Kon Nganong Lisod Kaayong Magpaubos

PARA sa daghang tawo, ang pagkamapaubsanon dili na uso karon. Ang mga tawo nga inila ug malamposon mao kadtong gustong labwan ang uban, kadtong mapahitas-on, ug kadtong porsigido nga makuha ang ilang gusto. Kadaghanan sa mga tawo nangandoy sa estilo sa kinabuhi sa mga dato ug inila, dili sa mga tawong mapaubsanon ug malumo. Ang malamposong mga tawo sagad magpasiatab nga nahimo nila kana tungod sa ilang pagpaningkamot. Inay magpaubos, ila hinuong gipasigarbo ang ilang kalamposan.

Ang usa ka tigdukiduki sa Canada nag-ingon nga sa ilang nasod “nagkadaghan ang mga tawong hakog ug magarbohon.” Matod pa sa uban, kita nagkinabuhi sa katilingban diin ang mga tawo mas naghunahuna sa ilang kaugalingong kalipay kay sa ilang ubang mga responsibilidad ug sila nakamatikod nga kanang batasana misamot pa sa atong panahon. Nianang kahimtanga, ang pagkamapaubsanon daw dili tilinguhaon nga hiyas.

Siyempre, daghan ang ganahan sa mga tawong mapaubsanon kay dali ra silang ikasinabot. Apan, sa atong kalibotan diin walay magpapiri, ang pipila mahadlok nga magpaubos kay basin isipon sila nga huyang.

Ang Pulong sa Diyos, ang Bibliya, nagtagna nga sa atong panahon, ang mga tawo mahimong “mapagawalon [ug] mapahitas-on.” (2 Timoteo 3:1, 2) Dili ba mouyon ka nga natuman gayod kining tagnaa? Sa imong hunahuna, may kaayohan ba ang pagkamapaubsanon? O naghunahuna ka ba nga kon ang usa mapaubsanon, siya isipon nga huyang ug daling mabentahaan sa uban?

Sa pagkatinuod, ang Bibliya naghatag ug maayong mga katarongan kon nganong angayng pabilhan ug ugmaron ang pagkamapaubsanon. Kini nagtaganag timbang ug positibong panglantaw bahin sa maong hiyas ug kini nagpakita nga ang tinuod nga pagkamapaubsanon maoy ilhanan sa kalig-on dili sa kahuyang. Ipatin-aw sa sunod nga artikulo kon ngano.

[Hulagway sa panid 3]

Angay ba natong ipasigarbo ang atong mga kalamposan?