Rumboha ang Kahayag

ANG mga parola nakaluwas nag daghang kinabuhi. Hinuon, alang sa gilaayan nang tiglawig, ang kahayag nga makita sa layo dili lang pasidaan bahin sa peligrosong kabatoan. Nagpaila usab kini nga duol na ang iyang destinasyon. Susama niana, duol nang matapos ang hataas nga panaw sa mga Kristohanon. Kini maoy panaw latas sa usa ka mangitngit ug makadaot-sa-pagtuo nga kalibotan. Sa Bibliya, ang katawhan nga nahimulag sa Diyos gipanig-ingon sa “dagat nga gikusokuso, sa dihang kini dili mahimong linaw, nga ang katubigan niini nagpadayon pagtugpo ug lusay ug lapok.” (Isaias 57:20) Ang katawhan sa Diyos nagkinabuhi sa maong kahimtang. Bisan pa niana, may masanag silang paglaom sa kaluwasan, nga alang kanila kini masambingayon ug kasaligang kahayag. (Miqueas 7:8) Tungod kang Jehova ug sa iyang sinulat nga Pulong, “ang kahayag nagdan-ag alang sa matarong, ug ang pagmaya alang sa mga matul-id ug kasingkasing.”—Salmo 97:11. a

Hinunoa, gitugotan sa pipila ka Kristohanon nga sila malinga ug mahilayo sa kahayag ni Jehova mao nga nagun-ob ang ilang pagtuo tungod sa samag mga bato nga natago—ang materyalismo, imoralidad, o bisan apostasya. Sama sa unang siglo, ang pipila karong adlawa “nakasinatig pagkalunod labot sa ilang pagtuo.” (1 Timoteo 1:19; 2 Pedro 2:13-15, 20-22) Ang bag-ong kalibotan ikatandi sa usa ka dunggoanan nga atong gipadulngan. Tungod kay duol na kaayo kini karon, pagkaalaot kon ang usa dili na mauyonan ni Jehova!

Likayi ang ‘Pagkalunod sa Imong Pagtuo’

Sa miaging mga siglo, ang paglawig sa usa ka barko sa halapad nga kadagatan tingali hapsay, apan kini mahimong malunod sa hapit nang modunggo. Kasagarang moabot ang labing delikadong bahin sa biyahe kon magkaduol na ang barko sa baybayon. Sa susama, alang sa daghang tawo, ang labing peligrosong yugto sa tawhanong kasaysayan mao ang “kataposang mga adlaw” niining presenteng sistema sa mga butang. Kini tukmang gibatbat sa Bibliya ingong “lisod sagubangon,” ilabina alang sa dedikadong mga Kristohanon.—2 Timoteo 3:1-5.

Nganong lisod man kaayo kining kataposang mga adlaw? Aw, nahibalo si Satanas nga “hamubo na lamang ang iyang panahon” sa pagpakiggubat sa katawhan sa Diyos. Busa, misamot ang iyang pagpaningkamot nga bungkagon ang ilang pagtuo. (Pinadayag 12:12, 17) Apan aduna kitay tabang ug giya. Si Jehova nagpadayon nga usa ka dangpanan niadtong mamati sa iyang tambag. (2 Samuel 22:31) Iya kitang gihatagan ug mga pananglitan nga nagyagyag sa malipatlipaton ug daotang mga laraw ni Satanas. Atong repasohon karon ang duha ka pananglitan sa nasod sa Israel sa dihang hapit na silang makaabot sa Yutang Saad.—1 Corinto 10:11; 2 Corinto 2:11.

Duol sa Yutang Saad

Tungod sa pagpanguna ni Moises kanila, ang katawhan sa Israel nakagawas sa Ehipto. Sa wala madugay, nakaabot na sila duol sa habagatang utlanan sa Yutang Saad. Unya gipadala ni Moises ang 12 ka tawo aron mangespiya sa yuta. Ang napulo ka way-pagtuong mga espiya mibalik nga may daotang taho, nga nag-ingon nga ang Israel dili molampos sa pagpakig-away batok sa mga Canaanhon tungod kay sila “dagko kaayo” ug hawod sa panggubatan. Unsay reaksiyon sa mga Israelinhon? Ang asoy nagsaysay nga sila misugod sa pagbagulbol batok kang Moises ug Aaron, nga miingon: “Nganong si Jehova nagdala kanato niining yutaa aron mapukan pinaagi sa espada? Ang atong  mga asawa ug ang atong mga anak mamahimong mga binihag. . . . Magtudlo kita ug usa ka pangulo, ug mamalik kita sa Ehipto!”—Numeros 13:1, 2, 28-32; 14:1-4.

Tiaw mo na! Kining mga tawhana mismo nakakita nga gipakaulawan ni Jehova ang gamhanang Ehipto—ang labing gamhanang nasod sa kalibotan niadtong panahona—pinaagi sa napulo ka malaglagong mga hampak ug sa usa ka kahibulongang milagro didto sa Pulang Dagat. Ug diha na sa ilang atubangan ang Yutang Saad, mao nga kinahanglang moabante na lang sila sama nga ang barko morumbo sa usa ka parola nga maoy timailhan sa destinasyon niini. Bisan pa niana, sila nagtuo nga si Jehova walay katakos sa pagpukan sa gagmay ug nabahinbahing mga siyudad-gingharian sa Canaan. Ang maong kawalay-pagtuo nakapahigawad gayod sa Diyos ug sa duha ka maisogong mga espiya, si Josue ug Caleb, kinsa mibati nga ang Canaan samag “tinapay alang [sa Israel]”! Nahibalo sila kay ilang nasiksik ang tibuok Canaan. Sa dihang ang katawhan wala mosulod sa Yutang Saad, nagpadayon usab si Josue ug Caleb sa paglatagaw sa kamingawan sulod sa daghang katuigan apan wala sila mamatay didto uban sa mga walay pagtuo. Gani, gitabangan ni Josue ug Caleb ang sunod nga kaliwatan aron makagawas sila sa kamingawan ug mopaingon sa Yutang Saad. (Numeros 14:9, 30) Sa nagsingabot na sila sa Yutang Saad sa ikaduhang higayon, nakaatubang ang Israel ug laing pagsulay. Unsay ilang gidangatan?

Gisulayan ni Haring Balak sa Moab ang pagtunglo sa Israel pinaagi sa mini nga manalagnang si Balaam. Ugaling, napakyas ang maong daotang laraw tungod kay gipahinabo ni Jehova nga si Balaam molitok hinuon ug mga panalangin imbes mga tunglo. (Numeros 22:1-7;  24:10) Bisan pa sa maong kapakyasan, si Balaam wala mabugnaw. Hinuon, nagmugna siyag laing daotang laraw sa tuyo nga ang katawhan sa Diyos dili na takos nga makapanunod sa yuta. Sa unsang paagi? Pinaagi sa pagtental kanila sa pagbuhat ug imoralidad ug sa pagsimba kang Baal. Bisan tuod sa katibuk-an napakyas ang maong laraw, may natental nga 24,000 ka Israelinhon. Sila nakighilawas sa mga kababayen-an sa Moab ug nakiglambigit sa Baal sa Peor.—Numeros 25:1-9.

Hunahunaa ra kana! Daghan sa mao ra gihapong mga Israelinhon ang nakakita nga si Jehova nag-agak kanila nga luwas latas sa “dako ug makalilisang nga kamingawan.” (Deuteronomio 1:19) Bisan pa niana, diha gayod sa ganghaan sa ilang panulondon, 24,000 sa katawhan sa Diyos ang nagpadaog sa unodnong mga pangibog ug gipatay ni Jehova. Pasidaan gayod kini alang sa mga alagad sa Diyos karon samtang nagkaduol na sila sa labi pang maayong panulondon!

Sa kataposang pagpaningkamot ni Satanas nga mapugngan ang mga alagad ni Jehova karon sa pagkadawat sa ilang ganti, siya wala magkinahanglan ug bag-ong mga estratehiya. Sa usa ka estratehiya nga magpahinumdom kanato sa nahitabo sa unang pagsingabot sa Israel sa Yutang Saad, kanunayng maningkamot si Satanas sa pagpukaw sa kahadlok ug pagduhaduha, pinaagi sa mga pagpanghulga, paglutos, o pagbiaybiay. Ang pipila ka Kristohanon nagpadaog sa maong panghadlok. (Mateo 13:20, 21) Ang laing malamposong laraw mao ang pagdaot sa moralidad sa tawo. Usahay, ang pipila nga nakayuhot sa Kristohanong kongregasyon naningkamot sa pagdaot sa mga mahuyang sa espirituwal ug wala magkinabuhi sumala sa kahayag nga gikan sa Diyos.—Judas 8, 12-16.

Alang niadtong hamtong ug nagtukaw sa espirituwal, ang daotan kaayong moralidad sa kalibotan maoy dakong pamatuod nga desperado na si Satanas. Nahibalo gayod siya nga sa dili madugay dili na siya makatandog sa maunongong mga alagad sa Diyos. Busa panahon na gayod karon nga kita magpabiling igmat sa mga paningkamot ni Satanas.

Tabang Aron Makapabiling Igmat sa Espirituwal

Gibatbat ni apostol Pedro ang matagnaong pulong sa Diyos ingong “usa ka lampara nga nagadan-ag sa usa ka dapit nga mangitngit,” tungod kay kini makatabang sa mga Kristohanon aron masabtan ang bug-os nga pagkatuman sa katuyoan sa Diyos. (2 Pedro 1:19-21) Kadtong makaugmad ug gugma sa Pulong sa Diyos ug padayong magpagiya niini makasabot nga si Jehova magatul-id sa ilang mga alagianan. (Proverbio 3:5, 6) Kay nahupngan sa paglaom, ang mga tawong mapasalamaton “managhugyaw sa kalipay tungod sa maayong kahimtang sa kasingkasing,” samtang kadtong wala makaila kang Jehova o mobiya sa iyang dalan mobati gayod ug “kasakit sa kasingkasing” ug “pagkahugno sa espiritu.” (Isaias 65:13, 14) Busa, pinaagi sa makugihong pagtuon sa Bibliya ug pagpadapat sa atong natun-an, ikapunting nato kanunay ang atong mga mata sa seguradong paglaom inay sa umalaging kalipayan niining presenteng sistema sa mga butang.

Ang pag-ampo hinungdanon usab sa atong pagpabiling nagtukaw sa espirituwal. Sa naghisgot bahin sa kataposan niining presenteng sistema, si Jesus miingon: “Nan, magpadayon sa pagtukaw, nga sa tanang panahon magapangamuyo aron molampos kamo sa pag-ikyas niining tanang butanga nga gitakdang mahitabo, ug sa pagbarog atubangan sa Anak sa tawo.” (Lucas 21:34-36) Matikdi ang paggamit ni Jesus sa pulong “magapangamuyo,” nga maoy usa ka sinsero kaayong matang sa pag-ampo. Nahibalo si Jesus nga niining makuyaw nga panahon posibleng dili na kita mahimong takos sa kinabuhing dayon. Gibanaag ba sa imong mga pag-ampo ang imong nagdilaab nga tinguha sa pagpabiling nagtukaw sa espirituwal?

Dili nato kalimtan nga ang labing peligrosong bahin sa atong panaw paingon sa atong panulondon tingali mao ang kataposang hugna sa atong biyahe. Busa, hinungdanon nga ipunting kanunay ang atong panan-aw sa kahayag nga motultol kanato ngadto sa kaluwasan.

Pagbantay sa Mini nga Kahayag

Panahon sa de-layag nga mga barko, nakahatag ug kapeligrohan ang mga tawong daotan nga gustog dili-bulanon nga mga gabii sa dihang lisod makita sa mga marinero ang baybayon. Tingali sila magbutang ug mga suga ubay sa peligrosong mga bahin sa baybayon sa paglimbong sa mga kapitan aron usbon ang ilang ruta. Tungod kay nalimbongan,  nalunod ang ilang mga barko, gipangawat ang ilang mga kargamento, ug may nakalas pa nga mga kinabuhi.

Sa susamang paagi, gustong bungkagon ni Satanas, ang malimbongong “manulonda sa kahayag,” ang relasyon sa mga alagad sa Diyos uban Kaniya. Mahimong gamiton sa Yawa ang “mini nga mga apostoles” ug ang apostatang “mga ministro sa pagkamatarong” sa paglimbong sa di-mabinantayon nga mga tawo. (2 Corinto 11:13-15) Apan sama nga ang igmat, eksperyensiyadong kapitan ug mga tripulante dili daling malimbongan sa makapahisalaag nga mga kahayag, ang mga Kristohanon “nga pinaagi sa paggamit nakabansay sa ilang mga gahom sa pagsabot aron sa pag-ila sa maayo ug sa daotan” dili malimbongan sa mga tawong nagtudlo ug bakak nga mga pagtulon-an ug makadaot nga mga pilosopiya.—Hebreohanon 5:14; Pinadayag 2:2.

Ang mga marinero nagdalag listahan sa mga parola nga ilang maagian. Kini magpadayag sa mga kinaiyahan sa matag parola lakip na ang linaing signal niini. Ang The World Book Encyclopedia nag-ingon: “Ang mga marinero magtino gayod kon unsa nga parola ang ilang nakita ug kon asa kini nahimutang pinaagi sa pag-obserbar sa kinaiyahan niini ug pagkonsulta sa listahan.” Sa susamang paagi, ang Pulong sa Diyos motabang sa mga tawong matinud-anog kasingkasing sa pag-ila sa matuod nga pagsimba ug sa katawhan nga nagtuman niini, ilabina niining kataposang mga adlaw sa dihang kini gituboy ni Jehova ibabaw sa bakak nga relihiyon. (Isaias 2:2, 3; Malaquias 3:18) Sa pagpakita sa dakong kalainan tali sa matuod ug sa bakak nga pagsimba, ang Isaias 60:2, 3 nag-ingon: “Ang kangitngit mismo motabon sa yuta, ug ang bagang kangiob sa nasodnong mga pundok; apan diha kanimo si Jehova mosidlak, ug diha kanimo ang iyang kaugalingong himaya makita. Ug mga nasod tinong manganha sa imong kahayag, ug mga hari nganha sa kasanag sa imong pagsidlak.”

Samtang ang minilyon gikan sa tanang kanasoran padayong magpagiya sa kahayag ni Jehova, ang ilang pagtuo magpabiling lig-on niining kataposang hugna sa ilang panaw. Busa sila luwas nga molatas sa nahibiling mga adlaw niining presenteng sistema ug mosulod sa malinawon nga bag-ong kalibotan.

[Footnote]

[Hulagway sa panid 15]

Sama sa mga marinero, magbantay ang mga Kristohanon nga dili sila malimbongan sa makapahisalaag nga mga kahayag