‘Isul-ob Ninyo ang Pagpaubos sa Hunahuna’

NAGPUYO siya sa usa ka iladong siyudad. Lungsoranon siya sa Roma ug lagmit prominente ang ilang pamilya. Ang maong tawo mao si Saulo, nga gitudloan sa kinamaayohang magtutudlo sa unang siglo K.P. Siya makasultig labing menos duha ka pinulongan, ug membro usab sa usa ka ilado nga relihiyosong grupo sa mga Hudiyo—ang mga Pariseo.

Si Saulo lagmit matamayon sa ordinaryong mga tawo ug mapasigarbohon sa iyang pagkamatarong. (Lucas 18:11, 12; Buhat 26:5) Ang iyang kaubanang mga Pariseo nag-isip sa ilang kaugalingon nga labaw sa uban ug sila gustong mainila ug gustong makabatog dungganong mga titulo. (Mateo 23:6, 7; Lucas 11:43) Lagmit nahimo siyang mapahitas-on tungod sa iyang pagpakig-uban kanila. Kita nahibalo nga gilutos pag-ayo ni Saulo ang mga Kristohanon. Pipila ka tuig sa ulahi, sa dihang nahimo na siyang apostol, siya miingon nga kanhi siya “usa ka tigpasipala ug maglulutos ug tawong bagis.”—1 Timoteo 1:13.

Oo, si Saulo nahimong Kristohanon, nga nailhan ingong apostol Pablo, ug bug-os nga nausab ang iyang personalidad. Ingong Kristohanong apostol, mapaubsanon niyang gipahayag nga siya “usa ka tawong ubos pa kay sa labing ubos sa tanang balaan.” (Efeso 3:8) Siya nagmalamposon sa iyang ministeryo, apan wala niya kini ipasigarbo. Hinunoa, gihatag niya ang tanang pasidungog ngadto sa Diyos. (1 Corinto 3:5-9; 2 Corinto 11:7) Si Pablo nagtambag sa kaubang mga Kristohanon: “Isul-ob ninyo ang malumong mga pagmahal sa pagkamabination, kalulot, pagpaubos sa hunahuna, kalumo, ug hataas-nga-pailob.”—Colosas 3:12.

Praktikal pa ba kining tambaga sa atong panahon? Duna bay kaayohan kon ang usa mapaubsanon? Usa ba gayod ka ilhanan sa kalig-on ang pagkamapaubsanon?

 Mapaubsanon ba ang Labing Gamhanang Maglalalang?

Kon pagpaubos ang hisgotan, angayng susihon kon unsay panglantaw sa Diyos bahin niini. Ngano? Tungod kay siya ang Soberanong Diyos ug ang atong Maglalalang. Dili sama kaniya, kinahanglan natong ilhon nga kita may mga limitasyon. Kita nagdepende kaniya. “Kon bahin sa Labing Gamhanan, kita wala makatukib kaniya; siya binayaw sa gahom,” matod pa ni Elihu nga usa ka maalamong tawo sa karaang panahon. (Job 37:23) Kon atong palandongon ang dako kaayong uniberso, matukmod gayod kita sa pagpaubos. Si manalagnang Isaias miingon: “Iyahat ang inyong mga mata sa itaas ug tan-awa. Kinsay naglalang niining mga butanga? Mao ang Usa nga nagpatungha sa ilang panon nga hilabihan ka daghan, siya nagtawag kanilang tanan pinaagi sa ngalan. Gumikan sa kadagaya sa dinamikong kusog, kay siya usab mabaskog sa gahom, walay usa kanila ang nawala.”—Isaias 40:26.

Bisag siya ang labing gamhanan, si Jehova nga Diyos mapaubsanon. Si Haring David miampo kaniya: “Ihatag mo kanako ang imong taming sa kaluwasan, ug ang imong pagpaubos mao ang nagpadako kanako.” (2 Samuel 22:36) Ang Diyos mapaubsanon sa pagkaagi nga siya may pagtagad sa ubos nga mga tawo nga naningkamot sa pagpahimuot kaniya, ug siya naluoy kanila. Gikan sa langit, si Jehova daw nanaog aron makiglabot nga maluloton sa mga tawo nga mahinadlokon kaniya.—Salmo 113:5-7.

Dugang pa, gipabilhan ni Jehova ang pagkamapaubsanon sa iyang mga alagad. Si apostol Pedro misulat: “Ang Diyos magabatok sa mga mapahitas-on, apan magahatag siyag dili-takos nga kalulot sa mga mapainubsanon.” (1 Pedro 5:5) Mahitungod sa panglantaw sa Diyos bahin sa garbo, ang usa ka magsusulat sa Bibliya miingon: “Ang tagsatagsa nga garboso sa kasingkasing maoy dulumtanan kang Jehova.” (Proverbio 16:5) Apan, nganong ikaingon nga ilhanan sa kalig-on ang pagkamapaubsanon?

Kon Unsay Wala Ipasabot sa Pagkamapaubsanon

Kon ang usa mapaubsanon, wala kini magpasabot nga siya tinamay. Sa pipila ka kultura kaniadto, ang usa ka tawong mapaubsanon sagad nga usa ka ulipon—ubos ug makaluluoy. Sa kasukwahi, ang Bibliya nagpasiugda nga ang pagkamapaubsanon makahatag ug kadungganan. Pananglitan, ang usa ka maalamong tawo nagsulat: “Ang sangpotanan sa pagpaubos ug pagkahadlok kang Jehova maoy bahandi ug himaya ug kinabuhi.” (Proverbio 22:4) Miingon usab ang usa ka salmista: “Si  Jehova hataas, apan siya makakita sa mapainubsanon; apan ang mapahitas-on iyang mailhan lamang sa halayo.”—Salmo 138:6.

Wala usab kini magpasabot nga siya walay katakos o walay nalampos. Pananglitan, wala gayod ilimod ni Jesu-Kristo nga siya bugtong Anak sa Diyos, ug wala gayod siya magpakaaron-ingnon nga dili hinungdanon ang iyang ministeryo sa yuta. (Marcos 14:61, 62; Juan 6:51) Hinuon, si Jesus nagmapaubsanon pinaagi sa paghatag ug pasidungog ngadto sa iyang Amahan sa tanan niyang nalampos ug sa paggamit sa iyang gahom sa pag-alagad ug pagtabang sa uban inay sa pagdaogdaog kanila.

Usa ka Ilhanan sa Kalig-on

Walay duhaduha nga sa iyang panahon, si Jesu-Kristo nailhan sa mga tawo tungod sa iyang “gamhanang mga buhat.” (Buhat 2:22) Apan sa panglantaw sa uban, siya ang “labing ubos sa katawhan.” (Daniel 4:17) Siya nagkinabuhing makasaranganon ug balikbalik nga nagtudlo sa kahinungdanon sa pagpaubos. (Lucas 9:48; Juan 13:2-16) Bisan pa niini, siya dili huyang. Maisogon niyang gidepensahan ang ngalan sa iyang amahan ug gituman ang iyang ministeryo. (Filipos 2:6-8) Sa Bibliya, gihulagway si Jesus ingong maisog nga leyon. (Pinadayag 5:5) Gipakita diha sa panig-ingnan ni Jesus nga ang pagkamapaubsanon nalambigit sa moral nga kalig-on.

Sa dihang atong ugmaron ang tinuod nga pagkamapaubsanon, atong maamgohan nga nagkinahanglan diayg dakong paningkamot ang pagbatasan niini. Kini naglangkit sa pagpasakop kanunay sa kabubut-on sa Diyos inay magpadaog sa atong mga kahuyangan. Ang pag-ugmad sa pagkamapaubsanon nagkinahanglag moral nga kalig-on, kay kinahanglan natong ihiklin ang atong kaugalingong interes aron alagaron si Jehova ug unahon ang kaayohan sa uban sa dili-mahakogong paagi.

Mga Kaayohan sa Pagkamapaubsanon

Ang tawong mapaubsanon dili mapahitas-on. Sa paghubit niini, gigamit sa Kasulatan ang ekspresyong “pagpaubos sa hunahuna.” (Efeso 4:2) Atong maugmad ang mapaubsanong hunahuna kon kita mohimog tininuod nga pagsusi sa atong kaugalingon—sa atong maayong mga hiyas ug mga kahuyangan, mga kalamposan ug kapakyasan. Si Pablo naghatag ug maayong tambag bahin niini sa dihang siya miingon: “Ako magasulti sa tanan dinha sa inyong taliwala nga dili maghunahuna ug labaw bahin sa iyang kaugalingon kay sa angay nga hunahunaon; kondili maghunahuna sa paagi nga makabaton sa maayong panghunahuna.” (Roma 12:3) Kadtong magpadapat niining tambaga mapaubsanon.

Ikapakita usab ang pagkamapaubsanon pinaagi sa pag-una, dili sa atong kaayohan, kondili nianang sa uban. Ubos sa pagtultol sa Diyos, si Pablo nagtambag sa mga Kristohanon: ‘Ayaw pagbuhat ug bisan unsa tungod sa pagkamatigion o tungod sa pagpaimportante sa kaugalingon, kondili uban sa pagpaubos sa hunahuna nga magaisip nga ang uban labaw kay kaninyo.’ (Filipos 2:3) Nahiuyon kini sa sugo ni Jesus sa iyang mga sumusunod: “Ang labing dako taliwala kaninyo kinahanglang mahimong inyong alagad. Si bisan kinsa nga magabayaw sa iyang kaugalingon igapaubos, ug si bisan kinsa nga magapaubos sa iyang kaugalingon pagabayawon.”—Mateo 23:11, 12.

Sa pagkatinuod, gipabilhan gayod sa Diyos ang mga mapaubsanog hunahuna. Ang tinun-ang si Santiago nagpasiugda niini sa dihang siya misulat: “Ipaubos ninyo ang inyong kaugalingon sa mga mata ni Jehova, ug kamo iyang pagabayawon.” (Santiago 4:10) Kinsay dili gustong bayawon sa Diyos?

Tungod sa pagkadili mapaubsanon, nahitabo ang kasamok ug panagbangi tali sa mga tawo o grupo sa mga tawo. Sa laing bahin, adunay maayong mga resulta kon ipakita ang pagkamapaubsanon. Atong maangkon ang pag-uyon sa Diyos. (Miqueas  6:8) Atong matagamtam ang kalinaw sa hunahuna tungod kay ang tawo nga mapaubsanon mas malipayon ug mas kontento kay sa tawong mapahitas-on. (Salmo 101:5) Mahimong mas malinawon ug malipayon usab ang atong relasyon sa atong pamilya, mga higala, kaubanan sa trabaho, ug sa uban. Ang mga mapaubsanon maglikay nga mahimong matigion ug mapugsanon kay makakati kini sa kasuko ug makabungkag sa maayong relasyon.—Santiago 3:14-16.

Sa pagkatinuod, ang pag-ugmad ug mapaubsanong hunahuna dakog ikatabang aron mahuptan ang maayong relasyon ngadto sa uban. Makatabang usab kini kanato sa pagsagubang sa mga kalisdanan niining hakog ug maindigon nga kalibotan. Sa tabang sa Diyos, nabuntog ni apostol Pablo ang pagkamapahitas-on ug pagkagarboso nga maoy iyang kinaiya kanhi. Sa samang paagi, kinahanglang suklan nato ang pagkamapahitas-on o ang paghunahuna nga kita labaw sa uban. “Ang garbo nagauna sa pagkahagsa, ug ang mapahitas-ong espiritu nagauna sa pagkapukan,” nagpasidaan ang Bibliya. (Proverbio 16:18) Kon atong sundon ang panig-ingnan ug tambag ni Pablo, atong makita nga maalamon gayod nga ‘isul-ob ang pagpaubos sa hunahuna.’—Colosas 3:12.

[Hulagway sa panid 4]

Nabuntog ni Pablo ang pagkamapahitas-on ug pagkagarboso

[Hulagway sa panid 7]

Ang pagpaubos sa hunahuna makatabang kanato sa paghupot ug maayong relasyon sa uban

[Picture Credit Line sa panid 5]

Anglo-Australian Observatory/David Malin Images