Dili Gayod Mapakyas ang Pulong ni Jehova

“Walay usa ka pulong gikan sa tanang maayong pulong nga gisulti ni Jehova nga inyong Diyos kaninyo nga napakyas. Kining tanan natuman alang kaninyo.”—JOSUE 23:14.

1. Kinsa si Josue, ug unsay iyang gihimo sa hinapos nga bahin sa iyang kinabuhi?

 SIYA abtik ug isog nga komander sa militar, usa ka tawo nga lig-on ug pagtuo ug matul-id. Siya kauban ni Moises ug gipili ni Jehova aron manguna sa nasod sa Israel sa paglatas sa makalilisang nga kamingawan ug pagsulod sa yuta nga nagaagay sa gatas ug dugos. Sa hinapos nga bahin sa iyang kinabuhi, kining tinamod kaayo nga tawo, si Josue, mihatag ug pakigpulong nga nakapatandog sa kasingkasing sa mga ansiyano sa Israel. Sa walay duhaduha, napalig-on ang pagtuo niadtong nakadungog sa maong panamilit nga pakigpulong. Mapalig-on usab niini ang imong pagtuo.

2, 3. Sa dihang nakigsulti si Josue sa mga ansiyano sa Israel, unsay kahimtang sa nasod, ug unsay giingon ni Josue?

² Handurawa ang kahimtang, ingon sa paghubit niana sa Bibliya: “Nahitabo pagkatapos sa daghang adlaw human mahatagi ni Jehova ang Israel ug pahulay gikan sa tanan nilang mga kaaway sa palibot, sa dihang si Josue tigulang na ug taas nag panuigon, nga gitawag ni Josue ang tibuok Israel, ang mga ansiyano niini ug ang mga pangulo niini ug ang mga maghuhukom niini ug ang mga opisyal niini, ug miingon kanila: ‘Kon bahin kanako, ako tigulang na, ako taas nag panuigon.’”—Josue 23:1, 2.

³ Si Josue mag-110 anyos na ug siya nabuhi panahon sa usa sa labing kulbahinam nga mga yugto sa kasaysayan sa katawhan sa Diyos. Nasaksihan niya ang gamhanang mga buhat sa Diyos, ug nakita niya ang katumanan sa mga saad ni Jehova. Tungod niana, masaligon kaayo siyang miingon: “Kamo nahibalo pag-ayo sa bug-os ninyong kasingkasing ug sa bug-os ninyong kalag nga walay usa ka pulong gikan sa tanang maayong pulong nga gisulti ni Jehova nga inyong Diyos kaninyo nga napakyas. Kining tanan natuman alang kaninyo. Walay usa ka pulong kanila nga napakyas.”—Josue 23:14.

4. Unsay gisaad ni Jehova sa mga Israelinhon?

⁴ Unsang mga pulong ni Jehova ang natuman sa panahon ni Josue? Atong hisgotan ang tulo ka butang nga gisaad ni Jehova sa mga Israelinhon. Una, luwason sila sa Diyos gikan sa pagkaulipon. Ikaduha, iyang panalipdan sila. Ikatulo, iyang atimanon sila. Susama usab niana ang gisaad ni Jehova sa iyang katawhan karon, ug ato usab kanang nakita nga natuman sa atong panahon. Apan, sa dili pa nato hisgotan kon unsay nahimo ni Jehova sa atong panahon, ato unang hisgotan ang iyang gibuhat sa adlaw ni Josue.

Si Jehova Nagluwas sa Iyang Katawhan

5, 6. Sa unsang paagi giluwas ni Jehova ang mga Israelinhon gikan sa Ehipto, ug unsay gipakita niini?

⁵ Sa dihang ang mga Israelinhon mituaw sa Diyos tungod sa ilang pagkaulipon didto sa Ehipto, sila gidungog ni Jehova. (Exodo 2:23-25) Diha sa nagdilaab nga kupongkupong, si Jehova miingon kang Moises: “Manaog ako sa pagluwas [sa akong katawhan] gikan sa kamot sa mga Ehiptohanon ug sa pagpagawas kanila gikan sa maong yuta ngadto sa usa ka yuta nga maayo ug haluag, ngadto sa usa ka yuta nga nagaagay sa gatas ug dugos.” (Exodo 3:8) Pagkamakalilipay nga makitang gituman kini ni Jehova! Sa dihang nagdumili si Paraon sa pagpagawas sa Israel gikan sa Ehipto, giingnan siya ni Moises nga ang tubig sa Nilo himoon sa Diyos nga dugo. Natuman gayod ang giingon ni Jehova. Ang Suba sa Nilo nahimong dugo. Ang mga isda nangamatay, ug ang tubig dili na mainom. (Exodo 7:14-21) Apan nagmagahi si Paraon. Busa gipadangat ni Jehova ang siyam pa  ka hampak ug iyang gihubit daan ang matag usa niini sa wala pa niya kini ipahinabo. (Exodo, kapitulo 8-12) Sa ikanapulo ka hampak, nangamatay ang mga panganay sa Ehipto. Tungod niini, gimandoan ni Paraon ang mga Israelinhon sa pagbiya sa Ehipto—ug mibiya gayod sila!—Exodo 12:29-32.

⁶ Human sa maong pagluwas, gisagop ni Jehova ang Israel ingong iyang pinili nga nasod. Gibayaw niini si Jehova ingong Magtutuman sa mga saad, ang usa kansang mga pulong dili gayod mapakyas. Gipakita niini nga si Jehova labaw gayod kay sa mga diyos sa mga nasod. Makapalig-on gayod sa pagtuo ang pagbasa niana nga mga asoy sa pagluwas. Handurawa lang kon unsay imong bation kon ikaw atua didto! Nakita ni Josue nga si Jehova mao gayod “ang Labing Hataas ibabaw sa tibuok nga yuta.”—Salmo 83:18.

Si Jehova Nanalipod sa Iyang Katawhan

7. Sa unsang paagi gipanalipdan ni Jehova ang mga Israelinhon batok sa kasundalohan ni Paraon?

⁷ Komosta ang ikaduhang saad nga si Jehova manalipod sa iyang katawhan? Dayag kaayo kini diha sa saad ni Jehova nga iyang luwason ang mga Israelinhon gikan sa Ehipto ug papuy-on sila sa Yutang Saad. Hinumdomi nga si Paraon naglungotlungot paggukod sa Israel uban sa iyang gamhanang kasundalohan nga nasangkapan sa gatosan ka karo. Sa walay duhaduha, kompiyansa kaayo ang maong mapahitas-ong hari, ilabina sa dihang ang mga Israelinhon daw natanggong tali sa kabukiran ug sa dagat. Nianang tungora milihok ang Diyos aron sa pagpanalipod sa iyang katawhan pinaagi sa pagpatunghag panganod tali sa magkaatbang nga kampo. Ngiob ang kampo sa mga Ehiptohanon apan ang kampo sa mga Israelinhon hayag. Samtang napugngan sa panganod ang pagdasdas sa mga Ehiptohanon, giisa ni Moises ang iyang sungkod ug ang Pulang Dagat natunga, nga nagtaganag kaikyasan alang sa mga Israelinhon apan nahimong laang alang sa mga Ehiptohanon. Bug-os nga gilaglag ni Jehova ang gamhanang kasundalohan ni Paraon ug gipanalipdan ang iyang katawhan gikan sa tinong kapildihan.—Exodo 14:19-28.

8. Sa unsang paagi gipanalipdan ang mga Israelinhon (a) sa kamingawan (b) sa dihang sila misulod na sa Yutang Saad?

⁸ Human makatabok sa Pulang Dagat, ang mga Israelinhon naglaaglaag sa yuta nga gihubit ingong “dako ug makalilisang nga kamingawan, nga may malala nga mga halas ug mga tanga ug uhaw nga yuta nga walay tubig.” (Deuteronomio 8:15) Didto, gipanalipdan gihapon sila ni Jehova. Komosta sa dihang sila mosuloray na sa Yutang Saad? Ang gamhanang kasundalohan sa Canaan mibabag kanila. Apan, si Jehova miingon kang Josue: “Tindog, tabok niining Jordan, ikaw ug kining tibuok katawhan, ngadto sa yuta nga ihatag ko kanila, ngadto sa mga anak sa Israel. Walay makabarog nga lig-on sa imong atubangan sa  tanang adlaw sa imong kinabuhi. Ingon nga ako nag-uban kang Moises ako magauban kanimo. Dili ko ikaw talikdan ni biyaan sa bug-os.” (Josue 1:2, 5) Natuman gayod ang gipamulong ni Jehova. Wala dangtig unom ka tuig, naparot na ni Josue ang 31 ka hari ug nasakop niya ang dakong bahin sa Yutang Saad. (Josue 12:7-24) Dili gayod unta sila makadaog kon wala pa sila panalipdi ni Jehova.

Si Jehova Nag-atiman sa Iyang Katawhan

9, 10. Sa unsang paagi giatiman ni Jehova ang iyang katawhan didto sa kamingawan?

⁹ Tagda karon ang ikatulong saad nga si Jehova mag-atiman sa iyang katawhan. Wala madugay human sila maluwas gikan sa Ehipto, ang Diyos nagsaad sa mga Israelinhon: “Ania, ako magapaulan ug tinapay alang kaninyo gikan sa langit; ug ang katawhan manggula gayod ug ang tagsatagsa mamunit sa gidaghanon nga igo kaniya sa matag adlaw.” Tuod man, ang Diyos nagpaulan ug ‘tinapay gikan sa langit.’ “Sa dihang nakita kini sa mga anak sa Israel, sila miingon sa usag usa: ‘Unsa ba kini?’” Kadto maoy mana, ang tinapay nga gisaad ni Jehova kanila.—Exodo 16:4, 13-15.

¹⁰ Sulod sa 40 ka tuig diha sa kamingawan, si Jehova nag-atiman sa mga Israelinhon, nga nagtagana kanilag pagkaon ug tubig. Giseguro pa gani niya nga ang ilang mga kupo dili madunot ni manghubag ang ilang mga tiil. (Deuteronomio 8:3, 4) Nasaksihan ni Josue kanang tanan. Si Jehova nagluwas, nanalipod, ug nag-atiman sa iyang katawhan, ingon sa iyang gisaad kanila.

Pagluwas nga Nahitabo sa Modernong Panahon

11. Unsay nahitabo sa Brooklyn, New York, niadtong 1914, ug panahon na kadto sa unsa?

¹¹ Komosta sa atong panahon? Sa Biyernes sa buntag, Oktubre 2, 1914, si Charles Taze Russell, nga maoy nanguna sa buluhaton sa mga Estudyante sa Bibliya niadtong panahona, misulod sa lawak kan-anan sa Bethel sa Brooklyn, New York ug malipayong miingon: “Maayong buntag kaninyong tanan.” Unya, sa wala pa siya molingkod, siya maikagong nagpahibalo: “Ang panahon sa mga Hentil natapos na; ang pagmando sa ilang mga hari natapos na.” Panahon na usab nga si Jehova, ang Soberano sa uniberso, molihok aron sa pagluwas sa iyang katawhan. Gibuhat gayod niya kana!

12. Unsang pagluwas ang nahitabo sa 1919, ug unsay resulta niini?

¹² Lima lang ka tuig human niana, giluwas ni Jehova ang iyang katawhan gikan sa “Dakong Babilonya,” ang gamhanan, tibuok-kalibotang imperyo sa bakak nga relihiyon. (Pinadayag 18:2) Pipila na lang ang nahibilin karon nga nakasaksi nianang kulbahinam nga pagluwas. Apan, tataw kaayo ang mga resulta. Gipasig-uli ni Jehova ang putli nga pagsimba ug gihiusa kadtong gustong mosimba kaniya. Gitagna kini ni manalagnang Isaias: “Mahitabo sa kaulahiang bahin sa mga adlaw nga ang bukid sa balay ni Jehova lig-ong matukod ibabaw sa tumoy sa kabukiran, ug kini igatuboy gayod ibabaw sa kabungtoran; ug nganha niini ang tanang kanasoran magaganayan.”—Isaias 2:2.

13. Unsay nakita nimong pag-uswag sa gidaghanon sa mga Saksi ni Jehova?

 ¹³ Wala gayod mapakyas ang gipamulong ni Isaias. Sa 1919, maisogong gisugdan sa dinihogang nanghibilin ang tibuok-kalibotang pagsangyaw nga nagbayaw sa pagsimba sa matuod nga Diyos. Sa katuigan sa 1930, nadayag nga ang “ubang mga karnero” gisugdan na sa pagtigom. (Juan 10:16) Sa sinugdan mikabat lamang silag pipila ka libo, dayon gatosan ka libo, ug karon milyonmilyon na ang nagpaluyo sa putli nga pagsimba! Sa panan-awon nga nakita ni apostol Juan, sila gihubit ingong “usa ka dakong panon, nga walay tawong makaihap, gikan sa tanang kanasoran ug mga tribo ug katawhan ug mga pinulongan.” (Pinadayag 7:9) Unsang pag-uswag ang imong nakita sa imong panahon? Pilay Saksi ni Jehova sa dihang nakadangat ka sa kamatuoran? Sa pagkakaron, mokabat nag kapin sa 6,700,000 ang mga alagad ni Jehova. Pinaagi sa pagluwas sa iyang katawhan gikan sa Dakong Babilonya, gibuksan ni Jehova ang kahigayonan alang sa makalilipayng pag-uswag nga atong nakita karon sa tibuok kalibotan.

14. Unsang pagluwas ang himoon sa umaabot?

¹⁴ Aduna pay laing pagluwas nga himoon ni Jehova sa umaabot nga mag-apektar sa tanang buhi karon sa yuta. Sa makapahingangha nga pagpasundayag sa iyang gahom, paphaon ni Jehova ang tanang mosupak kaniya, ug iyang luwason ang iyang katawhan ug papuy-on sila sa usa ka bag-ong kalibotan diin maglungtad ang pagkamatarong. Pagkamakalilipay unya nga makita ang kataposan sa pagkadaotan ug ang sinugdanan sa labing mahimayaong yugto sa tibuok kasaysayan sa tawo!—Pinadayag 21:1-4.

Si Jehova Nanalipod Kanato Karon

15. Nganong gikinahanglan ang panalipod ni Jehova sa atong panahon?

¹⁵ Atong nahibaloan nga ang mga Israelinhon sa adlaw ni Josue nagkinahanglan sa panalipod ni Jehova. Gikinahanglan ba usab kini karon? Oo! Si Jesus nagpasidaan sa iyang mga sumusunod: “Itugyan kamo sa mga tawo ngadto sa kasakitan ug pagapatyon kamo, ug kamo pagadumtan sa tanang kanasoran tungod sa akong ngalan.” (Mateo 24:9) Sulod sa daghang katuigan, ang mga Saksi ni Jehova sa lainlaing kayutaan nakaagom sa grabeng pagsupak ug mabangis nga paglutos. Bisan pa niana, napamatud-an nga si Jehova nagauban sa iyang katawhan. (Roma 8:31) Ang iyang Pulong nagpasalig kanato nga ‘walay hinagiban nga buhaton batok kanato’ ang makapahunong sa atong buluhaton nga pagsangyaw ug pagpanudlo bahin sa Gingharian.—Isaias 54:17.

16. Unsang pamatuod ang imong nakita nga si Jehova nanalipod sa iyang katawhan?

¹⁶ Bisan pag gidumtan sa kalibotan, ang katawhan ni Jehova nagpadayon sa pagdaghan. Ang  gidaghanon sa mga Saksi ni Jehova miuswag diha sa 236 ka kayutaan—usa gayod ka lig-ong pamatuod nga si Jehova nagauban kanato sa pagpanalipod kanato batok niadtong nagtinguha sa paglaglag o pagpahilom kanato. May mahinumdoman ka ba nga dagkong mga lider sa politika o sa relihiyon nga grabeng nagdaogdaog sa katawhan sa Diyos? Naunsa na man sila? Asa na man sila karon? Ang kadaghanan kanila nahanaw na, sama kang Paraon sa mga adlaw ni Moises ug Josue. Komosta ang mga alagad sa Diyos karon nga namatay nga matinumanon? Sila gitipigan diha sa panumdoman ni Jehova. Wala nay mas luwas nga dapit kay niana. Tataw nga kon bahin sa panalipod, natuman gayod ang gipamulong ni Jehova.

Si Jehova Nag-atiman sa Iyang Katawhan Karon

17. Unsay gisaad ni Jehova mahitungod sa espirituwal nga pagkaon?

¹⁷ Si Jehova nag-atiman sa iyang katawhan didto sa kamingawan, ug nag-atiman usab siya sa iyang katawhan karon. Iya kitang gipakaon sa espirituwal pinaagi sa “matinumanon ug maalamong ulipon.” (Mateo 24:45) Kita nakabaton ug kahibalo bahin sa espirituwal nga mga butang nga nagpabiling tinago sulod sa daghang siglo. Ang manulonda miingon kang Daniel: “Himoa nga tinago ang mga pulong ug timbrehi ang basahon, hangtod sa panahon sa kataposan. Daghan ang magngadto-nganhi, ug ang matuod nga kahibalo modagaya.”—Daniel 12:4.

18. Nganong ikaingon nga dagaya karon ang matuod nga kahibalo?

¹⁸ Nagkinabuhi na kita sa panahon sa kataposan, ug dagaya gayod karon ang matuod nga kahibalo. Sa tibuok kalibotan, ang balaang espiritu nagtabang sa mga mahigugmaon sa kamatuoran nga makadangat sa tukmang kahibalo bahin sa matuod nga Diyos ug sa iyang katuyoan. Daghan kaayog Bibliya karon, ug mao man usab ang mga publikasyon nga nagtabang sa mga tawo sa pagsabot sa bililhong mga kamatuoran nga anaa sa Bibliya. Tagda pananglitan ang kaundan sa librong Unsay Tinuod nga Gitudlo sa Bibliya? a Ang pipila ka ulohan sa mga kapitulo niini mao ang mosunod: “Unsa ang Kamatuoran Bahin sa Diyos?,” “Hain ang mga Patay?,” “Unsa ang Gingharian sa Diyos?,” ug “Nganong Gitugotan sa Diyos ang Pag-antos?” Dugay na kaayong gipalandong sa mga tawo kining mga pangutanaha. Karon, dali na lang mahibaloan ang mga tubag niini. Sulod sa daghang siglo, ang mga tawo walay alamag sa Bibliya ug ang Kakristiyanohan nagtudlog apostatang mga pagtulon-an, apan ang Pulong sa Diyos nagmadaogon, nga nagpalig-on sa tanan nga nagtinguha sa pag-alagad kang Jehova.

19. Unsang mga saad ang imong nakita nga natuman, ug unsay imong ikahinapos?

¹⁹ Sa ato nang nakita, masaligon kitang makaingon: “Walay usa ka pulong gikan sa tanang maayong pulong nga gisulti ni Jehova nga inyong Diyos kaninyo nga napakyas. Kining tanan natuman alang kaninyo. Walay usa ka pulong kanila nga napakyas.” (Josue 23:14) Si Jehova nagluwas, nanalipod, ug nag-atiman sa iyang mga alagad. Duna ka bay mahinumdoman nga saad ni Jehova nga wala niya tumana sa iyang gitakdang panahon? Wala gayod, dili ba? Busa maalamon nga mosalig kita sa Pulong sa Diyos.

²⁰ Komosta sa umaabot? Si Jehova nagsaad nga ang kadaghanan kanato may paglaom nga mabuhi sa usa ka paraisong yuta. Ang pipila kanato adunay paglaom nga magmando uban kang Kristo sa langit. Bisan unsa pay atong paglaom, may katarongan gayod kita sa pagpabiling matinumanon sama kang Josue. Sa dili madugay matuman na ang atong gilaoman. Nianang panahona, kita makapamalandong sa tanang gisaad ni Jehova kanato ug makaingon: ‘Kining tanan natuman gayod.’

[Footnote]

Makapatin-aw Ka Ba?

• Unsang mga saad ni Jehova ang nakita ni Josue nga natuman?

• Unsang mga saad sa Diyos ang imong nakita nga natuman?

• Nganong makasalig kita sa pulong sa Diyos?

[Mga Pangutana sa Pagtuon]

20. Nganong masaligon kita sa umaabot?

[Hulagway sa panid 23]

Si Jehova milihok aron sa pagluwas sa iyang katawhan

[Hulagway sa panid 23]

Sa unsang paagi gipanalipdan ni Jehova ang iyang katawhan didto sa Pulang Dagat?

[Hulagway sa panid 24]

Sa unsang paagi giatiman ni Jehova ang iyang katawhan didto sa kamingawan?

[Mga hulagway sa panid 25]

Si Jehova nag-atiman sa iyang katawhan karon