Ugmara ang mga Hiyas nga Makatabang Kanimo sa Paghimog mga Tinun-an

“Panglakaw kamo ug paghimog mga tinun-an sa katawhan sa tanang kanasoran.”—MATEO 28:19.

1. Unsang mga kahanas ug mga tinamdan ang gikinahanglan sa pipila ka alagad sa Diyos sa karaang panahon?

 ANG mga alagad ni Jehova usahay kinahanglang mag-ugmad sa mga kahanas ug mga tinamdan nga makatabang kanila sa pagbuhat sa iyang kabubut-on. Pananglitan, sa dihang si Abraham ug Sara gisugo sa Diyos, sila mibiya sa mauswagong siyudad sa Ur ug giugmad gayod nila ang mga hiyas ug mga kahanas nga mahinungdanon sa mga nagpuyog tolda. (Hebreohanon 11:8, 9, 15) Si Josue nagkinahanglan usab ug kaisog, pagsalig kang Jehova, ug kahibalo bahin sa Iyang Balaod aron giyahan ang mga Israelinhon paingon sa Yutang Saad. (Josue 1:7-9) Ug tungod sa espiritu sa Diyos, si Bezalel ug Oholiab nahimo pang mas hanas mao nga sila malamposong nakapakigbahin ug nakadumala sa pagtukod sa tabernakulo ug sa ubang nalangkit nga mga buluhaton.—Exodo 31:1-11.

2. Unsang mga pangutana ang atong hisgotan maylabot sa paghimog tinun-an?

² Kasiglohan sa ulahi, gisugo ni Jesu-Kristo ang iyang mga sumusunod: “Panglakaw kamo ug paghimog mga tinun-an sa katawhan sa tanang kanasoran, . . . nga magatudlo kanila sa pagtuman sa tanang butang nga akong gisugo kaninyo.” (Mateo 28:19, 20) Wala pa gayod sukad mahatagi ang mga tawo ug ingon niini nga pribilehiyo. Unsang mga hiyasa ang gikinahanglan sa paghimog tinun-an? Sa unsang paagi atong maugmad kanang mga hiyasa?

Ipakita ang Lalom nga Gugma Alang sa Diyos

3. Unsay gihatag nga kahigayonan kanato tungod sa sugo sa paghimog tinun-an?

³ Kinahanglang aduna kitay lalom nga gugma alang kang Jehova aron makasangyaw sa mga tawo ug makakombinsir kanila sa pagsimba sa matuod nga Diyos. Gipamatud-an sa mga Israelinhon ang ilang gugma alang sa Diyos pinaagi sa bug-os-kasingkasing nga pagsugot sa iyang mga sugo, pagtanyag ug dalawatong mga halad, ug pagdayeg kaniya pinaagig mga awit. (Deuteronomio 10:12, 13; 30:19, 20; Salmo 21:13; 96:1, 2; 138:5) Ingong mga tighimog tinun-an, kita nagtuman usab sa mga balaod sa Diyos, ug kita nagpahayag usab sa atong gugma alang kang Jehova pinaagi sa pagpakigsulti sa uban bahin kaniya ug sa iyang mga katuyoan. Kinahanglang mosulti kita nga may kombiksiyon, nga pilion pag-ayo ang hustong mga pulong  sa pagpahayag sa atong kinasingkasing nga pagbati bahin sa atong hinatag-sa-Diyos nga paglaom.—1 Tesalonica 1:5; 1 Pedro 3:15.

4. Nganong nagmalipayon si Jesus sa dihang siya nagtudlo sa mga tawo bahin kang Jehova?

⁴ Tungod sa iyang lalom nga gugma alang kang Jehova, nagmalipayon gayod si Jesus sa pagpakigsulti sa uban bahin sa mga katuyoan sa Diyos, sa Gingharian, ug sa matuod nga pagsimba. (Lucas 8:1; Juan 4:23, 24, 31) Gani, si Jesus miingon: “Ang akong pagkaon mao ang pagbuhat sa kabubut-on niya nga nagpadala kanako ug ang paghuman sa iyang buluhaton.” (Juan 4:34) Kining giingon sa salmista mapadapat kang Jesus: “Sa pagbuhat sa imong kabubut-on, Oh Diyos ko, ako nagakalipay, ug ang imong balaod ania sa akong kahiladman nga mga bahin. Akong gipahayag ang maayong balita sa pagkamatarong diha sa dakong kongregasyon. Tan-awa! Ang akong mga ngabil wala ko pugngi. Oh Jehova, ikaw nahibalo pag-ayo niana.”—Salmo 40:8, 9; Hebreohanon 10:7-10.

5, 6. Unsa ang pangunang hiyas nga gikinahanglan sa mga tighimog tinun-an?

⁵ Kay gitukmod sa gugma alang sa Diyos, ang mga bag-ong nakakat-on sa kamatuoran sa Bibliya usahay mosulting masaligon kaayo bahin kang Jehova ug sa iyang Gingharian nga dali nilang makombinsir ang uban sa pagsusi sa Kasulatan. (Juan 1:41) Ang gugma alang sa Diyos mao ang pangunang hiyas nga magdasig kanato sa pagpakigbahin sa paghimog tinun-an. Busa atong palamboon ang maong gugma pinaagi sa regular nga pagbasa ug pagpamalandong sa iyang Pulong.—1 Timoteo 4:6, 15; Pinadayag 2:4.

⁶ Ang gugma alang kang Jehova nakatabang gayod kang Jesu-Kristo nga mahimong usa ka masibotong magtutudlo. Apan dili ra kana ang hinungdan nga siya epektibo kaayong magwawali sa Gingharian. Nan, unsa pa ang laing hiyas nga nakatabang kang Jesus aron mahimong malamposong tighimog tinun-an?

Ipakita ang Mahigugmaong Pagtagad sa mga Tawo

7, 8. Unsay panglantaw ni Jesus sa mga tawo?

⁷ Si Jesus matinagdanon ug nagpakitag dakong interes sa mga tawo. Bisan sa iyang una-tawhanong paglungtad ingong “batid nga magbubuhat” sa Diyos, nahinangop na siya sa mga butang may kalabotan sa mga tawo. (Proverbio 8:30, 31) Ingong usa ka tawo sa yuta, si Jesus may kahingawa sa mga tawo, nga nakapadasig niadtong miduol kaniya. (Mateo 11:28-30) Ang gugma ug kahingawa ni Jehova gipasundayag usab ni Jesus, ug kini nakadani sa mga tawo sa pagsimba sa bugtong matuod nga Diyos. Ang tanang matang sa mga tawo naminaw kang Jesus tungod kay siya nagpakitag mahigugmaong pagtagad kanila ug sa ilang mga kahimtang.—Lucas 7:36-50; 18:15-17; 19:1-10.

⁸ Sa nangutana ang usa ka tawo kon unsay kinahanglan niyang buhaton aron makabaton siyag kinabuhing walay kataposan, “si Jesus mitan-aw kaniya ug mibatig gugma alang kaniya.” (Marcos 10:17-21) Bahin sa pipila ka tawo nga gitudloan ni Jesus didto sa Betania, atong mabasa: “Gihigugma ni Jesus si Marta ug ang iyang igsoong babaye ug si Lazaro.” (Juan 11:1, 5) Matinagdanon kaayo si Jesus sa mga tawo nga dihay higayon nga wala na lang siya mopahulay aron iyang matudloan sila. (Marcos 6:30-34) Ang maong lalom ug mahigugmaong pagtagad sa isigkatawo maoy hinungdan nga si Jesus mas epektibo kay sa uban diha sa pagkabig sa mga tawo ngadto sa matuod nga pagsimba.

9. Unsay tinamdan ni Pablo ingong usa ka tighimog tinun-an?

⁹ Si apostol Pablo usab interesado gayod sa mga tawo nga iyang gisangyawan. Pananglitan, iyang giingnan kadtong nahimong mga Kristohanon sa Tesalonica: “Kay may malumong pagmahal kaninyo, kami nahimuot nga ipaambit kaninyo, dili lamang ang maayong balita sa Diyos, kondili usab ang among kaugalingong mga kalag, tungod kay kamo nahimo man nga among hinigugma.” Ingong resulta sa mahigugmaong mga paningkamot ni Pablo, ang pipila sa Tesalonica ‘miliso gikan sa ilang mga idolo aron magpaulipon sa buhi nga Diyos.’ (1 Tesalonica 1:9; 2:8) Kon kita tinuod nga interesado sa mga tawo sama kang Jesus ug Pablo, malipay usab kita sa dihang atong makita nga ang maayong balita nakaabot sa kasingkasing niadtong “hustong nakiling alang sa kinabuhing walay kataposan.”—Buhat 13:48.

Ipasundayag ang Nagasakripisyo-sa-Kaugalingon nga Espiritu

10, 11. Nganong gikinahanglan ang nagasakripisyo-sa-kaugalingon nga espiritu diha sa atong pagpaningkamot sa paghimog mga tinun-an?

¹⁰ Ang epektibong mga tighimog tinun-an adunay  nagasakripisyo-sa-kaugalingon nga espiritu. Wala gayod sila maghunahuna nga ang pagbatog bahandi hinungdanon kaayo. Gani, giingnan ni Jesus ang iyang mga tinun-an: “Pagkalisod gayod alang sa mga sapian ang pagsulod sa gingharian sa Diyos!” Natingala ang mga tinun-an sa pagkadungog nila niini, apan si Jesus miingon: “Mga anak, pagkalisod gayod ang pagsulod sa gingharian sa Diyos! Mas sayon pa sa usa ka kamelyo nga makalusot sa mata sa dagom kay sa usa ka tawong dato nga makasulod sa gingharian sa Diyos.” (Marcos 10:23-25) Gisugyot ni Jesus ang usa ka yanong paagi sa pagkinabuhi sa iyang mga sumusunod aron mahatagan nilag bug-os nga pagtagad ang paghimog mga tinun-an. (Mateo 6:22-24, 33) Nganong ang nagasakripisyo-sa-kaugalingon nga espiritu makatabang kanato sa paghimog mga tinun-an?

¹¹ Kinahanglan ang dakong paningkamot aron ikatudlo ang tanang butang nga gisugo ni Jesus. Ang usa ka Kristohanon nga gustong makahimog tinun-an kasagarang maningkamot nga ang usa ka tawong interesado madumalahan niyag pagtuon sa Bibliya kada semana. Aron mas daghan silag kahigayonan sa pagkaplag ug mga tawong interesado, giilisag partaym nga trabaho sa pipila ka magmamantala sa Gingharian ang ilang regular nga trabaho. Libolibong Kristohanon ang nagtuon ug laing pinulongan aron masangyawan ang langyawng mga tawo diha sa ilang dapit. Namalhin ang ubang mga magmamantala ngadto sa laing dapit o nasod aron mas bug-os pang makapakigbahin sa paghimog mga tinun-an. (Mateo 9:37, 38) Nagkinahanglan gayod kinig nagasakripisyo-sa-kaugalingon nga espiritu. Apan aduna pay dugang gikinahanglan aron mahimong usa ka epektibong tighimog tinun-an.

Magmapailobon Apan Ayaw Usiki ang Panahon

12, 13. Nganong hinungdanon kaayo ang pagpailob diha sa paghimog mga tinun-an?

¹² Ang pagkamapailobon maoy usa pa ka hiyas nga makatabang kanato sa paghimog mga tinun-an. Dinalian natong imantala ang Kristohanong mensahe, apan kinahanglan kitang mogugol ug dakong panahon ug magpailob sa atong paghimog mga tinun-an. (1 Corinto 7:29) Si Jesus wala gayod mawad-ig pailob kang Santiago nga iyang igsoon sa inahan. Bisan pag nahibalo gayod si Santiago bahin sa pagwali ug pagpanudlo ni Jesus, may nakapugong kaniya maong wala dayon siya mahimong tinun-an. (Juan 7:5) Apan sa mubong yugto tali sa pagkamatay ni Kristo ug sa Pentekostes 33 C.E., si Santiago dayag nga nahimong tinun-an, kay gipaila sa Kasulatan nga siya nakigtigom uban sa iyang inahan, mga igsoon, ug mga apostoles alang sa pag-ampo. (Buhat 1:13, 14) Kusog ang espirituwal nga pag-uswag ni Santiago nga sa ulahi naghupot na siyag dagkong mga responsabilidad diha sa Kristohanong kongregasyon.—Buhat 15:13; 1 Corinto 15:7.

¹³ Sama sa mga mag-uuma, ang mga Kristohanon nag-ugmad ug mga butang nga kasagarang hinay nga motubo—pagsabot sa Pulong sa Diyos, gugma alang kang Jehova, ug usa ka tinamdan nga sama kang Kristo. Nagkinahanglan kinig pailob. Misulat si Santiago: “Mga igsoon, magmapailobon hangtod sa presensiya sa Ginoo. Tan-awa! Ang mag-uuma nagpadayon sa paghulat sa bililhong abot sa yuta, nga nagpailob niini hangtod nga madawat niya ang sayong ulan ug ang ulahing ulan. Kamo usab kinahanglang magpailob; lig-ona ang inyong mga kasingkasing, tungod kay ang presensiya sa Ginoo haduol na.” (Santiago 5:7, 8) Giawhag ni Santiago ang iyang mga isigkamagtutuo nga “magmapailobon hangtod sa presensiya sa Ginoo.” Kon may butang nga wala masabti sa mga tinun-an, si Jesus mapailobong nagpatin-aw o nag-ilustrar niini. (Mateo 13:10-23; Lucas 19:11; 21:7; Buhat 1:6-8) Karon nga  ania na ang Ginoo, gikinahanglan usab ang pagkamapailobon samtang nanlimbasog kita sa paghimog mga tinun-an. Kadtong mahimong mga sumusunod ni Jesus sa atong adlaw kinahanglang tudloan nga mapailobon.—Juan 14:9.

14. Bisan pag kita mapailobon, sa unsang paagi maalamon natong magamit ang atong panahon ingong mga tighimog tinun-an?

¹⁴ Bisan pag kita mapailobon, ang pulong dili mobunga diha sa kadaghanang tawo nga atong gitun-an sa Bibliya. (Mateo 13:18-23) Busa, human sa igoigong paningkamot sa pagtabang kanila, maalamon nga ihunong ang pagdumalag pagtuon ug mangitag mga tawo nga lagmit mas mopabili sa kamatuoran sa Bibliya. (Ecclesiastes 3:1, 6) Gani, bisan ang mga tawo nga nagpabili sa kamatuoran sa Bibliya tingali nagkinahanglan ug tabang sulod sa taas nga panahon aron mausab ang ilang mga panghunahuna, tinamdan, ug mga prioridad sa kinabuhi. Busa kita magmapailobon, sama nga si Jesus nagpailob sa mga tinun-an nga wala dayon makaugmad ug hustong tinamdan.—Marcos 9:33-37; 10:35-45.

Ugmara ang Arte sa Pagpanudlo

15, 16. Nganong hinungdanon ang kayano ug maayong pagpangandam sa dihang magapanudlo kita aron makahimog mga tinun-an?

¹⁵ Ang gugma alang sa Diyos, pagkamatinagdanon sa mga tawo, nagasakripisyo-sa-kaugalingon nga espiritu, ug pagkamapailobon maoy hinungdanong mga hiyas alang sa malamposong paghimog tinun-an. Ang kahanas sa pagpanudlo kinahanglang maugmad usab aron makaarang kita sa pagsaysay sa mga butang sa tin-aw ug yano nga paagi. Pananglitan, epektibo kaayo ang daghang gipahayag sa Dakong Magtutudlo, si Jesu-Kristo, tungod kay kadto yano. Lagmit makahinumdom ka niining mga gipahayag ni Jesus: “Pagtigom kamo ug mga bahandi alang kaninyo sa langit.” “Ayaw ihatag sa mga iro ang butang balaan.” “Ang kaalam mapamatud-ang matarong pinaagi sa mga buhat niini.” “Ibayad ninyo kang Cesar ang mga butang ni Cesar, apan ang mga butang sa Diyos ngadto sa Diyos.” (Mateo 6:20; 7:6; 11:19; 22:21) Hinuon, dili mugbo kanunay ang gipahayag ni Jesus. Siya nagtudlo sa tin-aw nga paagi ug nagsaysay sa mga butang kon nahiangay. Sa unsang paagi makasundog ka sa estilo sa pagpanudlo ni Jesus?

¹⁶ Ang maayong pagpangandam hinungdanon gayod aron makahimo sa pagtudlo sa yano ug tin-aw nga paagi. Ang way-pangandam nga magmamantala lagmit mosultig daghan kaayo. Ang pangunang mga punto mahimong malubog na hinuon tungod sa pagsulti sa tanan nga iyang nahibaloan bahin sa usa ka ulohan. Sukwahi niana, ang nakapangandam pag-ayong magmamantala maghunahuna bahin sa tawo nga iyang gitudloan, mamalandong sa topiko, ug tin-awng magpahayag sa gikinahanglan lang nga impormasyon. (Proverbio 15:28; 1 Corinto 2:1, 2) Iyang tagdon kon unsa nay nahibaloan sa ginatun-an ug kon unsang mga puntoha ang angayng ipasiugda panahon sa pagtuon. Ang magmamantala tingali nahibalog daghang makaiikag nga mga detalye bahin sa ulohan, apan dili niya angayng iapil ang wala-kinahanglanang impormasyon aron kana mahimong tin-aw.

17. Sa unsang paagi makatabang kita sa mga tawo sa pagpangatarongan pinasukad sa Kasulatan?

¹⁷ Gitabangan usab ni Jesus ang mga tawo sa pagpangatarongan, imbes hatagan lang silag mga impormasyon. Pananglitan, sa usa ka higayon siya nangutana: “Unsay imong hunahuna, Simon? Gikan ba ni kinsa ang mga hari sa yuta magadawat sa mga bayad sa buhis o sa buhis por ulo? Gikan ba sa ilang mga anak o gikan sa mga estranyo?” (Mateo 17:25) Kita tingali ganahan kaayong mosaysay sa Bibliya nga kinahanglan natong pugngan ang atong kaugalingon aron ang ginatun-an makapahayag sa iyang opinyon o makakomento bahin sa inyong gitun-an. Siyempre, dili nato han-okan ug mga pangutana ang mga tawo. Hinunoa, pinaagi sa taktika, maayong mga ilustrasyon, ug undanong mga pangutana,  makatabang kita kanila sa pagsabot sa Kasulatanhong mga punto diha sa atong mga basahon nga gipasukad sa Bibliya.

18. Unsay nalakip sa pag-ugmad sa “arte sa pagpanudlo”?

¹⁸ Ang Kasulatan naghisgot bahin sa “arte sa pagpanudlo.” (2 Timoteo 4:2; Tito 1:9) Ang maong katakos sa pagpanudlo wala lang magpasabot sa pagtabang sa usa ka tawo aron makasag-ulog mga impormasyon. Paningkamotan gayod nato ang pagtabang sa ginatun-an sa Bibliya nga masabtan ang kalainan tali sa kamatuoran ug kabakakan, sa maayo ug daotan, sa kaalam ug kabuangan. (Mateo 6:5, 6) Samtang nagbuhat kita niini ug naningkamot sa pag-ugmad ug gugma alang kang Jehova diha sa kasingkasing sa usa ka tawo, mahimo niyang masabtan kon nganong siya angay magmasinugtanon Kaniya.

Magmasiboton sa Pagpakigbahin sa Paghimog Tinun-an

19. Sa unsang paagi makatabang ang tanang Kristohanon sa paghimog mga tinun-an?

¹⁹ Ang Kristohanong kongregasyon maoy usa ka organisasyon nga nagahimog mga tinun-an. Sa dihang ang usa ka tawo mahimo nang tinun-an, ang Saksi ni Jehova nga nakakaplag ug nakatabang kaniya sa pagkat-on sa mga pagtulon-an sa Bibliya dili mao ray malipay. Sa dihang ang mga tawo mag-organisar ug mga boluntaryo sa pagpangitag usa ka nawalang bata, usa ra gayod sa grupo ang makakaplag sa bata. Apan pagkahibalik na sa bata ngadto sa iyang mga ginikanan, malipay ang tanang miapil sa pagpangita. (Lucas 15:6, 7) Sa susamang paagi, ang tibuok kongregasyon nalangkit sa paghimog tinun-an. Makigbahin ang tanang Kristohanon sa pagpangitag mga tawo nga mahimong mga tinun-an ni Jesus. Ug kon mosugod nag tambong ang usa ka bag-ohan sa mga tigom sa Kingdom Hall, makatabang ang tanang nagtambong aron mouswag ang iyang pagpabili sa matuod nga pagsimba. (1 Corinto 14:24, 25) Busa, ang tanang Kristohanon malipay nga libolibo ang mahimong bag-ong mga tinun-an kada tuig.

20. Unsay angay mong buhaton kon buot nimong may matudloan ka bahin sa kamatuoran sa Bibliya?

²⁰ Daghang matinumanong mga Kristohanon ang malipay unta nga adunay ilang matudloan bahin kang Jehova ug sa matuod nga pagsimba. Apan bisan pa sa ilang dakong paningkamot, wala silay nakaplagan nga ilang matudloan. Kon kanay imong kahimtang, padayong palig-ona ang imong gugma alang kang Jehova, magmatinagdanon sa mga tawo, magsakripisyo sa kaugalingon, magmapailobon, ug maningkamot sa pagpauswag sa imong kahanas sa pagpanudlo. Labaw sa tanan, iampo kang Jehova ang imong tinguha nga may matudloan ka bahin sa kamatuoran. (Ecclesiastes 11:1) Magkalipay tungod kay nahibalo ka nga ang tanan nimong ginabuhat sa pag-alagad kang Jehova makatabang gayod sa paghimog mga tinun-an nga nagahimaya sa Diyos.

Makapatin-aw Ka Ba?

• Nganong masulayan ang atong gugma alang sa Diyos pinaagi sa paghimog tinun-an?

• Unsang mga hiyas ang gikinahanglan sa mga tighimog tinun-an?

• Unsay nalangkit sa “arte sa pagpanudlo”?

[Mga Pangutana sa Pagtuon]

[Hulagway sa panid 21]

Gipasundayag sa mga Kristohanon ang ilang lalom nga gugma alang sa Diyos pinaagi sa paghimog mga tinun-an

[Hulagway sa panid 23]

Nganong kinahanglang magmainteresado sa uban ang mga tighimog tinun-an?

[Hulagway sa panid 24]

Unsa ang pipila ka hiyas nga gikinahanglan sa mga tighimog tinun-an?

[Hulagway sa panid 25]

Malipay ang tanang Kristohanon sa pagkakita sa maayong mga resulta sa paghimog tinun-an