Pagsusi sa “Lawom nga mga Butang sa Diyos”

“Ginasusi sa espiritu ang tanang butang, bisan ang lawom nga mga butang sa Diyos.”—1 CORINTO 2:10.

1. Unsa ang pipila ka kamatuoran nga makapalipay niadtong bag-ong nagtuon sa Bibliya?

 KADAGHANAN kanato nga membro sa Kristohanong kongregasyon makahinumdom sa kalipay nga atong gibati sa dihang una natong nakat-onan ang kamatuoran. Atong nahibaloan kon unsay kahulogan sa ngalan ni Jehova, kon nganong iyang gitugotan ang pag-antos, kon nganong may mga tawo nga moadto sa langit, ug kon unsay kaugmaon sa matinumanong katawhan sa katibuk-an. Tingali nakasusi na kita sa Bibliya kaniadto, apan sama sa kadaghanan sa katawhan, kining mga butanga natago gikan kanato. Nahisama kita sa usa ka tawo nga misalom sa dagat aron sa pagtan-aw sa maanindot nga kagaangan. Kon walay mga gamit, dili kaayo niya maklaro ang nindot nga mga linalang sa dagat. Apan, kon siya mag-antipara o kaha mosakay sa bildog-salog nga sakayan, siya malingaw sa pagsud-ong sa nindot kaayog kolor nga mga takot, isda, talikod ug uban pang makaiikag nga mga linalang. Sa samang paagi, sa dihang may mitabang kanato sa pagsabot sa Kasulatan, atong nakat-onan ang paninugdang nga kahibalo sa “lawom nga mga butang sa Diyos.”—1 Corinto 2:8-10.

2. Nganong walay kinutoban ang kalipay nga atong bation sa pagtuon sa Pulong sa Diyos?

² Kita ba matagbaw na lamang sa paninugdang nga kahibalo sa mga kamatuoran sa Bibliya? Ang ekspresyong “lawom nga mga butang sa Diyos” naglakip sa pagsabot sa kaalam sa Diyos nga gipadayag sa balaang espiritu ngadto sa mga Kristohanon apan wala ipadayag ngadto sa uban. (1 Corinto 2:7) Pagkadaghan sa mga butang nga angayng susihon bahin sa kaalam sa Diyos nga makahatag kanatog kalipay! Dili gayod nato mahibaloan ang tanan bahin sa kaalam sa Diyos. Ang kalipay nga  atong gibati sa dihang una natong nakat-onan ang paninugdang mga pagtulon-an sa Bibliya magpadayon kon kita dili mohunong sa pagsusi sa “lawom nga mga butang sa Diyos.”

3. Nganong kinahanglang masabtan nato sa bug-os ang basehanan sa atong mga pagtulon-an?

³ Nganong kinahanglan man natong masabtan ang “lawom nga mga butang”? Molig-on ang atong pagtuo ug pagsalig kon atong masabtan dili lang ang atong gituohan kondili ang mga katarongan o basehanan kon nganong kita mituo niana. Ang Bibliya nag-awhag kanato sa paggamit sa atong “gahom sa pagpangatarongan” aron atong “ikapamatuod sa [atong] kaugalingon ang maayo ug dalawaton ug hingpit nga kabubut-on sa Diyos.” (Roma 12:1, 2) Ang pagkasabot kon nganong giawhag kita ni Jehova sa pagkinabuhi sumala sa iyang mga sukdanan magpalig-on sa atong determinasyon sa pagsugot kaniya. Busa, ang kahibalo bahin sa “lawom nga mga butang” maghatag kanatog kusog sa pagsukol sa tentasyon sa pagbuhat ug kalapasan ug kini magtukmod kanato nga ‘magmasiboton sa maayong mga buhat.’—Tito 2:14.

4. Unsay nalangkit sa pagtuon sa Bibliya?

⁴ Aron atong masabtan ang lawom nga mga butang, kita kinahanglang magtuon. Apan, ang pagtuon dili sama sa yanong pagbasa lang. Kini naglangkit ug matukiong pagsusi sa maong impormasyon aron masayran kon unsay kalambigitan niini sa ato nang nahibaloan. (2 Timoteo 1:13) Kini naglakip sa pagsabot sa mga katarongan nga gipadayag sa maong impormasyon. Ang pagtuon sa Bibliya kinahanglang maglakip ug pagpamalandong kon sa unsang paagi atong magamit ang atong nakat-onan sa paghimog maalamong mga desisyon ug sa pagtabang sa uban. Dugang pa, tungod kay “ang tibuok Kasulatan inspirado sa Diyos ug mapuslanon,” ang atong pagtuon angayng maglakip “sa matag pulong nga magagula sa baba ni Jehova.” (2 Timoteo 3:16, 17; Mateo 4:4) Ang pagtuon sa Bibliya nagkinahanglan tingalig pagsakripisyo. Apan kini makapalipay usab. Gawas pa, dili lisod sabton ang “lawom nga mga butang sa Diyos.”

Si Jehova Nagtabang sa mga Maaghop Aron Makasabot

5. Kinsa ang makasabot sa “lawom nga mga butang sa Diyos”?

⁵ Bisan pag dili ka hawod sa klase o wala ka maanad sa pagtuon, dili ka angayng maghunahuna nga ang “lawom nga mga butang sa Diyos” dili nimo masabtan. Panahon sa yutan-ong ministeryo ni Jesus, gipatin-aw ni Jehova ang Iyang katuyoan, dili ngadto sa mga maalamon ug makinaadmanon, kondili ngadto sa mga tawong dili edukado ug ordinaryo kinsa mapaubsanong midawat sa gitudlo kanila sa mga alagad sa Diyos. Sila samag mga bata kon itandi niadtong naedukar diha sa mga eskuylahan. (Mateo 11:25; Buhat 4:13) Mahitungod sa “mga butang nga giandam sa Diyos alang kanilang nahigugma kaniya,” si apostol Pablo misulat sa iyang mga isigka-magtutuo: “Kini gipadayag sa Diyos kanato pinaagi sa iyang espiritu, kay ginasusi sa espiritu ang tanang butang, bisan ang lawom nga mga butang sa Diyos.”—1 Corinto 2:9, 10.

6. Unsay kahulogan sa 1 Corinto 2:10?

⁶ Sa unsang paagi ang espiritu sa Diyos magasusi sa ‘tanang butang, bisan sa lawom nga mga butang sa Diyos’? Imbes ipadayag ni Jehova ang kamatuoran ngadto sa tagsa-tagsa ka Kristohanon, iyang gigamit ang iyang espiritu sa pagtultol sa iyang organisasyon, nga nagtabang sa nahiusang katawhan sa Diyos sa pagsabot sa Bibliya. (Buhat 20:28; Efeso 4:3-6) Sa tibuok kalibotan, ang tanang kongregasyon nakapahimulos sa susamang programa sa pagtuon sa Bibliya. Sulod sa daghang katuigan, ilang natun-an ang lainlaing pagtulon-an sa Bibliya. Ang balaang espiritu molihok pinaagi  sa kongregasyon aron sa pagtabang sa mga tawo sa pagsagop sa tinamdan nga gikinahanglan sa pagsabot sa “lawom nga mga butang sa Diyos.”—Buhat 5:32.

Kon Unsay Nalakip sa “Lawom nga mga Butang sa Diyos”

7. Nganong wala masabti sa kadaghanan sa katawhan ang “lawom nga mga butang sa Diyos”?

⁷ Dili kita angayng maghunahuna nga ang “lawom nga mga butang” kanunayng lisod sabton. Ang “lawom nga mga butang sa Diyos” natago sa kadaghanan sa katawhan, dili tungod kay lisod mabatonan ang kaalam sa Diyos, kondili tungod kay gilimbongan ni Satanas ang katawhan aron isalikway ang tabang nga gitagana ni Jehova pinaagi sa Iyang organisasyon.—2 Corinto 4:3, 4.

8. Unsang lawom nga mga butang ang gitumong ni Pablo diha sa kapitulo tres sa iyang sulat sa mga taga-Efeso?

⁸ Ang kapitulo tres sa sulat ni Pablo ngadto sa mga taga-Efeso nagpakita nga ang “lawom nga mga butang sa Diyos” naglakip sa daghang kamatuoran nga nasabtan pag-ayo sa kadaghanan sa mga alagad ni Jehova, sama pananglitan sa kamatuoran bahin sa gisaad nga Binhi, sa pagpili ug mga tawo nga adunay langitnong paglaom, ug sa Mesiyanikong Gingharian. Si Pablo misulat: “Sa ubang mga kaliwatan kini nga tinago wala ipahibalo ngadto sa mga anak sa mga tawo ingon sa pagkapadayag niini karon ngadto sa iyang balaang mga apostoles ug mga manalagna pinaagi sa espiritu, nga mao, nga ang katawhan sa kanasoran mahimong kaubang mga manununod ug kaubang mga sangkap sa lawas ug mga mag-aambit uban kanato sa saad nga nahiusa kang Kristo Jesus.” Miingon usab si Pablo nga siya gitudlo aron “ipakita sa mga tawo kon sa unsang paagi ang sagradong tinago ginadumala nga sukad sa dili-tino nga kagahapon natago diha sa Diyos.”—Efeso 3:5-9.

9. Nganong usa ka pribilehiyo ang pagkasabot sa “lawom nga mga butang sa Diyos”?

⁹ Dugang pa, gipatin-aw ni Pablo nga kabubut-on sa Diyos nga ‘pinaagi sa kongregasyon, ikapahibalo usab diha sa langitnong mga dapit ang nagkadaiya uyamot nga kaalam sa Diyos.’ (Efeso 3:10) Ang mga manulonda makabatog kaayohan pinaagi sa pagpaniid ug pagsabot kon unsa kamaalamon ang pagpakiglabot ni Jehova sa Kristohanong kongregasyon. Pagkadakong pribilehiyo nga atong masabtan ang mga butang nga gikaikagan bisan sa mga manulonda! (1 Pedro 1:10-12) Dayon, miingon si Pablo nga angay natong “masabtan uban sa tanang balaan kon unsa ang gilapdon ug gitas-on ug gihabogon ug giladmon” sa Kristohanong pagtuo. (Efeso 3:11, 18) Atong hisgotan karon ang pipila ka lawom nga mga butang nga makapalalom sa atong pagsabot.

Mga Pananglitan sa Lawom nga mga Butang

10, 11. Sumala sa Bibliya, kanus-a si Jesus nahimong pangunang bahin sa “binhi” sa langitnong “babaye” sa Diyos?

¹⁰ Nahibalo kita nga si Jesus mao ang pangunang bahin sa “binhi” sa langitnong “babaye” sa Diyos nga gihisgotan sa Genesis 3:15. Aron ato pa kining masabtan, makapangutana kita: ‘Kanus-a man si Jesus nahimong sinaad nga Binhi? Sa panahon ba nga siya didto pa sa langit, sa iyang pagkatawo, pagbawtismo, o sa iyang pagkabanhaw?’

¹¹ Ang Diyos nagsaad nga ang langitnong bahin sa iyang organisasyon, nga gihisgotan diha sa tagna ingong iyang “babaye,” magpatunghag binhi nga magsamad sa ulo sa bitin. Apan milabay na lang ang libolibong katuigan, ang babaye sa Diyos wala gihapon makapatunghag binhi nga makalaglag kang Satanas ug makawagtang sa iyang mga buhat. Busa, diha sa tagna ni Isaias, ang babaye gihisgotan nga “apuli” ug “nagmagul-anon sa espiritu.” (Isaias 54:1, 5, 6) Sa ngadtongadto, si Jesus natawo sa Betlehem. Apan diha lamang sa pagbawtismo kaniya nga siya gipanganak na sa espiritu ug nahimong espirituwal nga anak sa Diyos, nga si Jehova miingon: “Kini mao ang akong Anak.” (Mateo 3:17; Juan 3:3) Ang pangunang bahin sa “binhi” sa babaye sa kataposan mitungha. Human niana, ang mga sumusunod ni Jesus gidihogan ug gipanganak usab sa balaang espiritu. Ang langitnong “babaye” ni Jehova, kinsa sa dugayng panahon mibati nga samag usa ka ‘babayeng wala manganak,’ sa kataposan ‘makahugyaw na sa kalipay.’—Isaias 54:1; Galacia 3:29.

12, 13. Unsang mga teksto ang nagpakita nga ang tanang dinihogang mga Kristohanon sa yuta naglangkob sa “matinumanon ug maalamong ulipon”?

¹² Ang ikaduhang pananglitan sa lawom nga  mga butang nga gipadayag kanato adunay kalabotan sa katuyoan sa Diyos sa pagpili ug 144,000 ka tawo gikan sa yuta. (Pinadayag 14:1, 4) Atong nasabtan nga ang tanang dinihogan nga nabuhi sa yuta sa usa ka partikular nga panahon naglangkob sa “matinumanon ug maalamong ulipon” nga giingon ni Jesus nga magtaganag “pagkaon” sa iyang panimalay sa tukmang panahon. (Mateo 24:45) Unsang mga tekstoha ang nagpamatuod nga husto kining maong pagsabot? Mahimo kaha nga ang gitumong ni Jesus mao ang si bisan kinsang Kristohanon nga nagpalig-on sa iyang mga igsoon sa espirituwal nga paagi?

¹³ Giingnan sa Diyos ang nasod sa Israel: “Kamo mao ang akong mga saksi . . . ang akong alagad nga akong gipili.” (Isaias 43:10) Apan sa Nisan 11, 33 K.P., giingnan ni Jesus ang mga pangulo sa Israel nga gisalikway na sa Diyos ang ilang nasod ingong Iyang alagad. Siya miingon: “Ang gingharian sa Diyos pagakuhaon gikan kaninyo ug igahatag ngadto sa usa ka nasod nga magpatunghag mga bunga niini.” Giingnan ni Jesus ang panon sa katawhan: “Tan-awa! Ang inyong balay mabiniyaan kaninyo.” (Mateo 21:43; 23:38) Ingong ulipon ni Jehova, ang balay sa Israel dili matinumanon ni maalamon. (Isaias 29:13, 14) Unya, niana gihapong adlawa, si Jesus nangutana: “Kinsa ba gayod ang matinumanon ug maalamong ulipon?” Ang iyang gipasabot mao, ‘Unsang maalamon nga nasod ang mopuli sa Israel aron mahimong matinumanong ulipon sa Diyos?’ Gitubag kana ni apostol Pedro sa dihang iyang giingnan ang kongregasyon sa dinihogang mga Kristohanon: “Kamo . . . ‘usa ka balaang nasod, usa ka katawhan alang sa linaing pagpanag-iya.’” (1 Pedro 1:4; 2:9) Kanang espirituwal nga nasod, ang “Israel sa Diyos,” nahimong bag-ong ulipon ni Jehova. (Galacia 6:16) Maingon nga ang tanang membro sa karaang Israel maoy naglangkob sa usa ka “alagad,” ang tanang dinihogang mga Kristohanon sa yuta sa usa ka partikular nga panahon mao usab ang naglangkob sa “matinumanon ug maalamong ulipon.” Pagkadakong pribilehiyo nga kita makadawat ug “pagkaon” pinaagi sa ulipon sa Diyos!

Mahimong Makapalipay ang Personal nga Pagtuon

14. Nganong ang pagtuon sa Bibliya mas makapalipay kay sa yanong pagbasa lang?

¹⁴ Sa dihang aduna kitay bag-ong makat-onan gikan sa Kasulatan, dili ba kita malipay tungod kay gipalig-on niana ang atong pagtuo? Mao kanay hinungdan kon nganong ang pagtuon sa Bibliya mas makapalipay kay sa yanong pagbasa lang. Busa, kon magbasa ka ug Kristohanong mga publikasyon, suknaa ang imong kaugalingon: ‘Unsay koneksiyon niining maong katin-awan sa ako nang nahibaloan bahin sa maong ulohan? May mahinumdoman ba akong mga teksto ug mga argumento nga dugang magpaluyo sa mga konklusyon nga gipresentar niining artikuloha?’ Kon gikinahanglan ang dugang pagpanukiduki, isulat ang pangutana nga gusto nimong matubag, ug mao kanay tun-i sa sunod.

15. Unsang mga ulohana ang makaiikag nga tun-an, ug sa unsang paagi makahatag ug malungtarong kaayohan ang imong pagtuon?

¹⁵ Unsang mga ulohana ang makaiikag nga tun-an? Ang detalyadong pagsusi sa lainlaing pakigsaad nga gigamit sa Diyos alang sa kaayohan sa katawhan makapalalom sa atong pagsabot. Imong mapalig-on ang imong pagtuo pinaagi sa pagtuon sa mga tagna nga nagpunting kang Jesu-Kristo o sa bersikulo-por-bersikulo nga pagkonsiderar sa usa sa matagnaong mga basahon sa Bibliya. Makapalig-on usab sa pagtuo ang pagbasa sa modernong-adlaw nga kasaysayan sa mga Saksi ni Jehova, ginamit ang librong Mga Saksi ni Jehova—Mga Magmamantala sa Gingharian sa Diyos. a Ang pagsubli usab sa miaging mga artikulo sa “Mga Pangutana Gikan sa mga Magbabasa” nga gipatik  diha sa Bantayanang Torre makatabang gayod kanimo nga mas masabtan ang pipila ka teksto. Matikdi pag-ayo ang Kasulatanhong mga rason nga gigamit aron makab-ot ang mga konklusyon nga gipresentar. Kini motabang kanimo sa pagbansay sa imong “mga gahom sa pagsabot” ug sa pag-ugmad sa imong katakos sa pag-ila. (Hebreohanon 5:14) Samtang magtuon, pagnota diha sa imong Bibliya o kaha sa papel aron kini dili makalimtan ug magamit sa pagtabang sa uban.

Tabangi ang mga Bata nga Malipay sa Pagtuon

16. Sa unsang paagi matabangan ninyo ang mga bata nga malipay sa pagtuon sa Bibliya?

¹⁶ Ang mga ginikanan dakog mahimo sa pagpukaw sa gana sa ilang mga anak alang sa espirituwal nga mga butang. Ayawg pakamenosa ang katakos sa mga bata sa pagsabot sa lawom nga mga butang. Kon inyong asaynan ang inyong mga anak ug usa ka ulohan nga dukidukion agig pagpangandam sa pagtuon sa Bibliya sa pamilya, mahimo ninyo silang pangutan-on kon unsay ilang nakat-onan. Ang pagtuon sa pamilya mahimong maglakip ug mga pag-ensayo aron makakat-on ang mga bata kon unsaon nila pagdepensa ang ilang pagtuo ug kon unsaon nila pagpamatuod nga kamatuoran ang gitudlo kanila. Gawas pa, inyong magamit ang brosyur nga “Tan-awa ang Maayong Yuta” b sa pagtudlo kanila bahin sa mga lugar diha sa Bibliya ug sa paghatag ug dugang katin-awan bahin sa mga lugar nga gihisgotan diha sa senemanang pagbasa sa Bibliya.

17. Nganong kinahanglan kitang magmatimbang sa atong personal nga pagtuon sa Bibliya?

¹⁷ Ang personal nga pagtuon sa Bibliya makaiikag ug makapalig-on sa pagtuo, apan ayaw tugoti nga maibanan niini ang imong panahon sa pagpangandam sa mga tigom sa kongregasyon. Ang mga tigom maoy laing paagi nga si Jehova nagtudlo kanato pinaagi sa “matinumanon ug maalamong ulipon.” Apan, ang dugang pagpanukiduki makatabang kanimo sa paghatag ug undanong mga komento panahon sa mga tigom—pananglitan, panahon sa Pagtuon sa Libro sa Kongregasyon o sa dihang hisgotan ang mga haylayt sa senemanang pagbasa sa Bibliya alang sa Teokratikanhong Tunghaan sa Ministeryo.

18. Nganong dili gayod makawang ang pagpaningkamot sa pagtuon sa “lawom nga mga butang sa Diyos”?

¹⁸ Ang dulot nga pagtuon sa Pulong sa Diyos makatabang kanimo nga masuod kang Jehova. Sa pagpakita sa kapuslanan sa maong pagtuon, ang Bibliya nag-ingon: “Ang kaalam usa ka panalipod maingon nga ang salapi usa ka panalipod; apan ang bentaha sa kahibalo mao nga ang kaalam nagatipig nga buhi sa mga nanag-iya niini.” (Ecclesiastes 7:12) Busa, dili gayod makawang ang inyong paningkamot sa pagpalalom sa inyong pagsabot sa espirituwal nga mga butang. Ang Bibliya nagsaad niadtong nagpadayon sa pagsusi: ‘Inyong makaplagan ang mismong kahibalo sa Diyos.’—Proverbio 2:4, 5.

[Mga footnote]

Makapatin-aw Ka Ba?

• Unsa ang “lawom nga mga butang sa Diyos”?

• Nganong ang atong pagtuon sa lawom nga mga butang walay kinutoban?

• Nganong posibleng matagamtam sa tanang Kristohanon ang kalipay sa pagsabot sa “lawom nga mga butang sa Diyos”?

• Sa unsang paagi makabaton ka ug mas dakong kaayohan sa pagkasabot sa “lawom nga mga butang sa Diyos”?

[Mga Pangutana sa Pagtuon]

[Hulagway sa panid 28]

Kanus-a si Jesus nahimong sinaad nga Binhi?

[Hulagway sa panid 31]

Mahimong asaynan sa mga ginikanan ang ilang mga anak ug ulohan nga dukidukion agig pagpangandam sa pagtuon sa pamilya