Gipahimuslan Mo ba ang Kahigayonan nga Makasangyaw?

“DUNA bay bug-os nga kamatuoran?” Mao kanay ulohan sa nasodnong kompetisyon sa pagsulat ug essay sa Polandia. Ang instruksiyon sa maong kompetisyon nag-ingon: “Kita wala magkinahanglan ug bug-os nga kamatuoran. Wala kana kinahanglana tungod kay kon buot hunahunaon, walay bug-os nga kamatuoran.” Si Agata, nga usa ka 15-anyos nga estudyante sa hayskul ug usa usab ka Saksi ni Jehova, nakahukom sa pagpahimulos niini nga kahigayonan aron ipaambit ang iyang pagtuo ngadto sa uban.

Agig pagpangandam, si Agata nag-ampo una kang Jehova ug dayon siya nanukiduki bahin sa maong ulohan. Siya nakakaplag ug susamang impormasyon diha sa gula sa Bantayanang Torre sa Hulyo 1, 1995. Iyang gikutlo ang pangutana ni Poncio Pilato kang Jesus: “Unsa bay kamatuoran?” (Juan 18:38) Kanang pangutanaha, sumala pa niya, nagbanaag ug matamayon nga tinamdan, nga sama ra sa pag-ingon: ‘Duna ba goy kamatuoran?’ “Ang pangutana ni Pilato nagpahinumdom kanako sa instruksiyon niini nga kompetisyon,” matod pa ni Agata.

Pagkahuman, iyang gihisgotan ang kaylap nga ideya nga ang usa ka butang mahimong tinuod para sa usa ka tawo apan dili tinuod para sa lain, ug posible nga silang duha “husto.” Siya nagpatunghag mga pangutana sama sa, “Kinsa kanato ang mangahas sa pagsakayg ayroplano kon wala kita maghunahuna nga ang mga balaod sa aerodynamics maoy bug-os nga kamatuoran?” Dayon iyang gipunting ang Bibliya, nga nag-ingon: “Ang pagsalig sa Pulong sa Diyos lig-ong gipasukad sa mga kamatuoran nga mahimong pamatud-an.” Siya nanghinaot nga kadtong sinserong nangita sa bug-os nga kamatuoran maningkamot pag-ayo sa pagpangita niana.

Si Agata nakadaog ug linain nga ganti ug siya gipasulti atubangan sa klase. Daghan sa iyang kaubang mga estudyante ang midawat sa iyang gitanyag nga pagtuon sa Bibliya. Si Agata malipayon nga iyang gipahimuslan kini nga kahigayonan aron ipaambit ang iyang pagtuo sa uban. Oo, adunay maayong resulta kon alisto ka sa mga kahigayonan sa pagsulti bahin sa imong pagtuo. Unsang mga kahigayonan ang mahimo nimong pahimuslan?