. Sa among pag-abot, ang tanan sa sangang buhatan nanggawas ug mainitong migakos kanamo. Ang mga igsoon gikan sa haduol nga mga kongregasyon nangabot aron motabang, ug pipila lang ka oras, nadiskarga ug nahipos na diha sa bodega ang ginatos ka kartong mga Bibliya, libro, pulyeto, ug mga magasin.”

“Usahay,” midugang si Joseph, “ang among karga naglakip sa gidonar nga mga sinina, ug mga dulaan sa mga bata alang sa kasikbit nga Democratic Republic of Congo. Makalilipay nga makita ang pahiyom sa mapasalamatong mga igsoon!”

Human sa usa ka adlaw nga pahulay, among andamon ang among trak ug dayon mobalik kami sa agi. May mga sulirang nagpaabot kanamo, apan wala ray bale kana tungod sa makalilipay namong mga kasinatian.

Ang lagyong mga distansiya, pagbunok sa ulan, libaongong dalan, paghiyos sa ligid, ug pagkaaberya mahimong makahasol. Ang dili-disiplinadong mga sundalo kanunay nga suliran. Bisan pa niana, alang sa maong mga drayber, labi pang makapatagbaw ang paghatod sa maayong balita sa Gingharian ngadto sa hilit nga mga dapit sa Aprika ug ang pagkakita sa epekto niini diha sa kinabuhi sa mga tawo nga nakadawat niini.

Pananglitan, tungod sa maong mga paghatod, usa ka molupyo sa hilit nga bahin sa Central African Republic duol sa utlanan sa Sudan nagbasa na karon ug usa ka modernong hubad sa Bibliya. Ginatun-an sa iyang asawa ang bag-ong mga kopya sa Ang Bantayanang Torre, ug nakabenepisyo usab ang ilang mga anak sa librong Pagkakat-on Gikan sa Dakong Magtutudlo. b Sila ug ang uban pa niining dapita nakadawat ug espirituwal nga pagkaon, sama ra sa ilang mga isigka-Kristohanon diha sa dagkong mga siyudad. Usa gayod kini ka hinungdan sa dakong katagbawan!

[Mga footnote]

[Mga mapa/​Hulagway sa panid 9]

(Alang sa aktuwal nga pagkahan-ay, tan-awa ang publikasyon)

CAMEROON

Douala

CENTRAL AFRICAN REPUBLIC

Bangui

[Hulagway sa panid 9]

Si Joseph

[Hulagway sa panid 9]

Si Emmanuel

[Hulagway sa panid 10]

Sangang buhatan sa Central African Republic, sa Bangui

[Hulagway sa panid 10]

Gidiskargahan ang trak didto sa Bangui