Siracusa​—⁠Gihapitan sa Barko nga Gisakyan ni Pablo

SA MGA tuig 59 K.P., ang usa ka barko milawig paingon sa Italya gikan sa isla sa Malta sa Mediteranyo. Sa dulong sa maong barko dihay larawan sa “Mga Anak nga Lalaki ni Zeus,” ang mga diyosdiyos nga giisip nga mga tigpanalipod sa mga marinero. Giasoy ni Lucas, nga magsusulat sa Bibliya, nga ang barko ‘midunggo sa Siracusa’ sa habagatan-silangang baybayon sa Sicilia ug “nagpabilin ug tulo ka adlaw.” (Buhat 28:11, 12) Nagsakay sa barko nga kauban ni Lucas mao si Aristarko ug si apostol Pablo, kinsa gidala sa Roma aron husayon.—Buhat 27:2.

Wala kita masayod kon gitugotan ba si Pablo sa pagkanaog sa Siracusa. Kon nakakanaog man siya o ang iyang mga kauban, unsa kahay ilang nakita?

Sa panahon sa mga Grego ug mga Romano, ang Siracusa halos katumbas sa Atenas ug Roma. Sumala sa tradisyon, gitukod kini sa mga taga-Corinto sa 734 W.K.P. May mga panahon nga mauswagon kaayo ang Siracusa ug dinhi natawo ang bantogang mga tawo sa karaang mga panahon, sama sa dramatorgo nga si Epicharmus ug ang matematisyan nga si Archimedes. Sa 212 W.K.P., gipukan sa mga Romano ang Siracusa.

Kon moduaw kita sa modernong siyudad, lagmit mahanduraw nato kon unsay dagway sa Siracusa sa panahon ni Pablo. Ang siyudad may duha ka bahin—ang usa didto sa gamayng isla sa Ortygia, diin didto lagmit midunggo ang barkong gisakyan ni Pablo, ug ang ikaduhang bahin didto sa dakong yuta.

Karong panahona, imong makita sa isla ang mga gun-ob sa labing karaang templo nga Gresyanhon ug arkitektura—ang templo ni Apollo nga gitukod pa sa ikaunom nga siglo W.K.P. May dagkong mga haligi usab ang usa ka templo nga gipahinungod kang Atena, nga gitukod pa sa ikalimang siglo W.K.P., apan kini gihimong bahin sa katedral.

Ang sentro sa modernong siyudad anaa sa dakong yuta, diin makasuroy ka sa arkeolohikal nga parke sa Neapolis. Duol sa entrada niini nagbarog ang Gresyanhong teatro. Kini maoy usa sa labing makapahinganghang panig-ingnan sa arkitektura sa Gresyanhong mga teatro. Tungod kay nag-atubang man sa dagat, kini nindot kaayong dapit alang sa mga pasundayag. Sa kinatumyang bahin sa habagatan sa parke nagbarog ang usa ka Romanhong ampiteatro nga gitukod sa ikatulong siglo K.P. Linginon kinig porma, 140 metros ang gitas-on ug 119 metros ang gilapdon, ug kini ang ikatulong kinadak-an sa Italya.

Kon makabisita ka sa Siracusa, makalingkod ka sa usa ka bangko nga nag-atubang sa dagat didto sa Ortygia, makaabli sa imong Bibliya sa Buhat 28:12, ug makahanduraw kang apostol Pablo nga nagsakay sa barko samtang naglawig paingon sa dunggoanan niini.

[Diagram/​Mapa sa panid 30]

(Alang sa aktuwal nga pagkahan-ay, tan-awa ang publikasyon)

Malta

Sicilia

Siracusa

ITALYA

Regio

Puteoli

Roma

[Hulagway sa panid 30]

Mga gun-ob sa usa ka Gresyanhong teatro sa Siracusa