Ikaw ba Makapahayahay sa Uban?

DIHA sa habagatang tumoy sa kabukiran sa Anti-Lebanon nagbuntaog ang Bukid sa Hermon, diin ang matahom nga taluktok niini may gihabogong 2,814 metros gikan sa lebel sa dagat. Halos sa tibuok tuig, ang taluktok sa Hermon maputos ug niyebe mao nga ang init nga inalisngaw nga mopaibabaw niini manibuok ug manungha ang yamog. Dayon ang yamog motulo diha sa kakahoyan ug mga ubasan sa ubos. Panahon sa tagdugayng ting-init sa karaang Israel, ang yamog maoy pangunang tuboran sa makapahayahay nga kaumog alang sa mga tanom.

Diha sa usa ka awit nga inspirado sa Diyos, ang makapahayahay nga panaghiusa taliwala sa mga magsisimba ni Jehova gipakasama sa “yamog sa Hermon nga motulo ibabaw sa kabukiran sa Zion.” (Salmo 133:1, 3) Maingon nga ang yamog sa Bukid sa Hermon maoy tuboran sa makapahayahay nga kaumog alang sa mga tanom, kita makapahayahay usab niadtong atong mahimamat. Sa unsang paagi atong mahimo kana?

Ang Makapahayahay nga Panig-ingnan ni Jesus

Dako kaayog impluwensiya si Jesu-Kristo sa uban. Bisan ang kadiyot lang nga pagpakighimamat kaniya makapahayahay na kaayo. Pananglitan, ang magsusulat sa Ebanghelyo nga si Marcos nag-ingon: “Gikugos [ni Jesus] ang mga bata ug gipanalanginan sila, nga gitapion ang iyang mga kamot diha kanila.” (Marcos 10:16) Pagkamakapahayahay kadto alang niadtong mga bataa!

Sa kataposang gabii ni Jesus dinhi sa yuta ingong usa ka tawo, gihugasan niya ang mga tiil sa iyang mga tinun-an. Seguradong natandog gayod ang ilang mga kasingkasing tungod sa iyang pagkamapainubsanon. Dayon giingnan sila ni Jesus: “Ako nagtagana ug sumbanan alang kaninyo, nga, ingon sa akong gibuhat kaninyo, pagabuhaton usab ninyo.” (Juan 13:1-17) Oo, kinahanglan usab silang magmapainubsanon. Bisan tuod ang mga apostoles wala dayon makasabot sa gisulti ni Jesus ug naglalis na usab sila sa ulahi niadtong gabhiona kon kinsa kanila ang labing dako, siya wala masuko. Hinunoa, mapailobon siyang nangatarongan kanila. (Lucas 22:24-27) Bisan “sa gisultihan siya ug pasipala, [si Jesus] wala mobalos sa pagsultig pasipala.” Gani, “sa nag-antos siya, wala siya manghulga, apan nagpadayon sa pagpiyal sa iyang kaugalingon ngadto sa usa nga nagahukom sa pagkamatarong.” Angay gayong sundogon ang makapahayahay nga panig-ingnan ni Jesus.—1 Pedro 2:21, 23.

Si Jesus nag-ingon: “Isangon diha kaninyo ang akong yugo ug magtuon gikan kanako, kay ako malumog-buot ug mapainubsanon sa kasingkasing, ug kamo makakaplag ug kahayahay alang sa inyong mga kalag.” (Mateo 11:29) Handurawa nga ikaw personal nga gitudloan ni Jesus. Human makadungog kaniya nga nanudlo didto sa sinagoga, ang iyang mga katagilungsod natingala ug miingon: “Diin kuhaa niining tawhana kining kaalam ug kining gamhanang mga buhat?” (Mateo 13:54) Ang pagbasa bahin sa kinabuhi ug ministeryo ni Jesus daghag ikatudlo kanato bahin sa pagkahimong makapahayahay sa uban. Atong susihon kon sa unsang paagi gihatag ni Jesus ang maayo kaayong panig-ingnan pinaagi sa makapalig-on nga sinultihan ug sa matinabangong tinamdan.

Himoang Makapalig-on Kanunay ang Imong Sinultihan

Mas dali gayod ang pagguba ug usa ka bilding kay sa pagtukod ug bag-o. Kining prinsipyoha mapadapat usab sa atong sinultihan. Ingong  dili-hingpit nga mga tawo, kita adunay mga kahuyangan. Si Haring Solomon miingon: “Walay tawong matarong sa yuta nga nagpadayon sa pagbuhat sa maayo ug dili makasala.” (Ecclesiastes 7:20) Dali kaayo natong makita ang sayop sa laing tawo ug daoton siya pinaagig masakit nga mga pulong. (Salmo 64:2-4) Sa laing bahin, gikinahanglan ang kahanas aron ang atong sinultihan mahimong makapalig-on.

Gigamit ni Jesus ang iyang dila aron sa pagpalig-on sa mga tawo. Iyang giwalihan sila sa maayong balita sa Gingharian aron mobati silag kahayahay sa espirituwal. (Lucas 8:1) Gipabati usab ni Jesus ug kahayahay kadtong nahimo niyang mga tinun-an pinaagi sa pagpaila sa iyang langitnong Amahan ngadto kanila. (Mateo 11:25-27) Bantog rang ang mga tawo nadani kang Jesus!

Sa kasukwahi, ang mga eskriba ug mga Pariseo wala magtagad sa mga panginahanglan sa uban. “Buot nila ang labing dungganong dapit panahon sa mga panihapon ug ang unahang mga lingkoranan sa mga sinagoga,” matod ni Jesus. (Mateo 23:6) Ila pa ganing gitamay ang ordinaryong mga tawo, nga nag-ingon: “Kining panon sa katawhan nga wala mahibalo sa Balaod maoy tinunglong katawhan.” (Juan 7:49) Kadto nga tinamdan dili gayod makapahayahay!

Ang atong sinultihan sagad magpadayag kon unsay atong mga panghunahuna o pagbati bahin sa ubang tawo. Si Jesus miingon: “Ang maayong tawo magapagula ug maayo gikan sa maayong bahandi sa iyang kasingkasing, apan ang tawong daotan magapagula kon unsay daotan gikan sa iyang daotang bahandi; kay gikan sa kadagaya sa kasingkasing ang iyang baba magasulti.” (Lucas 6:45) Nan, unsay atong mahimo aron ang atong sinultihan makapahayahay gayod sa uban?

Usa sa mahimo natong buhaton mao ang pagpamalandong sa dili pa kita mosulti. Ang Proverbio 15:28 nag-ingon: “Ang kasingkasing sa matarong nagapamalandong aron sa pagtubag.” Dili kinahanglang tas-on ang maong pagpamalandong. Pinaagi sa kadiyot nga pamalandong, kasagarang mahibaloan na nato kon makapahayahay ba ang atong isulti sa uban. Makapangutana kita sa atong kaugalingon: ‘Dili ba makapasakit ang akong isulti? Tinuod ba kini, o tinumotumo lang? Kini ba “usa ka pulong sa hustong panahon?” Makapahayahay ug makapalig-on ba kini niadtong akong sultihan niini?’ (Proverbio 15:23) Kon makahinapos kita nga kini dili makapalig-on ug dili angay, paningkamotan gayod natong wad-on kana sa atong hunahuna. Dili ba mas maayong pulihan nato kanag makapalig-on ug nahiangay nga mga pulong? Ang wala-hunahunaa nga mga pulong maoy sama sa “mga dunggab sa espada,” samtang ang makapalig-ong mga pulong “makaayo.”—Proverbio 12:18.

Ang laing tabang mao ang paghunahuna sa mga hiyas sa atong mga isigkamagtutuo nga naghimo kanilang bililhon sa mga mata sa Diyos. Si Jesus miingon: “Walay tawo nga makaari kanako gawas kon ang Amahan, kinsa nagpadala kanako, magkabig kaniya.” (Juan 6:44) Nakita ni Jehova ang maayong mga hiyas sa matag usa niya ka matinumanong alagad—bisan kadtong atong gihunahuna nga dili maayog kinaiya. Kon kita maningkamot sa pag-ila sa ilang maayong mga hiyas, makadayeg gayod kita kanila.

 Tabangi ang Uban

Nakasabot gayod si Jesus sa alaot nga kahimtang sa mga dinaogdaog. Gani, “sa pagkakita sa mga panon sa katawhan siya naluoy kanila, tungod kay sila pinanitan ug nagkatibuagsa sama sa mga karnero nga walay magbalantay.” (Mateo 9:36) Apan wala lang tan-awa ni Jesus ang ilang makaluluoy nga kahimtang; iyang gitabangan sila. Siya nagdapit: “Umari kanako, kamong tanang nabudlayan ug nabug-atan, ug ako magapalagsik kaninyo.” Nagpasalig usab siya: “Ang akong yugo masayon ug ang akong luwan magaan.”—Mateo 11:28, 30.

Nagkinabuhi kita karon sa “makuyaw nga mga panahong lisod sagubangon.” (2 Timoteo 3:1) Daghang tawo ang nabug-atan tungod sa “kabalaka niining sistema sa mga butang.” (Mateo 13:22) Ang uban nabug-atan tungod sa ilang makapaguol nga mga kahimtang. (1 Tesalonica 5:14) Sa unsang paagi makahupay kita kanila? Sama kang Kristo, makatabang kita aron mogaan ang ilang luwan.

Paningkamotan sa pipila ka tawo nga mahupayan ang ilang kaguol pinaagi sa pagpakigsulti sa ilang mga problema sa uban. Kon ang mga tawong magul-anon moduol kanato aron magpatabang, maminaw ba gayod kita kanila? Kinahanglan ang pagdisiplina sa kaugalingon aron mahimong mabinationg tigpaminaw. Nagpasabot kana nga angay natong isentro ang atong hunahuna sa ginasulti sa laing tawo, imbes maghunahuna na kon unsaon pagtubag o pagsulbad sa problema. Pinaagi sa pagpaminaw pag-ayo, pagtan-aw sa mata, ug pagpahiyom kon nahiangay, atong gipakita nga kita may pagtagad.

Adunay daghang kahigayonan diha sa Kristohanong kongregasyon sa pagdasig sa mga isigkamagtutuo. Pananglitan, sa dihang nagtambong ug mga tigom sa Kingdom Hall, mahimong duolon nato kadtong may mga suliran sa panglawas. Usahay, ang pipila ka minutong makapadasig nga kabildohay sa wala pa ug human sa tigom mao lang ang gikinahanglan aron mapalig-on sila. Matikdan usab nato kadtong wala makatambong sa Pagtuon sa Libro sa Kongregasyon. Mahimong teleponohan nato sila ug komostahon o tanyagan ug tabang.—Filipos 2:4.

Bug-at ang kaakohan sa Kristohanong mga ansiyano diha sa kongregasyon. Dako kitag ikatabang aron mogaan ang ilang luwan pinaagi sa pagpakigtambayayong kanila ug mapainubsanong pagtuman sa bisan unsang asaynment nga ilang ihatag. Ang Pulong sa Diyos nag-awhag kanato: “Magmasinugtanon kamo sa mga nagapanguna kaninyo ug magmapinasakopon, kay sila nagabantay sa inyong mga kalag ingon nga sila maoy maghatag ug husay; aron buhaton nila kini uban ang kalipay ug dili uban ang pagpanghupaw, kay kini makadaot kaninyo.” (Hebreohanon 13:17) Pinaagi sa pagpasundayag ug andam nga espiritu, kita makapahayahay niadtong “nagdumala sa maayong paagi.”—1 Timoteo 5:17.

Magmadagayaon sa Makapalig-ong Sinultihan ug Magmatinabangon

Ang makapahayahay nga yamog nagagikan sa libolibo ka pinong mga tinulo nga inanayng mokunsad nga morag gikan sa wala hisayring dapit. Sa susama, kita makapahayahay sa uban dili tungod sa usa ra ka dalayegong buhat, kondili tungod sa natingob nga epekto sa atong pagpasundayag kanunay sa Kristohanong mga hiyas.

Misulat si apostol Pablo: “Sa inigsoong gugma batoni ang malumong pagmahal alang sa usag usa. Manguna sa pagpakitag pasidungog sa usag usa.” (Roma 12:10) Atong ipadapat ang tambag ni Pablo. Hinaot makapahayahay kita sa uban pinaagi sa atong pagpanulti ug mga lihok.

[Mga hulagway sa panid 16]

Ang yamog sa Bukid sa Hermon maoy tuboran sa makapahayahay nga kaumog alang sa mga tanom

[Hulagway sa panid 17]

Ang usa ka mabinationg tigpaminaw makapahayahay sa uban