“Ang Plata Akoa, ug ang Bulawan Akoa”

SA IKAUNOM nga siglo W.K.P., gipagawas ni Haring Ciro sa Persia ang katawhan sa Diyos gikan sa pagkabinihag sa Babilonya. Linibo kanila ang namalik sa Jerusalem aron tukoron pag-usab ang nagun-ob nga templo ni Jehova. Walay kasegurohan ang ilang panginabuhi didto, ug supak ang mga nasod sa palibot nga matukod pag-usab ang templo. Busa, dihay mga magtutukod nga nabalaka kon molampos ba ang maong proyekto.

Pinaagi ni manalagnang Haggeo, gipalig-on ni Jehova ang mga magtutukod nga Siya nagpaluyo kanila. Ang Diyos miingon: “Uyogon ko ang tanang kanasoran, ug ang tilinguhaong mga butang sa tanang kanasoran manulod; ug pun-on ko kining balaya sa himaya.” Maylabot sa problema sa mga magtutukod bahin sa panalapi, si Haggeo nag-ingon: “‘Ang plata akoa, ug ang bulawan akoa,’ mao ang giingon ni Jehova sa mga panon.” (Haggeo 2:7-9) Sulod lamang sa lima ka tuig sukad nga gibungat ni Haggeo kining makapadasig nga mga pulong, ang proyekto natapos.—Esdras 6:13-15.

Ang mga pulong ni Haggeo nakadasig usab sa mga alagad sa Diyos sa modernong panahon sa dihang sila naghimog dagkong mga proyekto nga nalangkit sa pagsimba kang Jehova. Sa 1879, sa dihang gisugdan pagpatik sa matinumanon ug maalamong ulipon kining magasina, nga gitawag kaniadto ug Zion’s Watch Tower and Herald of Christ’s Presence, kini nag-ingon: “Nagtuo kami nga si JEHOVA nagpaluyo sa ‘Zion’s Watch Tower,’ ug tungod niini, kini dili gayod magpakilimos ni mangayog pinansiyal nga tabang gikan sa mga tawo. Kon Siya, kinsa nag-ingon: ‘Ang tanang bulawan ug salapi sa kabukiran akoa,’ dili na makahatag sa gikinahanglang salapi, amo kining sabton nga panahon na nga ihunong ang pagpatik niini.”

Sukad niadto, ang pagpatik wala gayod mahunong. Ang unang gula niini adunay 6,000 ka kopya, nga mabatonan lamang sa Iningles. Karon, ang matag gula niini moaberids ug 28,578,000 ka kopya, sa 161 ka pinulongan. a Ang Pagmata!, nga kaubang magasin sa Bantayanang Torre, moaberids ug 34,267,000 ka kopya, sa 80 ka pinulongan.

Ang mga Saksi ni Jehova adunay daghang proyekto nga susamag katuyoan nianang sa Bantayanang Torre—ang pagbayaw kang Jehova ingong Soberanong Ginoo sa uniberso ug ang pagmantala sa maayong balita sa iyang Gingharian. (Mateo 24:14; Pinadayag 4:11) Ang mga Saksi karon adunay pagsalig nga susama sa gipamulong sa magpapatik niining magasina niadtong 1879. Sila nagtuo nga paluyohan sa Diyos ang ilang buluhaton ug siya magtagana ug salapi para sa mga proyekto nga iyang giuyonan. Apan, sa unsang paagi nabatonan ang salapi nga gisuportar sa kalihokan sa mga Saksi ni Jehova? Unsay ilang gibuhat aron molampos ang pagsangyaw sa maayong balita sa tibuok kalibotan?

Sa Unsang Paagi Gisuportahan ang Buluhaton?

Sa dihang magsangyaw ang mga Saksi ni Jehova, ang mga tawo sagad mangutana, “Duna ba moy suweldo?” Sa pagkatinuod wala silay suweldo. Kinabubut-on nilang gigugol ang ilang panahon sa maong buluhaton. Agig pagpasalamat kang Jehova, sila naggahin ug daghang oras sa pagmantala sa kamatuoran bahin kang Jehova ug sa maayong kaugmaon nga gisaad sa Bibliya. Ilang gipabilhan ang nahimo sa Diyos para kanila ug ang maayong epekto sa maayong balita diha sa ilang kinabuhi. Busa, gusto nilang ipaambit kining maayong mga butang ngadto sa  uban. Sa ingon, ilang gisunod ang prinsipyo nga gisulti ni Jesus: “Nadawat ninyo nga walay bayad, ihatag nga walay bayad.” (Mateo 10:8) Sa pagkatinuod, ang ilang tinguha nga mahimong saksi ni Jehova ug ni Jesus maoy nagpalihok kanila sa paggasto sa ilang kaugalingong salapi aron ipaambit sa uban ang kamatuoran nga ilang nakat-onan, bisan ngadto sa mga tawo sa lagyong mga dapit.—Isaias 43:10; Buhat 1:8.

Tungod sa kadako sa buluhaton ug sa mga kinahanglanon aron mapalampos kini—sama sa mga imprentahanan, opisina, Assembly Hall, puy-anan sa mga misyonaryo, ug uban pa—dakong salapi ang gikinahanglan. Diin man gikan ang salapi nga gigasto? Gikan kini sa boluntaryong mga amot. Wala pugsa sa mga Saksi ni Jehova ang mga membro niini sa pag-amot ug salapi aron suportahan ang mga kalihokan sa organisasyon, ug wala usab nila pabayri ang mga literatura nga ilang gitanyag sa publiko. Kon dunay gustong mohatag ug donasyon, ang mga Saksi malipay sa pagdawat niana. Tagdon nato ang usa ka buluhaton nga nalangkit sa pagsangyaw sa maayong balita sa tibuok kalibotan—ang paghubad.

Pagpatik ug mga Publikasyon sa 437 ka Pinulongan

Lakip sa mga basahon nga gihubad sa daghang pinulongan sulod na sa daghang katuigan mao ang mga publikasyon sa mga Saksi ni Jehova. Ang mga tract, brosyur, magasin, ug mga libro gihubad sa 437 ka pinulongan. Siyempre, ang paghubad nagkinahanglan usab ug dakong salapi sama sa ubang mga buluhaton nga nalangkit sa pagsangyaw sa maayong balita. Sa unsang paagi gihimo ang paghubad?

Sa dihang mahuman na sa mga editor sa publikasyon sa mga Saksi ni Jehova ang Iningles nga mga artikulo, kini ipadala ngadto sa mga tem sa maayong-pagkabansay nga mga maghuhubad sa lainlaing dapit sa kalibotan. Hubaron sa matag tem ang mga publikasyon diha sa ilang lokal nga pinulongan. Ang matag tem adunay 5 ngadto sa 25 ka membro depende sa gidaghanon sa mga publikasyon nga ilang hubaron  ug sa kakomplikado sa lokal nga pinulongan.

Kon ang artikulo mahubad na, kini itandi sa Iningles aron masusi kon tukma o tin-aw ba ang pagkahubad niini. Susihon usab kon husto ang espeling ug puntuwasyon ug kon natural ba kining basahon. Dili sayon kining trabahoa. Kon ang mga artikulo adunay mga termino nga lisod hubaron, ang mga maghuhubad ug tigtsek (proofreader) manukidukig maayo aron masabtan ang Iningles ug mahubad kini sa tukmang paagi. Pananglitan, sa dihang ang artikulo sa Pagmata! maghisgot bahin sa siyensiya ug kasaysayan, ang mga maghuhubad kinahanglang manukidukig maayo.

Daghang maghuhubad, permanente ug dili permanente, ang nagtrabaho sa mga buhatan sa mga Saksi ni Jehova. Ang uban didto mismo magtrabaho sa dapit diin gisulti ang ilang pinulongan. Sila walay mga suweldo. Ang permanenteng mga maghuhubad gitagan-ag kapuy-an ug gamayng alawans para sa personal nga mga galastohan. Sa tibuok kalibotan, mga 2,800 ka Saksi ang nag-alagad ingong mga maghuhubad. Sa pagkakaron, ang paghubad gipahigayon sa 98 ka sangang buhatan sa mga Saksi ni Jehova, ug ang pipila niini nagdumala usab ug mga tem sa maghuhubad nga anaa sa laing dapit. Ingong pananglitan, ang buhatan sa Rusya nagdumalag kapin sa 230 ka permanente ug dili-permanenteng mga maghuhubad sa kapig 30 ka pinulongan, lakip na ang Chuvash, Ossetian, ug Uighur—mga pinulongan nga wala kaayo mailhi sa mga tawo sa laing lugar.

Pagpauswag sa Kalidad sa Paghubad

Sama sa nasayran sa usa ka tawo nga nagtuon ug laing pinulongan, dili sayon ang paghubad ug komplikadong mga ideya sa tukmang paagi. Gawas nga hubaron ang Iningles sa tukmang paagi, kinahanglan usab nga natural kining basahon nga morag gisulat kini diha mismo sa lokal nga pinulongan. Aron mahimo kini, gikinahanglan ang igong katakos. Nagkinahanglan ug taas nga panahon aron mabatid ang usa sa paghubad, ug ang mga Saksi ni Jehova nagtaganag mga programa sa pagbansay kanila. Ang mga instruktor moduaw usahay sa  mga tem aron motabang sa pagpauswag sa ilang kahanas sa paghubad ug sa pagbansay kanila sa paggamit ug kompiyuter.

Kini nga mga pagbansay adunay maayong mga resulta. Pananglitan, ang buhatan sa mga Saksi ni Jehova sa Nicaragua nagtaho: “Karon pa gyod nahitabo nga ang mga maghuhubad sa Miskito gibansay sa usa ka instruktor gikan sa buhatan sa Mexico bahin sa pamaagi ug mga teknik sa paghubad. Dako kinig natabang sa among mga maghuhubad diha sa ilang buluhaton. Miuswag gayod ang kalidad sa paghubad.”

Mga Pulong nga Makatukbil sa Kasingkasing

Gipaningkamotan nga mahubad ang Bibliya ug ang binase-sa-Bibliya nga mga basahon diha sa lumad nga pinulongan sa mga tawo aron matukbil ang ilang kasingkasing. Tuod man, ang maong tumong nagmalamposon gayod. Sa 2006, ang mga Saksi ni Jehova sa Bulgaria nalipay sa dihang giluwatan ang Bag-ong Kalibotang Hubad sa Kristohanon Gregong Kasulatan sa Bulgariano. Sumala pa sa taho sa sangang buhatan didto, mapasalamaton gayod niini ang mga Saksi didto. Ang mga membro sa kongregasyon nag-ingon nga “kini nakatukbil, dili lang sa ilang hunahuna, kondili sa ilang kasingkasing usab.” Usa ka tigulang lalaki nga taga-Sofia miingon: “Kadaghan na nako mabasa ang Bibliya, apan karon pa ko makabasa ug hubad nga sayon sabton ug modulot gayod sa kasingkasing.” Sa Albania usab, human makadawat ug kopya sa tibuok Bag-ong Kalibotang Hubad sa Albaniano, usa ka Saksi didto ang mikomento: “Pagkanindot paminawon sa Pulong sa Diyos sa Albaniano! Dako  gayong kadungganan nga si Jehova nakigsulti kanamo sa among pinulongan!”

Dangtan tingalig daghang tuig ang paghubad sa tibuok Bibliya. Apan, kon tungod niini masabtan na sa minilyong mga tawo ang Pulong sa Diyos, dili ba takos ang maong paningkamot?

‘Kita mga Isigkamagbubuhat sa Diyos’

Siyempre, ang paghubad usa lamang sa daghang buluhaton nga gikinahanglan aron molampos ang pagsangyaw sa maayong balita. Ang pagsulat, pag-imprenta, ug pagpadala sa binase-sa-Bibliya nga mga publikasyon ug ang uban pang mga buluhaton diha sa mga buhatan, sirkito, ug sa kongregasyon sa mga Saksi ni Jehova nagkinahanglag kusog ug salapi. Apan, ang katawhan sa Diyos ‘nagtanyag sa ilang kaugalingon nga kinabubut-on’ sa pagtuman niini nga buluhaton. (Salmo 110:3) Ilang giisip nga pribilehiyo ug kadungganan ang pagsuportar niini, ug ingong resulta, si Jehova nag-isip kanila nga iyang mga “isigkamagbubuhat.”—1 Corinto 3:5-9.

Tinuod, siya nga nag-ingon, “ang plata akoa, ug ang bulawan akoa,” wala magdepende sa atong amot aron molampos ang iyang buluhaton. Apan, gihatagan ni Jehova ug pribilehiyo ang iyang mga alagad nga makaambit sa pagbalaan sa iyang ngalan pinaagi sa pag-amot ug salapi aron masangyaw ang nagaluwas-ug-kinabuhi nga kamatuoran “ngadto sa tanang kanasoran.” (Mateo 24:14; 28:19, 20) Dili ba madasig ka sa paghimo sa tanan nimong maarangan sa pagsuportar niining dili-na-masubli pa nga buluhaton?

[Footnote]

[Kahon sa panid 18]

“NAKAPAMALANDONG GAYOD KAMI TUNGOD NIINI”

Usa ka 14 anyos nga dalagita ang misulat sa buhatan sa mga Saksi ni Jehova sa Cameroon: “Human makapalit sa akong mga kinahanglanon sa eskuylahan niining tuiga, akong gibaligya ang duha sa akong mga teksbok sa miaging tuig nga mibalor ug 2,500 francs [₱228]. Akong iamot kining kuwartaha ug ang 910 francs [₱83] nga akong tinigom. Hinaot magpadayon kamo sa inyong maayong buhat. Salamat sa mga magasing Bantayanang Torre ug Pagmata! Nakapamalandong gayod kami tungod niini.”

[Kahon/​Hulagway sa panid 18]

TALAGSAONG DONASYON

Ang buhatan sa mga Saksi ni Jehova sa Mexico nakadawat ug sulat gikan kang Manuel, usa ka mapasalamaton nga bata sa Estado sa Chiapas nga nag-edad ug sayis anyos. Kay di pa man siya makamaong mosulat, nagpatabang siya sa iyang amigo. Si Manuel miingon: “Gihatagan kog anay sa akong lola. Sa dihang nanganak kini, gipili nako ang kinahimsogan nga baktin ug gibuhi kini uban sa tabang sa mga igsoon. Kinasingkasing nakong iamot ang halin sa akong baboy. Mitimbang kinig 100 kilos ug 1,250 pesos [₱5,025] ang halin. Palihog gamita ang kuwarta para kang Jehova.”

[Kahon sa panid 19]

‘GAMITA KINI SA PAGHUBAD SA BIBLIYA’

Sa 2005 nga distritong kombensiyon sa mga Saksi ni Jehova sa Ukraine, giluwatan ang Bag-ong Kalibotang Hubad sa Kristohanon Gregong Kasulatan sa pinulongang Ukrainiano. Pagkasunod adlaw, nakuha kining sulata diha sa kahon sa donasyon: “Ako nuybe anyos. Daghan kaayong salamat sa Gregong Kasulatan. Ang among inahan maghatagan kanamo ug kuwarta sa akong manghod nga lalaki aron iplete sa bus paingon sa eskuylahan. Kon dili mag-ulan, magbaktas ra mi mao nga nakatigom mig 50 hryvnia [₱456]. Gusto namo nga gamiton ninyo kining kuwartaha sa paghubad sa tibuok Bibliya ngadto sa Ukrainiano.”

[Kahon sa panid 20]

MGA PAAGI SA PAGHATAG NGA GIPILI SA UBAN

MGA AMOT ALANG SA TIBUOK-KALIBOTANG BULUHATON

Daghan ang naggahin o nagbadyet ug salapi nga ilang ihulog diha sa mga kahon sa kontribusyon nga gimarkahan ug “Contributions for the Worldwide Work—Matthew 24:14.”

Matag bulan, ipadala sa mga kongregasyon kining maong salapi ngadto sa sangang buhatan sa mga Saksi ni Jehova nga nagdumala sa ilang nasod. Ang kinabubut-on nga mga donasyong salapi mahimong ipadala usab nga direkta ngadto sa Watch Tower Bible and Tract Society of the Philippines, Inc., P.O. Box 2044, 1060 Manila, o sa sangang buhatan sa mga Saksi ni Jehova nga nagdumala sa inyong nasod. Ang mga tseke nga ipadala sa adres sa ibabaw kinahanglang himoon nga payable to “Watch Tower.” Ang mga alahas o ubang mahalong mga butang mahimong idonar usab. Ang mubong sulat nga nagpahayag nga kana maoy direkta nga gasa angayng ipasukip sa maong mga amot.

CONDITIONAL-DONATION TRUST ARRANGEMENT

Ang salapi mahimong ibutang nga in trust with Watch Tower aron magamit sa tibuok kalibotan. Apan, kon ang nagdonar mohangyo niana, ang salapi ibalik kaniya. Alang sa dugang impormasyon, palihog kontaka ang Treasurer’s Office sa adres nga gitala dinhi.

CHARITABLE PLANNING

Gawas pa sa direkta nga mga gasang salapi, adunay ubang mga paagi sa paghatag aron makatabang sa buluhaton sa Gingharian sa tibuok kalibotan. Kini naglakip sa:

Insyurans: Ang Watch Tower mahimong himoon nga benepisyaryo sa usa ka polisa sa life insurance o sa usa ka programa sa pagretiro/pensiyon.

Mga Pondo sa Bangko: Ang mga pondo sa bangko, sertipiko sa deposito, o indibiduwal nga mga pondo sa pagretiro mahimong ibutang nga in trust for o himoong payable on death ngadto sa Watch Tower, nga nahiuyon sa mga kinahanglanon sa lokal nga bangko.

Stocks and Bonds: Ang mga stock o aksiyones ug mga bond mahimong idonar ngadto sa Watch Tower ingong direkta nga gasa.

Balay ug Yuta: Ang ikabaligya nga balay ug yuta mahimong idonar pinaagi kaha sa deretsong paghatag isip gasa o, sa kahimtang sa residensiyal nga propiedad, pinaagi sa pagreserba sa balay o yuta sa nagdonar, kinsa mahimong magpadayon sa pagpuyo diha niana samtang buhi pa siya. Kontaka ang sangang buhatan sa inyong nasod sa dili pa buhatag papeles ang bisan unsang balay o yuta.

Gift Annuity: Ang gift annuity maoy usa ka kahikayan diin ibalhin sa usa ang iyang salapi o mga deposito ngadto sa usa ka tinudlo nga korporasyon nga gigamit sa mga Saksi ni Jehova. Sa baylo, ang nagdonar, o ang usa nga gitudlo sa nagdonar, modawat ug usa ka tino nga bayad matag tuig sa tibuok niyang kinabuhi. Ang buhis sa kinitaan (income tax) sa nagdonar makunhoran sa tuig nga gisugdan ang gift annuity.

Wills and Trusts: Ang propiedad o salapi mahimong ikabilin ngadto sa Watch Tower pinaagi sa usa ka legal nga testamento, o ang Watch Tower mahimong himoon nga benepisyaryo sa usa ka trust agreement. Ang trust nga mapanunod sa usa ka relihiyosong organisasyon mahimong adunay pipila ka bentaha sa buluhisan.

Ingon sa gipasabot sa terminong “charitable planning” o pagplano alang sa buhat sa kaluoy, kining mga matanga sa donasyon kasagarang manginahanglan ug pagplano sa bahin sa nagdonar. Aron maabagan ang mga indibiduwal nga gustong motabang sa tibuok-kalibotang buluhaton sa mga Saksi ni Jehova pinaagi sa usa ka matang sa pagplano alang sa buhat sa kaluoy, gihimo ang Iningles ug Kinatsila nga brosyur nga nag-ulohang Charitable Planning to Benefit Kingdom Service Worldwide. Ipatin-aw niini nga brosyur ang impormasyon kon sa unsang mga paagi mahimong ihatag ang mga gasa karon o kon unsay mga pamaagi sa pagbilin sa panulondon inigkamatay. Human mabasa ang brosyur ug makonsulta ang ilang mga magtatambag bahin sa legal nga mga butang o sa buhis, daghan ang nakatabang sa pagsuportar sa relihiyoso ug makitawhanon nga kalihokan sa mga Saksi ni Jehova sa tibuok kalibotan ug namenosan ang ilang bayranan sa buhis samtang nagbuhat niini. Kining brosyura mahimong mabatonan pinaagi sa pagpangayo ug kopya nga direkta gikan sa Charitable Planning Office.

Alang sa dugang impormasyon, mahimong kontakon nimo ang Charitable Planning Office, pinaagi sa sulat o sa telepono, diha sa adres nga gilista sa ubos, o mahimong kontakon nimo ang sangang buhatan sa mga Saksi ni Jehova nga nagdumala sa inyong nasod.

Charitable Planning Office

Watch Tower Bible and Tract Society of the Philippines, Inc.

186 Roosevelt Avenue,

San Francisco del Monte 1105 Quezon City

Telepono: (02) 411-6090

[Mga hulagway sa panid 19]

Mga maghuhubad sa Miskito sa buhatan sa Nicaragua